主頁 高登熱話 吃喝玩樂 科技消費 名人專訪 短片
現有會員可[按此]登入。未成為會員可[按此]註冊。
[公司模式 - 關]  [懷舊模式 - 開
[Youtube 預覽 - 關]  [大字型]  [小字型]

您現在聚腳在 學術台內。

與時並進 重新出發

接手高登CEO至今已經有八年,一開始知道要代表高登出席唔同場合,都擔心會俾人起底,但最後決定豁出去以真面目示人。記得上任唔夠一年,就遇到高登歷年o黎最嚴重o既事件 — — 被告誹謗。最初我以為對方只係「嚇o下大家」,殊不知官司一打就打o左五年,最後打到上終審法院至告一段落。當時所受o既壓力大到難以形容,幸好得到好多會員o既支持,甚至有會員自發希望o係財政上給予支持,至今我仍然非常感激。不過,就呢單訴訟我o地花費o左超過7位數字o既律師費同賠償,換o黎法律上清晰釐定討論區要為會員發言負上o既責任。

除o左經常要處理關於誹謗問題o既律師信,高登最常要面對o既就係網絡攻擊問題。其實我o地一直有為伺服器作軟硬件上o既更新,奈何網絡攻擊o既「攻勢」日益增強同頻密,唔少時候大家鬧緊我o地Server超慢,背後其實都係因為伺服器受緊唔同程度o既攻擊,唔單只程式員要用大部分時間o黎處理相關問題,我自己有時都要半夜起身,甚至身處外地時都要處理。面對呢o的攻擊,我覺得冇可能每次都同大家講,否則有o的敏感時間每日要出十次八次公告,大家可能睇到麻木。 ......
精選文章
跳至第

發起人
【常公子近代史】大清亡國關慈禧蛋牛治
260 個回應
幫手同我除去負評:o) :o) :o) :o)


睇緊robert hart
其實點解英國佬會派人幫中國 又唔係殖民
改完之後英國會有特別關稅優惠定點 [???]

唔係啊
赫德先生純粹係大清官員,同大英帝國冇任何關係
至於英國貿易關稅優惠,亦同赫德先生無關

wiki寫一開波係英國駐華商務總監 [???]
點解會跳槽咁搞笑 清政府又信得佢過請佢 英國又比佢唔撈轉工


幫手同我除去負評:o) :o) :o) :o)

已正皮 #good2#


維基資料出錯
赫德先生從未做過英国商務總監
佢係27歲離鄉到中國找尋機會,結果被大清聘請,由始至終都係一個清国人嘅身份係大清政府工作,實際上和大英帝國並無特別關係。


[banghead] [banghead] [banghead] 王維基是會出錯的


請正皮


【常威考証】為花柳治替慈禧平反(十三)

政治博奕嘅最高技巧,係殺人於無形。

平定太平天國之亂,出力最多嘅人係曾國藩同李鴻章,仲有大英帝國女王伊莉沙白一世,因為係佢大力主張出兵扶清。曾生係百份百愛國人仕,正途出身儒家忠君愛國(党)哲學支持者,出錢出力組織湘軍打洪秀全,打贏之後就立刻解散湘軍大部份主力,擺明車馬幫大清,慈禧見佢咁乖,昇到佢做直隸總督,令南方江浙系漢族仕紳勢力到達顛峰,北京班大食懶滿清貴族會唔會妥佢?你話呢?

洋務運動佢係領頭人,從外國購買機器,連同李鴻章響上海設立「江南製造總局」,用機器仿造西式軍用武器,重新裝備心口得個「勇」字嘅清軍。慈禧同奕訢係佢背後嘅大力支持者,可惜一場「天津教案」就擺咗佢上神檯。

兩次鴉片戰爭割地賠款,火燒圓明園,太平天國又攞住「基督教」三個字起義,死成二千萬人,普羅民眾仇視洋人就係理所當然,民間愚男愚女亦最like人話乜佢話乜(到今日都係)。同治九年1870年,天津發生反洋教事件,事源法國天主教傳教士響天津望海樓強佔民地起教堂,積聚民怨。其時天津又有拐帶幼兒案件發生,拉到嘅拐子佬又話自已係法國神父主使,加上傳教士主理嘅育嬰堂因傳染病(天花)死咗三四十個孤兒,於是群情洶湧,成萬人包圍教堂,最後殺人放火,二十個傳教士同洋商被監生打死,身首異處!

事件即刻昇格上外交層次,英美法等七國聯名向清政府集體抗議,並集結軍艦於天津外圍港口示威。好嘞,咁點拆先?放火係你?打死人又係你喎?同埋你又冇軍艦?又唔夠惡又唔夠打?拆條毛咩?但大清就偏偏派咗曾國藩去拆依單嘢!(對佢真係好嘞……)

拆?

肇事者20人斬頭,充軍25人,天津知府流放黑龍江,派人去法蘭西道歉加賠錢,盛惠50萬兩白銀(折算今日一兩白銀值$300蚊港元左右購買力,即付1億5000萬港元)。吓?咁仲唔係賣国賊?仲唔係漢奸?仲唔係汪精衞?仲唔係劉少奇?輿論同全國上下一致狂隊曾國藩,之後佢仲被燉瓜菇由直隸總督變番兩江總督,曾(蔭權)硬食依隻政治死貓,有口難言,鬱住鬱住,過咗兩年1872年仲死埋,享年六十有一咋。

講真,曾生明顯係政治鬥爭嘅犧牲品,天津教案單嘢邊個傾就邊個死,同埋根本亦冇得傾。歷史上有兩個觀點,第一個係北京以奕譞為首嘅「滅夷派」推曾生去死,目的為咗削弱慈禧太后為首「洋腸派」嘅勢力。第二個觀點係滿清貴族集團(包括慈禧在內)要對付江南不斷坐大嘅漢人士大夫集團勢力,所以要揾蔭權嚟祭旗。

我信前者,1869年有「安德尊事件」,1870年有「天津教案」,兩者明顯衝住慈禧而來,典解?因為同治一日一日長大,就快出場親政,改朝換代日子嚟緊,新一輪權力交替快將上演。

下次繼續……

[img]https://upload.cc/i2/hZfeM4.png[/img]


【常威考証】為花柳治替慈禧平反(十四)

踏入十九世紀七十年代,眨吓眼,慈禧已經管治咗大清差唔多十年時間,頭十年,佢嘅成就有目共睹,大清由一個肺Can三期病人退返到二期尾,面色稍為好轉,未死得住。慈禧作為一個三十歲左右嘅女人,能夠有效平衡各方勢力,曾李嘅親西方羊腸運動繼續進行(泛民),滿清貴族集團滅夷保守派(愛港力量)亦唔敢玩嘢,可以話,都係慈禧嘅權謀運用得宜嘅結果,後世人話佢係個冇用低能嘅大嬸,依個説法其實已經完全可以推翻曬。


不過權力鬥爭仍暗中進行,「安德尊」事件令慈禧仇視慈安同奕訢,「天津教案」,以醇親王奕譞為首嘅「滅夷派」成功斬去慈禧洋腸運動左右手之一嘅曾國藩,加上同治皇帝親政在即,慈禧要開始籌備點樣退落嚟(或者有咩方法唔退落嚟連任多幾屆)。


同治帝載淳(細龜)係慈禧親生仔,自幼比翁同龢教導正統儒家哲學思想,立心要做個救民於水深火熱嘅好皇帝,不過佢嘅能力明顯好低,翁同龢就響日記透露過同治「寫字唔靚」「成日唔想返學」「見書就怕」「唔識作文」「思路不開」……,如果我冇估錯,同治應該係…………低能嘅!唔係,有小小「讀寫障礙」啫,佢唔鍾意讀書最鍾意玩,鍾意聽歌(戲曲),仲成日同啲親王friend(恬親王)太監你夜晚偷偷出宮去蒲,史稱「微服叫雞」!


以慈禧性格同智慧,佢冇可能like有小小seven嘅細龜,一定覺得佢爛泥扶唔上壁,1872年初,同治要結婚,有兩條女佢揀邊個做皇后,第一個係慈安揀嘅阿古特氏(唔係曼城前鋒阿古路),另一個係慈禧心水富察氏,但同治偏偏唔聽親生老母話,揀咗前者,慈禧當然唔like,因為阿古特氏外公係端華,即係辛酉政變中八個顧命大臣之一,慈禧發動政變時被賜令自盡!但冇計,皇帝揀皇后係大曬嘅,不過依件事令兩母子關係正式破裂,有史書記載慈禧甚至發脾四,唔俾細龜住響中宮,同老母再冇嘢講嘅同治,更加放縱自己,出宮夜蒲次數更密(根本唔駛理由嘅,佢鍾意滾吖嘛)。

洋曆1873年2月23日,同治正式親政,大清嘅最高權力落入一個17歲喜愛夜蒲嘅年青人手中,而慈禧同慈安亦結束「垂簾聽政」局面,正式退番入後宮,理論上不再涉足政治,只能安心終老。

嗰一年,慈禧38歲,正值人生智慧同歷練最高峰之際,要一下子放低曬所有權力退隱後宮,其實冇咩可能,況且大清響佢手上剛剛恢復過嚟,交俾有小小低嘅細龜打理,唔死有鬼?但慈禧要再上場,必需有一個特定條件:

細龜要死!

[censored] [censored] [censored]

[img]https://upload.cc/i2/CFLPfx.png[/img]


維基資料出錯
赫德先生從未做過英国商務總監
佢係27歲離鄉到中國找尋機會,結果被大清聘請,由始至終都係一個清国人嘅身份係大清政府工作,實際上和大英帝國並無特別關係。

有無其他網上source可以睇下 #adore#


你去圖書館
查Robert harts,看一些專晝,就會一清二楚

sorry 網上資源好多都不可靠,因為呢個世界上有國民黨有共產黨仲有五毛:o) :o) :o) :o)


冇負皮了


【碌葛男人嫁得過】線上購閱
https://play.google.com/store/books/details?id=e1N7DwAAQBAJ

[img]https://upload.cc/i1/2018/11/22/wLZYAc.png[/img]


【常威考証】為花柳治替慈禧平反(十五)

響中國家長式中央集權嘅帝制系統內,最高權力成日會無厘頭落入一啲seven-head手中,同治就係個好例子,佢能夠做皇帝,只因為血統(天命)同運氣,以佢嘅能力,睇怕響鳳來樓做個龜公都未必勝任。

登基之後,同治細龜仍然要返學,成個大清皇宮裡嘅高級知識份子仍然想細龜有出色小小,但細龜依然故我,返學時「毫無神采,且多嬉笑」,一放學就想辦法去玩,事實上佢嘅表現同一般十六七歲嘅二世祖(富九代)冇咩分別,但好衰唔衰,佢係一個人口接近三億古老帝國嘅最高統治者。

初初登基頭幾個月,細龜仲扮正路,但後來就成日偷懶日日射波,因為喜愛夜蒲,結果好晏起身,接見官員嘅人數愈來愈少,有時甚至一日見得一兩丁友,辦公枱上嘅文件(奏章)堆積如山,佢根本睇唔曬,好多亦唔睇就批,用朱砂筆寫句「知道了」(康熙名句)「依議」就算數,根本冇心處理,好好哋大清 嘅一場開放改革就咁樣開始放慢步伐……

響後宮仍然牢牢掌握大清實權嘅武則天慈禧唔會唔知道佢啲衰嘢,佢嘅失望情緒一定不斷昇溫。但阿細龜仲唔知死,除咗成日「微服叫雞」外,親政之後,更將京城妓女(唔知如煙有冇份?)帶返紫禁城內尋歡作樂,佢個終於朵臭曬,全個北京城,人人都知道大清出咗個叫雞皇帝,Yeah~~~!

響佢任內,法國人入侵越南,中國派兵幫拖(唔駛講又係慘敗收場)。對面海另一個年青人(另一件治),1852出生,當時20歲出頭嘅明治天皇就真係有為青年嘞,1867年德川幕府大將軍德川慶喜「大政歸還」,明治天皇重掌最高權力,勵精圖治,活力十足,能力超卓,大日本帝國正式掘起,1874年擴張領土,第一個目標係大清領土臺灣,同治下旨增強臺灣防務,或者當時同治與大清上下(包抬慈禧)仍未覺悟,大清嘅最大敵人已經稍稍出現鳥…………

細龜呢?響依個時候,佢發表咗佢任內最大嘅一個政績工程,就係修建国仇家恨云集一身嘅圓明園……人哋明治想辦法努力揾錢,你同治就諗埋啲屎橋努力駛錢,唯有一句,Hi Aunt!

唔怕貨比貨,做人真係唔好比較咁多……下次carry on!


[bouncer] [bouncer] [bouncer]

[img]https://upload.cc/i2/mNGL7I.png[/img]


【常威考証】為花柳治替慈禧平反(十六)

同治細龜用現代詞彙去形容,叫廢青。

佢親政前後唔夠兩年,最偉大嘅政績工程係提出重建圓明園,但大清庫房根本唔夠錢,工程進行咗一排就要斷尾。同治為此扯火好嬲,仲因此公開Hi恭親王奕訢Aunt,攪到要慈禧出面去拆。重建圓明園工程Stop la,同治並未放棄其「逃離紫禁城」生活嘅夢想,又開始修建「西苑」(即今日中南海)。

點解又重建圓明園同西苑?原因好簡單,並唔係咩重建大清聲威,以雪國恥,廢青就係冇咁大嘅夢想架,細龜只係想學明朝荒淫大帝正德朱厚照一樣,興建「豹房」居住,永遠逃避紫禁城內親生老母同嗰班大臣嘅約束,全宇宙都知,細龜最鍾意玩同滾,成日比人管住,又要讀書又要睇文件又要開會,佢又點會Happy先得架?要玩就要玩盡啲玩顛啲,晚晚帶女返來,就唔可以繼續住響紫禁城內,起個新竇比自己住,就係十八歲嘅細龜嘅終極夢想。

響同治壓力下,修建西苑工程馬上撥款動工,1874年夏天至冬天,同治成日去視察工程進度,絶對唔俾好似高鐵同港豬噢大橋一樣死拖難拖……

直到有一日,佢冷親,病咗。

1874年12月8號,同治開始出疹,御醫判斷為生天花,之後病情加劇,全身出水泡滲血,大鑊喇。國家唔可以冇人話事,同治病重期間,慈禧已經重新出關審批奏章,第十六日,細龜病情有好轉跡象,但好快又「腰間紅腫潰破,浸流膿水」,拖到1875年1月12日蒙主寵召正式去見努爾哈赤。依個短命皇帝死嘅時候得18歲,有人話佢係死於花柳(梅毒),但係佢亦有可能真係死於天花,因為同治姐姐亦響2月5日死於天花。同治駕崩,成日陪佢花天走地嘅一班friend同太監都被重罰,有人被開除貴族資格,亦有人充軍黑龍江。


同治死後,佢老婆曼城前鋒阿古路亦展示其儒家哲學嘅偉大情操,絕食殉夫,3月27日監生餓死自己於宮內,阿古路絕食身亡,相信被逼成份居多,傳聞佢仲有身孕,一屍兩命添,佢唔死,生個仔出嚟,慈禧咪冇得重新執政?如果阿古路生咗仔承繼皇位,咁佢先係皇太后,係佢「垂簾聽政」唔係慈禧喎……。左睇右睇,同治杏加橙後最大得益者係邊個?咪佢親生老母慈禧囉,因為同治最後冇仔生,冇人承繼皇位,慈禧「唯有」選擇醇親王奕譞同慈禧細妹生嘅仔載湉繼承大清皇位,佢就係之後夜祭珍妃嘅光緒帝,光緒嗰陣三歲仲未識自已屙屎,咁嘅局面,唯有有請小鳳姐再出場。


慈禧同慈安響群臣嘅巨大「壓力」下,被逼再次「垂簾聽政」,重新執掌大清政權。廢青瓜柴,明君回歸,成個大清舒服曬,當時人人都係咁諗。究竟係唔係慈禧一手安排害死親生仔同治?(權力面前,親生仔都冇情講)冇人知囉,但我信,因為慈禧絕對有動機咁做,佢亦有能力咁做,下次分析吓我依個論點。


[bouncer] [bouncer] [bouncer]

[img]https://upload.cc/i2/RD6yo3.png[/img]


【常威隨便噏】由十九世紀嘅大清思考今日嘅香港

今日叉開一筆。

地府裡有牛頭馬面話所有嘅歷史都係現代史,歷史只係比人用現代嘅角度去思考事物嘅本質。

十九世紀七十年代,成個歐洲高速向前,尤其係科技,同治微服叫雞嘅時候,麥士維(James Clerk Maxwell)已經發現電磁力嘅基本原理,人類亦由「蒸汽時代」邁向「電力時代」,醫學,化學發展亦一日千里,顯微鏡下化學家發現粒子世界,化學元素理論誕生,整個物質世界嘅神秘面紗即將被揭開。政治經濟方面,當中國嘅資產階級尚未形成嘅時候(講來講去,成三億人口民族資本家得個紅頂商人胡雪巖……),歐洲工人階級已經開始醒覺,馬克思「共產黨宣言」發表,要全世界無產者團結起來推翻資產階級,1848年嘅歐洲大革命遍地開花,1871年巴黎公社短命政權建立,為資本主義制度嘅必然性投下核彈。當成個世界不斷變化同向前邁進嘅時候,大清做緊乜?

大清攪羊腸運動當然想竭力趕上世界潮流,但佢哋嘅上層建築同貴族階級仍醉心於權力鬥爭,醉心於維護自身嘅既有利益同原來嘅守舊遊戲規則,拒絕接受大規模嘅改革,拒絕洗牌,甚至有部份人(例如奕譞)拒統發展西方科技,教育制度依然是卜卜齋四書五經考科舉做貪官,科技新思維發展無法響民間傳播擴散,一句「中學為體,西學為用」道盡當時一切嘅荒謬同愚昧。與大清一齊起步攪羊腸運動嘅日本,明治天皇大刀闊斧拋棄舊觀念舊世界,全盤西化,大力發展科技同資本主義生產模式,清日比較下,結果顯示咗響之後發生嘅甲午戰爭。

今日嘅香港又點jet?

其實同19世紀嘅大清都好似,如果七八十年代係香港嘅康雍乾盛世,現在嘅香港就係嘉慶中葉。踏入21世紀,全世界著眼於科技(互聯網)發展,今日香港最值錢嘅0700騰訊都係科技股啦,香港自己呢?繼續固步自封,繼續攪自家制房地產全融周邊產品炒賣生意,繼續塘水滾塘魚,既得利益者拒絕接受新事物同新遊戲規則,堅定不移沿用舊路,堅持住以往三四十年一直運作嘅舊體制繼續獲利賺錢,結果成個香港比佢哋攪「灣」曬,成個局面嚴重滯後於世界科技潮流,冇自家科技產物、冇自家科技品牌,工業掏空,基礎萎縮,加埋愚民政策,大家痴痴呆呆坐埋一枱,大家只見眼前有座大山,睇唔到大山後仲有山,大山後仲有山……嘻嘻哈哈,用嘅係人哋嘅科技成果,玩嘅係人哋嘅遊戲,自己呢?香港嘅科技呢?

妖!可能你會反駁,駛鬼識科技咩?玩財技就夠囉!但香港人千萬唔好以為人哋唔識玩財技成個世界剩係得你識,人哋眨吓眼已經玩財技玩得叻過你十倍鳥,你仍未發現,仍未覺悟,仍然自己以為自己好叻……我至叻,咪成個問題所在囉,陰公豬。

大清亡國,亡於蠢。香港人不蠢,共勉之。

下次講番慈禧殺子嘅心理側寫。

:o) :o) :o)

[img]https://upload.cc/i2/GAuoUv.png[/img]

【大清亡國關慈禧蛋牛治】全集,請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me


[shocking] [shocking] [shocking]


【常威考証】為花柳治替慈禧平反(十七)

常威響母體(地府)內遇見過一個意大利人,叫馬基維利(Nicolo Machiavelli,1469-1572),佢生前寫過本書叫《君王論》,教人點做皇帝同領導,堪稱厚黑學元祖,佢首先將政治同道德分開,兩者基本上全無關係;其次簡單啲講,為咗鞏固權力,君王應該不擇手段,帝王之術理應超越一般人嘅道德倫理層面。後世稱呼依類超越平凡人嘅成功帝皇典範,叫做「馬基維利主義者」。慈禧,東方維多利亞女皇,佢絕對係「馬基維利主義者」一員!


史上最偉大嘅「馬基維利主義者」叫毛澤東,另一個叫史太林(希特拉唔入流,相對前兩者,佢只係一個瘋狂愛國嘅顛佬)。


慈禧出身名門望族,自幼接受滿蒙最高等教育,知書識禮,一等一貴族專業人才,佢比同時代嘅滿蒙八旗貴族女人智慧高出十幾班,被選入宮後,好快成為無能丈夫(咸豐帝)嘅得力助手,共同處理帝國政務,經歷辛酉政變、英法聯軍、平定太平天國、開展洋務運動,每件大事都手到拿來,操縱政治權術嘅技巧超越咗佢嘅年紀同應有視野。1862年後,響重建垂死大清嘅事業上,毫無疑問慈禧做得非常超卓,可惜礙於儒家宗法帝皇制度,佢必須響如日方中嘅時候將最高權力交予成年嘅同治帝,退隱後宮終老,以慈禧嘅才能同野心,一定唔甘心,況且同治能力非常低(理論上佢係慈禧親生仔,冇理由咁弱雞,以優生學血統角度,只怕另有內情,我常威話嘅),而且唔聽話(揀老婆阿古路事件),慈禧殺子,重奪政權,亦是有跡可尋。


而且同治死後,慈禧立三歲嘅光緒帝,延續垂簾聽政,動機就更加明顯,所做嘅一切,無非都係延續佢嘅絕對統治權。光緒載湉係「滅夷派」首領醇親王嘅獨生子,妹夫醇親王一直係慈禧改革開放事業上最大嘅敵人,奪去其子,一則係報番安德尊單嘢嘅血仇;二則將醇親王綁架埋響同一條船上,醇親王成為皇上生父,被迫辭去一切職務,以避免利用特殊地位干政嘅嫌疑,一石二鳥,既可繼續垂簾聽政,又一嘢架空妹夫權力,從此之後,醇親王再冇影響力同發言權,只可以乖乖做慈禧身邊嘅一條狗。


殺子文化(唔係真係殺),響古代中國並唔罕見,大清律例就明言,父親有權力以暴力形式懲罰子女,父權文化基礎在此。況且為人父母者,心態上最唔想發生嘅係「自己叻過個仔」或者係「個仔俾人話係低能嘅」,每個父母都想仔女叻過自己,做自己做唔到嘅嘢,去自己去唔到嘅高度,以今日香港為例,自己做唔到醫生律師,就想仔女做醫生律師,自己入唔到三大(港大、中大、科大),就想仔女入到三大,結果兩歲半唔夠就死谷難谷,兩文三語,要贏在起跑線上咁話,結果,無厘頭奪去仔女幸福童年,仔女冇得玩電話冇得打機就對父母心生怨恨,到大咗,仔女讀書唔得,入唔到三大,父母就話仔女唔爭氣,不知所謂,於是兩代關係就此決裂,依啲事十常八九,你唔好話未見過?而且父權主義大曬,子女做唔到父母嘅期望固然有交嗌,但係如果仔女太叻超越咗父母嘅控制範圍,亦一樣會有事發生,君不見香港現今世代之爭,上層建築打壓嘅唔係冇出息嘅一群,反而係太有出息同太有遠見嘅一群。子女不成器可殺,子女不聽話亦可誅之。放於帝皇之家、名門之內,鬥爭只會更暴力,作為一個「馬基維利主義者」嘅慈禧,更將自身權力放響首位,同治嘅死同光緒之後嘅悲慘命運,其實唔難預見。


同治唔係死於花柳咩?響內宮要殺一個人,其實易過借火,只需要一種無色無味無跡可尋嘅「毒氣」就得,我常公子唔係講武俠小説,係講科學,see you next time……

#hoho# #hoho# #hoho#

殺子,乾杯。

[img]https://upload.cc/i2/LWvyFr.png[/img]


【常威考証】為花柳治替慈禧平反(十八)

有聰明嘅網友已經知道我常公子今日要講一氧化碳(Carbon oxide)依種無色無味嘅奪命氣體。

我常威響地府翻查明清兩朝歷史,發現大量神秘死亡個案,往往響權力交替日子,就無厘頭有好多皇帝身邊嘅人神秘暴斃,其中以嬰孩佔嘅百份率最高,自從朱棣將帝國首都從南北遷到北京,取暖問題就成為咗問題。去過北京都知,冬季北京氣溫可以跌到落零下十度,古人冇暖氣,用嘅取暖方法係燒煤(炭),響密閉空間內燒煤會產生一氧化碳,個人相信,皇宮內唔少死亡個案都係死於一氧化碳中毒嘅意外。

明清古人當然唔知道吸入一氧化碳氣體(CO)後,佢會將血液內嘅氧氣(O2)奪走,令大腦缺氧暴斃,其原理大約要去到十九世紀中後期先被歐洲人發現,但中國人亦略知一二,稱作中「煤毒」,但古人相信煤毒係由於燃燒品質唔好嘅煤先會有,皇室取暖,當然用最上等嘅山西靚煤,無煙,耐燃兼高溫。所以我常威相信以一氧化碳殺人於無形的技術其實一早就有,只不過冇人講過出嚟,分分鐘依招係大內最高秘密都未定。嬰孩病人,在寒冬季節更加要取暖,太監密封門窗,加重煤量亦係理所當然,內裡有冇和密任務,相信冇人敢爆響口。同治死嘅時候係1875年1月12日正值北京寒冬……

我冇証據話慈禧殺子,不過同治死後,慈禧重新掌權,隨即大展拳腳,加重開放改革力度,1875年慈禧將接任曾國藩做直隸總督嘅李鴻章召入北京,一連幾日同佢商討大計,用李鴻章嘅講法,慈禧係「悲傷迫切之中大有勵精圖治之意」,喪子有悲傷,但執政卻寧舍醒神!依次同李鴻章嘅會面,堪稱大清改革嘅里程碑,會面之後,慈禧決定做幾件大事:

1.派出公使去英國考察,正式直接向西方學習強國勵兵之道。

2.堅持收復新疆,左中棠負責全盤軍事行動。

3.經過同治年間響越南邊境同法國衝突,以及日本有侵略臺灣意圖,慈禧非常清楚建立一支強大海軍嘅重要性,北洋艦隊與南洋艦隊項目正式擺上Agenda!

大清就要勃起來鳥!

[bomb]al [bomb]al [bomb]al

[img]https://upload.cc/i2/eUvAXn.png[/img]


【常威考証】為花柳治替慈禧平反(十九)


上次講過1875年嘅慈禧要做三件大事,先講第一件出使外國。


慈禧早就想派遣使者到西方考察,可惜朝中大臣冇人識講英文(係真架陰公豬),早響1867年,註華六年哈佛畢業嘅美國人Anson Burlingame就曾代表中國出使歐美,佢代表中國見過美國總統Andrew Johnson,英國維多利亞女王,法國拿破侖三世Napoleon III,但代表團中只有兩個係中國人,依次出訪冇乜成績,純粹say hi to everybody!等全世界知道有大清依條國際大水魚存在。


1875年,終於有個識講英文嘅大清官員出現,佢叫郭嵩燾,識得ABC,佢當然係一個洋腸愛好者同改革者,帝師翁同龢就話佢係「喪心病狂之徒」,1875年8月31日,慈禧任命佢做「出使英國欽差大臣」,奉命去大英帝國正式考察,郭嵩燾當然將佢見到嘅一切美好西方事物介紹比大清同慈禧,例如科技,制度,甚至君主立憲、民主……等等,可惜,大清國內嘅士大夫階層完全唔能夠接受新事物,好似有人要響香港攪高科技產業同攪港獨咁……當其時人人唾罵郭生,話佢係狗,話佢「有二心於英國」「要中國對英國稱臣」……大清嘅士大夫階層同貴族真係不知所謂到咗極點,當人蠢到一個點嘅時候,的確係無藥可救。


郭嵩燾並冇比慈禧勁小,相反慈禧同恭親王好欣賞佢嘅意見,之後仲委任咗佢做駐法國公使(外交官),郭生之後,慈禧陸陸續續派人出國,響歐美設立使節處理外交問題同聯絡,希望同世界接軌。10年後(人生有幾多個10年?),1885年,慈禧決定系統化派官員出外考察,10年後,出國成為士大夫潮流,甚至要通過語文基準考試合格先可用公帑出洋考察,慈禧大力推動政策,為大清全面現代化播下種子。


慈禧勁?係勁!慈禧洋化大清正路?啱!


可惜礙於國內士大夫階層嘅滿蒙貴族保守勢力抯撓,成個洋化過程太慢鳥,同期嘅日本帝國同大清做同一樣嘢,而人哋就快你十倍,考察到啲乜,唔傾唔諗照搬番東京照做,學洋人就學足100%,(有興趣朋友可以睇睇湯告魯斯套西片「最後武士」)唔洋化就殺,就邊緣化你,唔侵你玩,拋開一切,大刀闊斧食洋腸!兩者比較結果係點?遲啲咪知囉。


大清洋化進程輸比日本,因為中國大過日本好多,人口亦多過日本成十幾二十倍,背負嘅歷史包袱比日本重十幾二十磅。最重要嘅係日本人知道自己瀨晒嘢,想儘快翻身。而大清仲有一部份人(甚至大部份)以為自己仲係十六七世紀康雍乾盛世嘅天朝大國,要乜有乜,拒絕改革,拒絕洗牌。今日香港,仍有唔少人以為香港仲係八九十年代領導全亞洲嘅香港,懷緬昔日光輝,一樣拒絕改革,拒絕洗牌,以為香港人三個字仲係海獅威威,爛船的確仲有三根釘,但船底穿窿,最後一樣會沉……


下次講左中(宗)棠打伊斯籣教!


[flowerface] [flowerface] [flowerface]

[img]https://upload.cc/i2/L6dYqC.png[/img]


【常威考証】為花柳治替慈禧平反(二十)

1875年慈禧委任左宗棠為「欽差大臣」,處理收復新疆軍務。


左宗棠同曾國藩李鴻章一樣,以漢人身份平定太平天國之亂上位,三人都係南方紳士財金勢力嘅代言人,曾李同屬一黨,左先生同佢哋唔啱,冇計,角色重曡兼利益衝突。曾國藩因「天津教案」落馬,年輕左宗棠十年嘅李鴻章坐收漁人之利,一人獨大,代表整個南方漢族士大夫階層加土豪鄉紳勢力同大清瓜分半個天下,左宗棠冇眼屎乾淨盲,為咗避開李鴻章,自己向西北面發展,1867至1873年間鎮壓捻軍同西北回民有功,留督陝西甘肅,成為封疆大吏,與李鴻章一樣,支撐住整個大清。


1864年,趁住太平天國之亂,中亞浩罕汗國軍官阿古柏(Yakub Beg)(唔係曼城前鋒阿古路)乘機入侵新疆南部,建立伊斯蘭政權,1871年俄國沙皇亞歷山大二世入侵新疆北部,強佔伊犁地區。到咗1875年,新疆依片(自古以來,2000多年來)都屬於中國嘅廣大領土已經岌岌可危。左宗棠力主出兵收復新疆,而佢嘅政治對頭人李鴻章則希望唔動武以外交手段解決新疆問題。


依個亦係大清「塞防」同「海防」兩個戰略意識形態之爭,左宗棠認為大清最大嘅威脋嚟自陸路邊疆(俄國,伊斯蘭教),而李鴻章則認為最大嘅敵人係嚟自海上(日本,歐洲列強),資源重點投放響陸軍定係海軍身上?當時拗到面紅面綠,但大清始終係一個騎兵起家嘅政權,慈禧亦冇辦法擺脫打仗唔騎馬嘅傳統思維,結果都係信陸軍多啲,去到之後1884年海防嘅全年軍費只係三千萬兩白銀(以一兩白銀值300蚊港元,折算為90億),而陸軍軍費則為八千萬兩(240億)……甲午慘敗,計曬落李鴻章頭上,其實當時已經瓜咗嘅左宗棠功不可歿,明治天皇要多謝佢先啱。


1875年慈禧下令收復新疆,咁錢呢?冇喎!要求各省擠出軍費,亦唔夠(陰公豬……),於是左宗棠通過胡雪巖向外國銀行借錢打仗,借500萬兩白銀(1億5000萬),抵押品係全國各省嘅稅收同糧餉,開期票!當時最大筆嘅貸款來自上海英租界內嘅匯豐銀行(係呀!0005滙控呀!),外資就係用咁嘅手段,逐步操縱成個大清嘅經濟命脈,妖!鬼叫你窮咩?又窮又要威又要戴頭規!


好彩左宗棠爭氣,帶埋副棺材出征新疆,1877年底打敗阿古柏伊斯蘭殖民政權(維護了祖国嘅統一同領土完整)!威威!至於普京就打唔贏嘞,伊犁收復唔到。但打敗阿古路,左宗棠嘅人生亦攀上顛峰,1880年比慈禧召返入京(打贏咗仗,梗係杯酒釋兵權啦),入值軍機(內閣),成為軍機大臣、總理各國事務衙門大臣,管理兵務,其後撈咗兩年離京任兩江總督兼南洋通商大臣揾真銀!


新疆問題自古都係問題,新疆人信伊斯蘭教(即回教),語言唔同,種族唔同,相頭唔同,文化唔同,生活同飲食習慣都唔同,依種情況一旦分裂(被分裂)咗出去,就100%冇得返轉頭。之後二十世紀嘅大清國plus,即係滿州國(或稱偽滿州國)亦係相同情況,有人話,依個亦係蔣介石逼於同日本開戰嘅理由。放番響今日嘅臺灣同香港,其實分裂嘅可能性並唔大,因為兩岸三地大家嗰樣差唔多,大家仲用緊相同語言文字,擁有共同文化脈絡,至少大家亦肯自稱為「中國人」(或半個中國人),條臍帶永遠連結母體,要切割要好大工程。慈禧當年急於收復新疆,理由就係依個。


下次繼續講大清海軍血淚史。

[bouncer] [bouncer] [bouncer]

[img]https://upload.cc/i2/fhWcBt.png[/img]


【常威考証】為花柳治替慈禧平反(二十一)

1875年,日本頒佈《苗字必稱令》,規定全體國民必須有姓,一直只有名冇姓嘅平民,開始陸續同自己取姓,結果日本人千奇百怪嘅姓氏開始出現。用日本開頭,因為慈禧當時想做嘅第三件大事,就同日本有關。

創建一支現代化嘅先進海軍,相信就係1875年夏天慈禧當時同李鴻章一連三日碰面嘅主要話題。其時直隸總督李鴻章權傾天下,洋務派第一號人物,當時大清創建大部份現代工業,李生(唔通姓李都注定係有錢人)都有份參予。

叉開一筆,當時大清嘅國營企業股本都唔係來自公帑,因為大清基本上冇水,所以資金都係響民間籌集得來,錢係民間嘅,但管理同經營都係政府官員,咁得意嘅?因此本質上並唔係國營企業,而係「國營民企」。依個情況有兩個嚴重後果,第一,民間資本主義冇辦法高速發展,民族資產階層從未上過位,相對同期嘅日本就會一清二楚;第二,一有「國營」兩個字,就等同有「貪污」有「油水」有「上下其手」,中国人做官唔貪揾鬼信。

講番組建海軍(唔係水師)單嘢,由1875年慈禧拍板要攪,到1888年北洋艦隊組建完成足足用咗13年時間,龜速太慢囉(又要同日本比較)。當然要造船買船訓練官兵招聘員工需要時間,但李生揸Fit嘅「江南製造局」響1868年已經製造到中國第一艘軍艦恬吉號(排水量600噸)、到咗1872年海安號,排水量已經有2800噸,基礎響處,實在冇理由要到1888年先組建到北洋艦隊。

原因係李生有兩個敵人。

第一個係左宗棠,上文已提過佢兩個唔啱,左生平定新疆有功,入值軍機處兼撈過軍機大臣,撥款要佢簽名,佢唔攪李鴻章你信唔信?第二個係帝師(外號頭號攪屎棍)翁同龢,翁生來自江東,係安徽人李鴻章嘅天敵,吳人同淮人係世仇,原於五百年前朱元璋同張士誠嘅血腥爭鬥,兼且翁同龢係大清儒家哲學系統嘅發言人,李生係洋務派領頭羊(大英間謀),水溝油,又再加上太平天國之亂時,李鴻章插過翁同龢一嘢,翁生懷恨在心,響之後三十年處處攪住李生嘅洋務進程。但翁生仕途又一帆風順,出入軍機又做過軍機大臣,又係三個皇帝嘅啟蒙老師。由1875至1888年間,左生同翁生背後發力,拖慢北軍艦隊組軍發展,天下皆知。冇計,鬼叫你李鴻章咁鬼巴閉,捧打出頭鳥,中國人最鍾意內鬥內耗,基因嘛。人哋日本帝國?上下一心囉,真心擁護明治天皇囉,後發先至囉,最後一鋪清你袋囉。

無可否認,李鴻章係個出色嘅男人,係一隻漆黑中嘅螢火蟲,佢有多重身份,係淮軍軍頭、又係大清名臣、又係洋務派第一人、又係大英間諜、又係外交官、又係大清同國際社會間嘅聯絡人、又係半個資本家財閥、又係南方士大夫財金系統嘅首領……人得一個,手得一雙,時間一日得24小時,做得幾多吖?

關於依隻淒Hi中嘅螢火蟲,一集講唔曬,下次繼續……

[flowerface] [flowerface] [flowerface]

[img]https://upload.cc/i2/BA8jD1.png[/img]


【常威考証】為花柳治替慈禧平反(二十一)

1875年,日本頒佈《苗字必稱令》,規定全體國民必須有姓,一直只有名冇姓嘅平民,開始陸續同自己取姓,結果日本人千奇百怪嘅姓氏開始出現。用日本開頭,因為慈禧當時想做嘅第三件大事,就同日本有關。

創建一支現代化嘅先進海軍,相信就係1875年夏天慈禧當時同李鴻章一連三日碰面嘅主要話題。其時直隸總督李鴻章權傾天下,洋務派第一號人物,當時大清創建大部份現代工業,李生(唔通姓李都注定係有錢人)都有份參予。

叉開一筆,當時大清嘅國營企業股本都唔係來自公帑,因為大清基本上冇水,所以資金都係響民間籌集得來,錢係民間嘅,但管理同經營都係政府官員,咁得意嘅?因此本質上並唔係國營企業,而係「國營民企」。依個情況有兩個嚴重後果,第一,民間資本主義冇辦法高速發展,民族資產階層從未上過位,相對同期嘅日本就會一清二楚;第二,一有「國營」兩個字,就等同有「貪污」有「油水」有「上下其手」,中国人做官唔貪揾鬼信。

講番組建海軍(唔係水師)單嘢,由1875年慈禧拍板要攪,到1888年北洋艦隊組建完成足足用咗13年時間,龜速太慢囉(又要同日本比較)。當然要造船買船訓練官兵招聘員工需要時間,但李生揸Fit嘅「江南製造局」響1868年已經製造到中國第一艘軍艦恬吉號(排水量600噸)、到咗1872年海安號,排水量已經有2800噸,基礎響處,實在冇理由要到1888年先組建到北洋艦隊。

原因係李生有兩個敵人。

第一個係左宗棠,上文已提過佢兩個唔啱,左生平定新疆有功,入值軍機處兼撈過軍機大臣,撥款要佢簽名,佢唔攪李鴻章你信唔信?第二個係帝師(外號頭號攪屎棍)翁同龢,翁生來自江東,係安徽人李鴻章嘅天敵,吳人同淮人係世仇,原於五百年前朱元璋同張士誠嘅血腥爭鬥,兼且翁同龢係大清儒家哲學系統嘅發言人,李生係洋務派領頭羊(大英間謀),水溝油,又再加上太平天國之亂時,李鴻章插過翁同龢一嘢,翁生懷恨在心,響之後三十年處處攪住李生嘅洋務進程。但翁生仕途又一帆風順,出入軍機又做過軍機大臣,又係三個皇帝嘅啟蒙老師。由1875至1888年間,左生同翁生背後發力,拖慢北軍艦隊組軍發展,天下皆知。冇計,鬼叫你李鴻章咁鬼巴閉,捧打出頭鳥,中國人最鍾意內鬥內耗,基因嘛。人哋日本帝國?上下一心囉,真心擁護明治天皇囉,後發先至囉,最後一鋪清你袋囉。

無可否認,李鴻章係個出色嘅男人,係一隻漆黑中嘅螢火蟲,佢有多重身份,係淮軍軍頭、又係大清名臣、又係洋務派第一人、又係大英間諜、又係外交官、又係大清同國際社會間嘅聯絡人、又係半個資本家財閥、又係南方士大夫財金系統嘅首領……人得一個,手得一雙,時間一日得24小時,做得幾多吖?

關於依隻淒Hi中嘅螢火蟲,一集講唔曬,下次繼續……

[flowerface] [flowerface] [flowerface]

[img]https://upload.cc/i2/BA8jD1.png[/img]


【常威考証】為花柳治替慈禧平反(二十二)

今次繼續講隻淒Hi中嘅螢火蟲李鴻章。

早響1862年太平軍直逼上海嘅時候,當時嘅上海已經開埠二十年,係英國人同西方列強響中國嘅財金貿易總基地,為保住個錢罌,英國人主動出資比曾國藩手中一員猛將李鴻章建立自己嘅嫡系部隊「淮軍」,淮軍由最初只有6500人,到後來擴軍到6,7萬人,背後嘅資金差唔多全部來自大英帝國同西方列強,淮軍由英法軍官操練,配合新式武器同裝備,太平天國戰爭後期,淮軍仲同留響中國火燒圓明園嗰班英軍組成「常勝軍」,成為掃盪太平天國嘅主力部隊。

從此之後,李鴻章就同大英帝國連成一線。

李生比師傅曾生聰明,喜愛名譽多於權力嘅曾國藩為表示對大清忠心不二,戰後旋即解散湘軍,反觀李鴻章嘅淮軍則全面滲透入大清軍事系統內,其實當時大清陸軍,就即係李鴻章嘅私人部隊,冇兵在手嘅曾生,其後毀於天津教案嘅政治鬥爭,一生重名譽多於自己條命嘅曾國藩,竟以「賣國賊」之名結束自己一生,慘到PK。而手握兵權嘅李鴻章則冇人敢攪佢,慈禧仲對佢鬼死咁好,官仲愈做愈大,權亦愈揸愈多,成為東方卑斯麥添,歷史早就教曉咗一個定理:「槍杆子出政權」,揸筆做清流講哲學,最後Hi Hi居多。

李生背後金主係大英帝國,或者講係英國背後嘅大財閥,其後開展嘅洋腸運動,外國資金係主力。有傳說話,李鴻章其實係猶太人羅斯柴爾德家族Rothschild響中國嘅白手套(買辦)。2009年中央電視臺CCTV訪向過羅斯柴爾德家族後人,佢哋亦有承認家族響十九世紀末葉同李鴻章關係密切。其時中國最有錢嘅民族資本家叫胡雪巖(佢就係左宗棠背後嘅金主),李左唔啱,因為大家代表唔同嘅幕後金主響中國市場掠水,之後胡雪巖破產收場,李鴻章其實做咗好多陰質衰嘢(中國資產階級冇辦法彈起上位,主宰自己個市場,真係要多謝李鴻章架),有興趣嘅陽間朋友可以自己揾料睇睇,金融戰爭其實好鬼精采!


跳至第



  快速回覆 - 輸入以下項目

本討論區現只接受會員張貼文章,本站會員請先登入。非會員人仕,您可以按此加入為新會員,費用全免,並可享用其他會員服務。


上次光臨時間: 18/2/2019 3:44
今天貼文總數: 336 | 累積文章數目: 6,465,996

聯絡我們 | 服務條款 | 私隱政策 | 廣告查詢 | 職位空缺
Copyright © 2019 HKGolden.com. All Rights Reserved.