主頁 高登熱話 吃喝玩樂 科技消費 名人專訪 短片
現有會員可[按此]登入。未成為會員可[按此]註冊。
[公司模式 - 關]  [懷舊模式 - 開
[Youtube 預覽 - 關]  [大字型]  [小字型]

您現在聚腳在 學術台內。

將已解封的舊帳戶升級高級會員

我們上年12月曾解封部分只輕微觸犯版規或懷疑被駭的帳戶,但有會員反映一些於2009年前登記的舊帳戶在解封後未有自動升級為高級會員,現在我們已將該批帳戶升級,謝謝。
精選文章
跳至第

發起人
【常公子近代史】大清亡國關慈禧蛋牛治
260 個回應
除咗六君子,豆斗仲處死咗幾個劉晶身邊嘅太監,話佢哋幫手通風報訊,由於太監冇J,並唔係人,所以歷史上並冇留低佢哋嘅名字。

有資料指出,由於當時慈禧仲未知清楚成件合邦外交陰謀中,英、美、日等國嘅參與程度,所以將疑犯判罪之時,如果貿然指責英、美、日,會引發新一輪外交衝突,所以好多治罪罪名都含混帶過。後世覺得六君子死得冤枉,依個亦係原因之一。另外,當中處斬六君子,其中一條罪名就係佢哋私通身在日本嘅奪命書生孫文,密謀造反,不過後來經過國共兩黨嘅專業歷史工作者編輯,孫文依個名從此亦同戊戌政變無關。

仲有一則花邊,康有為同梁啟超兩師徒後來著草去咗日本,利用把口同枝筆全力唱衰豆斗,同重構戊戌政變成個故仔。話說有為繼續吹大個波,佢痴到話自己根本會做皇帝!有一次保皇會響夏威夷檀香山開會,有為到場時,梁啟超率領衆人起立,恭祝皇帝萬壽三聲!睇到依處,相信每一個正常人都知道邊個先係痴線佬?

戊戌年嘅事終於狗噏完!下回神打上身!義和拳出場!

#常威 #大清亡國關慈禧蛋牛治 #慈禧太后 #晚清歷史 #戊戌政變

【大清亡國關慈禧蛋牛治】

https://play.google.com/store/books/details?id=C3hjDwAAQBAJ

常公子頻道登陸Youtube,【大清亡國關慈禧蛋牛治】有聲(我把聲)又有畫!請大家支持我,記得睇完,「訂閱」我條常公子channel!

去片https://youtu.be/KKMmBkHIY-4


【大清亡國關 #任人魚肉 蛋牛治】

恭喜發財,豬年進步。

每年新年,大家都希望好過舊年,人之常情。但係大家問心嗰句,21世紀後,唔係一年好過一年,係一年衰過一年,今日講呢啲嘢,的確唔啱時候。但係冇辦法,我真係有感而發。

香港係一個好地方,係一個富裕嘅地方,但係大家會發覺,錢越嚟越唔見使,物價越嚟越高,高得令人難以接受,工作時間日漸加長,工作壓力亦都隨住時間推移愈來愈大,但另一方面,機會則不斷減少,一切資源只係不斷集中喺少數人、或喺更少數人手上面。點解會咁嘅?其實簡單啲講,就係個世界印得太多銀紙(量化寬鬆),我成日都話,如果印銀紙可以解決問題,世界就無問題。可惜,我哋除咗印銀紙之外,真係諗唔到有咩方法解決世界嘅問題。大概,呢個就係資本主義嘅終極問題。

大年初一,悲觀嘅說話唔好講太多,總之大家嚮前看。我相信人類係有足夠解決所有問題嘅智慧,我哋唔肯去解決,只係問題未真真正正嚟到面前,我相信,響未來當關乎存亡一刻出現,人類係會懂得團結一齊,共同攜手,達到共識,解決所有。我始終對人類抱有希望,我始終對自己抱有希望。

【#大清亡國關慈禧蛋牛治】語音導航!請大家幫手「#訂閱」我條YoutubeChannel!同埋介紹多啲人睇睇!衝上1000訂戶!

http://yt1.piee.pw/E59TG

https://youtu.be/lWjmY8_ovLc

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁:https://www.facebook.com/historysandwich/


[img]https://upload.cc/i1/2018/07/23/08V9Cx.png[/img]

【常威中史】為慈禧平反系列(九十八)

百日維新隨住一場戊戌政變,劉晶被軟禁後宣告全盤失敗,1898年10月,大部份新政煞停,中央政府恢復八股文取士考評制度,但炒咗嘅官員再冇請返,政府成功瘦咗身。大家又千祈唔好將百日維新嘅重要性放到無上限,又話豆斗煞停變革,中國從此冇辦法實現現代化冇辦法富強又剩,又咩嘢中華民族大轉捩點又乜又物,其實多舊魚,我常公子講過,維新新政除咗湖南省陳寶箴全力拾卜之外,其實冇乜省份響應,有啲想做亦做唔到,維新新政影響好有限,基本上成壇嘢只係一場官廷政變權力鬥爭,小市民日常冇乜受影響。唔明,早前周永康徐才厚孫政才北京落臺,你覺得生活有影響嗎?冇吖嘛,佢哋鬥生鬥死關人蛋治就係咁解囉。

史學大師磁力王艾瑞克.霍布斯邦(Eric Hobsbawm)講過「歷史本身嘅意義,其一係唔帶住任何情感純粹研究嘅過去;其二係摻雜咗自身記憶同背景立場嘅過去」,所以一個洋人研究晚清史同一個中國人研究晚清史,可以得出兩個唔同嘅睇法。就算你係中國人,你都要分自己係國民黨定係共產黨,兩者嘅眼光係睇到兩個唔同嘅世界觀。

經歷甲午戰爭同百日維新,學習西方自強不息變成過去式,一路走嚟就係唔得就係唔得,香港人1989年嗌民主自由嗌到今日都做唔到,即係唔得,一切勁做,就係咁解。豆斗個招牌經歷戊戌政變後,已經搖搖欲墜,而且當時豆斗已經65歲,明眼人都睇得出佢都擺唔到幾耐,加上一衆重臣例如李鴻章恭親王一係死一係靠邊站,依個時候唔奪權仲等幾時呀?

之前已經講過,班滿蒙貴族保守派比李鴻章南方士大夫階層抑壓咗四十年成代人,真係谷到上心口,但係依班大食懶就係有錢有地,可以hea住等,等到李鴻章下臺,等到洋務運動慘敗收場,等到豆斗老鳥,等到風水輪流轉,卒之輪到佢哋「保守派」威威。子彈上膛,班Seven Head要做嘢鳥。

講返條Hi Hi仔劉晶,佢雖然被軟禁,但佢仍然係皇帝,大清最高領導人,仍然「響豆斗嚴密監控」下行使緊佢嘅皇帝職務。史書記載,佢仍然會上朝、閱讀奏章同接見外賓,不過當然豆斗要在場「重簾聽政」。劉晶並唔係好似坊間以為唔可以離開瀛臺半步,佢仲有一定自由(起碼比趙紫陽多),話事權就一定冇,依段時間(1898-1899),佢表面亦識DO,冇再搞事,繼續同Tomboy珍妃過安樂日子,有時同太監玩吓敲擊樂,讀吓書進修自己,非常自我抑壓。你以為條Hi Hi仔從此生性,我常公子話其實佢仲有嘢諗。

有人睇到紙板人劉晶已經變得可有可冇,知道係時候做嘢,一派守舊派大臣元老崇綺、徐桐、剛毅、載漪、啟秀等人(唔該記住呢班Hi Hi嘅名)埋堆,佢哋以端郡王載漪(1856-1922)為首,1899年開始四處串連密謀奪權,於是有人提出廢咗劉晶,另立新皇帝。

豆斗點睇廢立問題,下次分析一下。

#常威 #大清亡國關慈禧蛋牛治 #慈禧太后 #晚清歷史 #戊戌政變


【大清亡國關慈禧蛋牛治】

https://play.google.com/store/books/details?id=C3hjDwAAQBAJ


[img]https://upload.cc/i1/2018/07/25/JkA1M4.png[/img]


【常威中史】為慈禧平反系列(九十九)

政治世界最討厭變色龍,三家姓奴,就算你係人中呂布都要比人小,睇你唔起因為你冇立場,97年前血係藍色,97年後血係紅色,真係冇辦法信你真心為香港。

我講過豆斗係一個從一而終嘅領導人,由佢1861年上臺開始,佢嘅立場同定位始終冇改變過,佢知道自己係滿蒙皇室貴族嘅代言人,佢嘅存在,主要就係要維護同捍衛滿蒙皇室貴族嘅利益,豆斗本身係貴族嘅一份子,佢嘅權力亦由滿蒙貴族嘅支持而得到。你可以話佢出發點係錯,但唔可以話佢唔道德累大清,依點要好清楚。20世紀前嘅大清(或中國),係一個由儒家哲學「三綱五常」建構出嚟嘅世界,社會基本上係由人與人之間互信關係同倫理宗法制度凝聚出嚟,同現代世界唔同,法理條文同合約精神並唔係社會凝聚嘅主力同紐帶。1911年後,中國人企圖用西方世界嘅法理精神(法統)取代原來儒家哲學三綱五常重構社會,結果觸發半世紀大分裂同天翻地覆,一切容後再講。


劉晶同新黨嘅維新活動,就係要推倒原來嘅宗法制度,推倒守舊嘅滿蒙貴族勢力,由一開始就係大逆不道。用今日香港人眼光,就係你本身民主派出身,最後投靠建制派,變色龍從來好難得到他人信服,因為你成世都要孭住「出賣朋友」嘅罪名。 #湯渣 、 #劉肛華 就係好例子。有人話政治世界瞬息萬變,我就答你撈政治其實仲嚴格過結婚,從一而終先係大道理,一次不忠百次不容仲嚴格過男女關係。

豆斗從一而終,立場堅定,從來都係舊派嘅人,當然佢作風同思想都係屬於新派洋化,同李鴻章南方士大夫班人行理三十年搞大清現代化,一方面係保障緊滿蒙貴族階級嘅利益,另一方面係利用李鴻章幫大清皇朝吊鹽水,事實上大英帝國白手套李鴻章響任何時間都絕對有power推翻大清另起爐灶,豆斗「媾」得佢掂,其實係好犀利。

1898年後,豆斗歸隊,企番響保守派陣型(雖然佢從來未離開過),1899年,保守派貴族階層拋出廢黜劉晶嘅動議,想另立新皇帝(一次不忠百次不容道理),但係比國際社會遣責,北京各國公使都唔同意皇朝另立新君,原因好簡單,合邦外交陽謀中,英美日三國都有份參予,佢哋視劉晶為同黨,點可以比你郁佢呢?只要劉晶一日未死未落臺,死灰隨時可以復燃。

守舊派見廢君依招唔掂,再出新招!新劉晶身體虛弱,依點冇錯,細個漏精個個都知嘞,1898年底有份西醫醫療報告,話佢應患有慢性腎炎,未能正常排毒,劉晶個腎真係一直落嚟有問題,珍妃冇懷孕,其他妃嬪都冇。封建皇朝「嗣繼無人」好大件事,於是1899年底,豆斗下令封咸豐細佬端郡王載漪個仔溥儁(1885-1942)做大阿哥,皇太子。溥儁當時14歲,當然只係權力鬥爭嘅紙版人一個,1900年1月24號大清皇室宣布立皇儲,但係又比西方各國一致反對,西方公使團甚至聯名支持劉晶,反對立儲,於是又搞唔成,西方列強下下對著幹,嚴重粗暴干涉中国內政!班權貴激到紮紮跳,懷恨在心……

依個時候,1899年間山東半島又有一班仇洋嘅暴民聚集起事,於是大清班保守派覺得機不可失,一於玩大佢!利用民間力量,直接向洋人進行大報復……

#常威 #大清亡國關慈禧蛋牛治 #慈禧太后 #晚清歷史 #義和團


[flowerface] 【大清亡國關慈禧蛋牛治】

https://play.google.com/store/books/details?id=C3hjDwAAQBAJ

:o) 常公子頻道登陸Youtube,【大清亡國關慈禧蛋牛治】有聲(我把聲)又有畫!請大家支持我,記得睇完,「訂閱」我條常公子channel!

去片https://youtu.be/KKMmBkHIY-4


【大清亡國關 #戊戌政變 蛋牛治】

今集講劇本問題,戊戌政變有一個民間流傳嘅劇本,忠奸分明,好有肥皂劇氣氛。但事實上,喺政治嘅世界裡面,往往係黑白不分,冇所謂絕對正義,亦冇所謂絕對邪惡。60年代初期,送去越南打越戰嘅美軍,大部份都係抱住捍衛自由世界唔畀共産主義侵蝕嘅崇高理念,同樣喺叢林裡面比橙劑毒害嘅共產主義遊擊戰士,一樣係抱住抗拒帝國主義者侵略嘅崇高理想,大家冇話啱定錯,只可以講,嗰個仲係一個黑白分明嘅時代,作為一個人,仍然可以選擇自己所站立嘅位置。

嗰個黑白分明嘅時代已經無聲過去,現代世界先至係一個完全灰色嘅時代。由於資訊太發達,世界嘅操作環境已經變得無比複雜,每一樣事情都同其他事情連結喺一齊,千絲萬縷,無法割斷,正義同邪惡混雜發生,黑白交織,再冇人知道自己係黑定係白。正如最近金融大鱷索羅斯講,佢話習近平喺世界上最邪惡嘅人,但係我真係想講,出自你把口,就真係非常可圈可點。索羅斯長期以來為地球人帶來嘅災難同痛苦,我諗一定比習近平大。

身處一個咁樣嘅時代,我哋應該如何自處呢?答案仲有一個,不假外求,訴諸內心。人性,一個個體內在觀照自己心靈深處嘅尺度,大概就係一把量度灰色世界正邪距離之間嘅規尺。呢個已經係個體當道嘅年代,每一個個體應該有自己獨立思考嘅能力同想法,世界能否邁向更美好?就要睇吓人性本身嘅韌性同持續性喺邊度?

【#大清亡國關慈禧蛋牛治】語音導航!請大家幫手「#訂閱」我條常公子YoutubeChannel!同埋介紹多啲人睇睇!衝上1000訂戶!

http://yt1.piee.pw/F2MYP

https://youtu.be/aOnmcXe2nVU

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁:https://www.facebook.com/historysandwich/


[img]https://upload.cc/i1/2018/07/27/hLqcAU.png[/img]

【常威中史】為慈禧平反系列(一百)

終於連載到100回,向200回進發,但愿有一日,真係可以寫到王光美親手接劉少奇骨灰為止……

對於1899年開始發生嘅義和團暴亂事件,大家需要有幾點認知。

第一,大清國民唔妥傳教士同洋人,已經唔係一朝一夕嘅事,仲記唔記得發生響1870年既「天津教案」,大好人曾國藩就係咁樣落馬,中國人社會結構,係倚賴儒家哲學宗法系統,即「三綱五常」建構出嚟,傳教士輸入個套天主教基督教西方倫理觀念根本同中國傳統格格不入,發生衝突亦係正常。日本早響明治時代之前,亦發生過類似嘅宗教意識形態大衝突,即可歌可泣既天草十四郎事件。

第二,大家亦唔好認定洋人或傳教士一定係好人,落老蘭嘅洋腸好少覓真愛,大部份都係想呃蝦條。19世紀活躍於中國境內嘅幾千名洋教士,亦唔係全部為咗叫人信耶穌得永生,當中唔少人根本就係外國間諜,好似李提摩太先生就係好例子,佢所做嘅嘢同佢能夠做嘅嘢,根本唔係一個傳教士能夠做到。另外,除咗間諜同二五仔,仲有好多披住傳教士件袍嚟中國搵食嘅不法分子,借住外國教會名義,響中國收靚,霸地起教堂,然後圈地做生意,1860年中法北京條約,更規定法國傳教士有租買田地建造房屋特權,要記住古往今來凡係地產項目就係大油水,19世紀亦唔例外。

第三,自1876年中英煙台條約生效後,關於領事裁判權方面,大清同西方列強建立會審判度,每每遇到教案發生,洋人可以派員觀審或會審,好多訴訟糾紛,教士成日用領事裁判權為護身符甩身,甚至干涉訴訟,袒護教民二毛子。信耶穌除咗得水牛之外,仲可以遠離大清律例嘅制裁,相信當時好多人都會識揀囉。法律不公平,造成平民仇視洋人同二毛子,亦唔可以單方面怪曬大清國民嘅!


第四,大家亦唔好用今日嘅角度去睇當時嘅世界,今日嘅西方歐洲人又靚又高級又有文化又理性又民主又自由又平等,但第一次世界大戰之前,西方係一個帝國主義世界,西方人嘅教育水平亦唔係你想像咁高,大清有99%嘅人係文盲,但係西方世界係有八九成人盲字都唔多個。列寧話嘅:資本主義最後就會發展成帝國主義。當時候西方列強隻隻都係豺狼,為咗掠奪資源同競爭可以不擇手段,張張刀把把利,大清貴為當時世界第一號霹靂無敵大水魚,比人嘢嘢劏落去,其實都幾慘。

經歷甲午戰爭,西方列強個個都想響大清身上分一杯羹,繼德皇無厘頭伸隻手要咗膠洲灣後,1899年,連意大利呢個啱啱立國40年嘅弱國都想嚟大清搶地插旗,又武力威嚇又剩,但豆斗冇理佢,Auntie唔係話要地就俾你囉……意大利人兇得大清幾次,自己亦Stop la。但依件事反映出洋人嘅野心不斷擴大,連當時大清嘅海關總稅務司赫德(Robert Hart)先生都擔心,再咁樣落去,大清遲早會彼列強瓜分玩完!連赫德都咁講,你話豆斗同班滿清貴族會點諗?仇洋心理逐漸昇溫,乜都唔做就等死,比著你係豆斗,你會點做先?

火藥庫其實已經裝滿曬火藥,藥引亦預備好曬,呢個時候出現嘅義和團,無疑係一部打火機。


#good# 【大清亡國關慈禧蛋牛治】

https://play.google.com/store/books/details?id=C3hjDwAAQBAJ

#常威 #大清亡國關慈禧蛋牛治 #慈禧太后 #晚清歷史 #義和團


[img]https://upload.cc/i1/2018/07/30/LdKc7B.png[/img]


【常威中史】為慈禧平反系列(一百零一回)

未詳細進入1900年連串瘋狂事件之前,首先論述一下中國歷史上一個名詞:「羅織」。

咩叫「羅織」?古往今來,歷史上都有人利用民間偶發嘅個別事件,然後煽風點火、加鹽加醋、甚至泵水入去,吹大佢搞大佢,就係要利用群衆力量完成某啲政治目的或打擊對手奪權!我朋友周顯話,中國歷史從漢武帝、武則天,以至近代嘅文化大革命,都係從一宗案件擴大成重大政治事件,可以涉及幾萬人,甚至是幾十萬人,咁就叫做「羅織」,或者叫「群衆瘋狂症侯群」。

從來,群衆力量就係用嚟打擊政敵嘅最有效手段,尤其響一個冇民主選舉制度嘅國家裡面,人民唔可以用有效途徑例如選票表達意愿,就只有用另類方法渲洩憤怒同不滿(或渲洩忠誠同憂國*基本上同義),一百年前嘅大清如是,今時今日嘅中国亦如是。但係群衆係盲目同非理性嘅,佢哋嘅力量好多時候會被政客所利用同操縱或「羅織」,大搞特搞,借力打力,誣告陷害,藉民意嚟打擊對手或完成政治目的。

太遠遲啲講,舉個啱啱發生嘅例子,內地出現黑心疫苗事件係一個獨立事件,但係事件引起咗民憤同大量民意支持,有心人就可以藉此案揪出大量涉及行賄受賄嘅官員,拉去坐監,有意思嘅係,涉及疫苗案嘅人都係上一代領導人時代上位嘅,大家明嘅。當然你冇位比我入,我一定唔可以入你,但係一有位入,就要大入特入,入到本來冇位嘅地方都可以入,就係咁解。

30年前嘅六四事件都係一樣,起碼最後我哋嘅總結界師鄧小平係覺得,成件事係趙紫陽利用群眾力量羅織佈局,目的係想推翻佢或中國共產黨嘅絕對領導權,於是將趙紫陽判終身軟禁。


古往今來,最大型嘅羅織事件,應該係上世紀60年代發生嘅文化大革命,沒有之一。依一場浩浩盪盪嘅「十年浩劫」,牽涉過億人,死幾百萬人,無數人被批鬥被牽連被入獄被受傷被扣帽子被失蹤被痴線被放逐被陷害被冤枉,或者被浪費青春一齊瘋狂,甚至令中國造成文化斷層,令中國人變成神憎鬼厭嘅一群。但其實推根究底,只不過係一場黨內宮廷政變,係史上最強馬基維利主義者毛澤東向政治對手劉少奇嘅報復行動,係毛派向聯共列寧幹部派嘅奪權遊戲……睇得通透嘅,就會知道單嘢有幾膠,係膠到冇人有,係只會發生喺中國人嘅世界裡面……

返去二十世紀第一年1900,義和團事件其實亦係一件偶發嘅獨立事件,但有心人睇到佢係潛力股,只要有成交一定可以炒上去破頂獲利,於是羅織佢,搞大佢!用嚟達到政治目的,有心人係清朝嘅滿蒙貴族保守派,仲有豆斗。不過豆斗又點會係普通人?佢嘅諗法,一定唔會同班低智商貴族一樣。

早前,有網友KwanShingCheong留低一段咁嘅説話:

「太后一直都努力改變天下一家呢個概念,希望可以令大清接受萬國呢個概念,可能佢真係一個蟻后,可惜佢下面個班係d寄生蟲……」

世事的確被你看透鳥,下次繼續……

#常威 #大清亡國關慈禧蛋牛治 #慈禧太后 #晚清歷史 #義和團


#:)3#lny 【大清亡國關慈禧蛋牛治】

https://play.google.com/store/books/details?id=C3hjDwAAQBAJ


:)


【大清亡國關 #康有為 蛋牛治】

大清亡國嘅故事發展到康有為出場,康有為係一個晚清歷史上重要嘅人物,但佢嘅重要性並唔係因為佢做過啲乜嘢,而係佢用自己支筆將自己嘅重要性鋪陳出嚟,簡單啲講,就係自我宣傳,就係作大,就係將好多冇發生嘅事變成歷史。中國近代史嘅墮落,康有為絕對要負上極大責任。

作為一個文人,作為一個揸筆搵食嘅文棍,康有為將自己提高到一個冇人可以到達嘅高度,這一點佢係成功嘅,以現代香港人角度去睇,佢係一個成功人士,走精面,出古惑,作假吹大,以最少嘅成本,獲取最大嘅報酬。但由歷史角度去睇,這種人作出嘅遺害係最大。

好高興係生命有限嘅時間裡面,能夠細讀歷史。中國歷史非常有趣,有趣嘅地方係太多假嘢,太多人老作,你想知道真相撥開迷霧,好多時候要靠自己。情況就好似睇緊一部推理小說咁,內中嘅趣味,不足為外人道也。

【#大清亡國關慈禧蛋牛治】語音導航!請大家幫手「#訂閱」我條常公子YoutubeChannel!同埋介紹多啲人睇睇!衝上1000訂戶!

http://yt1.piee.pw/G32AP

https://youtu.be/KHlZYNZTO3k

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁:https://www.facebook.com/historysandwich/


[img]https://upload.cc/i1/2018/08/01/7OGVuU.png[/img]

【常威中史】為慈禧平反系列(一百零二回)

義和團嘅爆發點響山東半島,甲午戰爭後,新掘起嘅歐洲超級強權德國無厘頭插隻腳入清國,一個唔該就要咗膠洲灣,1898年,山東半島已經響德國勢力支配底下,成為威廉二世德意志帝國(第二帝國,希特拉係第三帝國Third Reich )半殖民地。德國人唔係講玩,佢哋做乜都好認真同快手。大家身為中國人千祈唔好同德國人比,因為完全冇得比嘅。

到咗今時今日,山東半島100年前德國人鋪設的地下排水系統,仲運作得好好,你吹得佢脹咩?日耳曼人就是強!

十九世紀最後幾年,半島上清國人同德國人衝突經常發生,加上1896年5月,山東黃河決堤,遍地災民,德國教會賑災,又以教民二毛子優先,因此半島上仇洋心理昇溫,地下社團(即黑社會)紛紛建立,其中「義和拳」、「大刀會」就係當中表表姐。玩社團一向都係中國人強項,由陳家洛紅花會陳近南天地會到今日香港新義安14K,依個優良統傳從未斷絕過。

1899年2月,保守派官員毓賢(1842-1901)上任山東巡撫,佢啲衰嘢大家可以睇劉鶚嘅《老殘遊記》。毓賢自己都仇洋,於是秘密泵水俾義和拳坐大,義和拳亦改名義和團,拳民有政府高層背後撐腰,高舉「扶清滅洋」旗幟,組織愈玩愈大。由於教案同衝突不斷發生,1899年春天,德國人終於頂唔X順,派兵鎮壓拳民,燒村殺人!哇!火上加油,義和團迅速演變成有幾十萬followers嘅大型仇洋組織,更立志要將全部洋人趕出大清。

消息傳到中央,豆斗聽到,知道要撲火,於是佢炒咗毓賢,叫袁世凱做山東巡撫,儘快擺平單嘢。袁生深知太后心意,立刻將義和團加以壓制!豆斗對清國人同外國人嘅衝突一向都持平辦理,處理得相當好,因此喺過去40年,整個大清教案數量其實只有幾十宗,相對大清一個人民衆多、版圖巨大嘅超級國家嚟講,其實非常之少。


但山東半島上,窮人災民失業者太多,義和團壓之不盡,繼續坐大。加上毓賢、剛毅等仇洋官員不斷響中央串聯,煽風點火,響滿蒙貴族暗中拾卜科水下,成個大清仇洋心理愈演愈烈。1900年1月24號嘅立儲事件,各國公使聯名反對溥儁做大阿哥,終於點著火藥庫條藥引,一個帝國連選擇承繼人都要比外國勢力干預?咁即係我哋中華人民共和國要選政治局中央常委要諮詢Donald trump同Putin啫?豆斗嗰吓我諗真係堅嬲,於是認定洋人係大清皇室嘅敵人!

呢個時候,義和團繼續玩嘢,滋擾洋人範圍更離開山東,直撲向直隸地區,一場大型民間暴亂成型。西方列強見自己國家僑民人生安全不受保障,於是一齊抗議聯署要求豆斗將義和團定性為非法組織,就好似江澤民當年將法輪功定性為非法組織一樣。但豆斗並冇咁做,半推半就消極處理。當時我哋嘅山東巡撫袁世凱就醒目喇,睇見件事好似會失控咁,於是佢就用自己嘅先進新軍將義和團驅逐出山東,先行自保。

於是幾十萬義和團成員,無處容身,直湧向北京,沿途殺燒搶掠,踢人入會。呢個時候,西方列強嘅軍艦亦部署大沽口外圍,預備隨時有所行動,拯救橋民同胞。一場戰爭,就係咁樣醞釀爆發……我常公子成日話要同慈禧平反,但義和團同之後發生嘅悲劇,佢應該要負上最大責任,責無旁貸,佢想避都冇得避,唯一解釋就係佢當時已經太老(65歲),冇咗年輕時代嗰份判斷力同智慧,所以話,一個人無論點叻,執政時間太長,一定唔係好事囉。

#常威 #大清亡國關慈禧蛋牛治 #慈禧太后 #晚清歷史 #義和團



:o) 【大清亡國關慈禧蛋牛治】

https://play.google.com/store/books/details?id=C3hjDwAAQBAJ

[flowerface] 常公子頻道登陸Youtube,【大清亡國關慈禧蛋牛治】有聲(我把聲)又有畫!請大家支持我,記得睇完,「訂閱」我條常公子channel!

https://youtu.be/KKMmBkHIY-4


[img]https://upload.cc/i1/2019/02/10/mVCGs1.png[/img]

【星期日特別放送】社會碌葛嘅社會任務

講返社會碌葛,社會碌葛一定要生存響一個社會裡面。社會(Society) **點解成日要響啲人人都認識嘅詞語後面加個英文字呢?咁係咪高檔啲呢?係咪有服說力啲呢?但係又典解英文書裡面嘅詞語後面又冇個括弧加個中文字呢?例如Society (社會)** 社會係由人類群居所組成嘅有機體,係一個舞台,讓人可以上台表演或存在。成群人聚埋一齊唔係社會,痴痴呆呆坐埋一檯亦都唔係。你黃昏時份去郊外,頭頂有一大推蚊蠓嬲吓嬲吓,佢哋亦唔係一個社會結構。

一個社會結構,必需有「制度」同「秩序」存在。

人類典解要製造社會依樣嘢先?理論上,人類可以獨立生存,自己打獵種菜搵嘢食存活,或者以「家庭」同「部落」形式作為生存單位。但隨住時間推移,人類嘅生活內容愈來愈複雜化,人類所需要嘅生存物資愈來愈多,一個個體絕對唔可以靠自己力量生產一切自己生存所需。諗諗,你總唔可以自己整一部I-phone或Samsung畀自己用吧?但現今世代,冇智能電話我哋是不可能生存嘅!因此,我們必需同旁人建立生產經濟關係,大家互換物資,我種香蕉、你種大樹菠蘿,咁大家就有香蕉同大樹菠蘿食,社會個概念,大致上就係咁樣出現。

起初,大家以物換物,我三條香蕉換你一個大樹菠蘿,後來,事情慢慢複雜化,生存物資種類愈來愈多,人嘅欲望亦愈來愈大,生產關係亦愈來愈複雜……最終導致貨幣出現,方便記帳、評估價值、製造信貸。但係貨幣金錢明顯係萬惡嘅東西。社會響金錢作為紐帶下成形,終於建立起我們今日身處嘅世界模式。社會有大有細,細嘅幾十萬人,大嘅成千萬人,但大致上運作模式都非常相似,不外乎都係以金錢作為血液,令整個經濟有機體不斷膨脹發大出現泡沫,直至一日爆煲為止、然後冼牌再開始。


如果你問一個香港廢老(最好上晒岸嗰亭),一個社會最驚係乜?廢老會答你:

「亂!」

冇錯!一個社會最怕就係亂!

所以社會建立,成班人聚埋一齊生活(無論自愿或非自愿),共同約定俗成使用金錢交易(無論自愿或非自愿)後,一定要創立制度去規管所有人,為咗乜?為咗建立「秩序」囉,「秩序」一旦存在且運行正常,個社會就唔會亂。否則,亂就好大件事!

舉個例,住響你對面有條日日打機嘅廢青,有一日走入咗你屋企,攞走曬你啲錢,仲順手殺埋你老豆老母家姐細佬同你養個竇倉鼠,然後拍下個蘿柚就離開?之後完全冇事,廢青仲過得好開心,日日仲對住你笑若無其事咁講早晨。咁仲有皇法咩?如果上述事件你覺得非常唔妥或非常不安,咁你就係認同「秩序」係有幾咁重要。

再舉一個例,2014年夏天,香港有班人要求香港要有真普選(其實香港嘅選舉制度已經係世界上最公平公開公正嘅選舉制度,佢哋嘅訴求完全多舊魚),於是佢哋發動佔領中環運動!你睇,當時香港幾咁亂吖,啲學生哥學生妹周地訓,成個中環烏煙瘴氣,交通又擠塞,又搞到啲大肚婆老人家趕唔切去醫院生仔同覆趁,上曬岸嘅廢老仲話,佔中搞到啲乖乖後生仔冇嘢做冇工返,啲股同啲樓又跌,成個香港好似返番去三年零八個月日本皇軍佔領香港咁,經濟差啲崩潰,幾銀咁大件事呀!所以,「秩序」依樣嘢你話幾重要呢?

(如果你對佔中真係有上述想法,恭喜你!你已經完全進入咗社會碌葛既思考領域……)

節錄【碌葛男人嫁得過】

【碌葛男人嫁得過】
https://play.google.com/store/books/details?id=e1N7DwAAQBAJ


[img]https://upload.cc/i1/2018/08/03/zBuHNy.png[/img]

【常威中史】為慈禧平反系列(一百零三回)

義和團同太平天國嘅結構其實非常相似,都係利用一啲宗教口號或理念招收會員加入社團,不斷做大,其實「扶清滅洋」又好,「神打」又好,乜嘢孫悟空豬八戒、耶穌、天國、甚至北伐、共產主義馬克思主義都係一樣,大前提係要個社會夠窮困,遍地都係飢民同埋失業者,當好多人走投無路時,而家有條路俾佢哋入嚟,有飯派,咁無論用咩形式都好,都會好容易聚到幾十萬人,革命就係咁樣發生。

最近呢幾年香港有啲人成日講要喺香港發動革命,推翻擁有300萬正規軍、總動員可到達700萬至1000萬嘅中共政權或者搞香港獨立,其實一定冇可能發生,聽到只可以啖笑,或者當作閒話家常。原因係香港基本上仍然係一個富裕社會,人人衣食豐足,冇人會餓死街頭,既然冇人會餓死,冇人走投無路,又點會有人願意拋個身出嚟搞革命衝呢?毛澤東話革命唔係請客食飯,革命係要人頭落地嘅。革命亦都唔係失意文人paperback writer大學教授因不滿社會資源分佈不均,寫隻字就可以發生或推動,如果你有咁嘅諗法,只不過同康有為梁啟超係同一類人。

1900年4月,身穿紅衫居多,幾十萬會員嘅義和團直撲向大清首都北京。豆斗依個時候的確做錯咗,佢早兩個月嘅優柔寡斷,唔肯下旨認真鎮壓暴民,令到局面一發不可收拾。呢個時候,連佢最信任嘅軍機大臣榮祿都請咗兩個月大假走先(認真醒目)。袁世凱柄埋山東半島自保,長江下游成班南方封疆大吏買晒花生等睇戲。


事實上,豆斗亦完全控制唔到義和團,因為義和團嘅人數已經遠遠超越咗大清當時可動用嘅陸軍總數,當時駐守北京外圍嘅大清陸軍,其實可以用嘅只有幾千人。而義和團係十幾二十萬三十萬人湧到(並冇正確嘅統計數據),打條毛咩?加上所謂義和團並唔係一個統一有組織黑社會,字頭堂口衆多,成班暴民係隸屬多個數唔清嘅小組織小社團,或者單拖,雖然大家都係扶清滅洋殺大毛子二毛子,但你信神打我信茅山,你用龜波氣功我係ironman,你拜齊天大聖我拜豬八戒,你可以刀槍不入我可以隔空取物,根本係完全冇秩序冇組織,清延想搵人去傾,都唔知揾邊個傾好?根本就係大暴走!大暴亂!

洋人睇到個局,知道係時候出手。6月頭,駐京外國公使團要求批准派軍隊進入北京保護橋民,豆斗同意,但唔可以多過400人,公使團反對,6月10號,英國駐華艦隊總司令愛德華西摩(Edward Seymour)率領2000名英軍由大沽口登陸(留意:又係大清好朋友大英帝國率先出手!),搭火車向北京進發。豆斗唔允許咁嘅規模嘅軍隊進京城,要求總理衙門大臣慶親王奕劻(1838-1917)拒絕,但慶親王攪唔X掂,豆斗即刻撤換佢,揾咗大左仔仇洋派大佬載漪替代去傾,但西摩軍團拒絕回頭。

豆斗好X嬲,加上大阿哥老豆載漪同成班豬朋推波助瀾,仇洋心理作用下,班大食懶低B滿清貴族自告奮勇,主動科水組織義和團暴民。豆斗更下旨將義和團招募成軍,隨時同洋人開拖!

嚟到呢個位,下集會分析一下聰明絕頂豆斗當時嘅心理狀態……

#常威 #大清亡國關慈禧蛋牛治 #慈禧太后 #晚清歷史 #義和團


#yup# 【大清亡國關慈禧蛋牛治】

https://play.google.com/store/books/details?id=C3hjDwAAQBAJ

#yup# 【大清亡國關慈禧蛋牛治】實體購買

https://www.382now.com/product?id=87


【大清亡國關 #梁啟超 蛋牛治】

新年假期,都喺屋企煲Netflix嘅史詩式紀錄片【越南戰爭】,全套十集,共18小時,高度推薦(呢啲高汁嘢,喺香港嘅電視臺同媒體永遠唔會睇到),睇完好難過,為美國人而難過,亦為越南人而難過,無數性命付出,到頭來,大家都係玩咗一個遊戲,戰爭遊戲,意識形態遊戲,當時美國係驚共產主義赤化亞洲,所以出兵越南,但共產北越最後取得勝利,贏咗之後,到咗今時今日又放棄咗共產主義行資本主義市場經濟,你話件事幾咁吊詭呢?呢場延續咗十年嘅無聊戰爭,冇最後嘅贏家,但有最後嘅輸家,輸家又係兩個國家嘅民眾.......

越戰同香港都有關係,因為越南戰爭產生大量越南難民,佢哋喺70年代中期同80年代源源不絕坐船走難嚟香港,香港係亞洲唯一一笪地方作為第一收容港,聯合國爭香港嗰條難數,好似到咗最後都冇還。而香港為越南難民做咗咁多嘢,保障咗佢哋嘅生命同安全,但事後我又唔見成班最後移民咗去美國歐洲嘅越南人大大聲多謝香港人一句,反而有人仲Hi,響香港難民營過住啲好差嘅生活條件,Auntie個臭化,當時你又唔見新加坡、馬來西亞、泰國、菲律賓、印尼、臺灣同中國大陸收容你哋?

可能我已經係一個老屎忽,我覺得,受人因果要千年記,我永遠都會記得伊莉莎白女王二世、麥理浩、尤德、衛奕信(唔係陳奕迅)、彭定康對香港人所做過嘅一切。越南難民,你哋真係欠咗香港人。

【#大清亡國關慈禧蛋牛治】語音導航!請大家幫手「#訂閱」我條常公子YoutubeChannel!同埋介紹多啲人睇睇!衝上1000訂戶!

https://user35103.pics.ee/FBFAU

https://youtu.be/Me1UeDnBKtM


【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁:https://www.facebook.com/historysandwich/


[img]https://upload.cc/i1/2018/08/05/vgwkOF.png[/img]


【常威中史】為慈禧平反系列(一百零四回)

試想像一下,如果而家有一班中國僑民同埋中國遊客喺紐約嘅唐人街被一群ISIS恐怖分子挾持,並威脅要逐個屠殺,但係美國政府講到明佢哋唔會插手,咁中華人民共和國派出航空母艦遼寧號橫渡太平洋到達美國東岸,直入美國本土保護僑民同埋同胞,我諗都係理所當然,冇人會覺得有錯。1900年所謂八國聯軍侵略中國,大概就係咁嘅一回事,其實冇人要諗過推翻大清白痴政權,外國人派軍隊入京城,無非都係想保護僑民,事實上係一個合情合理嘅行為。

事實上,大家千祈唔好覺得中國係咩好嘢,邊個咁得閒侵略同統治你丫?乸屎上身嘅嘢好少人會做,比你去領意一隻狗,你都唔會揾隻成身狗虱同有神經病掛?最重要嘅係,要地有地,要做生意有生意得做,其他嘢真係唔好諗咁多。你又唔見美國最後將伊拉克變成美國領土第五十三個洲?啋你都儍喇,最緊要係伊拉克出產嘅石油係畀美國人做獨市生意就夠,你明我講乜,就進入咗八奇嘅思考領域嘞。

但係智慧高超嘅豆斗典解當時又會將義和團班暴民組織成軍隊,打擊洋人呢?玩嘢當然係第一優先,但係我諗豆斗都係逼不得已。我講過義和團當時已經發展成為一個完全失控的暴民暴動,大清嘅維穩力量根本唔能夠控制佢哋,雖然義和團話自己扶清滅洋,但風勢一變,義和團分分鐘可以變成李自成嘅闖軍,大清政權即刻玩完絕對唔奇,又或者政敵利用暴民力量推翻豆斗亦有可能,豆斗係馬基維利主義者,運用權術已經進入出神入化嘅地步(當然唔及毛澤東同史太林)。當時嘅佢我諗首先要自保,將義和團組織成軍,目的係捆綁佢哋上埋自己條船上,確保意識形態站在自己同一陣線上。


玩政治,要隊人一定要有個藉口,你唔可以無端端攞把刀仔去柄人幾嘢!豆斗做嘅嘢,就係唔比政敵有任何藉口隊自己!你信又好,唔信又好,我就覺得係。

而且拳民殺燒搶掠,口講對付大毛子二毛子,大清官員同有錢人其實係主要目標。同文革紅衞兵一樣,抄家順便偷錢,兵荒馬亂,合法打劫,比我都滯。義和團佢哋仲佯言要殺「一龍二虎三百羊」,一龍係劉晶,二虎係慶親王奕劻同洋務大佬李鴻章,三百羊就係一非明白事理嘅京官,其中話唔殺嘅,就只有大左仔載漪、崇綺、徐桐、剛毅、啟秀班Hi Hi。名單咁樣開出嚟,睇都睇到係一場背後有黑手嘅宮延政變啦。

6月頭,京城大亂,外國軍隊陸逐派兵前往京城保護僑民,被保守仇洋派演繹成為外國勢力入侵大清,載漪等杏加橙煽動拳民進攻外國領事館殺洋人,豆斗明顯自保緊,同佢哋同一口徑説話,任命另一左仔莊親王載勛為統帥組織拳民,對付正向京城進發嘅各國軍隊。

6月16號,英、美、俄、日、德、意、奥八國聯軍攻陷大沽口礮臺作為進軍北京據點。6月19號清廷要聯軍撤出大沽口,並要求各國領事離開,比二十四小時佢哋離開北京(痴膠花),20號朝早,北京東交民巷使館區一衆外國公使(領事)開大會,之後德國領事親臨總理衙門詢問詳情,點知比載漪率領嘅虎神營禁軍開槍打死咗!冇錯!係打死咗人哋國家嘅領事!!於是各國領事決心固守使館區等待八國援軍拯救,而响北京嘅外國人同教民亦相繼走入東交民巷保命……

件事發展到依處,冇辦法再返轉頭鳥!


#cn#【大清亡國關慈禧蛋牛治】

https://play.google.com/store/books/details?id=C3hjDwAAQBAJ

:o) 【大清亡國關慈禧蛋牛治】實體購買

https://www.382now.com/product?id=87


唔記得睇到邊[sosad]


唔記得睇到邊[sosad]

咁向左走向右走大鑊


[img]https://upload.cc/i1/2018/08/08/AcDgeN.png[/img]

【常威中史】為慈禧平反系列(一百零五回)

1900年6月嘅北京,已經變成人間煉獄,一波一波嘅義和團暴民湧入北京,殺燒搶掠,見洋人同二毛子就殺,唔係普通殺,而係酷殺,分屍燒屍或剁成肉醬餵狗,隨處可見,男嘅殺人搶錢,女嘅「衣紅衣,短袖窄褲,十百成群,招搖而過市,手持紅巾一方,沿途揮舞……」,依個情景,令你諗起啲乜呢?旺角行人專用區?法輪功?尖沙咀碼頭?所以我話,中国人嘅問題嘅DNA嘅問題、係劣質基因嘅遺傳問題。

扶清滅洋,順便打劫大官貴人,連恭親王長女、豆斗養女固倫榮壽公主都未能倖免,慘被抄家。嚟到依度,可以睇到豆斗同滿蒙貴族已經失去咗控制首都秩序嘅能力。早響20號德國公使克林德(Baron von Ketteler)被殺之前嘅6月11號,日本使館書記杉山彬就俾殺人王董福祥嘅甘軍殺害並當衆分屍,腸流滿地。清國軍人冇嘢叻,殘忍對付襯家最叻!已經唔係第一次,1860年英法聯軍火燒圓明園,1895年日本人旅順大屠殺,佢哋入你嘅位都係清軍殘酷虐殺佢哋嘅戰俘同胞在先,然後逼不得已進行大報復!你可以唔信,但我堅信。

清國軍隊,文化傳統上係一支野蠻落後殘忍嘅遊牧民族軍隊,保留住蒙古人橫掃歐亞大陸時代、食完就走搶完就殺嘅血腥傳統。好簡單,點解女真人(滿族祖先)要有男人紥辮依種習俗?就係為咗方便將個人頭割落嚟之後,縛響身上面方便攜帶,用以向上頭報人頭數。西方戰場對敵人嘅尊重同禮儀統統不適用於中国国情。可惜到咗20世紀文明時代,佢哋仍然咁做,咁就荒謬到咗一個點了。

6月20號,清國同國內外國人已經進入戰爭狀態,八國聯軍人齊,攻陷大沽口,向首都推進,6月21號,豆斗做咗佢一生人最大嘅錯事,俾人小足一百年嘅超巨大黑鑊,就係頒發宣戰詔書,對八國聯宣戰!


後世人笑佢不自量力同宇宙宣戰,誤咗大清。但睇番當時嘅形勢,宣戰同唔宣戰根本冇關係,局面完全失控,有冇份詔書出現,八國聯軍亦一定入京。而且響外交層面去睇,八國聯軍響清政府未同意下向北京發動軍事行動平定義和團,清國最高領導人發聲明進入戰爭狀態亦係正常外交辭令,既然清政府將外國軍隊行動定性為侵略(正如將六四事件定性為暴動),咁呼籲全國人民奮戰保家衛國亦係正常舉動。當然認識歷史事件嘅你,知道真相並唔係咁樣。

但由宣戰嗰日開始,義和團正式「被」合法化,豆斗諭旨稱佢哋做「義民」!並接受政府正式規管,獲派發槍械武器,變成國家民兵部隊。寫到依個位,好荒謬喎?但係大家可能將因果調轉咗,宣戰對付洋人係一般人嘅理解,但我覺得宣戰一著,係用嚟對付暴民多啲。借住宣戰為藉口合法化義和團,將佢哋火速收編,某程度上係想維持番京城嘅基本秩序(打洋人好喇,唔好打劫滿蒙貴族啲資產呀,understood?)!又調動其中10萬義民,迎擊正從大沽口進發過緊嚟慨20000人八國聯軍,豆斗係智將,當然知道仇洋派官員率領義民民兵對洋人正規部隊後果會點……(三個字:唔死就奇!)

1900年6月,亂中有序,序中有亂,對中有錯,錯中有對,你中有我,我中有你,豆斗諗嘅嘢唔係好多人明。但事後証明,佢先係最後嘅勝利者,話佢係運用權術出神入化嘅馬基維利主義者,就係咁解…

下一集我哋講吓,大清嘅好朋友日本人,點樣利用呢個時機同埋空檔,聯結奪命書生,發動大清國土內嘅第一次民族革命!

#常威 #大清亡國關慈禧蛋牛治 #慈禧太后 #晚清歷史 #義和團


[bouncer] 【大清亡國關慈禧蛋牛治】實體購買

https://www.382now.com/product?id=87

#good# 【大清亡國關慈禧蛋牛治】

https://play.google.com/store/books/details?id=C3hjDwAAQBAJ


跳至第



  快速回覆 - 輸入以下項目

本討論區現只接受會員張貼文章,本站會員請先登入。非會員人仕,您可以按此加入為新會員,費用全免,並可享用其他會員服務。


上次光臨時間: 18/2/2019 3:31
今天貼文總數: 661 | 累積文章數目: 6,465,993

聯絡我們 | 服務條款 | 私隱政策 | 廣告查詢 | 職位空缺
Copyright © 2019 HKGolden.com. All Rights Reserved.