主頁 高登熱話 吃喝玩樂 科技消費 名人專訪 短片
現有會員可[按此]登入。未成為會員可[按此]註冊。
[公司模式 - 關]  [懷舊模式 - 開
[Youtube 預覽 - 關]  [大字型]  [小字型]

您現在聚腳在 學術台內。

【再負荊請罪】全新高登官方app HKG正式上架 會員永久免廣告
是咁的,2016年年尾,我因為忽略會員對手機程式o既需求,做o左一個不明智o既決定,加上一直未有好好回應會員平日訴求,最終令唔少會員不滿。事件並唔單單影響我,亦影響一直以來熱愛高登o既每一名網民,為此再向各位表示衷心歉意。:-(

或者有巴打會講,寫好隻app自然會有人回家。我唔否認自己曾經都抱過呢種僥倖心態,但沉思過後,我明白其實只係寫好一隻app並不足夠,要為高登會員做o既事情實在太多,包括提升網速同改善伺服器穩定、維護自由o既討論空間、鼓勵會員參與創作及討論等。因為,高登最珍貴o既係每一位會員,所以落足心力滿足會員訴求係高登o既首要任務。 ......
精選文章
跳至第

發起人
【常公子近代史】大清亡國關慈禧蛋牛治
260 個回應
吊吊揈磁能線+書綁價99蚊,TYPE C, MICRO USE, LIGHTNING接頭可選。即買︰
https://goo.gl/7cpBx3

[img]https://upload.cc/i1/2018/11/27/fequOP.png[/img]

[img]https://upload.cc/i1/2018/11/27/5u2BYh.png[/img]


【常威考証】為花柳治替慈禧平反(三十七)

替慈禧平反同時,亦不得不替袁電筒平反,有人話,中國近代史上,有四個人被抹黑得最離罩,佢哋就係慈禧、李鴻章、袁世凱同蔣介石。

抹黑佢哋嘅,主要係民國二三十年代上海嘅左派文人同滿州國嘅花邊新聞,如果政治係有動機嘅話佢哋就全部有政治動機。舉一個例,民國「四大家族」你聽過未?其實係出自一本由中共文膽陳伯達隨手所寫嘅宣傳小冊子……後世唔少人就採用咗袁和平本「如來神掌」秘笈做正式史料加以發揮發酵。

慈禧由一個聰明智慧、一手挽救大清嘅國家領袖,被抹成一個心狠手辣嘅白痴大媽;李鴻章係改革先鋒,就冇厘頭變成大清守舊派封建代表;袁世凱更加唔駛講,集天下所有衰嘢賤嘢瀨嘢於一身,差少少拍得住秦檜同汪精衛,事實上1911年前嘅袁世凱只不過係一個時來運到嘅能幹大吏,平心而論,佢冇乜做過咩衰嘢(戊戌政變向榮祿告密出賣光緒一事,遲啲再講),辛亥革命後嘅佢,響一個出奇咁複雜嘅大亂世裡面,某程度上更加係一個負責任有承擔嘅政客,只不過身邊實在太多投機主義者同馬基維利主義者,同埋歷史亦將佢放響錯誤嘅位置上,最後稱帝失敗而死,遺臭萬年,臭過篤屎,講真,好慘!我有機會要替佢同(汪精衛)出平反系列。

最後一個蔣天生,我常威睇唔透佢,唔評論。

講番響首爾揸權時代嘅袁世凱,到底佢有冇睇穿日本人隴嘢?事實上係一定有,日本人要吞拚朝鮮擴張勢力天下皆知,慈禧延遲交權(攪到光緒漏精),到1888年完成北洋海軍組建,要防嘅亦係日本帝國,千億重量級投資威海衛軍港(北洋水師衙門所在地)亦係針對日本建立,從1882年開始,慈禧早就feel到大清嘅最大敵人就係對岸嘅明治,雙方進行咗前後十年嘅軍事競賽,彼此傾盡國力備戰,最終一決勝負,亦係避無可避。

不過中間有兩點值得注意,第一,李鴻章一心要避戰,甲午戰爭佢根本唔想打,可能佢太清楚大清嘅實力同氣數,自嘉慶皇帝1813年著草離開紫禁城依80年來,大吉利是,大清根本未正正式式打贏過一場仗,(除咗1885年中法戰爭諒山大捷,事後証明,法軍B隊作客亦唔係咁難打贏啫)李鴻章似乎心知肚明,一打就會露出底牌。階磚3一見,大清就大X鑊。


第二,1889年到1894年期間,拖住北洋海軍發展嘅人係光緒條Hi Hi仔,光緒對軍事完全冇興趣,又唔學英文(咁未冇睇上海法租界每日出版嘅字林西報囉,咁知識同視野咪完全封閉囉…),親政之後,我常威話嘅,翁同龢條攪屎棍一定成日響劉晶耳邊加鹽加醋,篤X仇家李鴻章背脊,而且當時翁屎棍主理戶部,批錢一定要經佢手,佢一直認為李鴻章攪北洋海軍撈咗唔小油水(事實上亦一定有,唔係死後點有幾百億身家?),加上1890年中原又有天災,嗰一年大清就用咗1100萬白銀(折算33億港幣)入口大米賑災,所以自1888年北洋建軍完成後,大清亦再唔俾錢購買新式軍艦同改良裝備,導致甲午開戰前大清海軍軍備落後於日本,依個亦係甲午戰敗嘅主因。

後世人完全怪曬李鴻章同豆斗,故然李鴻章一定有責任,佢一直向光緒同慈禧隱瞞北洋海軍嘅弱點,但冇人Hi過光緒同翁同龢兩仔爺,光緒仲要係一個靚仔多情好人明君、翁生仲要係晚清一代大儒道德典範,你話公唔公平吖?平反開,同李鴻章平反埋!

大清的確有戰爭嘅思想準備,可惜時不利兮,人不和政不通天不幫,日本方面嘅情形又係點呢?依一戰,點解亦係非打不可,下次繼續。

[img]https://upload.cc/i1/2018/03/01/OLBGKd.png[/img]

#hoho#bg 【大清亡國關慈禧蛋牛治】實體購買
https://www.382now.com/product?id=87 

#hoho#bg  【大清亡國關慈禧蛋牛治】
https://play.google.com/store/books/details?id=C3hjDwAAQBAJ


【常威考証】為花柳治替慈禧平反(三十八)

睇開嘅陽間朋友可能都會有一個錯覺,覺得十九世紀明治維新時期嘅日本帝國係一個上下一心,極度團結,共同奮鬥嘅民族國家,因此創造咗世界歷史上一次時間最短又最成功嘅社會轉型,擠身世界列強中一員。

不過真相並唔係咁簡單,日本嘅改革維新,同樣波折重重,只不過關鍵係日本人克服到,大清人克服唔到啫。

日本人最聰明嘅地方係一早掌握咗貨幤發行權,而且無論點都唔會同外國借貸,拒絕歐美資金流入控制金融市場。贏個位,響「定價權」上,十九世紀中期嘅日本同大清好似,都係依賴農產品出口賺取外滙,不過由於日本主導貨幣政策同冇外國勢力滲透,佢對自己出口嘅產品有全面「定價權」,10蚊一斤茶葉賣比你,就收足你十蚊,冇花冇假;反觀當時嘅中國,國內金融長期被大英帝國洋行操縱(怡和匯豐太古),一斤茶葉,洋行用5蚊同你收購,再用10蚊賣番出去,中間人咩都唔駛做袋咗5蚊,分別就響依處;日本人真係好硬頸,到咗今日都冇變過,二十世紀九十年代資產泡沫爆破後,日本亦拒絕向外國銀行大幅借貸融資挽救經濟,反而靠自己,咬實牙根,一步一步爬番上嚟,衰足三十年冇有怕,最近開始復甦番,依份耐性同自決真係唔可以講笑。

19世紀七十年代,日本都經歷過狂印銀紙,導致惡性通貨膨脹,民不聊生。有研究話比我地知,當時1875年全國貨幣流通量係1.53億日元,而金銀儲備(外匯儲備)只有870萬日元,僅佔貨幣流通率嘅5.7%,即係你手揸五個七,就同人借100蚊去洗。貨幣信用響咁惡劣嘅環境下仲未崩盤,係日本人至得。所以日本一定要揾水救火,佔領朝鮮事在必行,同大清打一場生死大戰,亦係孤注一擲,非打不可。事後証明,日本豪賭依一舖贏凸,《馬關條約》二億兩白銀賠款(折合600億港元)足夠日本購入足夠黃金儲備,成功建構「金本位」,從此擠身強國之列。

日本明治維新,100%移殖西方觀念,除咗科技同技術外,仲一併將西方嘅文化同社會制度吞曬落肚,依一點或者就係佢成功嘅地方。


話說甲午戰爭前夕,1890年日本根據明治憲法召開第一屆國會,國會模彷英美分上下議院,貴族院(上議院)非選舉產生,由天皇任命。眾議院(下議院)由選舉產生,貴族院係特權階級嘅代表,政治態度極端保守,貴族院嘅作用係剋制衆議院提出有利民生嘅自由化議案,依個情況同今日香港非常相似…民間力量掘起,要求明治政府將更多資源投放響改善國內民生上面,但貴族院明顯傾向維護華族同資本家利益,主張擴張軍力,增大貿易空間。上下議會僵持不下,衡突不斷,甚至發生暴力事件,死咗唔小人,日本頻繁轉換首相同解散國會嘅政治傳統亦係由此而來。如果冇咗甲午嘅勝利,自由主義嘅聲音就唔會被壓制落嚟,日本亦唔會踏上軍國主義嘅不歸路。

明治維新嘅成功,來自剝削日本農民同貧苦大衆嘅剩餘價值投資工業。軍國主義冒昇,亦係將貧苦大眾帶上戰場利用佢哋嘅鮮血圖取國力,甚至到咗最後,美國原子彈選擇投落嘅地方,亦係平民百姓居住嘅廣島同長崎,果然要將日本一舖清袋,點解唔直接投落東京同大阪,兩個皇室貴族同有錢人嘅聚居地呢?

歷史,有時候慘不忍睹,下次再見。

[img]https://upload.cc/i1/2018/03/04/igwlea.png[/img]

:P 【碌葛男人嫁得過】線上購閱
https://play.google.com/store/books/details?id=e1N7DwAAQBAJ

:P 【大清亡國關慈禧蛋牛治】實體購買
https://www.382now.com/product?id=87 

:P  【大清亡國關慈禧蛋牛治】
https://play.google.com/store/books/details?id=C3hjDwAAQBAJ


【常威考証】為慈禧平反系列(三十九)

日本一面,要將國運同中國豪賭一舖……

中國一面,似乎冇打仗嘅心理準備。1889年光緒親政之後,聰明智慧兼備嘅慈禧宣佈退休,依一年佢55歲。以佢嘅能力同政治手腕,要終生執政唔難,但佢知道,大清必需接班,帝國後繼要有人,而且做人嘅嘢,得些好意雖回手,響最光輝嘅時候選擇急流勇退,俾啲機會後輩上位,先係大智慧大菩薩。連依點都唔明,凡人一個啫,既然只係凡人一個,又有乜資格終生執政呢?老而不退有時候幾肉酸,你睇今日嘅譚詠麟同許冠傑嘅分別就一清二楚,而且話退休啫,有需要一樣可以開演唱會架!


1889年退休後,由於當時頤和園未起好,慈禧暫住皇宮旁邊嘅西宛,同政壇仍未割斷,光緒會日日向豆斗請安,豆斗亦會睇奏褶,不過只睇標題,詳細內容就唔睇嘞,治理大清交曬俾劉晶負責,豆斗只保留一項權力,就係人事任命,任何重要官員嘅招聘昇職或炒魷懲處,豆斗都要知要理。聰明人做聰明事,處理一個龐大組織內嘅人事變動,即控制住整個組織,今日我哋國家最高領導人必需兼任「黨總書記」就係咁解。住西宛果兩年,豆斗仲想將中國第一條鐵路項目「京漢鐵路」上馬,可惜後來比翁同龢同劉晶否決咗。(起高鐵貴吖嘛,冇用吖嘛!)


1891年頤和園工程完成,劉晶固然開心到飛起,動用文武百官大鑼大鼓將豆斗送去頤和園頤養天年。去過北京都知紫禁城同位處海淀區嘅頤和園距離都幾遠,揸車要45分鐘,步行要四粒鐘。豆斗入往頤和園後進一步遠離權力核心,除咗大事同皇族紅白二事外,其他政事絕少干涉,好似1891年1月1號醇親王奕譞(劉晶父)過身,白事就由豆斗統籌辦理。其餘時間,豆斗專心扮靚、養狗養雀、信佛睇戲,過住優哉悠哉嘅退休生活。


要提一提,如果冇豆斗,中國就冇京劇,京劇響中國古代稱為「通俗劇」,低三下四窮鬼賤民嘅平價娛樂,係豆斗一手將「京劇」嘅地位提界到「國粹」嘅境界。響慈禧之前,冇女人做京劇,女角色都要由男人反串,係慈禧一手將女演員帶入京劇界,無可否認,豆斗響十九世紀嘅中國,真係前衛人物,話佢係一個禍國殃民嘅無能大嬸嘅朋友,真係要用個屎忽諗吓。

退休嗰幾年,豆斗只見過李鴻章幾次,每一次見,豆斗都會提佢千祈唔好俾大清海軍軍備落後於日本,否則一定大鑊!李鴻章次次都話ok,遠離核心嘅豆斗又點會知道真相呢?至於真正擁有最高權力嘅光緒,則仍然沉溺於佢同珍妃間嘅美麗愛情故事裡,不知天上人間……

日本人非常聰明,睇準治國能手慈禧退下最前線後,就開始佈署同大清攤牌一戰,1890後不惜冒住金融風險狂印銀紙大幅投資海軍,重金購入英國同德國嘅新式戰艦,朝鮮半島已經志在必得,東亞海上霸權先係日本人嘅著眼點,同時,日本亦要藉住依一戰講比全世界人知道:

「東方人唔係東亞病夫呀!死鬼佬!死帝國主義者!」

依句說話,其實係日本人講先!

[img]https://upload.cc/i1/2018/03/05/egUAIF.png[/img]

[369]al [369]al [369]al [369]al [369]al 【碌葛男人嫁得過】線上購閱
https://play.google.com/store/books/details?id=e1N7DwAAQBAJ


【常威考証】為慈禧平反系列(四十)

時間線嚟到19世紀90年代,歐洲帝國俱樂部自德國意大利加入後更加精采,英法早年食得飽得滯,國力滯後,奧匈顎圖曼兩大帝國糖尿病末期,音樂椅開始換人,距離終極大決戰仲有20年時間……

《共產黨宣言》係國際共產主義運動嘅經典政治文獻,由馬克思同恩格斯寫於1848年。內容鼓勵全世界無產者聯合起來發動暴力革命,推翻資本主義並最終建立一個無階級社會為宗旨。共產主義運動令19世紀歐洲依個火藥庫火上加油,同時一江春水向東流,好快直擊帝俄羅曼諾夫政權祠堂……

19世紀東方世界對馬克思完全免疫,我年青時以為太平天國運動或朝鮮民變內一定有馬克思主義成份在內,但長大咗讀史書從未見過半個馬字,後來明白一係翻譯問題;二係東方仍未滋生所謂工人階級。作為西學翻譯第一大國嘅日本,19世紀翻譯咗大量西方文史哲作品,獨獨就絕小馬克思。東方有奴隸制但冇工人階級,只靠冇秩序冇紀律嘅農民革命好難推翻專政皇朝,布爾什維克贏嘅就係贏咗組織性同鐵一般嘅紀律,列寧同托洛斯基修補咗馬克思嘅文人缺憾,十月革命組建世上第一個共產主義政權,八十年後1991年無聲崩盤,令人意外,共產(社會)主義烏托邦實驗最後只有寄望中共今後嘅偉大實踐。

甲午戰爭嘅導火線係一場叫「東學黨之亂」,「東學」係由崔濟愚於1860年所創立,內容混集中國儒釋道,另加巫術拜神炒埋一碟,其實同日本20世紀90年代麻原彰晃所創嘅奧姆真理教有幾分相似,不過前者扭曲宋明理學;後者扭曲大乘佛學。東學教旨係「人乃天」(인내천),主張人人平等、世上不應該有上等人下等人嘅區分,都幾有馬克思主義味道,致力幫助窮困農民爭取合理權益,於是傳播十分迅速,由於信衆太多,一度成為法輪功被統治階層列為邪教大力打壓而消亡。

1885年中日簽訂《中日天津條約》,朝鮮事實上已經變成二次世界大戰嘅波蘭,響1939年納粹德國同蘇聯簽訂《德蘇互不侵犯條約》中被秘密瓜分。

中日一齊註軍朝鮮,保護佢?儍的嗎?冇非都係要剝削佢,強姦佢!揾佢著數啫。同美國駐軍伊拉克原理一樣。用生意角度講,就係低價購入朝鮮嘅產品(主要係農作物)自用,或再高價轉售圖利,李氏皇朝響中間收佣金。Perfert!1894年,朝鮮有九成貨物出口去日本,其實淨係睇依個數據,你就知甲午戰爭中國一定輸囉……民眾係咁比人剝削咪窮囉,人窮就會發窮惡,東學死灰復燃,加上民衆對中國同日本插手自己國家嘅怨恨,佔中就發生鳥!係呀!一切都由佔中而起架!

弊!又寫多咗,下次繼續甲午戰爭!

(哈,點解歷史不斷重複嘅?人類總係不斷喺度重覆犯錯?)

[img]https://upload.cc/i1/2018/03/08/8pQvgt.png[/img]

:P 【大清亡國關慈禧蛋牛治】實體購買
https://www.382now.com/product?id=87 

:P  【大清亡國關慈禧蛋牛治】
https://play.google.com/store/books/details?id=C3hjDwAAQBAJ


【大清亡國關慈禧蛋牛治】實體購買
https://www.382now.com/product?id=87 ;

【大清亡國關慈禧蛋牛治】
https://play.google.com/store/books/details?id=C3hjDwAAQBAJ


【1886年清國長崎水兵事件】

今日叉開一筆,講講依單絕核嘢。明治19年,1886年,北洋水師派出「定遠」、「鎮遠」、「濟遠」、「威遠」四艘鐵甲艦訪問日本長崎。其中「定遠」同「鎮遠」係當時(1886)世上最先進、排水量達7600噸巡洋艦,由世界科技第一強國德國Stettiner Maschinenbau A.G. Vulcan船廠製造,12英寸口徑嘅主炮係當時世上最可怕嘅攻擊武器,船身由30cm厚裝甲包圍,一等一海上怪物。

黃海上演練完,四艦駛入長崎港補給修理,同時耀武揚威。五尺不足嘅倭人睇見巨艦,哇哇聲,大清就是勁啊!大清就是堅啊!船上數百名中國海軍一登陸,立即扯大清旗,拿拿臨為國爭光,排隊叫雞。唔好笑,登陸召妓,各國海軍傳統嚟架,灣仔就係咁旺起嚟……北洋水兵於一妓院內與本地嫖客口角,繼而動武,日本警察到場,拘捕五名水兵。

第二日,400個水兵包圍警局要人,雙方打交,混亂中死咗10個人,傷70人,當中有北洋水兵。咁仲得了?幫襯你日本女人仲要攞命,於是鎮遠炮口對正長崎,要求月本賠償道歉,嚴懲打死人嘅警察。

日本人照做,你惡。

北洋水師提督丁汝昌當時響艦上指揮一切。

清國長崎水兵事件之後,當時任職參謀嘅東鄉平八郎(1848-1934)獲邀上艦參觀。出身薩摩藩嘅東鄉留學英國七年,就讀訓練商船駕駛人員泰晤士航海訓練學院(Thames Nautical Training College),後來佢成為日本海軍大將,佢又唔係好叻啫,生平殲滅咗大清嘅北洋艦隊同俄國嘅波羅的海艦隊啫。

有傳説話東鄉上艦見到大炮上有人晾底環,又見到有人響暗角抽鴉片,仲話佢「撻」咗北洋水師本密碼簿。以雙方兩國當時嘅文明程度嚟講,可信性唔大。

不過東鄉落船後,就真係積極開始制定「征清大作戰構想」,依一點就係堅嘅。

[img]https://upload.cc/i1/2018/03/08/0DZrzf.png[/img]


【常威考証】為慈禧平反系列(四十一)

事後煙,有時候一目了然。身在其中,鬼知咩?

冇咩慘得過訓響度四肢張開任人魚肉,當時嘅朝鮮就係一個咁嘅狀態,其實想響佢身上攞著數嘅不只中國同日本,俄國英國都曾經想分一杯羹,日本知道,如果俄國英國插手朝鮮政局,形勢將會更加混亂,於是日本採取新戰略,反鼓勵中國加強對朝鮮控制,借此削弱其他國家力量,日本明白,只要中國完全控制朝鮮,將來打敗中國即得到朝鮮。李鴻章並冇睇通日本仔攏嘢(光緒更加唔會啦),著力加強控制朝鮮,任命袁世凱為駐朝鮮大臣,響1885至1893年間,年輕果斷有勇有謀嘅袁世凱果然獨攬大權,掌控咗朝鮮海關、貿易同電報業務,同時操縱住李氏宮廷,但佢完全唔知道自己其實不知不覺間服務於大日本帝國嘅利益,且成為日本參謀們手中一隻棋子。

響袁世凱眼中,日本只想響朝鮮做生意揾錢,日本亦以一個貿易夥伴嘅姿態同袁世凱打交道,以袁氏智慧,應該冇咁易被人呃,佢以為中日兩國勢力響朝鮮入面會繼續拉鋸落去,但我相信袁世凱千萬估唔到日本會攤牌,或咁快會攤牌。李鴻章同豆斗亦了解到日本開戰亦冇100%必勝把握,佢估日本唔會搏,點知人哋真係夠薑搏!你估佢唔到囉!

1894年,日本海軍已經完成全面現代化,隨時準備挑戰中國,只係差咗一個開戰嘅藉口。

又拖拖先……

1894年有單嘢,大家記唔記得TB珍妃呀,光緒最愛果條女呢!依一年佢18歲,卜卜脆,正式被冠以「妃」個名銜。唔好以為佢好卡娃兒好天真好傻,其實佢有料到架。一直以來珍妃出名大花筒,出手非常闊綽,宮中太監宮女都愛到佢飛起,但錢從何來?原來財來自有方,佢利用自己係光緒愛妃嘅身份,玩賣官。1894年就被人踼爆佢收咗黑錢,要光緒任命一個文盲去做上海市長,當然亦唔係第一次,中國人貪污嘅嘢你明嘅……珍妃成家都發到盤滿砵滿。後宮佳麗歸慈禧管,慈禧知道後嬲到爆廠,皇帝求情下先免珍妃一死,不過豆斗從此之後好X憎佢,1900年八國聯軍入京逼條女跳井,可能就係因為依單嘢。花邊新聞講完!

1894年1月11日,全琫準帶住一千多名東學教徒同農民響全羅道古阜郡起義,史稱「古阜民亂」。起事理由不外乎官員貪污,官迫民反。事情一發不可收拾,一直以來累積嘅民怨一下子爆發出嚟,全國各地均有農民響應全琫準起義,廢柴朝鮮皇室當然第一時間血腥鎮壓,但死人愈多,民憤只會火上加油。有人話東學黨之亂係日本人響背後煽風點火,但我常公子唔同意依個觀點,東學黨之亂純粹係一個偶然事件,但就觸發咗之後嘅中日大衝突。


東學黨亂事蔓延,李氏皇朝求助袁世凱出手平亂,日本公使為製造日本出兵藉口,慫恿袁世凱出兵鎮壓東學黨之亂,更加講大話日本只想保護貿易同橋民,無意參加任何軍事行動。同一時間響北京嘅日本公使亦同清政府發放相同訊息(類似事件,偷襲珍珠港時再玩一次,當日本聯合艦隊駛向珍珠港時,註華盛頓日本大使宣稱絕唔會向美國發動戰爭),袁世凱同李鴻章都比日本人呃咗,以為日本唔會出兵朝鮮,於是單方面派軍隊進入朝鮮鎮壓暴亂。

但中國軍隊進入朝鮮後,8000名日本軍人同時出現響朝鮮……

[img]https://upload.cc/i1/2018/03/10/IVQqly.png[/img]

【大清亡國關慈禧蛋牛治】實體購買
https://www.382now.com/product?id=87 

 【大清亡國關慈禧蛋牛治】
https://play.google.com/store/books/details?id=C3hjDwAAQBAJ


【常威考証】為慈禧平反系列(四十二)

1894年,適逢係慈禧六十大壽,豆斗生於1835年,又係甲午年,世事邪到你唔信。

頤和園內早響三年前,慈禧已經開始籌備佢嘅六十大夀,人生七十古來稀,十九世紀六十歲絕對係高齡,等於現代人八十歲咁上下,點都要擺番幾圍賀一賀佢。日本方面,伊藤博文係當年首相,我諗佢知道豆斗六十大夀,所以亦預備咗一大堆節目同佢慶祝。

事實上東學黨之亂響中日軍隊進入朝鮮之前已經大致平定,根據1885年中日簽訂《中日天津條約》內容,兩國有權派遣軍隊進入朝鮮維護本國橋民及貿易利益,不過必先預先知會對方,但日本今次派兵,明顯不尊重條約內容,難聽啲講,已經撕毀條約。日本人單方面要求朝鮮改革內政,以避免同類亂事再次發生。李氏皇朝操縱響中國手上,邊有權話事?李鴻章透過袁世凱指使朝鮮政府宣佈,只有日軍撤出朝鮮,先有可能進行改革,日本冇理會,進一步增兵人朝鮮,咄咄逼人。

明眼人一睇已經睇出日本想點……事實上,日本參謀部佈署吞拚朝鮮(甚至大清)嘅戰略,已經進行咗超過十年以上,每一個戰略上嘅可能性佢哋根本一清二楚。1884年3月至6月間不斷增兵入朝,目的就係要將軍隊永遠留低,保護橋民同貿易統統只係藉口,背後其實係一個更龐大嘅軍事計劃,目的係挑起同大清嘅軍事衝突,一舖清中國袋。不過作為第一步,伊藤博文知會大清,如果大清愿意,可以留低軍隊一齊幫助朝鮮進行「改革」,Auntie講得幾好聽呀?如果嫌煩,可以走先,日本自己幫助朝鮮改革。大清嘅選項,就係走同唔走,主導權完全操縱晒響日本人手手,大清撤兵嘅話,日本就明正言順佔領鮮朝;大清唔走,就想辦法引起兩國正面軍事衝突……

當日本不斷增兵同時,李鴻章並冇加派軍隊入朝,我一早講過,李鴻章係聰明人,佢自己知自己事,佢一直唔想同日本人打仗,佢心知肚明,打就一定Hi Hi。但大清國內同李鴻章諗法相同嘅人並唔多,尤其是皇族之內,嗰班智商接近低能嘅滿蒙權貴八旗子弟仲巴屎閉閉,仲覺得日本只係一個小國,膽敢冒犯大清,就他奶奶的死無葬身之地,打就打,教訓日本仔都係時候。1884年3月之後,大清皇室出現「主戰派」同「主和派」兩種意見,「主和派」以李鴻章為首,而「主戰派」就係光緒條白痴仔!大清國內民衆亦熱血上腦,主流民情都話要開戰打仗!其實之前打親都輸,真係唔明大清子民點解咁有信心?可能對手只係黃皮膚,身高唔夠五尺嘅日本人掛?

你話打啫,李鴻章就唔想打嘞,北洋海軍其實係李鴻章嘅私人軍隊,佢一日話唔打就唔打,吹咩。李鴻章被日本逼上梁山之前,仲想以外交途徑化解危機……


日本人響朝鮮諗緊乜,中國人完全唔知道?事後反映出大清嘅收集情報工作真係九流,當時嘅日本同大清使用相同文字(漢字),日本國內嘅報紙或軍事文件,大清冇理由冇間諜收集,亦冇可能睇唔明(英文就有機會睇唔明)!其時活躍於日本國內嘅中國人唔係小數,少少哋都有過萬人,有官紳商人勞工留學生,但當中竟然冇間諜刺探敵方軍情?唔係化?係大清睇唔起日本?定係大清蠢過隻豬,事後睇應該係後者。

兩個相鄰且帶有敵意嘅國家,冇響對方境內設立全方位間諜情報系統?你講出嚟笑大人哋個口喇!我好相信,當時日本已經派出大量間諜(甚至係大清子民身份嘅中國人間諜)滲透整個中國,知己知彼,百戰百勝。大清嘅階磚3底牌佢哋一早已經睇穿睇透,否則冇可能咁大膽挑釁大清開火嘅。

其實未打,大清已經輸咗……

[img]https://upload.cc/i1/2018/03/12/fhOGrE.png[/img]

#ng# 【大清亡國關慈禧蛋牛治】全集,請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

[shocking] 【碌葛男人嫁得過】線上購閱
https://play.google.com/store/books/details?id=e1N7DwAAQBAJ


[img]https://na.cx/i/NT0d0hS.jpg[/img]
【星期日特別放送】低能文化氾濫,蠢係潮流

打開 #facebook 同 #Intrsgram,情況就更加顯眼,個個上載自己去邊度玩,食乜好西,或者豬西自拍,將一個同自己完全唔似樣嘅人擺上去呃like,或者講一堆同旁人或整個世界都無關嘅無聊嘢低能嘢,全部得啖笑。你想搵小小有意義嘅內容轆下,仲難過登天。

整個香港既Social Media文化,要求快捷要求即食,唔要高深只要傳真,有圖有片就最好,啲圖啲片最緊要爆,係真係假都唔重要,個帖寫多幾隻字就冇人睇!就有人話悶!世界只係過眼雲煙,冇人在乎,或者用不著花精神探究或討論,又或者,一般香港人已經喪失咗認知、探索、及批判世界事物嘅能力同興趣。

Social Media本來希望利用無邊無際嘅互聯網世界開闢人類更寬闊視野,從而創造更多新事物。但到頭來,反而令人類眼界更細,只睇到自己同自己身邊嘅狹隘事物,只在乎自己嘅感覺,只將一個人封閉於一個更細小更狹窄嘅世界裡面,柄埋一邊自己打飛機,自己娛樂自己,依種副作用,相係連Bill Gate都估唔X到吧?

「#知識」兩個字,響現今香港社會,更加冇人尊重同在乎,年青人讀書,只係為咗考DSE上大學,要一個學位做職場入場卷,將來入上市公司做CEO搞IPO、分拆再上市集資。日常生活,你試吓同人討論啲有深度小小嘅嘢或者學術問題,其他人第一個反應會覺得你好扮嘢,以大學生自居,一定係想媾女、想拋書包想比較、想抬高自己身價眨低他人、想佔領談話有利位置、搶奪話語權!簡單啲講,係乞X人僧,係極度唔受歡迎,#狗見到都走。

科學、哲學、文學、歷史當然冇人會講同敢講,你去講亦都冇人會有興趣聽,因為社會碌葛會話:「識依啲嘢講依啲嘢根本完全冇用」,社會碌葛時間好寶貴,睇住個市,一分鐘幾廿萬上落,實在唔可以花時間響啲冇意義嘅嘢身上,知識一啲都唔重要,係虛幻嘅,因為知識食唔飽,知識到今時今日亦唔可以要嚟炫耀,或媾女(媾仔)。

咁知識有乜用先?知識冇存在價值,蠢就係常態。

節錄【碌葛男人嫁得過】

【碌葛男人嫁得過】
https://play.google.com/store/books/details?id=e1N7DwAAQBAJ


【常威考証】為慈禧平反系列(四十三)

中國同日本係世仇,19世紀中葉,兩國斷交已近300年。日本曾經做過中國(明朝)嘅朝貢國,即係比錢跟大佬要大佬保護自己。1433年日本幕府將軍足利義滿(70後回憶,機靈小和尚一休裡面嗰個大將軍呀!)接受咗向大明朝貢,直至1549年幕府覺得冇face,所以無聲無息結束咗依段關係,從此兩國不相往來,之後倭寇日本海盜則不斷騷擾中國沿海,最後比大英雄戚繼光打到Stop la,相信大家亦聽過鳥。1644年大清建國,多朝以來亦從來未認真處理過同日本嘅外交關係。

1870年明治政府初建,試圖向大清正式建交,因為兩國貿易額唔細,每年大清從日本進口大量嘅銅,日本亦進口中國陶瓷,而且亦有大量中國人響日本居住揾食。李鴻章當時就認為有必要同日本建立平等外交關係,但最後大清高層並冇做到。

明治政府當時基本嘅對外政策,就係模彷西方帝國主義,響亞洲大陸進行侵略擴張,而朝鮮並唔係佢哋第一個目標。早響1874年,日本就成立咗「遠征臺灣統帥部」,由重量級人馬大隈重信做大佬。同年日本軍利用琉球(今日香港人最鍾意去玩嘅冲繩)問題登陸臺灣,賊佬試沙煲,一試大清水溫。

當時,臺灣只係一個未開化嘅島嶼,島上住咗啲土人(原住民),日軍登陸後,李鴻章命福建船政大臣沈葆楨防守臺灣,兩軍對峙並冇發生大規模軍事衝突。但日本就要求大清約束臺灣原居民,因為之前有原居民殺咗琉球水手,仲要求中國賠償咁話。1874年9月10日,大久保利通到達北京同大清談判。最後由英國人出面調情(停),儍逼恭親王愿意賠償50萬兩(折算1億5000萬港幣)比日本,10萬兩賠償人命損失,40萬兩贖買日本響臺灣起嘅臨時兵營。哇!寫到似處火都嚟埋,有個賊入咗你間屋,然後響大廳中間搭咗個帳幕,跟住叫你俾錢買番個帳幕,仲要唔俾報警!有冇攪很錯?咁嘅情況,明眼人都知道,個屋主一定係--------

低能嘅!

日本人都知道了,既然大清嘅智商係80樓下,亦急不在一時,臺灣已經係囊中物鳥。比20年時間自己預備,一舖吞拚朝鮮,直取中原!當然大清衰極仲有個豆斗,當知道日本野心後,決心傾盡國力組建北洋水師防範日本,於是兩國就開始咗長達20年嘅海軍軍事競賽。到咗1894年,終於要一決雌雄。

哈,今日又叉開咗添,下集再繼續講講李鴻章為朝鮮危險所作嘅外交努力……


[img]https://upload.cc/i1/2018/03/13/P5LQ2u.png[/img]


【常威考証】為慈禧平反系列(四十四)

當上天註定你Hi Hi,你便非Hi Hi不可。

大清係註定咗要響甲午年Hi Hi。當時1894年中日經濟同軍事實力相比,大清事實上佔有些微優勢,日本除咗紡織業外,重工業仍落後於大清,鋼鐵同機器製造量都比中國低,國家收入同資本都唔及大清(當然大清大過佢好多),大清當時財政收入亦非常唔錯,之前借落嘅外債差唔多全部還清。軍事方面,日本擁有戰艦55艘,排水量6萬噸,同北洋艦隊差唔多,北洋仲要多DD,日本常備陸軍22萬,未及大清一半,武器裝備兩國大致相同,夾硬比,大清仲要略佔優勢。

所以,以漏精光緒同翁同龢條男朋友為首嘅「主戰派」唔驚日本仔亦有道理,民間當然一致要打。官吏中所謂「清流派」嘅一班儒吏更成日笑勁李鴻章係綏靖主義者失敗主義者,依班清流,講就現實做就碌Seven,事事道理行先,全冇諗過實際情況,大清要亡,其實都係亡響依種成口仁義道德理念哲學成頭光環嘅好樣手上。咁豆斗呢?佢係聰明人係馬基維利主義者,對日本人佢一清二楚,同李鴻章一樣都唔贊成打。可以拖就拖,可以以外交途徑解決就以外交途徑解決。

李鴻章一心希望取得西方列強同情,施壓要日本以和平手法解決朝鮮半島問題,俄國駐華公使曾經答應調情,但最後冇任何具體行動,俄國嘅態度好有可能一早就同日本有默契要玩謝大清,而且俄國沙皇亞歷山大三世病重,換屆在即,可能亦冇咩心情攪依單嘢。(同年11月亞歷山大三世駕崩,羅曼諾夫皇朝亡國之君尼古拉二世繼位)。李鴻章轉向英國求助,英國提出中日兩軍同時撤出朝鮮首都再談判,但日本拒絕,轉頭就向英國人保証,若戰爭爆發,必然保証上海安全同中立,並全力保障同尊重英國在華一切商業利益!英國人利益得先,亦唔想捲入戰爭,一聲拜拜食花生。

外交手段冇取得任何成效,反而嚴重影響咗大清軍事準備工作。1894年上半年,日本已經全面進入戰爭狀態,總動員22萬名軍人,國內亦招聘15萬軍夫作後勤補給,日以繼夜、夜以繼日橫渡日本海向朝鮮增兵……


見到日本咁,大清國內「主和派」完全失去周旋空間,「主戰派」大力向李鴻章施壓,要求佢同日本決一雌雄!寫到依處,大家係咪以為當時大清嘅統治階層已經全情投入戰事呢?其實又唔係喎,因為仲有另一件比中日開戰更重要嘅大事同時發生中,係乜?之唔係慈禧六十大壽囉。打仗還打仗,豆斗六十大壽就唔可以推遲,打仗同賀壽,兩件事嚟嘅……

舉個例子,當日本軍隊同大清軍隊響朝鮮對峙嘅時候,1894年2月到3月左右,光緒帝合共發佈上諭(聖旨)30條,其中三份一13條係關於豆斗賀壽嘅,北京同各地官員都努力攪緊豆斗六十大壽壇嘢,忙於粉飾太平、送禮疏通。光緒自己同所有重要官員亦將豆斗大壽當成第一優先處理。當一個國家將最高領導人嘅生日當成最重要嘅事,就證明咗個國家嘅上層建築已經腐敗到發霉發臭嘅地步。日本人當然亦考慮過豆斗大壽嘅因素,所以佢哋嘅參謀部,亦將戰爭發動嘅時間推到1894年。

你以為甲午係偶然?真係唔係囉……

[img]https://upload.cc/i1/2018/03/15/xEh8oF.png[/img]

[369] 【大清亡國關慈禧蛋牛治】實體購買
https://www.382now.com/product?id=87 

 [369] 【大清亡國關慈禧蛋牛治】
https://play.google.com/store/books/details?id=C3hjDwAAQBAJ


【常威考証】為慈禧平反系列(四十五)

外交途徑冇力解決朝鮮問題,豆斗又要做大壽同時,身處漢城嘅袁世凱多次向李鴻章要求增兵提高談判籌碼,可惜事情一拖再拖,5月中,日本已經完成朝鮮半島內嘅軍事佈署。袁世凱當時35歲,佢嘅談判對手係日本外相陸奧宗光(1844-1897),陸奧有剃刀大臣(カミソリ大臣) 外號,剃刀,割Auntie喉嚨咁解!日本明治中期向外擴張戰略,陸奧係主要推手,伊藤博文第二次組閣,就揾咗佢担任外相,任內主力征服朝鮮同大清開戰工作,到咗現代,陸奧仍然係唔少日本人嘅偶像。陸奧宗光嘅外交能力同辭令都響李鴻章同唐紹儀(袁世凱老友,1895年後成為大清駐朝鮮總領事)之上,開戰前大清外交處處失利,陸奧宗光就係贏你九條街。仲有,西方列強始終由頭到尾嚴重高估李鴻章對大清皇室嘅影響力。 其實響豆斗同一衆滿蒙權貴心目中,漢人李鴻章始終都係一條狗。

戰爭終於無可避免,6月3號,李鴻章簽發向朝鮮增兵命令,直隸提督葉志超率領2500名士兵由陸路入朝。6月17號,袁世凱離開漢城返國,朝鮮進入戰爭狀態。由6月到7月間,中日兩國繼續交涉談判,李鴻章仍然唔想正面衝突,但日本人半步不退,咄咄逼人,到咗7月中,李鴻章己被逼入死角,唔打唔得,1894年7月25號,大清租用三艘英國蒸汽船,響三艘中國戰艦護航下運載士兵打算登陸牙山支援葉志超,不過其中一艘汽船「高升號」響朝鮮灣被日本海軍擊沉,950名中國士兵陣亡,有人死鳥,大清冇得唔打,8月1日,中日雙方同時向對方宣戰,甲午戰爭正式開打!

北洋海軍同陸軍,其實係李鴻章自己嘅私人軍隊,李生靠團練淮軍鎮壓太平天國起家,佢嘅嫡系部下,多年嚟盤鋸整個大清軍事系統,你睇北洋艦隊大佬丁汝昌,北洋陸軍大佬葉志超全部都係鎮壓太平天國嘅淮軍將領,但係太平天國之亂係19世紀60年代嘅事,甲午戰爭係1894年,過咗三十年鳥,你後生係iron man都冇用,現在都變咗老屎忽,而且中國古代軍人仲有世襲制,軍藉可以父傳子、子傳孫。可想而知,李鴻章嘅嫡系部隊嚟到1894年,己經係食老本、係另一枝大食懶「八旗子弟」,部隊中一係廢老一係廢青,咁嘅班底打硬扙,死得喇。佢哋嘅表現亦響之後嘅戰役中表露無遺。

仲有,依班淮軍將領多年以來,南征北伐,以鎮壓內亂為主,係明苻其實嘅維穩勁旅,打自己人打中國人打長毛打捻軍打回教徒打農民撈油水就天下無敵,而且出曬名凶殘成性,至於為國爭光打同外國人交手,Sorry!未贏過囉!正宗門口狗,專咬自己人,有賊入屋,give hand hand就叻!北洋軍隊最後一敗塗地,李鴻章依種狹隘嘅嫡系思想要付上大部份責任,不過用人唯親益自己友係中國人DNA嚟嘅,本性難移,冇得話佢錯。

對面日本軍人其實都唔好得幾多,甲午之前,日本亦冇乜同外國人交手嘅機會,佢哋嘅陸軍亦係響國內維穩事業中取得戰爭經驗,至於東鄉平八郎主持嘅海軍更加係一支freshmen部隊,賽前全無實戰經驗,初試啼聲揾啱大清做對手,日本人係有運行,亦係最正確嘅選項。

[img]https://upload.cc/i1/2018/03/18/8BIXgn.png[/img]


【常威考証】為慈禧平反系列(四十六)

將打敗仗隻鑊卸比豆斗,真係無銀厘頭,因為當時慈禧已經好似李嘉誠咁退咗休。卸落李鴻章身上都有小小道理,因為北洋海陸軍其實係李生嘅半支私人軍隊,不過冇乜人話係翁同龢條男朋友唔啱嘅?其實當時大清最高領導人係光緒,大清最高權力機關係紫禁城內嘅軍機處,而當時軍機處負責人係翁同龢同李鴻藻,職級上,話事係佢兩位,而一直主戰要打仗嘅人亦係佢兩位元老重臣。

前面講過,吳人翁同龢同淮人李鴻章係天敵,好似毛澤東同周恩來咁嘅關系,明爭暗鬥咗幾十年。比我係男朋友翁我都識諗,推李鴻章去打日本人,打贏咗,我咪威威,因為我係主戰派首領;打輸咗,李鴻章就Hi Hi,都咁happy,無論贏輸我翁同龢都有著數就係咁解。你咪以為依亭Hi Hi做唔出呀,睇咗咁耐歷史,最陰濕嘅就係依種斯文敗類。總之一句,遇到著住老西滿口仁義道德又賺到盤滿砵滿嘅人,就要小心!冇錯嘅!

1894年7月25號嘅「豐島海戰」,成千人響東海浸死,結果增援牙山葉志超嘅清軍只有1300人,朝鮮半島內嘅清軍合共只有3880人。兩日前23號凌晨,日本人打入朝鮮皇宮,打死40幾個宮衛隊,佔領皇宮,軟禁國王高宗及一衆大臣,皇宮落入日本手中,其時袁世凱已經離開朝鮮,避過一劫。

收到漢城淪陷,駐紥牙山嘅葉志超聶士成清軍開始行動,向漢城推進,仲響通往漢城嘅重鎮成歡初次同日本兵交手,大敗!葉聶兩軍向平壤撤退,沿途洗劫朝鮮平民,平民怨聲載道,民心開始傾向軍紀嚴明嘅日本軍人,日本完成控制朝鮮首都漢城、仁川一帶佈防。

戰況加劇,李鴻章調派四支軍隊由陸路入朝鮮,8月6號同葉(問)志超聶士成殘兵會合,清兵合共15000人駐紥平壤,開始建立防禦工事。依個時候,葉問仲同朝廷虛報戰績,話自己之前赤手空拳擊斃日軍2000人,講大話日軍大舉登陸,自己部隊英勇扺抗幾萬日軍,寡不敵衆先撤退平壤咁話……實情係清軍戰死500人,日軍戰死39人,葉問除咗功夫好,仲識吹水吹到飛天,朝廷見葉問一個打十個咁「近」,仲打賞咗佢二萬兩白銀(600萬港幣)做獎金,錢一到手,葉先生就響平壤叫雞飲酒,夜夜笙歌……(佢老味葉問之後唔駛斬首真係天冇眼)


可憐嘅李鴻章同大清仲信曬葉問,以為清軍真係同日軍有得打,李鴻章仲繼續委任自己人葉問做平壤最高統帥,平壤內嘅其他將領一早睇穿葉問壠嘢,內部矛盾爆發,軍隊風紀渙散,士氣低落。

9月12號,日本大將山縣有朋率領14000人,向平壤進軍,要將清軍逐出朝鮮半島……

事情發展到依處,北京紫禁城內班滿清權貴仲未知死,全力攪緊豆斗六十大壽壇嘢,有心人上疏要求停辦幾個大壽項目,留啲錢應付中日戰爭,豆斗一聽,嬲咗!講咗句「今日令吾不歡者,吾亦將令彼終身不歡」(語譯:邊X個令我今日唔happy,我就要佢成世都唔happy),去到咁盡,仲有邊位敢出聲?

平壤大戰在即,日本聯合艦隊亦開始駛向黃海,位處威海衛同旅順港嘅大清最強北洋艦隊亦進入全面作戰狀態。


[img]https://upload.cc/i1/2018/03/20/8EaISF.png[/img]

【大清亡國關慈禧蛋牛治】實體購買
https://www.382now.com/product?id=87 ;

【大清亡國關慈禧蛋牛治】
https://play.google.com/store/books/details?id=C3hjDwAAQBAJ


南無阿彌陀佛


【常威考証】為慈禧平反系列(四十七)

大清原本想用開赴平壤嘅援兵,同牙山葉問聶士誠部隊匯合,向中央嘅漢城形成南北夾擊之勢,但葉聶軍隊成歡一役大敗,只有退到平壤會合大清四營援兵,固守平壤同日軍死過。

1894年9月8號,以打遍天下無敵手嘅葉問(志超)為首嘅清軍,已經完成平壤城嘅禦敵佈署,等待日軍嚟攻城。照常理,雙方實力相近,各有15000人左右,裝備亦大同小異,大家千祈唔好以為日本人裝備勁過清兵好多,其實當時大家所用嘅武器水平同火力大致相同。既然係咁,睇過拿破崙兵法都知,攻城嘅一方完全冇著數,反而守城一方先係佔上風,但認真你就輸了,清軍不但輸,而且輸得好向左走向右走好向左走向右走肉酸。

12號到15號,日軍支援力量響仁川登陸,配合陸路而嚟嘅陸軍部隊,陸續到達平壤外圍。15號浚晨4點,日軍開始向清軍發動猛烈進攻!雙方激戰,旗鼓相當,守城清軍並未處於下風,清晨時份,鎮守平壤城北牡丹台嘅大清將領左寶貴,英勇作戰,見陣地被日軍佔領,決意以身殉國,換上大清卸賜朝服,身先士卒,親自操火炮迎敵,最後被炮彈碎片擊中身亡!日軍非常佩服左寶貴嘅勇猛,之後仲響佢陣亡嘅地方立咗塊石碑紀念佢!

如果大清將士人人係左寶貴,大清點會亡國吖?可惜一百個將軍,左寶貴得一個,其他九個係葉問!九十個仲食緊鴉片吹緊水!成個上晝,清日雙方繼續駁火,清軍藉住防禦工事同堅固堡壘,守住平壤不失,其實稍佔上風。

但係依個時候,葉問忽然叫曬所有將領開會,商量撤兵大計,佔緊上風仲要走佬,你聽過未?驚死嘛!除咗馬玉昆外,其餘人都贊成棄城撤退。下晝4點,平壤落起大雨,清軍停上炮擊,而且響城頭扯起白旗投降,日軍派出使者同清兵交涉,要求清兵開城門受降,單係扯旗唔可以當真,清軍以落雨同入黑為理由,同日軍講第二朝先開城門投降,日軍恐防清軍玩嘢,保持戒備狀態,但停止炮擊平壤城。

傍晚6點,已陸陸續續有清兵擅自逃亡出城,8點,葉問自己亦第一時間拜拜,主帥都閃咗,其他清兵仲唔發顛,完全冇曬秩序雞咁腳作鳥獸散,逃出嘅清軍仲比日軍伏擊,傷亡慘重。次日黎明5點,日本軍佔領平壤空城,取得勝利!平壤一戰,打咗24小時就結束咗!清軍大敗,四散逃走,留低大量物資,單係火炮就留低30門、子彈就留低76萬發、黃金100公斤、銀錠540公斤…………咁究竟大清想點Jet?


平壤一戰,清軍約有2000人陣亡(1500人死於黑夜撤退),日軍僅有200人左右戰死。依一戰亦係中日正規陸軍部隊第一次大規模短兵相接,結果日本人睇穿曬大清隴嘢,原來大清軍隊係「低能」嘅,冇情報參謀系統、冇醫療後勤系統、零戰術運用,同傳說一樣,停留咗響18世紀乾隆時代,完全缺乏保家衛國嘅基本能力,雖然擁有精良武器裝備,但戰術落後,軍紀衰過小學雞,完全唔具備十九世紀現代化軍隊嘅一切條件,從此以後,日本人再唔怕大清,食硬你就係必然!

葉問執番條命渡過鴨綠江返中國。之後被炒魷就一定,但李鴻章仲要求繼續比佢留職出糧,光緒睬你都生臭狐,次年葉問被送去北京監斬。但李鴻章力保佢,結果踎咗幾年,1900年獲大赦還鄉,次年逝世。

北洋陸軍平壤一役total lost……北洋海軍呢?下次繼續甲午戰爭戲肉!

[img]https://upload.cc/i1/2018/03/22/07FCrG.png[/img]

【大清亡國關慈禧蛋牛治】實體購買
https://www.382now.com/product?id=87 

 【大清亡國關慈禧蛋牛治】
https://play.google.com/store/books/details?id=C3hjDwAAQBAJ

【碌葛男人嫁得過】線上購閱
https://play.google.com/store/books/details?id=e1N7DwAAQBAJ


【常公子假如電話亭】之《以左寶貴代替葉志超》

常公子以絕對唔嚴謹嘅方法談論歷史,純粹個人喜好,不喜勿插,啱傾就參予討論。

今日又叉開一筆,問叮噹(唔係多拉A夢)借個假如電話亭,試吓如果平壤之戰由左寶貴代替葉問會有咩效果,歷史冇如果,大家千祈唔好咁認真,因為身處依個時代,認真你會輸了。

李鴻章信葉問,因為嫡系問題,假如當日左寶貴兵諫成功,踢走葉問做總指揮,歷史可能會全盤改寫。首先左寶貴唔會比葉問推去日軍攻勢最猛烈嘅城北而陣亡,以左先生戰意,平壤亦唔可能響24小時內淪陷,以雙方投入戰力估算,清兵不戰而降機會好細,平壤之戰會拖延落去,進入拉鋸狀態,日軍1894年9月16號未能佔領平壤,9月17日黃海之上,相信亦唔敢主動挑釁北洋艦隊,黃海海戰根本唔會爆發,冇咗依場毀滅性嘅大海難,大清仍保有健全軍事實力,絕對唔會一敗塗地。

平壤之戰拉鋸得十零廿日後,大清一定會從陸路加派軍隊渡過鴨綠江增援平壤,日本人未能將清軍成功驅逐出朝鮮,就會開始同大清談判朝鮮前途問題,以李鴻章同豆斗求和不求戰嘅性格,最後又係賠錢了事(三、四百萬兩應該可以擺平日本人),大不了將朝鮮主導權交畀日本,日本人得到朝鮮半島,已經達成之前戰略佈署,相信亦會暫時滿足收手,繼續發展工業,增強國力,力求及早脫亞入歐。

咁冇咗甲午一敗,李鴻章最多俾人叫賣國賊漢奸,唔需要落馬。由佢繼續揸旗,開放改革會順住行落去,當然百日維新同戊戌政變亦唔會出現,慈禧會真係響頤和園退休成為真正老佛爺取代釋迦牟尼,昇上神枱。光緒就算再遇到梁啟超、康有為同六君子等人,都只係會令佢視野更開闊,明白學習西方世界先係發展王道,分分鐘有機會踼走翁同龢條老不死,同洋務改革派嘅李鴻章行得更埋。同埋以當日大清經濟情況估計,1894年左右已經還清外債,之後嘅收入只會遂年上昇,冇咗一系列政治風波,中國會進入全面工業化發展階段,有咗錢,軍事投資相對增加,國力加強,西方列強同日本人更加唔敢予取予攜,任意進出,瓜分中國。

踏入二十世紀初,國家安定繁榮,人民相對唔係太窮後,乜嘢革命思潮更加冇市場。大清繼續統治中國,但會學習英國日本,進入君主憲時代,議會政治誕生。歐洲戰爭頻繁爆發,帝國主義者亦會響亞洲退場,大清自主性更強後,以大清人口嘅巨大勞動力,如果全面投入工業生產,振興出口,大清可能響二十世紀三四十年代已經成為亞洲一級強權。

只係將葉志超換咗左寶貴,就會將中國歷史完全改寫?吹吓水就得!認真你就輸了。

過去百幾年,中國人嘅苦難其實大部份係自己問題。對內張牙舞爪,對外貪生怕死,打自己人最叻,打敵人腳軟。歷史上唔係剩係得葉志超一個。人始終都係主導歷史嘅源頭,一個人嘅所作所為,分分鐘會影響億萬人嘅生死榮辱。

[img]https://upload.cc/i1/2018/03/23/FLCqsd.png[/img]


畀幅地圖巴打及及
[img]https://upload.cc/i1/2018/03/20/C9FWip.png[/img]


跳至第



  快速回覆 - 輸入以下項目

本討論區現只接受會員張貼文章,本站會員請先登入。非會員人仕,您可以按此加入為新會員,費用全免,並可享用其他會員服務。


上次光臨時間: 18/2/2019 3:30
今天貼文總數: 661 | 累積文章數目: 6,465,993

聯絡我們 | 服務條款 | 私隱政策 | 廣告查詢 | 職位空缺
Copyright © 2019 HKGolden.com. All Rights Reserved.