主頁 高登熱話 吃喝玩樂 科技消費 名人專訪 短片
現有會員可[按此]登入。未成為會員可[按此]註冊。
[公司模式 - 關]  [懷舊模式 - 開
[Youtube 預覽 - 關]  [大字型]  [小字型]

您現在聚腳在 學術台內。

有關解封部份帳號之事宜

早前收到各會員反映一些朋友的帳號可能因誤會導致被封,CEO與管理員團隊商討後,重新審核並決定解封部分只輕微觸犯版規、懷疑被駭的帳號。所有可得到解封的帳號(包括登入電郵及備用電郵)將會收到我們發出的通知,如有用戶收到電郵而未能正常重新登入,可以到「聯絡我們」(http://forum8.hkgolden.com/contactus.aspx)提供你用作註冊的電郵地址、後備電郵地址予我們跟進。

香港高登討論區管理員團隊
精選文章
跳至第

發起人
【常公子近代史】大清亡國關慈禧蛋牛治
392 個回應
總之李鴻章在位之時,大英帝國就響中國身上大做其生意,你攪自強不息四個現代化,我就上下其手袋袋平安,邊個係天才?邊個係白痴?李鴻章作為大英帝國買辦白手套(Spy),油水亦撈唔小,是旦舉個例,大清用1500萬兩白銀(折算港幣45億)向德國購買一批戰艦,李生手下就收5%回佣80萬兩白銀(2億4000萬港幣)嘞。李生過身後,有人估算佢有4000萬兩白銀身家(折算120億港幣),擁有土地超過250萬畝。(一畝土地面積大約係一個足球場大小,以香港九龍新界總面積約1066平方公里計算,李生坐擁大約16個香港土地),如果大清當時有ICAC,應該可以用「財富與官職收入不相稱」而請佢飲咖啡……(頂!ICAC又係英國人產品)

弊!又離罩鳥,下次繼續講番北洋海軍同李嘉誠,sorry,係李鴻章……

註:李鴻章有錢?未算。根據Forbes雜誌估算,到咗21世紀,羅斯柴爾德家族Rothschild約有50兆美圓資產,50兆係乜嘢概念?如果將50兆美元平均分畀地球上70億人,每一個人可獲得7萬美元。講掠水,中國人仲係小學雞,英國人都只有中六程度,猶太人先係大佬,咩人係猶太人?美國400個富豪家族中,猶太人佔23%;獲得諾貝爾獎科學家中17%係猶太人;美國華爾街金融精英有50%有猶太血統,仲有提芬史匹堡囉,Bill Gate囉,妮坦寶雯囉,馬雲囉……sorry,馬雲係中国人。

[369]al [369]al [369]al

[img]https://upload.cc/i2/G3NIWT.png[/img]

【大清亡國關慈禧蛋牛治】實體購買
https://www.382now.com/product?id=87 

 【大清亡國關慈禧蛋牛治】
https://play.google.com/store/books/details?id=C3hjDwAAQBAJ


【常威考証】為花柳治替慈禧平反(二十三)

上次講到組建北洋海軍單嘢,洋腸揸Fit人李鴻章孭重飛,依單嘢涉及幾千億工程,勁過幾條高鐵,識得掠,油水夠食十世。

好事多磨,響仇口左宗棠同翁同龢兩位夾擊之下,組建現代海軍工程拖拖拉拉(立法會唔撥款你吹得我脹咩?),進展有限,直至1884年中法再次爆發戰爭,件事先有轉機。

法國佬一直想吞拚越南,而越南一直都係大清嘅保護國(附庸國),多年以來,大清作為一個社團大佬嘅角色,已經為咗條「靚」多次同法軍發生衝突,之後甲午戰爭,大清又係為咗另一條「靚」朝鮮強出頭,最後攪到一身蟻,睇到依啲事,真係冇嘢好講……直到1884,中法兩國衝突浮面,法軍派軍艦威脅佔領臺灣,南海上同大清水師一戰,結果打都唔駛打,大清福建水師木船全軍覆歿。如果唔係陸軍爭氣嚟個諒山大捷,大清又要割地賠款一鑊熟。

慈禧終於明白海軍現代化嘅事唔可以再拖,中法戰爭,恭親王奕訢食正死貓,從此靠邊站退下歷史舞臺,慈禧從新起用光緒老豆醇親王奕譞(一啖砂糖一啖屎),1885年設立海軍衙門,任命奕譞為總理大臣,同李鴻章會辦現代海軍同海防事宜。講真,海軍嘅嘢傻Hi奕譞識條鐵咩?(神主牌囉)咪李鴻章一手包辨囉。大清撥下巨款擴建北洋海軍,向外國買大型戰艦,修建旅順、威海衛軍港,建立船塢同炮臺,聘請洋人訓練海軍……大刀闊斧,個人感覺,李鴻章成為百億富豪應該就係依段時間嘞。

中國人怕涷,鍾意圍爐,李鴻章亦唔例外,1888年,成為當時世界第六大海軍嘅大清北洋艦隊正式服役,北洋海軍揸莊人叫丁汝昌,另一北洋陸軍大佬叫葉志超,丁汝昌同葉志超都係農家子弟,未受過正規教育同軍事訓練,其中丁汝昌仲係太平軍出身,輾轉最後投靠李鴻章淮軍,係百份百自己友。後世人對丁汝昌評價好兩極,有人話佢忠党愛国(甲午戰敗後吞生鴉片殉國),亦有人話佢全無海戰經驗,係甲午慘敗嘅元凶,事後狗噏冇結論嘅,揾第二個做大佬亦未必打贏日本仔,而且幾千億project咁大壇嘢,比你都揾自己友揸莊喇,人之常情啫。

(大聲講)李鴻章冇錯嘅!

甲午戰爭嘅嘢留番甲午年嚟到先講,下次將鏡頭pen番去慈禧身上,睇吓佢點向左走向右走個新皇帝光緒。

[bouncer] [bouncer] [bouncer]

[img]https://upload.cc/i2/EoigwU.png[/img]


【常威考証】為花柳治替慈禧平反(二十四)

光緒嘅遭遇話比我哋知,做一個認真讀書、對國家民族有抱負同有承擔嘅年青人,到最後只有X街收場(除非你想提名諾貝爾和平獎)。做乜都好,就唔好做有為青年,中國依個大染缸,從來成功嘅只有古惑仔同馬基維利主義者,正直有為上進嘅年青人有一個用途:墊屍底。

1875年豆斗選擇四歲嘅光緒繼位,第一佢係自己細妹個仔,係100%自己人,第二係向「滅夷派」首領醇親王報復,奪去其獨生子,亦令佢成為皇帝親生老豆,被逼放棄一切既有權力,自此之後,奕譞再唔敢掂慈禧,再唔敢攪豆斗嘅洋腸運動開放改革,只能忠心做一條狗傻的嗎,慈禧依一著擺平奕譞,同時亦將奕譞身邊嘅反洋貴族勢力拉攏埋過嚟,從此在滿蒙貴族階層之內慈禧再無敵人,所有貴族都成為佢手中嘅人,豆斗為所欲為鳥。

但之後豆斗又扶番起奕譞,用佢嚟排斥恭親王奕訢,用佢嚟壓抑李鴻章,玩權力鬥爭玩內部矛盾,慈禧天下第二(第一當然係毛主席)。

光緒細路嗰陣,由慈安太后一手帶大,可惜慈安響光緒九歲嗰年死於腦中風(好食好住,長期養尊處優唔做運動,中風亦係常識吧?),江湖有風吹係豆斗毒死佢,但冇証冇據咬佢唔入,慈安死時43歲,豆斗仲要大佢兩年,慈安死埋,豆斗大曬,攪掂埋奕訢靠邊站,整個皇朝再冇人制衡到佢,豆斗亦正式成為咗「武則天」。

新皇帝光緒係個乖仔,翁同龢依條食古不化攪屎棍成為帝師,繼同治之後,再嘗試調教另一個儒家帝皇哲學系統下嘅「明君」,不過今次佢似乎成功咗,起碼光緒好鍾意讀書,冇好似同治咁係條冇用嘅雞蟲,我心諗,如果送光緒去讀劍橋牛津或者哈佛,甚至港大都好,光緒應該會有一番成就(唔係律師就係醫生),好可惜,佢成世人只係讀四書五經,仲要得朱熹注釋,官廷內嘅傳統儒家教育令佢冇辦法突破自己嘅眼界,冇辦法同現代世界接軌,同時亦束縳咗佢嘅高度,最後累死理佢。

光緒帝有一個好嘅腦袋,但係冇一副好嘅身體,歷史記載佢身體好差好虛,細細個好驚行雷,會比雷聲嚇到瀨尿(堅係瀨尿),每逢行雷閃電,要成班太監陪住佢先訓得著。佢嘅身體反應,表示咗佢嘅心理狀態,驚行雷?佢明顯患有「驚恐症」,佢身處禁宮仲係皇帝,有乜好驚呀?有!佢明顯係好驚豆斗,佢嘅人生就係活響慈禧嘅陰影之下。佢知道自己只係豆斗嘅傀儡,可以隨時被撤換(等於死),而且豆斗已經賜咗幾個女人比光緒老豆醇親王,奕譞亦生多幾件,成堆複製人出現可以隨時替代自己,光緒唔驚有鬼,你諗諗一個細佬成日驚死,有乜辦法唔患情綪病吖?

關於光緒嘅正直青年悲劇物語,下次繼續……

[bouncer] [bouncer] [bouncer]


[img]https://upload.cc/i2/1nQUPT.png[/img]


【常威考証】為花柳治替慈禧平反(二十五)

如果話光緒戴湉係中國皇帝中最慘嘅一個,大概都可以成立。崇禎煤山上吊做亡國之君,但畢竟都威過都話過事,同治衰衰地都微服叫過雞,光緒呢?

自幼個性內向、沉默寡言、努力讀書、憂國憂民,一心一意要做一個愛民如子嘅儒家仁君,每日柄埋自已響書房讀呀讀,以為四書五經中自有黃金屋(其實幾傻的嗎,毛澤東講得啱,讀書係會讀壞腦),佢以為自己可以改變個世界,依種性格,註定佢一生係一個大悲劇。

1886年夏天佢15歲,慈禧頒發懿旨,光緒明年16歲親政(講係咁講)……但係依個時候,成個皇朝大地震,個個都驚豆斗離開政壇,怕條年青人90後攪唔掂大清,於是成班大臣,包括李鴻章同奕譞都組織集體上書,要求豆斗留低(訓政數年),其實又係一場大龍鳳,左推右推後,豆斗終於充份「考慮」咗大家嘅請求,「勉強」同意留低執政多幾年……

16歲嘅光緒接班唔成功就開始發脾氣,書唔X讀了,成日玩射波唔上堂,屈埋屈埋,身體仲愈嚟愈差,三日見一次醫生,可能情緒太惡劣,佢竟然患上「遺精之病」,Sorry,我常威真係唔知咩病會成日夜晚遺精(應該幾大件事嘞),頭暈作嘔,手腳冰冷,成日冇力冇精神,亂發脾氣,氣虛聲弱……左睇右睇,應該係嚴重情緒病,精神衰弱症狀,(或者長期中鉛毒……)又或者佢只係患咗「強烈權力渴望症侯群」,要權就會好番曬,但豆斗又點會交權比你丫?自己柄埋被竇度遺精啦儍仔。

16歲冇得親政,過多兩年,1889年18歲要結婚了,一場婚宴盛惠550萬兩白銀(折算16億5000萬港元,哇!),貴又點?新娘又係豆斗欽點,今次係豆斗細佬桂祥個女,隆裕皇后個樣可以上google search到,睇到包你想自殺。光緒有幾憎自己老婆?話説有一次隆裕同佢請安,佢就一腳伸埋佢……

隆裕大光緒三年,21歲,光緒就最愛細自己5年嘅珍妃(13歲?今日要坐監架),珍妃鍾意素顏,作男性打扮(???)。民間流傳佢like珍妃,因為珍妃以男性打扮出現,並唔會加重光緒嘅行房心理壓力(遺精病後遺症),鍾意一個13歲TB打扮嘅女童?光緒係性無能?或者有特殊性辟好?自己諗啦。

大婚之後,皇帝已經大個仔,響儒家帝皇制度中,慈禧亦不得不將權力交出,慈禧可以擺平天下一切人一切事,但卻無法逆轉運作千年嘅儒家哲學宗法系統,而且1889年豆斗已經過咗五十,響當年嘅中國已經係百份百老友記(當時大清人民平均年齡約50),真係要考慮退休咯。

1889年夏天,18歲嘅光緒正式親政,大清響依個正直青年手上,正式邁向滅亡之路……

[bouncer] [bouncer] [bouncer]

[img]https://upload.cc/i2/LK6yfP.png[/img]


一枝穿雲箭 千軍萬馬來相見


【常威考証】為花柳治替慈禧平反(二十六)

曾經發生過一件咁嘅事……

1876年英商響上海私自興建咗中國第一條鐵路,全長20公里。(可以任意響人哋國內起鐵路,可見英國人當時幾X惡)見到火車啲中国貧中下農嚇到標屎,火車啟動時,有愚民拉住車廂希望拉停佢(當然唔得),之後仲有大人細路訓響路軌阻止火車前進,結果碌瓜咗一個,有人死,暴動就發生(天津教案翻版)。於是慈禧要求英商停駛鐵路,用公帑買咗成條鐵路並拆毀。傻的嗎到咗盡頭,我常公子想講,中華民族(sor,其實響1876年仲未有“中華民族”依個概念出現)嘅苦難係源於一種「集體性嘅亢奮愚昧」,依種愚昧狀態到幾時完結?1911?No!1949?No!個人感覺係1979……即總設計師鄧小平落實開放改革之後先得到明顯改善。踏入二十世紀之初,依種「集體性嘅亢奮愚昧」會將大清拖入最黑暗嘅深淵,但拳民之亂只係一個段落,半個世紀之後,1966年仲有一次將民族良知徹底滅絕嘅文化大革命發生……


講返漏嘢嘅光緒,響佢長大出毛期間,即1875-1885年間,大清嘅洋化運動開展得幾順利,由慈禧李鴻章牽頭,全国不少「官辦民企」同「官督民企」紛紛成立,展開大規模洋化生產方式。從軍工、造船、開礦、紡織、物流、通訊……瓣瓣齊。雖然大清仍然係一個農業為主嘅古老帝國,識字率不足1%,不過係當時的確有一番新氣象出現。

1886年光緒親政被延後,慈禧「勉強」訓政多兩三年,事實上亦係無可奈何,要知道1885年有場中法戰爭,大清幸運地唔駛total lost(非常少有),次年就政權易手,相信唔係一個明智選擇,我常公子多番強調慈禧係一個絕頂聰明人,馬基維利主義者,佢知道政權一定要交還比光緒,但交出之前,佢唔想自己二十多年來嘅開放改革努力毀於一旦,所以佢要多兩三年時間佈局先肯退休,一為神功二為弟子,好可能佢只係想光緒順利接手大清帝國,不致車毀人亡,其實係為咗劉晶好都未定。


豆斗嘅佈局主要針對當時功高蓋主嘅李鴻章。中法戰爭發生期間,李鴻章女婿張佩綸(1848-1903)孭隻大黑鑊(1884年8月23號馬尾港海戰,11艘清軍艦響兩個小時內被法軍擊沉9艘!!),依件事令北洋艦隊工程加速推進,同時壓低李鴻章氣焰,於是豆斗開始扶起張之洞(1837-1909)、劉坤一(1830-1902)等南方漢族大吏,製造內部矛盾,分散李鴻章嘅單一影響力;北方一面,豆斗亦重用滿族大員榮祿(1936-1903),重建遺失多年嘅大清皇族直屬軍事力量。(榮祿非常重要,因為佢提拔咗袁世凱依個人)南方抑壓李鴻章,北方交予榮祿主理,去到1888年,重量級投資嘅北洋艦隊亦組建完成,啲事做好曬攪妥曬,豆斗先響1889年敢將皇權交比光緒,其實一番苦心為咗佢好。

可惜光緒根本唔明豆斗嘅諗法,仲以為佢一心唔肯交權,於是自己晚晚響被竇打J扮漏精扮情緒病向豆斗逼倉,依個行為反映出光緒嘅高度同智力,同埋佢追求權力嘅強烈欲望,1989年親政之後,咪乜病都好番曬囉,正一Hi Hi仔。

豆斗終於可以退休了,亦響依個時候,聰明一世嘅豆斗開始變咗第二個人咁,人唔可以老,唔可以退休,堅肯定!下次繼續!

[bouncer] [bouncer] [bouncer]

[img]https://upload.cc/i2/dJ053D.png[/img]


吊吊揈磁能線+書綁價99蚊,TYPE C, MICRO USE, LIGHTNING接頭可選。即買︰
https://goo.gl/7cpBx3

[img]https://upload.cc/i1/2018/11/27/fequOP.png[/img]

[img]https://upload.cc/i1/2018/11/27/5u2BYh.png[/img]


【常威考証】為花柳治替慈禧平反(二十七)

真人真事嘅大清滅亡故事,隨住1889年慈禧退休,交權畀劉晶後,開始進入最高潮,故事要有「起、承、轉、合」,其中「轉」就係大高潮所在,依個轉,就係1894年甲午戰爭,一場將中國同日本命運、甚至牽連到整個世界格局嘅驚天海戰。

甲午戰爭仲有幾年,或者先審視一下大清同世界嘅大局。

一直係大清金融幕後玩家嘅大英帝國,經過差唔多百年嘅大興盛,終於同歷史上其他帝國一樣,步向衰落命運,冇計,領土太大人太多,涉及權力太多,供養帝國生命嘅金錢數目更加巨大,十九世紀下半,大英帝國響成個世界嘅殖民地管治日益困難,要鞏固日不落帝國,亦要付出更大嘅維穩經費,響文盲有色人種傻仔身上予取予攜嘅好日子已經過去;法國自普法戰爭戰敗,被簽訂喪權辱國嘅「法蘭克福條約」後,由拿破崙建立嘅歐洲強國地位一去不返,1870年「第三共和」建立,亦將法國帶入重重內政嘅爭拗漩渦之中(同現在香港好似,齋嗌交冇發展),取代法國地位嘅係由鐵血宰相卑斯夢完成統一大業嘅德國,德國(普魯士)響十九世紀中葉開始急速發速,重視教育文化科技發展嘅德國(普魯士)後來居上,一嘢就超越法國,同時威脅大英帝國嘅龍頭地位。1861年地中海隻腳意大利亦完成統一大業,加上美國內戰後成功南北大和解,國力亦飛騰而上,歐洲棋盤格局開始重新執位。

不得不提嘅係,隨住商品貿易高速發展,工人階級左翼勢力響馬克思主義統合下,開始響歐洲遍地開花,歐洲列強亦不得不耗上巨大人力物力心力財力抑壓依股工人力量冒起,1864年「第一國際」(First International)嘅成立,正式將共產主義地雷埋響歐洲土壤之中。我常公子諗,歐洲多事之秋,亦係大清得以響1875到1889年依十幾年期間順利回氣嘅主要理由。(自己都攪唔X掂,仲邊有時間攪你先?)

大清回氣期間,對岸嘅大日本帝國更加如火如荼砰砰聲發展資本主義。中日洋化過程響十九世紀中葉一齊起步,但十幾廿年後高下立判,中國文化包袱太重,儒家哲學習氣積聚咗二千幾年,相反日本初生之犢,冇乜包袱,閤埋對眼向前死衝,有前冇後,打死罷就!當中最重要嘅分野係貨幣政策,要發展現代工業,必要資本注資,大清嘅洋腸運動,資金大多數來自外資或同外國銀行借貸而來,世界最公平,邊個有錢邊個惡曬,邊個有水邊個話事,最後大清嘅經濟命脈,基本上係操縱響外資手上,咁唔死有鬼?(主要係大英帝國間謀大賣辦李鴻章為白手套代理)而日本由一開始已經抗拒外來資本操縱,一心自力更新印銀紙創造財富(詳情下次再講)!

當期時甲午戰爭前,論人口質素日本同大清根本冇話邊個高啲,大家識字率不足1%,當中少數有又化背景嘅「高端人口」裡面,大清論數目且係日本嘅10倍以上,不過人多並唔代表有料到,位於權力最頂端嘅一小撮人,佢哋嘅智慧同判斷力先係決定成敗嘅主因。


大清有慈禧,日本有明治;大清有李鴻章,日本有伊藤博文,人比人,比死人。

中日之爭,下次再講。

[@_@sk] [@_@sk] [@_@sk]

[img]https://upload.cc/i2/kwmTtr.png[/img]


【常威考証】為花柳治替慈禧平反(二十八)

三億個腦,冇人諗到計發達……咁咪叫失敗囉。(最新史料:十八世紀中葉大清人口可能已經有4億3千萬)

中日同時起步食洋腸轉型,點解人哋咁X掂?明治天皇荷蘭叻?唔係,先天條件係明治新政府繼承咗德川幕府時代嘅有利遺產,幕府時代日本已有「財閥」存在,三井(江戶)、三菱(京都)、住友(大阪)三大財閥集團主宰整個日本經濟,商人身份高高在上。反觀大清,賤人先做商人先做律師醫生,最曡水班滿蒙貴族八旗子弟全部只係大地主,翹埋雙手打跛雙腳收地租過活,宗人府仲禁止佢哋從商(陰公豬,咁資本冇法進入市場流通,咪等死囉),其實依家香港嘅情況都好似,大地主只識玩買地起樓,唔肯投資其他新科技項目,現代叫「地產霸權」,古代叫「地主霸權」,所以中華人民共和国建立後唔鋤2唔玩show hand住,第一時間「鬥地主」先就係咁解!

明治新政治轉型嘅第一批資金就係來自三大財閥,由長州、薩摩、肥前、土佐四潘為核心嘅明治政府向財閥借錢,然後將政府資助成立、政策配合發展嘅企業(工業項目)廉價賣番畀佢哋作為回報,就係咁明治政府同三大財閥利益互相鎖定,建立起官僚財閥資產階級專政形態,開展可歌可泣嘅明治維新!大清啲地主呢?繼續食住鴉片叫雞囉!從商,真係識條鐵!

日本最威嘅仲有佢哋一早就知道「錢可以印出嚟洗,貨幣可自行創造出嚟,唔一定要借嘅」,但係先決條件係要有一個銀行金融體系同統一貨幣,伊藤博文1868年已經到美國考察金融體系運作,佢未必明得曬內容係乜,但就大膽照辨煮碗將成套嘢搬番日本照攪,明治信佢(可能佢都唔知係乜),日本人又信佢(佢哋更加唔會知道係乜),但風水嘅嘢,真係好好彩,又畀佢哋食碗麵攪X掂,十九世紀下半季日本已經有153間私人銀行,並開始統一貨幣為「日元」,白銀退場,紙幣流通,而中國要到七十年後(1949)先做到統一貨幣(人民幣),日本人一早就做咗鳥。

貨幣,法幣係一種「信心」同「信用」,要你相信手中嘅「印刷品」可以換到商品同服務,大家都係講個「信」字。日本人信「萬年一系」嘅天皇,信剝削佢哋嘅政府,錢只會存入日本人自己開嘅銀行。大清呢?十九世紀所有有錢人只會將錢存入英資背景嘅匯豐(係呀!0005匯控呀),因為領事管轄權,大清無權查匯豐賬目,喂,好多錢唔見得光架,比你查?發緊夢喇!日本方面,亦好快響十九世紀70年代建立中央銀行管理銀根同貨幣,大清其實都有中央銀行,不過係英資嘅匯豐啫。日本人將銀根控制響自己人手上,大清就將夾萬條鎖匙交畀英國人,後果係點?自己睇!

事實上到咗今日今時,依事其實都冇變過,假設你響內地做生意賺咗一億現金,而你面前有兩間銀行你揀入錢,一間係中銀,一間係匯豐,愛国的你一定揀中銀吧!(口裡説不,身體卻很誠實…)

日本嘅路都唔係一帆風順,下次再講。(當日本金融大展拳腳期間,光緒正響被竇內打飛機,攪到成床都係……)

[bouncer] [bouncer] [bouncer]

[img]https://upload.cc/i2/aD4zEV.png[/img]


高質po 劉明#good#


【常威考証】為花柳治替慈禧平反(二十九)

十九世紀最後三十年,日本短時間內融入世界資本主義帝國集團中,且成為大玩家,玩到要「脫亞入歐」,的確係勁!另一方面亦好好彩。

上文已經提過,日本食洋腸過程亦非一帆風順,19世紀80年代,日本亦曾經因印太多銀紙(印乜嘢銀紙呀,量化寬鬆啫),導致日元大幅眨值,引發惡性通貨膨脹。但係成個社會不但冇亂,而且大部份人上下一心勒緊褲頭克服金融災難,日本人絕對相信政府能力。反觀中國人就永遠唔會相信政府,就算口講話信,都會陽奉陰違,講一套,做一套,中國人就係最叻,人民唔信政府,個社會就好容易動盪,上一趟廣東廣西大失業潮就爆發咗太平天國之亂,死二千萬人,差唔多成個日本三份二人口。

日本得以大成功,因為人民有巨大嘅向心力。當「民族」依個團結人民嘅概念響十九世紀出現嘅時候,當時世界並無強烈民族概念,只有國家概念。以中國為例,所謂「中華民族」概念要到康有為梁啟超出現後先廣泛傳播,但日本人一早就因為「萬世一系」嘅天皇體系而「被」團結起來,成為一個生死與共嘅「文化共同體」,加上四面環海嘅地緣因素、擁有共同語言文化同生活飲食習慣,大和民族比世界上其他地區嘅「民族」更早被創建出嚟。仲有宗教信仰,日本最多人信奉嘅神道教本身就係「政教合一」嘅意識形態操控工具。

另外,日本嘅「武士階級」響明治維新前係一股龐大嘅社會力量,原本係一個極度危險嘅計時炸彈,但新政府竟然能將依股威脅化成助力,依個係改革得以成功嘅關鍵。明治新政治要削藩同取締武士階級,西鄉隆盛、山縣有朋之類嘅武士領袖以愛國心為號召擁護天皇專政,化解咗潛在於內部嘅分裂根源,有助全國人民一致槍口對外,一齊抵擋外來帝國主義者嘅侵略。當然其中亦少不免有血腥顛壓,1877年嘅薩摩叛亂就有三萬名武士起事,最後被東京新軍血腥擊滅(詳情可睇睇Tom Cruise 2003年嗰套【最後武士The Last Samurai】電影)。


Boost起明治新政嘅金主,日本三大財閥亦以維護國家利益為優先考慮,話佢哋愛國(其實日本人唔鍾意用【愛國】嗰名,佢哋叫【憂國】)固然亦係事實,但佢哋明顯清楚了解金融主導權(銀根)絕對唔可以落入外國人手上,維護國家利益即維護自己利益,佢哋睇得遠啲啲,同期大清嘅李鴻章、張之洞、盛宣懷、席正甫之流,只睇眼前利益,勾結外國勢力斷送大清金融主導權予帝國主義者,血液中永遠流住洋買辦嘅基因,大清最後輸,就輸在有依種人揸權。

再深入意識形態層次去睇,日本天皇視人民為人民,縱使階級有別但仍某程度上憂戚與共;但大清則以外族身份入主中原,一直以來,都係將人民當成「降虜」(投降嘅俘虜),「人民」唔同「降虜」,依個亦係大清滿蒙貴族同官僚集團往往以自身利益為出發點嘅理由。日本人嘅團結性,產生咗世上無出其右嘅嚴謹紀律性(只有德國可比),亦因為有依份特別守紀律嘅社會秩序,先可以創造出「明治維新」嘅經濟奇蹟。1895年嘅甲午戰爭,就係日本帝國收割成果嘅重要一役,當然依場仗,佢哋亦非打不可,理由遲啲再講。

光緒呀,你打完飛機未?慈禧呢?身心已做好準備,迎接退休生活,下一次,返番1889年劉晶親政再開始……


[bouncer] [bouncer] [bouncer]

[img]https://upload.cc/i1/2018/11/30/ZekYUK.png[/img]


【大清亡國關慈禧蛋牛治】全集,請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me


【常威考証】為花柳治替慈禧平反(三十)

寫到三十回鳥,可以出書喎,唔知有冇人買呢?哈哈。

光緒王劉晶1898年親政,親政之後亦用冇漏精嘅記錄,睇嚟佢得到實質權力後已經好返曬(但之後都係冇仔生,陰九公…),當時大清人民同全世界都對依個十九歲大清皇帝抱有好大期望,(大家唔準笑,當日CY Leung同林鄭上任時,我常公子都對佢哋一對黑白無常抱有好大期望),不過希望愈大,失望就愈大。做人做鬼都要記住,千祈唔好對政客咁天真嬌。

豆斗擺好晒棋先退休,一心為大清好,為劉晶好,只要劉晶(好似江澤民同胡錦濤咁)堅守住豆斗(鄧小平)嘅開放改革路線、寧右勿左,做個能力中等、盡責嘅行政管理人員,大清其實大有可為,但係劉晶明顯好憎豆斗,親政之後就立即同豆斗一直行嘅現代化路線唱反調,條小氣Hi Hi仔第一,北洋艦隊停購戰艦(講真,咪就係甲午慘敗嘅主因囉);第二撂置京漢鐵路計劃;第三貨幣改革再無下文……仲未夠,豆斗之前重用嘅人佢唔用,大量現代化改革嘅文件又唔處理(可能有英文睇唔明怕露底結果唔睇)。

後世人有個感覺,認為劉晶光緒係現代改革先鋒,豆斗慈禧係守舊派死廢老,但其實啱啱相反,守舊嘅人係二十歲出頭嘅劉晶,剩係依個point,就已經值得同豆斗用十萬字平反。

光緒嘅反常守舊行為,其實同攪屎棍翁同龢條男朋友有關,由於翁同龢係劉晶老師,劉晶一直同佢關係好好,甚至當佢係自己老豆,聽曬佢話。翁男朋友一直係儒家保守派代表,同洋務派李鴻章長期不和,劉晶親政後嘅反洋態度一定就同條男朋友有關,舉個例,1891年李鴻章上書要求劉晶學英文,連豆斗都出埋聲,但係翁男朋友就一口反對,認為冇咁嘅需要。講老實話,控制皇帝嘅決定,就等於控制大清,翁男朋友都唔知等咗依個機會幾耐?佢一心以為劉晶親政之日,就係佢發圍之時,佢一心要將大清帶返去儒家哲學嘅臭馬桶入面藕臭再藕臭。依種人只顧自身利益,只關心自己嘅夢想,將廣大市民利益放響屎忽後面再後面,咁大家公道小小,叫佢一聲男朋友,其實係讚緊佢,因為男朋友都係一個人,正確嚟講,應該叫佢做一個器官:( )【填充題】。

A.狗歡喜
B.豬歡喜
C.有臭味嘅歡喜

豆斗真係冇諗過劉晶咁廢,佢一早安排咗自己嘅退休計劃,其實好簡單,豆斗只係想起處地方俾自己安享晚年,仲有避開劉晶,專心禮佛,於是佢揀咗離開北京市中心嘅一處地方,興建「頤和園」。

佢一定唔知,頤和園會令佢遺臭萬年。鄭若驊僭建只係冇心之失都俾人鬧到飛天,起頤和園令大清打輸甲午戰爭喎?依隻鑊,夠佢孭一百年……真相又係唔係咁,下次再講。

[bouncer] [bouncer] [bouncer]

[img]https://upload.cc/i2/pJD8GX.png[/img]


【常威考証】為花柳治替慈禧平反(三十一)

1889年慈禧離任前,的而且確係一位有魄力、有智慧、有權謀同有能力嘅開明領導人。

佢揸權嘅二十幾年間,大清平定咗太平天國之亂(再講一次,大家千祈唔好睇小依場中國內戰,如無意外,太平天國之亂好有可能係世界歷史上死得最多人同最殘酷嘅一場內戰),收復新疆,保持咗帝國大部份領土完整,整個社會進入咗全面現代化階段,各種西式工業響大清遍地開花,依個時候,大清已經可以製造自己嘅軍需品同商船戰船,全國重要城市亦有電報網絡覆蓋,各條主要河道上,世界各地嘅商船可以自由進出航行,商品貿易欣欣向榮,「招商局」成立,更開展咗中國人主理海上物流業先河,引入西方採礦技術,國內嘅豐富天然資源得以被開發獲利,鐵路工程亦開始上馬(不過之後比光緒刹停咗),由赫德先生主理嘅大清海關廉潔有效,令國家收入大大增加,經濟穩定,人民生活雖然比唔上歐陸富足,但比之前嘅水深火熱,已得到顯著改善。

豆斗亦係第一個大清領導人愿意從外國輸入糧食,其實大清長期以來生產嘅糧食不夠養活人口(4億人呀),但大清一直禁止輸入糧食,直至1867年,豆斗先第一次用110萬兩白銀購買大米入口,解決國內糧食問題。1876年有一場「丁戊奇荒」,連續三年蝗禍洪水旱災接二連三響全國各地發生,近二億人受災,數百萬人餓死,如果冇咗慈禧向外國購糧,死嘅人會係八位數字以上。

豆斗亦明白大清必須融入國際社會內先可以生存落去,佢在位期間積極同世界各國建立外交關係,連帶亦保障咗大量「賣豬仔」到外國工作嘅中國人權益。

文化方面,豆斗廢除凌遲處死等酷刑,任內亦無攪過文字獄同大形政治迫害,史冊上當時冇大清市民因言論入獄或殺頭,反而現代大把,香港宜家都有喇,問你死未?你可能唔會相信十九世紀嘅大清係一個言論自由嘅社會,但事實上:「係」,今日嘅世界係明顯倒退中……豆斗主政期間,宗教信仰絕對自由,外國傳教士可以響大清境內自由活動。響當時嘅國際社會,豆斗其實有好高聲望,風評一流,叫佢做「東方維多利亞女王」,其實一啲都冇誇張到。


內政方面,豆斗充份利用手中權力同巧妙嘅政治技巧,平衡咗洋腸派同守舊派之間嘅利益衝突,滿蒙貴族乖乖哋唔敢玩嘢,南方士大夫(李鴻章)主導嘅洋腸運動亦被豆斗巧妙制衡,亦因為有豆斗嘅政治手腕,「同治中興」嗰廿幾年嘅大清現代化運動先得以運作暢順,唔會車毀人亡。(之後冇咗豆斗,咪好快撞車囉)

留俾光緒手牌仲有pair煙,當時世界第六大海軍力量北洋艦隊成功組建。當時世界未有核武、未有空軍。強大海軍就係一個國家國力嘅表現,傾盡全國財富建立嘅北洋海軍,事實上亦係大清躋身世界列強中嘅一個象徴意義。如果冇甲午戰爭之敗,歷史會係另一個走位。如果?世事冇如果……

今日篇文正正就係為豆斗平反嘞,頤和園,留返下一次。


#yup# #yup# #yup#

[img]https://upload.cc/i2/vNwqcn.png[/img]

【大清亡國關慈禧蛋牛治】實體購買
https://www.382now.com/product?id=87 ;

【大清亡國關慈禧蛋牛治】
https://play.google.com/store/books/details?id=C3hjDwAAQBAJ


【常威考証】為花柳治替慈禧平反(三十二)

中國近代史最鍾意屈人,豆斗比人屈得最甘單嘢,就係修建「頤和園」。

一般嘅講法係豆斗攞曬大清啲公帑去修建頤和園,窮奢極侈,攪到北洋艦隊冇錢買戰艦,最後打輸甲午戰爭,成為歷史罪人吸血鬼,依隻死貓食足一百年!

街坊傳聞,頤和園嘅興建費用係3000萬兩白銀(折算港幣90億左右,妖!都未夠十份一條高鉄喇…),但根據日本歷史學者嘅研究,修建費大約只係六份一500萬兩白銀(15億港幣)左右,修建頤和園真正洗咗幾多錢冇一個定案,但根據頤和園前身「清漪園」嘅建造費用「用咗15年,耗費440萬兩白銀」推算,計埋十九世紀八九十年代嘅通貨膨脹,修建頤和園都唔會超過600萬兩白銀,而且3000萬兩白銀依個數字實在太巨大,個波明顯係吹大咗,典解?屈豆斗囉?邊個屈豆斗?梁啟超掛?革命黨掛?國民黨掛?滿州國掛?中共文膽陳伯達掛?總之你講我又講,人噏我又噏,咁咪變咗事實囉。

約瑟夫·戈培爾(Joseph Goebbels)名言:『謊言重覆千遍就是真理。』

500萬兩白銀,就只係劉晶(光緒)條Hi Hi仔大婚嘅洗費,劉晶結婚所用嘅15億港紙,就係100%公帑嘞。至於頤和園單工程,豆斗從來冇響國庫攞過一分錢,佢自己首先攞咗300萬兩白銀私己錢擺底,其餘200至300萬兩,一部份則向文武百官眾籌得來,餘數先向海軍衙門籌集,因為大清撥畀海軍軍費款項最大,豆斗偷小小都係正常架,由史料推論,響1889年至1995年頤和園工程進行期間,豆斗每年大約偷咗30萬兩出嚟,總數合共150萬至180萬兩之間。以當時南北洋海軍軍費每年3000萬兩計算,每年豆斗大約撻走1%軍費左右,以豆斗嘅權力同聲望,小數目咋。依筆錢,對整個大清海軍運作影響性絕對不大,更加唔會係導至甲午戰爭慘敗嘅主因。依隻死貓,佢老母佢食到應一應!

而豆斗依單冤獄又由邊個吹起呢?咪又係帝師翁同龢條【攪屎棍+男朋友】囉,《翁同龢日記》中有句「以昆明湖易渤海,萬夀山換灤陽」,後世人就憑依句説話,將北洋海軍慘敗於日本隻驚世大黑鑊推曬畀慈禧,其實1895年前北洋海軍停購新型軍艦,係劉晶光緒決定嘅,海軍軍費同發展一直滯後於陸軍,係李鴻章政敵左宗棠遺留落嚟嘅思維同政策,可惜左冷禪響甲午戰爭前(1885)去咗見努爾哈赤,冇人怪佢囉。

咁豆斗真係有撻海軍軍費嘅,但窮奢極侈?禍國殃民就點講都唔通,佢只係唔好彩撞正場甲午戰爭啫。路易十四建凡爾賽宮,人面獸心朱棣修築紫禁城,維多利亞女王建白金漢宮一樣洗咗好多錢,佢哋就係「為世界文明留下偉大遺產」,豆斗起個「頤和園」就十惡不赦,咁……明屈啫!唔同佢平反?我常公子睇唔過眼囉。

下次講講,中年女人千祈唔好信佛……
:o) :o) :o)

[img]https://upload.cc/i2/Ik1yMB.png[/img]


吊吊揈磁能線+書綁價99蚊,TYPE C, MICRO USE, LIGHTNING接頭可選。即買︰
https://goo.gl/7cpBx3

[img]https://upload.cc/i1/2018/11/27/fequOP.png[/img]

[img]https://upload.cc/i1/2018/11/27/5u2BYh.png[/img]


《#碌葛男人嫁得過》常公子部份簡介

1.究竟社會碌葛同碌葛有乜嘢分別?社會精英又係乜嘢?

2.社會碌葛嘅哲學定義為何?佛系政治任務究竟又係乜?

3.世界上有一種人叫單向度的人,你究竟係咪單向度的人?

4.你知唔知咩叫做意識形態操控技術?你不知不覺被人操縱意識,又究竟知唔知道?

5.踼爆統治階層如何操縱我們意識!令我們成為聽聽話話嘅社會碌葛,真相大揭秘!

6.香港傳媒大災難,一切都係意識形態操縱戰略嘅結果?

7.點解唔畀細路仔返學會犯法?背後嘅真正原因又係乜嘢?

8.社會碌葛固然要知,但統治階層一樣要睇,本書將會教社會精英的你如何操縱民眾意識形態?

9.全港第一本以數學同哲學角度,切入香港人真實生活面貌嘅一級奇書,深入淺出,絕對唔離地,堅持母語教學,廣東話寫作,香港人寫香港人嘅哲學書!

#碌葛男人嫁得過 #嫁得過系列 #賭Sir #常威 #數學 #哲學 #mathematics #philosophy #生命 #風險管理 #新香港人 #意識形態

[img]https://na.cx/i/GfJBNhx.jpg[/img]
[img]https://na.cx/i/Rd6oshD.jpg[/img]


【常威考証】為花柳治替慈禧平反(三十三)

1889年放下一切嘅慈禧,的確係想退休。

佢同唐朝武則天唔同(中國歷史上出現過兩個女王,嚴格嚟講仲有劉邦老婆呂雉,但佢執政時間只有8年太短,什麼都不知道嘅紅都女王江清唔計),武則天雄才大略,曾經嘗試稱帝改朝換代,可惜最後都打破唔到儒家嘅父權帝皇專政制度,豆斗係聰明人,自己知自己事,佢從來冇諗過稱帝,攪兩次「垂簾聽政」掌握實權差唔多三十年,對佢嚟講已經相當足夠。

依三十年(1861至1889)係大清起死回生嘅大轉折,冇咗豆斗,我常公子可以寫包單大清早已亡黨亡國,太平天國之亂其實已經要咗大清條命,冇豆斗出現,中國絕對會陷入大分裂,分分鐘最後好似印度咁成為大英帝國嘅殖民地(咁可能對中國人嚟講係好事都未定…),豆斗當機立斷,大刀闊斧進行開放改革,長期揸權有時候只係權宜之策,病人未脫離危險時期,冇奶油換主診醫生嘅。豆斗一手帶領大清邁向現代化之路,功成身退,臨走前擺好曬棋,佢嘅行為絕冇辜負過大清,亦對得往老公咸豐同承繼人光緒,對得住四億大清子民,對得住天地良心,咁仲Hi,咁只係你有問題。

遇上100%嘅政客,只係你嘅一廂情愿,政治人物做到60分已經國泰民安,豆斗,我常公子比75分!

退休之時豆斗已經年近六十,以百多年前嘅角度去睇,佢等同今日一個七十幾歲嘅老人家,半生亞太區有一天成為亞太區心亞太區有一天成為亞太區病貢獻國家,鞠躬盡瘁,退休起撻地方畀自己頤養天年,聽吓京戲學吓佛,有咩唔啱先?有人話佢品味低下鍾意通俗嘅京劇唔鍾要聽崑曲,佢係人生攻擊,我常公子就最愛周星馳。

豆斗退休後冇完全離開政壇,仍干涉政事,咁又Hi?第一,如果劉晶攪得掂,我諗豆斗亦唔會理唔想理。第二,專制君皇制度,認人唔認事,人亡先政息。豆斗一日在世,佢仍有巨大影響力同震攝力,自古中國帝皇,其影響力要直接帶入棺材先會完全結束,例子太多,只舉一個,20世紀80年代鄧小平引退,胡耀邦同趙紫陽先後出任中共黨總書記,表面上係國家領導人係佢兩位,但實權卻牢牢掌握響軍委會主席鄧小平手上。退休慈禧同光緒嘅關係大致差唔多,但豆斗參予政事嘅時間一定比鄧小平小。

一個聰明嘅老人,係唔駛勞煩其他人照顧嘅,慈禧一早安排好自己嘅退休生活,長居頤和園,得閒聽吓京劇,之吓船河、招呼吓啲和尚高僧學吓佛唸吓經、間中出席一下公開活動,同各國領事打吓交道、或者同李蓮英成班太監仔玩吓角色扮演,自己佛祖上身響蓮花池扮「老佛爺」坐蓮,優哉悠哉。

不過,用心理狀態分析佢,豆斗退休後,心神明顯放鬆曬,或者佢覺得大清會一直順落去,佢做低嘅嘢會開花結果,水到渠成。於是佢嗰幾年潛心禮佛,古往今來,不少中年女人或老年女人都鍾意信佛,今時今日幾多活佛生神仙和尚神棍都係由富婆包養架(包養一辭冇眨義,冇性暗示),冇他嘅,作為一個有錢有樓有老公養嘅富婆,現實要得到嘅嘢都可以垂手可得,咁人生仲有乜所求先?咪追求心靈境界嘅超昇囉、咪追求啲更加虛無飄渺嘅嘢囉,唔通仲同一般人咁臨老仲憂柴憂米咩?

佛,下次再繼續……

[img]https://upload.cc/i2/oLGEm3.png[/img]


【常威考証】為花柳治替慈禧平反(三十四)

如果將慈禧一生分成兩個階段,1889年前嘅佢係一個集智慧氣度同視野廣闊嘅國家領導人。但1889年之前,佢好似變咗第二個人咁,成為個好普通又保守又迷信又小氣嘅阿嬋,依個亦係豆斗響一般人心裡面嘅形象。由一代名君變咗個Hi Hi阿嬋,好慘!好慘!同佢有得揮嘅仲有毛主席,分水嶺係1949,49年前,佢係一個出色嘅軍事家、政治家、革命家、詩人同馬列主義者;但49年之後,卻變成了一個專制獨裁、為保住自身權力可以不擇手段嘅暴君。

所以,人千祈唔可以老。老都得,但要退休。

又老,又信佛,仲繼續玩政治,有時候會幾大鑊。佛教,源於印度,係釋迦牟尼睇見衆生之苦而想出嘅一套開脫法門,簡單啲講,就係「逃避」,係「捨」、係「空」,大前題係「衆生皆苦」、「諸行無常」、「諸法無我」(三法印),否定自我,否定現實,否定一切,遁入空門,自然咩嘢煩惱都冇曬。大膽啲講,係「虛無主義」。我常公子有理由相信豆斗退休後潛心拜佛,不但冇將佢原來嘅境界拉高,反而拉低咗佢。佢前半生嘅所作所為,好有實用主義者、馬基維利主義者嘅風範,做事好「實」!但退休後嘅佢,之後嘅行事為人都「虛」咗,終於「虛」到1899年攪壇義和拳事件出嚟,本來流芳百世嘅東方維多利亞女王,變咗一個遺臭萬年嘅Hi Hi阿嬋。佢嘅心理狀態演變,應該同信佛有關。當然年紀老邁亦係一個問題,智力衰退體力下降,都會嚴重影響佢嘅判斷力同治國能力。

講番信佛,中國歷史上兩個最把炮嘅女性都信佛,盛唐武曌不但信佛,佢仲係將中國佛教帶到顛峰上嘅女人,武則天在位期間,大力推動佛教發展,重金之下,中國佛學開出「華嚴宗」同「天台宗」兩大流派,論述之深境界之高,超越印度佛學本源。加上唐三藏羅家英從天竺取得佛學至深典籍「唯識論」來華,中國佛學發展到達極致(亦從此以後不斷向下,最終同道教合流淪為阿嬋拜神大迷信…)。

佛教亦成為武則天手中最鋒利嘅文化統戰武器,向全世界宣示大唐盛世國威,促進商品貿易交流,要攪一帶一路,單單有錢係唔夠嘅,仲要有高檔嘅文化內涵。當時嘅長安根本係世界嘅經濟中心、文化中心同哲學中心(當其時未有哲學一詞,哲學係十九世紀先由日本人翻譯過嚟嘅)。舉一個例,日本文化嘅起源就係由佢哋啲和尚留學長安開始……

人比人,比死人。

武則天信佛,造就大唐盛世;豆斗信佛,層次只能去到荷花池同李蓮英玩角色扮演,境界上有好大分別。不過武則天係繼承老公唐太宗活絡油李世民,手上副牌係四條「2」加煙夫,而豆斗手牌只係得條細蛇冇「2」,冇得咁計嘅。手握一副好牌贏好易,手揸一副爛牌唔輸先考功夫,個人評價,身心狀態全盛時期嘅豆斗仲要比武則天高啲啲……

慈禧退休信佛講完,下一次,進入大清Hi Hi戲肉,甲午年近了……

[img]https://upload.cc/i1/2018/02/24/vVcIFL.png[/img]


留名再睇


【常威考証】為花柳治替慈禧平反(三十五)

甲午戰爭嘅重要性一直被人忽視。

首先,甲午戰爭係人類戰爭歷史上第一場鐵甲艦對戰。其次,甲午戰爭改變咗成個東亞世界嘅格局,日本作為勝利者,勢力進一步掘起,令國內軍國主義火熱昇溫,最終導至野心膨脹,種下二次世界大戰禍根。然後,假如大清冇甲午一敗,亦一定冇戊戌政變,冇戊戌政變,豆斗唔會再出場,光緒可能會成為一代名君,冇甲午一敗,亦一定唔會有義和團之變,所以又或者亦唔會有辛亥革命,孫中山會只係一個香港名醫,大清壽命應該唔會響1911年結束,中國極有可能步向君主立憲模式過導向現代民主社會……哇哇哇,冇甲午,一連串蝴蝶效應可能發生。妖!狗嗡姐!歷史邊有如果乜如果物?之不過既然大埔九巴車禍可以同四年前佔中有關,上述所講嘅嘢就有充份意義囉。

你講我又講,冇乜責任嘅。唔啱聽咪唔講囉,係咪吳廣德吖?

甲午戰爭,起源於K-pop少女時代,朝鮮問題一直都係問題,位處俄國(蘇聯、俄羅斯)、中國同日本中央嘅朝鮮半島,一直都有強烈地緣歷史意義,今日中國千方百計保住北韓,已經唔関共產主義兄弟情義事,純粹要用北韓作為同南韓中間嘅地域屏障,否則薩德導彈系統可佈署響距離北京三百公里之內,導彈一分鐘唔駛可以射入中南海,你都咪話唔驚喎。朝鮮(自古以來)都係中國直屬嘅保護國,受中國明清兩朝統治者冊封取得權力,年年進貢歲歲來朝,朝鮮李氏王朝(1392年-1897年)長期統治朝鮮半島,認中國做大佬,一直相安無事。日本想吞拚朝鮮亦唔係十九世紀明治維新嘅事,早響豐臣秀吉年代,日本已經發動過侵略朝鮮行動,亦同明朝試過擦槍走火。

十九世紀中葉,日本明治維新經濟起飛,但日本係一個嚴重缺乏天然資源嘅島國(缺煤缺鐵,當然冇石油喇),要擴大生存空間只有侵略別國一途,明治天皇同伊藤博文心裡面嘅民族復興大計,奪取朝鮮半島正正就係第一手牌,有咗朝鮮做橋頭堡,就可以進一步入侵大清,掠奪遼東半島東三省嘅豐富天然資源做日本國內重工業軍工業發展嘅強大後盾,隨後嘅故事亦依照佢寫嘅劇本發展……

寫到依度真係心已噏,人哋伊藤博文早有個【大東亞共榮圈】劇本響手,我哋大清嘅「伊藤博文」李鴻章呢?有冇寫過劇本呢?有冇諗過日本真係會郁手呢?抑或心裡只有「數簿」,而冇「劇本」,咁,甲午Hi Hi,就燒佢老母本數簿囉。

日本勢力不斷滲透朝鮮,令整個李氏皇朝分裂成大院君李昰應嘅「親日派」同閔妃集團嘅「親中派」。叉開一筆,近年韓風大盛,後生仔唔扮韓仔冇女埋身咁滯,唔少韓劇仲同古代朝鮮皇朝塗脂抹粉,重塑李氏皇朝為一個身光頸靚、開明同理性嘅形象,其實響唔少韓國人眼內,李氏皇朝根本係大韓民族嘅恥辱同瘡疤,五百年統治朝鮮期間昏君輩出、殘酷不仁、不思進取、毫無建樹,只係一個低智奴隸主集團……

大清冇料份四條,日本似乎一早睇穿佢隴嘢,擺好棋局後,1882年,伊藤博文出手鳥,同一時間,近代史上另一個重要人物袁世凱先生亦粉墨登場。

see you next time.

[img]https://upload.cc/i1/2018/02/26/Lu9Fs3.png[/img]


【常威考証】為花柳治替慈禧平反(三十六)

「太陽能電筒」嘅原理就係響冇光嘅環境下,電筒係唔會「著」嘅。如果響熄燈黑暗環境下想佢著,就可以用另一枝電筒照住佢,咁佢就會「著」。

袁世凱(1859-1916)係一碌太陽能電筒,佢前半生嘅彈起,永遠要有另一碌電筒射住。姓袁嘅,大把貨,佢阿爺係辦團練鎮壓捻軍起家,老豆係二世祖,袁世凱係三世祖,中國人話富不過三代,袁世凱打破依個定律。電筒細個唔鍾意讀書,正牌太子黨富三代,游手好間撩事鬥非打交媾女瓣瓣齊,不過千祈唔好睇少依種人,佢勝在有家底,叔伯兄弟唔係有錢佬就係大官,十五歲嗰年去北京投靠大官親戚,發奮讀書(佢話),但兩次返鄉下河南考鄉試都肥佬,註定無緣以正途做官,普通人咁就一世,或者好似洪秀全咁痴膠花,但電筒勝在有人照,22歲嗰年棄文從武,經人介紹跟咗淮軍將領吳長慶,有另一枝電筒照住佢,咁佢就「著」咗。

1882年,適逢K-pop發生「壬午兵變」,朝鮮皇帝高宗老豆,保守派大院君發動兵變踼走維新黨閔妃勢力,大清身為朝鮮大佬,派吳長慶入朝鮮平亂,當時袁世凱嘅官職只是「幫辦」(即係跟出跟入),吳長慶平亂成功,捉拿大院君回大清監禁。而行運一條龍嘅袁世凱則留響朝鮮,替高宗編練朝鮮新軍,袁世凱可能天生係一個練兵高手,一支1500人嘅朝鮮新軍比佢練得有聲有色,高宗大為讚賞,同時亦得到大清揸Fit人李鴻章嘅注意。你睇,做人最緊要有運,識人好過識字就係咁解,比幾支電筒照住,袁世凱依支「太陽能電筒」終於上位!嗰陣佢只係25歲,今日香港,25歲仲響屋企柄埋屠緊龍呀陰九公!

電筒響朝鮮發跡上位,1884年中法戰爭爆發,李鴻章調走吳長慶回防遼東,將朝鮮防務暫時交曬比袁世凱依個24歲嘅小肥人(佢圓碌碌脹卜卜,幾cute架)主理,1884年底,守舊勢力又捲土重來,響日本人幕後支持下,發動開化黨政變,再次挑戰閔妃集團,袁世凱當機立斷,冇通報北京同李鴻章,就私下帶3000兵馬入宮平亂,推倒政變,再次挽救閔妃集團,依一鑊就堅係爆嘞,李鴻章非常欣賞肥電筒依個果斷行為,正式將朝鮮交俾佢,電筒成為封疆大吏,行運行到腳趾尾!不過話分兩頭講,電筒都係膽搏膽,自行帶兵平亂,平到咪發囉,平唔到,要殺頭架!做人,真係要有運!而且想發圍,好多時候要揾命博,冇得呃嘅。

開化黨之亂後,大清同日本簽訂【中日天津條約】,朝鮮成為中日共同保護國,大清同日本都可以派軍隊入朝平亂,不過要預先通報對方。之後十年,太陽能電筒變咗核子火箭,一下子成為大清重要官員,坐鎮漢城,山高皇帝遠,甚至係朝鮮半個皇帝,適逢朝鮮亦開始攪開放改革,商機處處,個人感覺依段時間電筒應該掠唔少……

袁世凱行大運,大清就亞太區有一天成為亞太區大雞,1885年1894間,日本繼續滲透朝鮮,而且背後做足準備功夫,矛頭直指大清,朝鮮問題,只不過係發動甲午戰爭嘅借口。

咁到底,仗要打嘞,袁世凱知唔知?李鴻章知唔知?豆斗知唔知?歷史冇話比我哋知,或者,佢地真係唔知喎……

下次再講……


[img]https://upload.cc/i1/2018/02/28/hofCWa.png[/img]


跳至第



  快速回覆 - 輸入以下項目

本討論區現只接受會員張貼文章,本站會員請先登入。非會員人仕,您可以按此加入為新會員,費用全免,並可享用其他會員服務。


上次光臨時間: 23/4/2019 9:53
今天貼文總數: 441 | 累積文章數目: 6,490,984

聯絡我們 | 服務條款 | 私隱政策 | 廣告查詢 | 職位空缺
Copyright © 2019 HKGolden.com. All Rights Reserved.