主頁 高登熱話 吃喝玩樂 科技消費 名人專訪 短片
現有會員可[按此]登入。未成為會員可[按此]註冊。
[公司模式 - 關]  [懷舊模式 - 開
[Youtube 預覽 - 關]  [大字型]  [小字型]

您現在聚腳在 學術台內。

有關整合forum 1~15事宜

高登討論區定於下星期三(14/6)將forum1~15整合為http://forum.hkgolden.com,屆時有部分未獲授權的第三方app與瀏覽器plugin或會受到影響。不便之處,敬請原諒。
精選文章
跳至第

發起人
【常公子近代史】大清亡國關慈禧蛋牛治
392 個回應
極端的年代

我常威死咗後,響母體遇上難滾死於花柳病嘅同治帝載淳,佢叫我寫篇嘢幫佢老母伸冤,皇帝叫到,照做囉。

佢老母係慈禧太后。

好多人都將大清亡國瀨落佢親生老母慈禧身上,話佢把持大清帝國最後五十年政權,7事做盡,令成個國家被西方列強瓜分,直頭係民族罪人,到底真相係唔係咁呢?

同治叫同治,因為一場辛酉政變,1861年咸豐帝病死熱河,慈禧夥同慈安太后扳倒八位顧命大臣奪權成功,六歲幼子載淳繼位,兩個女人響背後操縱朝政,垂簾聽政,共同統治大清,故稱「同治」,慈禧知書識禮,得勢時年僅24歲,從此大清國運就同依個年輕女人連結埋一齊。

慈禧得到嘅權力可同唐朝武則天相題並論,但係武則天接手嘅係中國歷史上數一數二嘅大唐盛世(一部法拉利);比較下,慈禧接手嘅只係一部單車,仲要係(一部共享單車)。

1861年嘅大清帝國已經係五癆七傷,外乾內乾,得番半條人命。事實上真正為清國送上棺材嘅係大英帝國,1840年第一次鴉片戰爭,講咗比全世界知清國嘅軍事實力係停留響十八世紀,滯後於世界大約一百年,幾隻戰艦幾千名次級遠征僱傭兵,就可如入無人之境予取予攜,割地賠款(香港島,九龍半島界限街以南),乜都肯滯白痴仔咁,你估其他國家會點諗?

二十年後,1860年第二次鴉片戰爭爆發,英法聯軍又入嚟大清洗劫一次,仲打到去北京火燒圓明園,姦淫擄掠無所不為,咸豐帝走佬避走熱河,衰到亡国咁滯。同一時間,1850開始國內爆發civil war,洪秀全揸住上帝之子旗號,太平天國佔領半壁江山,立都南京(天京),清國堅守先打自己人再打外國人原則,集結所有兵力,1860年前後建立江南大營同江北大營,企圖阻止太平天國繼續北上……

外憂內患,慈禧接手政權後,面對嘅就係一個咁嘅死局,十三張手揸兩個碌,點好呢?

関於為慈禧平反,下次繼續……

[img]https://upload.cc/i2/hKx1dn.png[/img]


#good2#21    #bad#11  
標籤:
【考証】為花柳治替慈禧平反(一)

今日繼續同同治老母慈禧平反。1861年接手大清政局嘅慈禧面對內憂外患,未講外患,先談內憂。蔣介石1931年講過「抗日必先勦匪,攘外必先安內」,中國人最叻打自己人維穩,當年嘅大清亦唔例外,英法聯軍任由佢殺燒搶掠縱橫九洲,全部滿清軍力則集中成一碌,對抗太平天國。

太平天國自1850年十二月初六於廣西金田村起事,1853年攻克南京改稱天京,但中國人就係唔鬥唔X舒服,1856年天王洪秀全與東王楊秀清反目,一場「天京事變」令太平天國急轉直下,自相殘殺之餘,強將四散,大清逐將所有可以動用嘅兵力集結於江南江北兩個大營,圍剿天京,剿匪有望之際,洪秀全阿哥耶穌仲照住佢,1859年洪秀全老表正宗Hongkonger洪仁玕抵達天京,為太平天國注入殖民地新思維,響「朝中無將,國中無人」絕境下,洪秀全被逼起用陳玉成(英王)同李秀成(忠王)兩個廿歲左右嘅年輕農民將領壓陣。

世事就係咁奇怪,陳玉成(綽號四眼狗,傳説中華第一美男)及李秀成(此人更加不得了,我哋目前所知嘅太平天國史料,就係來自佢被擄後獄中所寫下嘅第一手資料「天朝十誤」)依兩位後生仔原來係軍事天才,佢哋用農民靈活嘅游擊戰略打到清兵一楝都冇,先後大破江南同江北大營,五六十萬清兵主力土崩瓦解,徹底粉碎大清軍事力量!

大清至此,其實已經玩卵完,此後同太平天國嘅戰爭,只能倚靠民間團練曾國藩嘅湘軍同李鴻章嘅淮軍,一個政府要靠地區財閥嘅私人軍隊平亂,後果可想而知,從此以後,權力正式由北方嘅滿清貴族手裡轉移到南方士大夫手上,慈禧得到依架大清爛單車亦變成一架共享單車,就係咁解。

太平天國嘅土炮農民革命最後雖然失敗收場,但佢哋嘅革命經驗影響深遠,七十年後嘅另一場由中国共産党領導嘅農民革命,最終就取得偉大光榮勝利,為中国開展一個新時代一個新世界。

1861年,24歲嘅慈禧面對嘅國內環境已經咁惡劣,至於國外,就更加係唔得笑,下次繼續同佢平反。

#bye# #bye# #bye#

[img]https://upload.cc/i2/adSYE2.png[/img]


【考証】為花柳治替慈禧平反(二)

繼續講慈禧接手嗰部爛單車

鴉片,的確係大清嘅棺材釘。中国人吸食鴉片煙,始於康熙年間,百多年過去,愈演愈烈,食鴉片煙最初被視為上流社會嘅潮流玩意,由上而下,於是成街老同道友,問你死未?最慘嘅係鴉片係入口貨,而且由英國商人一手包辦,踏入19世紀,鴉片貿易造成巨大貿易逆差,白銀不斷流入東印度公司,即大英帝國溫莎皇室荷包之內。

1781-1790年間,流入大清嘅白銀達1640萬兩,到咗四十年後1831-1833年間,將近有1000萬兩白銀流出大清,比較兩組數字你就知道大清財政有幾很大鑊,加上官僚管治能力日趨衰弱,貪污已經係常識,稅收未到中央政府已經被人攞走八九成,死得啦,咸豐年間,國內銀根短缺,引發惡性通貨膨脹,民變四起(太平天國只係其中最大鑊個次),鴉片禍國,禁煙囉。啱嘞,#QueenVictoria 等咗你好耐,1840年第一次鴉片戰爭大英帝將大清隻紙老虎撤底地撕破,情況一如當日美帝進攻伊拉克巴格達,又話史上最強陸地堡壘世上第三坦克部隊又乜又物,結果美帝只用咗三日唔夠就攻陷巴格達,侯賽因捐狗窿走佬。割地賠款又幾盞鬼喎,但大清班7頭繼續不思進取,1860年第二次鴉片戰爭,英法聯軍如入無人之境,直殺入北京,殺燒搶掠無所不為,火燒圓明院,嚇到咸豐標屎,連夜離開北京到熱河避難!(清代有三個皇帝試過走佬,第一個係因為天理教之亂嘅嘉慶;第二位係咸豐,第三個係1899年八國聯軍攻入北京嘅光緒)留低細佬恭親王亦訢響北京同英法議和,和條毛咩?又割地賠款囉,仲未夠,趁住北京大亂,俄國沙皇仲無厘頭吞拚咗大清烏蘇里江以東嘅大片土地,慘?慘到貼地啦。

外有西方列強予取予攜,內有耶穌細佬洪秀全太平天國,咸豐幾個月後就監生激死咗(其實唔死又有咩用吖佢?),慈禧接手大清政權,但依個時候嘅大清,軍事力量接近係零,國庫亦被英法聯軍掠奪一空,正所謂人又冇錢又冇,基本上係獻世嘅一個阿源。

但係,慈禧居然有辦法將依個肺Can三期病人續多48年陽壽,剩係咁,已經要為佢繼續平反落去……

最後奉上秋官名曲【火燒圓明園】作結:

https://youtu.be/Vw3k24Vir3A

#bye# #bye# #bye#

[img]https://upload.cc/i2/I67Xkm.png[/img]


大學做功課定咩?


邊有大學水平?小學雞嘢:o) :o) :o)


因為喺講故台已經連載咗一段時間
而家貼埋響學術台……
#cn# #cn# #cn# #cn# #cn# #cn# #cn#


lm


【常威考証】為花柳治替慈禧平反(三)


1861年,英法聯軍大肆搶掠,再逼北京答應增開通商口岸、開放長江、外判海關同外國公使駐京等條款後撤走,大清已經係一間市值仙股嘅空殼公司,冇兵又冇錢(個殼仲值錢嘅),仲俾洋人踩到上心口。毛主席講過「槍桿子出政權」,冇槍在手只能食屎。事實上最終能夠平定太平天國之亂,主要係靠民間團練曾國藩嘅湘軍同李鴻章嘅淮軍,曾(湖南人)、李(安徽人)、左中棠(湖南人、楚軍)等一批來自南方嘅漢族官員,立下大功保住大清江山,自己亦逐漸掌握地方大權,事實上中央政府已經冇能力控制佢哋,反過來係佢哋唔駛再聽中央政府枝笛。自此以後大清嘅權力核心已由北方轉移至南方、由滿洲人轉移至漢族人手上,之後半個世紀,由慈禧主理嘅北京滿清貴族中央政府實際權力有幾多?我唔知,但一定冇你想像咁多囉。


有燈就有人,有兵就有權,滿清中央政府軍隊瓦解(八旗滿蒙系統)後,民兵私人軍隊制度冒起,奠定咗後來民國軍紳政權嘅基石(袁世凱、北洋軍閥系統),從十九世紀晚期開始,地方軍隊再不一定效忠中央政府,中央政府對地方軍隊亦無絕對嘅領導權力。曾國藩同李鴻章之流,響1860年前後,絕對有能力自己插旗割地稱皇,或者推翻大清亦有可能,正史亦有記載淪為階下囚嘅忠王李秀成曾經煽動曾國藩叛變大清,但曾國藩並冇咁做,曾李依亭漢族官員明顯係100%愛國人仕,亦係儒家哲學嘅忠實發燒友,佢哋重名節大於權力,鍾意比人讚比皇帝讚,太平天國之亂結束後,佢哋選擇解散自已話事嘅私人軍隊,繼續效忠大清做其門口狗就係最佳例子。


順帶一提,平定太平天國同英法軍隊都有直接關係,當中有不少重要戰役係由英法軍隊參予而得到勝利,當初英法對天平天國採取中立態度,但後來佢哋發現保住大清依個垃圾政權仲有著數,於是決定幫大清平亂,而且曾李等人經營私人軍隊嘅錢,除咗向土豪劣紳募捐(勒索)得來之外,亦有部份係向外國銀行借貸,由此可見,外國勢力響當時已經係無孔不入干涉緊中國嘅內政。


風高浪急下,慈禧以24歲妙齡執政,首先令曾國藩李鴻章杯酒釋兵權,繼續為大清依間空殼公司賣命,足見手段之高明。


大清股價跌到落一仙停牌咁滯,究竟點樣重組架構令股價反彈?下次繼續……


[img]https://upload.cc/i2/IBfAEd.png[/img]


【常威考証】為花柳治替慈禧平反(四)

要仙股股價反彈,要注入新元素,1860年後大清經歷英法聯軍同太平天国蹂躪再蹂躪後,明白”到再唔變就死路一條(好似宜家香港咁),於是一場刻意學習西方技術嘅「洋(腸)務運動」正式展開。

由曾國藩李鴻章牽頭纜,大力引進西方工業,最初建立軍事工業,興建阿仙奴兵工廠,訓練新式海軍同陸軍,培養洋務人才,之後逐漸擴展到開辦礦業、電報、鐵路、輸船、機械及紡織等先進工業,實行食洋腸救大清。除此以外,亦興辦新式學校,派人出外留學,翻譯外文書藉,就好似九十年代嘅港男咁,非常認真地救國!

依個時候,大清政權話事人係三頭馬車,分別係西太后慈禧,東太后慈安同恭親王奕訢,同治皇帝只係一個毛都未出齊嘅細路仔,有理由相信從1860至1875期間,大清揸Fit人其實係咸豐細佬奕訢。慈安同慈禧只係兩個廿幾歲、稍為識字、且從未有政治經驗嘅深宮女人,好難相信佢哋可以管治整個當時人口接近三億、版圖全世界第三大嘅大清帝國,佢哋嘅存在,就好似兩個皇親國戚神主牌咁,擺響公司高層鎮壓全場,用就冇乜,唔攪事唔瀨嘢唔多嗲已屬萬幸。

剩係慈禧執政初期乖乖哋唔攪事已經要讚要平反啦,你睇,新一任特首林鄭月娥咪唔攪事囉,堅守公務員七字心訣「多做多錯,唔做唔錯」,做小啲,講小句,理小瓣,專心打工,專注擦老細鞋,民望咪高囉,有時候,無為勝有為就係咁解喎。

同治年間因為洋腸運動,成個大清好似有番小小生氣咁,其實只係之前太衰太折墮** ,所以大家覺得好咗,太平天国之亂,有統計話死咗成二千萬中國人,寧做太平犬,不作亂世民,一般市民冇仗打就好咯,其實冇乜太多要求。依段時間大清冇咁動盪,歷史上叫「同治中興」。

「同治中興」其實唔関同治事,當時佢仍未親政,只係出齊了毛,晚晚離開紫禁城微服叫雞。1873年有一晚,花柳治佢去到鳳來樓揾名妓如煙,就遇到包龍星告御狀。

下一次,我常威會用經濟角度分析下「同治中興」!see you!

[img]https://upload.cc/i2/AiNzHa.png[/img]


#yup# #yup# 請解除負評


:o) :o) :o)


【常威考証】為花柳治替慈禧平反(五)

繼續停留響1860年,窮是禍根,一般相信大清當時之窮,係同「鴉片貿易」掛鉤,鴉片製造嘅貿易逆差,令大清白銀大量流出,當時市民向政府繳稅要用白銀交易,民間一般使用銅錢,白銀短缺,造成水脹船高,產生惡性通脹,民不聊生。

但另有一個見解係,當時大清土地稅收嘅徵斂能力非常薄弱,大清財源響十九世紀中葉之前,大部份由向土地使用者(地主,自耕農)徵稅得來,但要從民間徵稅到中央庫房,官吏對民間嘅控制能力一定要強,但滿清官僚系統經過百多年嘅腐敗同膨脹,已經到達慘不忍睹同失控嘅地步,稅項收唔收到手係一個問題,收到手之後你偷幾多我偷幾多又係另一個問題,舊錢貪污要分比幾多個勢力又係再一個問題,瞞上欺下、上下其手,七除八扣下,響一個資訊不發達、科技極度落後、賬目概念混亂嘅封建舊世界裡面,你可以想像最後中央收到嘅稅款會有幾多?但中央政府要出糧(俸祿)比全國官吏,打仗需要軍費,紫禁城裡滿清皇族要錢享樂揮霍,咁,錢從何來?

簡單一句,係稅源嚴重不足,「同治中興」更具體嘅內容係揾到新嘅水喉,水源係「關稅」,大清響打咗幾次敗仗後,尤其係火燒圓明院之後,終於要全面開放對外貿易,同整個世界嘅資本主義市場接軌,同時,大清亦響洋腸身上學嘵咗徵收商業關稅嘅概念同技術,貨品出入口,經過海關徵收關稅,天經地義,奈何響赫德先生出現之前,成個中国冇人做依件事做得好,「中國海關」之前只係對外開放貿易口岸官員同買辨階層用嚟貪污舞弊嘅借口,北京中央政府完全冇錢落袋。天朝當時貴為全球三份一人口聚居之地,中央政府蠢成咁,真係羞恥。

赫德(Robert Hart,1835-1911,字鷺賓),北愛爾蘭人,與慈禧同年。1854年嚟到中國撈翻譯,1863年以一個28歲英國人身份受聘於大清政府成為「海關總稅務司」,大清海關最高負責人,官階二品,英國洋人Robert明顯係一個天才,接手大清海關短短幾年間,竟然將舊屎變成世上最廉潔(注意:係「廉」字,唔係「窮」字)同最有效率嘅海關機構!洋人就係強!你吹得佢脹麼?同治中期,大清嘅稅收總收入竟然超過之前康雍乾三朝盛世,到達史無前例高峰。財政恢復穩定,大清元氣先漸漸回復返嚟,之後Robert掌管大清海關逾四十年,直至退休,告老歸田,返英才辭世。Robert一生以清廉見稱,歷史對佢評價甚高,佢嘅故事,令我想起70年代管治香港嘅麥理浩爵士(Crawford Murray MacLehose,1917-2000)。

兩袖清風?中国人似乎從來都唔知係乜嘢嚟?吓?食風呀?

慈禧起用Robert掌管中國海關,而且同佢建立咗40幾年良好嘅僱傭關係,剩係依件事,你可以話慈禧係一個冇見地冇內涵冇遠見嘅大媽嗎?答案,唔該自己諗。

下次,我哋再將眼光拉闊啲,睇吓同治年間成個世界發生緊咩樹?

[img]https://upload.cc/i2/qwCls2.png[/img]


【常威考証】為花柳治替慈禧平反(六)

初初得到最高權力嘅西太后慈禧,正身處於一個急劇變化中嘅世界,佢自己並唔知道。相信佢同其他大清皇帝一樣,以為自己係世界中心。我常威死咗後,浪盪於無邊無際嘅母體之中,我反而睇得更清楚,今集拉闊眼界,睇吓1860年左右中國以外嘅世界局勢。

十八世紀末葉有兩件事改變咗成個世界,第一件係大英帝國嘅工業革命,工業革命徹底改變咗人類嘅生產方式同生活方式,將地球人由農業社會帶入工業社會,資本主義新玩法取代一切舊事物,金權取代皇權,世界進入全新格局;第二件係法國大革命,皇帝貴族階級被平民推翻,自由、平等、博愛等現代政治必備概念同普世價值(Sor,不適用於中国国情)出現,政治全新玩法,舊世界過去,新世界來臨,人類邁步進入十九世紀翻天覆地嘅文明時代……

十九世紀歐洲(英法)先係世界中心,大清唔係。歐洲雙元革命發生後,法蘭西仲出咗個拿破崙,依位五尺三吋不足、小肥同嗰樣有小小「嘟」嘅科西嘉人,炮兵出身,最後橫掃歐洲大陸。佢嘅貢獻,第一,戰爭打仗依回事,由佢大革新,因為拿破崙,整個世界軍事思想同技術向前行咗一大步;第二,佢頒佈嘅「拿破崙法典」奠定咗近代西方世界嘅法治基礎同基本嘅道德模態(婦女單方面可以離婚都係拜拿破崙所賜)。

(**帶開一筆,拿破崙先生曾經講過中國只係一隻訓著咗嘅獅子,佢明顯係中國人嘅朋友或收過嘉慶錢。)

人哋歐洲翻緊天覆緊地嘅時候,大清做緊乜?

踏入十九世紀嘅清帝國,依然鎖國,對外界事物不聞不問,以為自己仍然係全宇宙最叻最惡嗰個,仍然係一個君君臣臣、父父子子嘅中央集權宗法社會。真相係十全老人乾隆加埋和坤駛曬大清康雍乾三代盛世嘅積蓄,國家愈來愈窮同時,人口急劇膨脹,四處有作反暴亂,踏入十九世紀時,天理教之亂,暴民打到入北京,嘉慶帝著草離開紫禁城。中原人口自明末大約一億五千萬,到嘉慶年間翻咗一翻到三億。康雍乾太平盛世150年,戰亂減小、國泰民安係人口急昇嘅理由之一。另一個理由係番薯!冇錯係番薯!依一種容易栽種、極度粗生兼含有高澱粉熱量嘅農作物自十七世紀從歐洲(蕃邦)傳入中國,餵飽咗唔少人,直接令中国人口暴脹!(關於番薯依個冷門小小嘅論點,大家可以自行查核吓)

妖!寫到離曬題添,下次要兜返去同治老母度先得。

#常威 #慈禧太后 #晚清歷史 #工業革命 #法國大革命#拿破崙 #食洋腸救大清

[img]https://upload.cc/i2/esJ0kD.png[/img]


#yup# #yup# #yup#


【常威考証】為花柳治替慈禧平反(七)

向1860進發……

響工業革命同資本主義帶動下,歐洲經濟高速發展,大量工業產品出現,需要向全世界傾銷獲利,產品需要市場同時,亦需要原材料供應地同廉價勞工,導致嘅後果係,歐洲諸國傾力將勢力拓展到全世界,爭先撂奪地盤,海上霸權時代開始。

英國人當時以其最強海軍力量同最先進航海技術先飲頭談湯,響世界各地佔領重要戰略位置橋頭堡,紛紛建立殖民地政權,1837年維多利亞一世女皇登基,大不列顛帝國步上最輝煌年代,成為當時世界上第一號霸主!不落日帝國誕生!

中国同現在香港一樣,嚴重滯後於國際大形勢,問題係,典解大清嘅資本主義冇辦法發展起來?貨品唔得?其實唔係,單單絲綢同茶葉兩樣產品已經夠通殺全世界,尤其係茶葉,茶葉當時只有中國製造,但成個歐洲美洲人人都鍾意飲中國茶,十八世紀末,英國從中國進口茶葉,每年單單係英國政府向商人抽取嘅茶葉入口稅已達300英磅,相等於皇家海軍半年軍費。如果大清政底識玩遊戲,唔係單單響廣洲賣茶葉比外國商人轉售,直接同歐洲諸國建立資本主義式嘅貿易渠道,建立關稅制度,大清單單靠茶葉貿易已經發咗好耐。

大清不但不重「商」,而且仲嚴重眨低「商人」依種職業。情況一如幾個世紀之前嘅歐洲,基督教勢力禁止基督徒做兌換貨幣借貸嘅生意(銀行業務),上帝認為係貪婪同不潔嘅行為,結果猶太人獨攬銀行生意,最後到咗十八九世紀,全世界最有錢嘅人都係猶太人(到咗今日都係呀陰公)。大清以外族身份推翻明朝,滿蒙八旗子弟以統治者自居,為咗塑造滿蒙貴族統治階層高高在上嘅尊貴型象,大清政府規定滿蒙人仕不得務農,不得從商!吓?唔俾人耕田又唔俾人做生意,咁做乜?只能做官或做大地主收地租食鴉片享受人生囉。依個極其愚蠢嘅豬兜政策,令大清最有錢嘅一群人從來冇辨法由大地主變成資本家,於是大清嘅資本主義亦從未有起過步,蠢到咁,冇人幫到你啦!

十九世紀初大清人口約有三億,滿蒙貴族人口佔其中1000份之3,即係話,成個國家有大概100萬依種大地主寄生蟲,無所事事,坐食山崩靠地租靠農奴過活,政策冇辦法釋放佢哋手中嘅龐大資本投入商業市場,大概係大清衰亡嘅重要理由之一。

歷史係一面鏡,可以睇到自己有幾咁醜陋,今日嘅香港亦係,各大地主只顧繼續起樓賣樓炒樓玩地產霸權,唔投資高科技工業,21世紀香港科技滯後於世界,其實又係自己攞嚟衰。

只去到1837,仲未返到1860……大時代風起雲湧,仲有一個巨人要響中間登場。

佢叫Karl Marx,卡爾·馬克思!下次繼續。

#bye# #bye# #bye# #bye#

[img]https://upload.cc/i2/4jlVOP.png[/img]


【常威考証】為花柳治替慈禧平反(八)

我常公子上次話要講馬克思,但唔地府少老友叫我hold住先,費時愈來愈離罩,我順從民意唔提佢住,只講半句,馬生嘅重要性在於佢提供咗人類社會運作嘅另一條路比大家揀,而整個二十世紀嘅世界格局亦由此形成,到咗今日,炒到慶烚烚北韓問題、中美關係、美俄關係全部都關馬克思事……

去返【資本論】出版嘅1860年,自1840第一次鴉片戰爭開始,西方列強要求大清繼續「開放改革」,但大清睬你都有味,仍玩自己嗰套,並冇積極履行同洋人簽訂嘅各項條款同外交協定,又繼續放縱抽釐金制度(唔係正式海關關稅,只係各地官員私自設定關卡向商人索取過路錢),洋人見冇計透過談判取消釐金制,即生意冇辦法做大,於是打住「懲罰大清依個野蠻落後國家」嘅旗號,組成英法遠征大軍直攻入大清心臟,其時大清面對強權來犯,竟然採取「不戰不和不守,不死不降不走」嘅「古之所無,今亦罕有」態度應對,你話死唔死?咸豐著草、火燒圓明園,最後又係割地賠款瀨到應一應……

我常公子當時係個細路仔,經常有個疑問,其實英法聯軍佔領北京,點解唔乾脆吞拚成個冇錢又冇兵嘅中國,將中國變成一如印度嘅殖民地統治?(佢哋當時完全有能力咁做喎)打完就走不特止,反而仲幫大清平定太平天國之亂,由此可見,西方列強嘅著眼點的確係「市場」同「貿易」,洋人最緊要有生意做,其他嘢唔好諗咁多。

幫大清打洪秀全,穩定局面,亦有一種說法如下:

1860年,世界上百份之二十嘅貨品由英國制造,雄霸全球嘅大英帝國,靠嘅係一個全球性貿易網,當中最重要就係紡織業,而提供紡織業原材料棉花嘅地方,就係美國。(吓?又關Trump事?係呀!)現在,我哋睇下英國佬點玩個Game,以下嘅描述有啲難度,大家可以細味英國人當時嘅精湛財技。

首先英國人用匯票向美國購入綿花,美國人將英國匯票兌換後去中國購買茶葉,並開出自己嘅匯票付款,中國人將美國匯票兌換後去購買英國人嘅鴉片,英國人將售賣鴉片之所得,向中國購買茶葉運回歐洲銷售,所值遠遠超過本來用作購買美國綿花所開出嘅匯票……唔明?唔緊要,簡單講,綿花美國生產,茶葉中國生產,英國人作為中間人左右逢源,空手入白仞,反而係賺得最多嗰個囉……

1861年慈禧上陣,英軍仍響大清境內活動,大清同太平天國進入最後決戰階段,同一時間,美國嘅Civil War亦正式開打(唔係iron mam打美國隊長嗰次),南北戰爭!大英帝國兩個揾食對象,中國同美國,同時發生內戰!

即係話,英國正面對綿花同茶葉嘅供應短缺,冇綿花同茶葉,英國就算齋食鴉片都會死……明天繼續!

[img]https://upload.cc/i2/7MyAwl.png[/img]


#yup# #yup# #yup# #yup#


【常威考証】為花柳治替慈禧平反(九)

繼續停留在19世紀60年代,英國人一向非常聰明(到今日亦係),亦係全世界最精明嘅投注者,中國同美國一齊發生內戰,英國只選擇幫大清打太平天國,而響美國南北戰爭中則堅持中立角色。

太平天國起事初期,英國同歐洲諸國都係中立狀態,加上洪秀全用耶穌哥掛頭牌,洋人甚至like佢多啲啲,但當天國佔領長江中下游蘇杭一帶江南最富裕、亦係盛產茶葉之地後,由於戰亂頻繁,茶葉生產大幅下降,而茶葉失收,就會攞英國人命!上文已經提及過嗰條大英帝國全球貿易期貨交易鏈,美國棉花同中國茶葉根本係大英帝國身體運行嘅血液。

自十八世紀後,英國人酷愛飲中國茶,茶葉成為咗英國人生活必需品(中國人咁都攞唔到英國人著數,真係低能),英國政府向商人徵收100%茶葉進口稅,成為稅收主力。所以穩定中國茶葉出口對英國非常重要,條數好簡單,冇錢買美國棉花,紡織廠就會停產,工廠Stop la,失業率就會上昇,就會有更多人信馬克思,信馬克思人多咗,個社會就會亂,就會有革命。冇錢俾皇家海軍開銷,戰艦就要停駛,軍隊冇錢維穩,咁整個橫跨世界嘅大英帝國就會癱瘓!原來中國冇茶葉出口,大英帝國就會Stop la?係呀!剩係大清自己唔知喳嘛……

至於干預美國內戰有乜好處先?無論傑佛遜嘅南軍贏定林肯嘅北軍贏,美國人都係要賣棉花嘅,棉花由黑奴種定白人種,我諗英國人冇乜所謂。1861-1864年英國大力幫助大清平定太平天國,一方面係要儘快結束中國內戰,穩定番茶葉出口,另一方面要繼續維持白痴政權大清統治中國,咁就可以一直呃儍仔呃落去,繼續向大清身上發大財,一箭雙鵰一石二鳥,當時嘅英國人就係聰明絕頂!(抑或係中國人太蠢太傻的嗎?)

好嘞,話題始終可以返番慈禧度,1862年11月申酉政變後,恭親王奕訢拒絕當攝政王,只掌管軍機處(大清內閣),同治八歲仔,東西太后垂簾聽政,慈禧開始掌權,曾國藩李鴻章嘅洋務運動開始。而歐洲列強自己國內都鬼死咁多嘢攪(1861年普法戰爭開打,日耳曼民族掘起),自顧不暇,暫時冇乜時間再攪中國,英國人攞曬著數同時,亦幫大清繼續四個現代化,大清終於可以喘番條氣,關稅稅收增加,國內環境稍為好轉,同治中興降臨大地。

當時慈禧二十六七歲,老公死咗幾年,下次滿足小數人希望,講慈禧秘密生活……(冇甜)


[bouncer] [bouncer] [bouncer]

[img]https://upload.cc/i2/cifPvu.png[/img]


【常威考証】為花柳治替慈禧平反(十)

好多野史都有記載慈禧有一個情人叫安德尊,Sor!係安德海,安德海係咸豐皇帝嘅近身太監,細慈禧八歲,因為響辛酉政變時候做二五仔,將遺詔密報慈禧太后立咗大功,慈禧就昇咗佢做太監總管,十七八歲就統領成個紫禁城所有太監,少年得志(語無倫次)。

從此,佢同慈禧形影不離,雖然正史無記載佢哋有冇私情,但好多証據都顯示慈禧對佢嘅感情超越咗主僕關係。其時同治中興緊,慈禧自覺走在當時時代嘅尖端,洋務運動如火如荼,大清仲派人去歐洲美國考察睇吓洋人典解咁威,三十歲前嘅慈禧似乎真係想擺脫舊世界嘅束縛,1869年,佢做錯咗一件事,害死咗安德尊。

1869年同治十三歲,毛都未出齊時,根據祖訓,就要籌備大婚,春天,全國選秀(獸)會開始,各省佳麗爭相入宮服侍皇帝,位於蘇州嘅皇家織造廠亦開始預備大婚禮服同婚紗,依個時候慈安派安德尊前去「採辦龍袍」,依個行為其實多舊魚,野史話慈禧只係想揾個借口比安德尊出宮玩吓,放鬆吓,雖知大清規定太監不可私自出宮,除非係做非常重要嘅任務。

七月,安德海於是攜同家人(佢仲有老婆添)同幾個太監friend一齊出發,沿途招搖過市,毫不低調,仲有樂隊歌女助慶,當正自己真係TVB大明星安德尊,好多市民都未見過太監,紛紛上前圍觀。不過依個行為,震動咗中央守舊派官員嘅神經。佢哋紛紛上疏投訴安總管,山東巡撫丁寶楨以順治帝祖訓「宦豎非經差遣,不許擅出皇城」為名,命泰安縣知縣何毓福將安德尊逮捕,派人向慈安太后請示,要求處理安德尊生死。

慈禧當然唔想殺安德尊,但守舊派群臣壓力下,輿論一面倒,佢亦冇能為力,而且如果佢替安德尊強出頭,分分鐘會自己火燒後欄,最後由慈安太后下諭旨,處死安德尊。安德尊被斬首,其他六個太監七個隨從亦被處死,安先生家人流放黑龍江為奴。傳說安德尊死後仲要曝屍三日俾人欣賞屍體,証明佢係冇J。

件事發生咗,下一次我常公子再深入探討一下依單嘢……

xx( xx( xx(

[img]https://upload.cc/i2/r2WcX5.png[/img]


【常威考証】為花柳治替慈禧平反(十一)

空穴來風,並非無因,安德海之死,一般認為冇咁簡單。

事實上慈禧同大王有嘢,宮中應該一早有人吹風,1869年年初,翁同龢(同治光緒老師,國子監祭酒,即國立大學校長,全國儒家知識分子領袖)就曾上書講慈禧「近年以來,精勤之意稍遜於前」,話慈禧「沉緬逸樂」,矛頭似乎直指豆斗同大王安德海單嘢。

其後大王於山東斷正,翁同龢同一衆大臣堅決要即時處死大王,就地正法,當時宮中,就算慈安太后出面求情都冇用,由此可見,單嘢背後的確存在另一場政治鬥爭,翁同龢幕後大老細係醇親王奕譞(咸豐另一個細佬),奕譞屬於保守派仇夷派,痛恨洋腸,而慈禧同恭親王奕訢係洋務派,堅持洋務運動,開放改革,兩股勢力早就水火不容,奕譞借大王開刀,打擊急劇上昇緊嘅開放派慈禧勢力,亦係常理。

豆斗有幾愛大王?

從安德海被斬首後嘅幾件事可以睇到,大王被斬殺,慈禧立刻要求將大王衣物送返宮中保存,並派內務府專人查辦事件,四個字:「睹物思人」;另外大王有個太監friend叫王添福,響宮內唱豆斗派大王出宮結果害死大王,豆斗一聽到即刻殺咗佢!其時史書亦有記載,慈禧果排成日發脾氣,將怒火發洩響身邊嘅人身上,同時聲言痛恨嗰啲逼死大王嘅王公大臣。之後,慈禧仲大病一場,成個月訓響張床度差啲瓜咗,史上有書當時豆斗「少食不寐,胸滿嘔水,耳鳴頭悶……嘔水多黑……頭痛發暈……」,御醫診斷為「肝氣上逆」(乜呀?),但明眼人都睇到,兩個字已經鑿咗響豆斗額頭度,「失戀樣」呀!非常明顯,係失戀令到豆斗精神同生理狀態接近崩潰邊緣,辛酉政變期間生死相搏,周旋於歷史大局中慈禧都可以鎮定面對,如今死咗個太監仔就咁大反應,咁你話豆斗愛唔愛佢吖?

響豆斗心中,害死大王嘅人係醇親王,下諭旨殺大王嘅係慈安太后,依兩個人,佢都唔會放過。

君子報仇,十年未晚。

慈禧唔係普通人,佢好快回復心情,重新上路,繼續籌辦同治大婚,同埋安排同治快將親政事宜,同治皇帝親政,垂簾聽政時代就會結束,慈禧就會完成歷史任務退下……

大王死後,佢原本一個手下小李子被慈禧提拔成為新一任太監總管,佢就係我常威契爺李連英,李連英同大王一樣,以靚仔有型見稱,之後幾十年,佢一直陪住慈禧終老。可能有過安德海事件,契爺一生行事非常小心謹慎,絕對唔行差踏錯,而且得罪人小稱呼人多,最後以一個好人名字結束一生,平安終老。


可惜1966年文化大革命,李連英被紅衛兵響個墳處起咗出嚟斬首,紅衛兵仲用個屎兜兜住佢個頭當波踢,個頭之後仲不知所縱……

[img]https://upload.cc/i2/K5Le1U.png[/img]


【常威考証】為花柳治替慈禧平反(十二)

人死咗都會感冒你聽過未?我常公子病咗兩Day冇帖出,真係唔好意思。今日繼續同西太后慈禧平反。

1861年慈禧執政以來,一直非常勤力,其實做「大清皇帝」依份工,勤力就可以,每日不外乎睇吓email覆吓email(奏章),簽個名開吓九會同啲大臣九噏幾句,史書記載慈禧每朝大約五點開工,下晝四點左右收工,十一小時工作,同一個普通香港人嘅工時差唔多,話太辛苦亦唔係。

前文提過慈禧執政初期,咸豐細佬恭親王奕訢可能先至係大清最高領導人。事實上亦係,奕訢最初亦冇將二十四五歲嘅西太后慈禧放入眼內,1865年,慈禧就借同治(黃一山)之手發放一道聖旨,攻擊奕訢「從議政以來,妄自尊大,諸多狂傲,依仗爵高權重,目無君上……」,最後攪到奕訢要響慈禧腳邊「伏地痛哭」,慈禧先原諒佢,經過依場小風波,從此冇人敢睇小慈禧,佢亦將實權一步一步收入自己手裡面,加上一齊「垂簾聽政」嘅東太后慈安太后冇乜野心,文化水平勤力度亦不及慈禧,到咗1870左右,慈禧的確掌握咗大清嘅實質政權。中國5000年大歷史中,唯一能夠同佢比較嘅女性,亦只有盛唐嘅武曌武則天。

中国人就係叻。

太平之國內戰,係世界歷史上一場死得最多人嘅內戰,2000萬人瓜咗,同期美國南北戰爭死60萬人,係中國內戰嘅三十份之一,第一次世界大戰死1500萬,第二次世界大戰加埋原子彈希特拉屠殺猶太人都係多太平天國小小,你話係咪勁抽吖?單從死亡人數,你就知道太平天國內戰其實有幾很咁大鑊,大清半隻腳已被拉入棺材中。

帶開一筆,最近翻讀史料發現有件咁嘅事,太平天國戰爭後期,話説軍事天才忠王李秀成帶領6000兵馬突襲杭州,其實佢只係想引開敵人兵力,冇打算真係入城,但杭州城內嘅女人怕太平軍入城將佢哋污辱,為保貞節,城內竟然有數萬女性上吊服毒自殺?咁又死幾萬,死得人多就係咁解,一件「小事」可反映出當時中國內戰嘅殘酷同野蠻,當然仲有中國人嘅愚昧同無知,仲有,自己人打自己人就係最叻。仲有仲有,中国人就係命賤如此!?

就算慈禧有幾叻幾勤力政治手腕有幾聰明都好,要佢救返肺Can三期嘅大清已經冇可能。開展洋務運動,的確為五癆七傷嘅大清帶來小小新氣象,不過中國人繼續唔生性,一邊學習洋人,一邊又仇視洋人,加上上層建築中以醇親王奕譞為首嘅「滅夷派」推波助瀾,製造輿論蒙騙國民,民間對洋人洋物洋腸洋娃娃有嚴重錯誤理解,終於又爆出1870年嘅「天津教案」,局內人借力打力,矛頭直指洋務運動大將曾國藩。

明日再講洋鬼子殺中国孤兒……


[img]https://upload.cc/i2/UOkD1X.png[/img]


#yup# #yup# #yup#


樓主本科係讀歷史 [???]


睇緊robert hart
其實點解英國佬會派人幫中國 又唔係殖民
改完之後英國會有特別關稅優惠定點 [???]


睇緊robert hart
其實點解英國佬會派人幫中國 又唔係殖民
改完之後英國會有特別關稅優惠定點 [???]

唔係啊
赫德先生純粹係大清官員,同大英帝國冇任何關係
至於英國貿易關稅優惠,亦同赫德先生無關


樓主本科係讀歷史 [???]

yes


跳至第



  快速回覆 - 輸入以下項目

本討論區現只接受會員張貼文章,本站會員請先登入。非會員人仕,您可以按此加入為新會員,費用全免,並可享用其他會員服務。


上次光臨時間: 23/4/2019 10:40
今天貼文總數: 452 | 累積文章數目: 6,490,995

聯絡我們 | 服務條款 | 私隱政策 | 廣告查詢 | 職位空缺
Copyright © 2019 HKGolden.com. All Rights Reserved.