主頁 高登熱話 吃喝玩樂 科技消費 名人專訪 短片
現有會員可[按此]登入。未成為會員可[按此]註冊。
[公司模式 - 關]  [懷舊模式 - 開
[Youtube 預覽 - 開]  [大字型]  [小字型]

您現在聚腳在 學術台內。

【再負荊請罪】全新高登官方app HKG正式上架 會員永久免廣告
是咁的,2016年年尾,我因為忽略會員對手機程式o既需求,做o左一個不明智o既決定,加上一直未有好好回應會員平日訴求,最終令唔少會員不滿。事件並唔單單影響我,亦影響一直以來熱愛高登o既每一名網民,為此再向各位表示衷心歉意。:-(

或者有巴打會講,寫好隻app自然會有人回家。我唔否認自己曾經都抱過呢種僥倖心態,但沉思過後,我明白其實只係寫好一隻app並不足夠,要為高登會員做o既事情實在太多,包括提升網速同改善伺服器穩定、維護自由o既討論空間、鼓勵會員參與創作及討論等。因為,高登最珍貴o既係每一位會員,所以落足心力滿足會員訴求係高登o既首要任務。 ......
精選文章
跳至第

發起人
【常公子近代史】大清亡國關慈禧蛋牛治
441 個回應
【大清亡國關 #候賽因 蛋牛治】

侯賽因的確係一個獨裁者,佢在位嘅時候,被美國同埋西方媒體形容為一個殘暴不仁嘅專政領袖,美國推翻侯賽因,藉口係伊拉克國內擁有巨大殺傷力武器,而且打算向美國或其中東盟友作出攻擊。但係事後證明,呢件事並冇具體證據支持,總之推翻咗就推翻咗,侯賽因亦死咗,件事一了百了,其實好精彩。

伊拉克自從候賽因政權倒臺之後,亂局一直維持到今日,整個國家仍未有另一股勢力,可以打敗其他勢力取得統治伊拉克嘅合法權力,咁樣一亂就亂咗十幾年……侯賽因倒臺之後,伊拉克嘅石油利益當然由美國企業獨佔,咁究竟美國推翻侯賽因政權係唔係為咗石油?我諗答案已經相當肯定。

侯賽因政權嘅崛起,係兩伊戰爭。兩伊戰爭中美國嘅立場係幫伊拉克打伊朗。中東亂局,始於70年代初期,當時嘅美國啱啱由尼克遜放棄金本位,係世界經濟火車頭,連蘇聯都唔夠膽正面挑戰佢,但係中東嘅幾個產油國,佢哋嘅國家力量只係屬於第三世界水平,竟然係嗰個時候連成一線,利用石油供應向美國政府施壓,導致所謂世界石油危機,美國對呢件事其實懷恨在心,之後嘅日子裡面,美國人明白中東諸國再唔可以再團結起嚟,最好就七國咁亂,之後美國人做嘅嘢,都係朝住呢個大方向進發,直至今日。

【#大清亡國關慈禧蛋牛治】語音導航!請大家幫手「#訂閱」我條YoutubeChannel!同埋介紹多啲人睇睇!衝上1000訂戶!

http://yt1.piee.pw/D9R4W

https://youtu.be/0oTgvAP_BGY

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁:https://www.facebook.com/historysandwich/


YouTube 已subscript
皮已正

中學中史真係信老師講用晒錢起野,所以無錢買槍[sosad]


YouTube 已subscript
皮已正

中學中史真係信老師講用晒錢起野,所以無錢買槍[sosad]

唔係化……


YouTube 已subscript
皮已正

中學中史真係信老師講用晒錢起野,所以無錢買槍[sosad]

唔係化……


而家學生會信70-6 是........


【常威中史】為慈禧平反系列(六十二)

相信金正恩呢條肥仔上臺時,冇乜人睇好佢,但係佢竟然成就咗偉大功業,隻手結束咗維持咗70年嘅朝鮮戰爭,實現朝鮮半島無核化,開放改革,真係唔好睇小肥仔(目測230磅)。事後睇返轉頭,有理由相信佢之前剷除張成澤、崔龍海等舊臣,並非勁做,極有可能係剷除阻擋南北韓和平嘅舊派絆腳石,政治嘅嘢,真係冇咁容易俾你睇透。

1895年1月,日軍響山東半島捷捷勝利,1月26日全面進攻威海衛軍港,比起佔領旅順軍港,日軍遭受嘅抵抗比較強烈。但係清兵仍然冇辦法阻擋日本人攻勢,以定遠鎮遠兩艘旗艦為首嘅殘餘北洋艦隊,試圖喺海岸線上用炮火支援陸軍,保衛威海衛,可惜效果欠奉。1月30號,威海衛南岸陣地完全失守,北洋艦隊完全暴露係已經被日軍佔領嘅炮台射程之內,用大清嘅炮射番大清嘅戰艦,陰公豬。

2月3日,威海衛東岸陣地相繼失守,整個威海衛軍港同所有炮台差不多比日本人完全佔領,陸軍雞飛狗走,北洋艦隊孤零零漂浮喺威海衛同劉公島之間嘅水域等死,2月5日深夜時份,日本利用魚雷艇發動夜襲,定遠中魚雷響淺灘擱淺,船身入水傾斜,丁汝昌下令炸沉定遠。

回天乏力,丁汝昌同劉步蟾率領鎮遠艦同魚雷艇退返劉公島作垂死掙扎,2月7號,聯合艦隊23艘軍艦全力進攻劉公島,大清最後九艘魚雷艇全被殲滅。2月8日,日軍佔領劉公島。北洋水師冇路可走,被迫喺海面四處躲避,完全捱打。2月12號,北洋水師派遣代表程璧光前往日艦商量投降事宜,向日軍投降後,當夜丁汝昌、徐步蟾吞生鴉片自殺,丁汝昌享年59歲,劉步蟾享年42歲。


除咗佢兩個,仲有劉公島陸軍指揮官張文宣同時自殺。北洋水師到此全軍覆沒。17號,日清雙方正式簽字落印,即日履行交收航艦同港口事宜,日軍釋放戰俘4000餘人,當中包括不少高級將領同外國僱傭兵。

德國嘅手工藝極品鎮遠旗艦都最後都冇沉到,投降後被編入日本聯合艦隊,沿用返鎮遠個名,服役到1912年於橫濱解體。

丁汝昌自盡,寧死不降,贏得日本軍人敬重,伊東佑亨用商船將遺體送返中國、同立碑以表敬意(日本人真係一個好分裂嘅民族,一邊咁靚仔一邊玩大屠殺……)。關於丁汝昌同劉步蟾生吞鴉片自殺嘅事,有人話佢哋隨身帶住鴉片,明顯煙癮好大。佢哋兩個有煙癮應該一定。當時大清北洋海軍屬於高級官員,有舖煙癮係當時生活潮流,一啲都唔需要覺得奇怪。反而係佢哋典解要採取呢種自殺手法?手槍佢哋一定有,一粒子彈射入個口一了百了,又何需用咁痛苦嘅方法去死呢?睇嚟佢哋只係想增加自己嘅死前受苦時間,以表達自己嘅愛國心同悔咎心,唔識Hi就唔好亂Hi唔該。

想提提一個人叫蔡延干,佢係北洋水師魚雷艇艇長,佢被俘虜後作咗首詩,詩曰:

「渤海清兵勢力微,日東軍士向前馳,此敗沙場君莫笑,他年再戰決雄雌。」

甲午戰爭後佢返番清國,歷任大清海軍部軍制司司長,中華民國海軍中將,民國總統府副大禮官,中國紅十字會副會長等職務,晚年歸隱,用心翻譯,喺清華大學同燕京大學教授中國文學。

邊個話大清冇人?祇不過係唔識用人,用廢官用狗官用貪官用擦鞋仔,唔死都幾難啦Hi?

#常威 #慈禧太后 #晚清歷史 #甲午戰爭 #丁汝昌 #劉步蟾 #鎮遠 #威海衛

[img]https://upload.cc/i1/2018/04/29/e5zfEM.png[/img]


【常威中史】為慈禧平反系列(六十三)

隨住1895年2月17號威海衛之戰結束,丁汝昌自殺,甲午戰爭基本上已經打卵完,大清全無還手之力。1895年2月下旬,日本陸軍擴大遼東半島戰線,全力掃盪遼東半島上殘餘嘅清軍,3月頭,日本全面控制遼東半島,甲午戰爭宣佈落幕。

戰後大家嚟做個總結,甲午戰爭係近代遠東一場重大戰役。大清總動員人數接近100萬,傷亡35000人,整個北洋艦隊被瓦解,海上自衞能力被解除武裝;日本方面,總動員24萬,傷亡人數大概14000人。雙方比較下,日本亦唔係佔得上百分百上風,但最後結果,係日本大獲全勝,呢樣嘢係無需爭辯。

事實上由9月17號黃海戰敗、大清失去渤海制海權開始,清朝政府已經開始從外交途徑求和停戰。鬼子六恭親王嘅復出,更加凸顯咗大清求和心切。11月21號旅順被攻陷,日本國內情綪更加高脹,福澤諭吉(1835-1901,近代日本最重要啓蒙思想家哲學家,印響1000¥銀紙上面嗰位)同唔少社會名流煽動輿論,要求日本陸軍直接攻入北京,堅決拒絕西方列強嘅干涉同埋調停,認為一切應該係要佔領北京之後再講。

西方列強一直喺側邊食花生,亞太區有一天成為亞太區佢個街正X樣,佢哋最想睇見中日兩敗俱傷,日本嘅崛起當然唔係佢哋想見到,因為多隻香爐多隻鬼,日本必然會瓜分咗西方列強在華利益。隨住日本節節勝利,響大清身上攞得最多著數嘅英國同法國,開始響外交上向日本施壓,要求停戰。去到1894年年尾,當成個日本狂烈慶祝嘅時候,首相伊藤博文明顯頭腦比較清晰,佢明白如果日本進攻北京,大清朝廷萬一倒台,咁日本就會失去咗合法嘅談判對手,已經得到手嘅戰爭利益就會喪失,而且冇咗大清政府,日本將要正面面對西方列強,以當時日本國力,並未係時候。


逼使日本停戰嘅其實係俄國,日本佔領同俄國接壤嘅遼東半島,俄國沙皇深感威脅,而且當時係新沙皇尼古拉二世啱啱繼位,新官上任三把火,佢召集30000兵力集結邊境,防範日本人。俄國嘅舉動同埋西方列強嘅施壓,逼使伊藤博文同奧陸宗光放棄直隸決戰,並於1884年底開始同大清談判。

談判嘅嘢有排傾,一面傾日本人一面打,一面不斷增加自己手上面嘅談判籌碼,談判一向需要籌碼,現在香港泛民陣營就係一個籌碼都冇響手,傾?傾條毛!

1894年12月20日,大清委託美國公使轉告日本政府,任命總理衙門大臣張蔭桓(1837-1900)為全權代表赴日談判,結果到1895年2月1號上午11:00先響廣島埋枱傾,啲效率仲慢過烏龜,其時戰局亦發生巨大變化,第一輪和談冇任何實質結果,日本人藉口張蔭桓官階低微唔係老闆冇嘢好傾……

呢個時候大清不得不打出最強嘅談判王牌:李鴻章先生又要出動!

大清有冇人?如果我冇睇錯,應該冇喇,來來去去又係李鴻章。2月19號,威海衛淪陷同時,娶咗日本第一美人為做老婆嘅外相陸奧宗光收到美國駐清國公使電報,大清任命李鴻章為和談全權代表。

[img]https://upload.cc/i1/2018/05/02/asNQIf.png[/img]

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集,請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁:https://www.facebook.com/historysandwich/


【大清亡國關 #大屠殺 蛋牛治】

2018年係Donald Trump年,上半年不停係特朗普同金正恩,下半年不停係特朗普同習近平,對手調咗,但係始終都係特朗普,美國總統先係世界舞臺嘅主角,到咗今日都係,所以我哋只可以相信美元為最值得信賴嘅交易貨幣,相信美債先係最後嘅金融基石。美國嘅霸主地位喺短時間內應該難以動搖,中國要追趕佢,除非軟實力加強,除非即刻出現大規模政治改革,否則係50年之後嘅事。

日本人係一個好奇怪嘅民族,一方面謙謙有禮,另一方面殘酷不仁。某程度上同德國人非常相似,一面聽住舒伯特音樂一面將猶太人送入毒氣室處決……係德國人日本人先做得到。旅順大屠殺係中國人同日本人仇恨嘅開端,呢份仇恨到咗今日仍未正式消解。

日本今日面對嘅問題,係人口老化,再過十年,日本一半以上嘅人口係60歲以上嘅銀髮族,過去十年,日本用喺社會福利開支已經上漲咗一倍。但係日本為咗維持佢哋大和民族血統純正,一直冇大規模放寬移民政策,大量接受外國移民。當然佢哋都心知肚明,一旦放寬移民政策,投入嘅新移民多數係韓裔、中國人或有中國血統嘅人。但係嚟緊嘅世代,日本一定要咁樣做,否則個國家一直老化落去,只會比大時代越拋越遠……

【#大清亡國關慈禧蛋牛治】語音導航!請大家幫手「#訂閱」我條YoutubeChannel!同埋介紹多啲人睇睇!衝上1000訂戶!

https://user35103.pics.ee/DK6LC

https://youtu.be/cnbsPUREOk0

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁:https://www.facebook.com/historysandwich/


[img]https://upload.cc/i1/2018/05/04/p9AfdW.png[/img]

【常威中史】為慈禧平反系列(六十四)

1895年2月12號北洋艦隊全軍覆沒,張蔭桓去日本傾又傾條毛返嚟,第二日劉晶召開軍機緊急會議,會上佢老母佢竟然喊(長息悲嘆聲淚哽咽),主戰派男朋友翁不知所措,李鴻藻叫皇帝罷免李鴻章。好彩住喺隔籬西苑嘅豆斗及時出手,保住李鴻章,因為豆斗知道,要傾,只有李鴻章識傾。真奇怪,翁同龢條男朋友咁叻仔,點解唔係佢出去傾嘅?

2月16號,日本開出和談條件,一定要賠錢,一定要承認朝鮮獨立,一定要割地---否則唔好傾,好快打到嚟北京。期間李鴻章隻身接洽各國領事,希望歐洲列強干涉談判,對日本造成壓力。日本人睬你都傻,繼續擴大遼東半島佔領區,直指直隸。上次已經講過,好彩羅曼諾夫皇朝亡國之君尼古拉二世(1868-1918)出手,否則北京早已淪陷。

3月14號,已經72歲嘅李鴻章出發前往日本進行和談,四億人口嘅大清,最後竟然將依個沉重包袱交畀個72歲老人,你話陰功唔陰功冇?李鴻章帶住隨行官員33人,僕役90人乘坐德國商船從大沽口出發,19號到達福岡。兩國代表喺山口縣赤間關市嘅旅館「春帆樓」舉行會談。講真,喺間旅館同你傾,擺明係貶低你身價,3月20號到4月17號,用咗成個月中間經過七輪會談,最後簽訂日清媾和條約,大清叫佢做「馬關條約」,日本稱佢做「下關條約」。


其實當時開會已經相當國際化,一切文件以英文為主,雙方會談亦透過英語做中介語言。李鴻章嘅談判對手係日本首相伊藤博文同埋外相陸奧宗光。陸奧當時嘅肺病已經相當嚴重,完成埋最後一件任務,過兩年仲死埋。

談判期間,日本不斷以軍事施加壓力,企圖獲得更多談判籌碼,日本仔夠膽死將國內差唔多所有陸軍同後備軍、利用可以動員嘅一切船隻響談判期間輸送去遼東半島同山東半島,令到國內防守空虛,認真狠辣。而李鴻章就不斷打外交牌,希望以西方列強壓力抗衡日本人獅子開大口。

3月24日第三輪和談後,發生咗一件震驚世界嘅大事。李鴻章返回旅館途中,受到日本右翼青年小山豐太郎行刺,子彈命中李鴻章左眼下面頰,行刺事件令日本天皇同內閣極度震驚,佢哋好驚被國際社會指責為一如大清嘅野蠻國家。呢件事亦令到日本嘅談判態度軟化。可以相信,如果冇人行刺李鴻章,日本人一定死咬住遼東半島不放。

小山豐太郎之後被判終身監禁,但係響1907年特赦放返出嚟,有人話佢係頭山滿派出嘅刺客,至於頭山滿係邊位?第日有機會講奪命書生孫中山時再講。

順帶講一講香港人嘅威水史,有份參與談判嘅伍延芳(1842-1922)係百分百香港人,佢早年入讀聖保羅書院,1874年自費留學英國,取得法學博士同大律師資格,1877年成為香港第一位華人律師,1880年仲更加做咗香港第一位華人立法局議員,1881年佢創建電車計畫同進行九龍灣填海工程,1882年加入李鴻章陣型成為幕僚,馬關條約嘅法律條文都係由佢經手,之後佢做咗大清嘅外交家同法律專家,大力改革大清嘅法律制度。1911年亦係佢同袁世凱促成清室和平退位,達成共和,建立中華民國,民國初年出任司法總長,再之後發生嘅事日後再講,總之依位香港人就係勁,就係巴X閉。

#常威 #慈禧太后 #晚清歷史 #甲午戰爭 #李鴻章 #馬關條約 #伍廷芳

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集,請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁:https://www.facebook.com/historysandwich/


【常威中史】為慈禧平反系列(六十五)

行刺李鴻章嗰個日本仔小山豐太郎真係幫咗大清一個大忙,有理由相信佢係鬼,兩國相交,不斬來使,一條72歲嘅老坑喺你國土內進行和談俾人淝一槍,西方列強即刻有藉口介入馬關談判。

其實日本甲午之戰中出大清,歐洲列強都嚇咗一跳,佢哋冇諗過日本仔咁勁,亦冇諗過日本係短時間內可以擴張得咁犀利。如果畀日本成功得到所有嘅戰爭利益,佢哋將會成為大清帝國最大嘅既得利利益者,所謂我唔食唔等於要畀你食。1895年3月27號,明治天皇繞過國會簽署日清無條件休戰敕令,以援和國際社會聲討日本氣氛,依條明治又衝出嚟扮好人,其實人又係佢鬼又係佢。

李鴻章一面養傷,一面同伊藤博文周旋,李鴻章強硬反對日本關於割讓台灣、遼東半島及2億5000萬兩白銀戰爭賠償金嘅要求。可惜李鴻章每日發送返大清嘅會談進展電報,均被日方截取破譯(Seven到一個點),伊藤博文完全掌握大清無意談判破裂底線,於是一步不肯退讓。

終於經過七輪會談,4月17號上午11點40分,雙方響《日清媾和條約》(即馬關條約)上簽字,國際法定義上,甲午戰爭於當日正式結束。簽約後嘅當日下午,李鴻章嘅清國使節團速速離開馬關歸國。李鴻章仲立誓,一生一世不再踏足日本國土。


馬關條約具體內容如下:

一:清國確認朝鮮為獨立國家,朝鮮對清國朝貢永遠廢止。

二:日本佔領區內,包括遼東半島,臺灣及澎湖列島上的一切政府財產及軍用物資永遠讓與日本。

三:兩國各選派官員依據條約附件,共同踏勘並確定遼東半島之劃界。

四:清國支付日本賠款2億兩白銀(折算港幣600億)。

五:割讓土地內居民能任聽其意愿遷移界外與變賣資產,日本亦有酌情權可將當地居民視為日本國民。

六:清國開放口岸通商予日本,並給予日本最惠國待遇。允許日本人在清國設立領事館和工廠。

七:日本在三個月以內撤回清國領土內之所有日軍。

八:清國承認日本佔領威海衛三年,待還清賠款後才交還。

九:清國不可虐待處刑日本戰俘。

十:條約批准日開始,日清停止交戰。

十一:條約由清日兩國批准,於日本明治28年(1895年)5月8日,清光緒二十一年農曆四月十四日生效。

馬關條約上並冇解決到遼東半島嘅問題。因為俄、德、法三國態度強硬,一定要迫日本人交還半島,日本人想拖延時間,俄國人集結海陸大軍威脅,德國亦派遣巡洋艦開赴遠東。到咗1895年5月4日,日本內閣召開會議,作出永久放棄遼東半島決定。11月8號日清兩國簽署《遼南條約》,日本向大清歸還遼東半島,但大清要另外繳付3000萬兩白銀(折算港幣90億)贖金。講真其實都幾抵,呢個價可以買起成個遼東半島,香港啲地產商一定滯。

威逼日本交還遼東半島,俄國嘅戰略意圖非常明顯。因為俄國已經修建緊西伯利亞鐵路,打算橫貫滿州到達俄國嘅海參崴,進而南下遼東半島。呢單嘢,日本人視為奇恥大辱,令日本同俄國結下深仇大恨,十年後,日俄大戰一舖歸還!

日本人其實好記仇,向俄國復仇之後輪到美國,1941年12月7號偷襲珍珠港,就係要報復美國「黑船事件」嘅歷史情意結。可惜美國佬唔係俄國佬,後來佢還返兩個原子彈俾日本。

李鴻章利用外交手段,利用歐洲列強抑壓日本野心,有得必有失,同時亦都引狼入室,甲午戰爭之後,清國亦步入咗畀列強瓜分嘅慘痛歴史。

[img]https://upload.cc/i1/2018/05/07/KjwC6P.png[/img]

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集,請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁:https://www.facebook.com/historysandwich/


【大清亡國關 #楊繼繩 蛋牛治】

楊繼繩是我最喜愛的歷史作家,我嘅大量歷史知識都係來自佢身上,佢寫嘅《墓碑》,係我所睇過最沉痛嘅一本書,用文字為2500萬人立碑。佢嘅新作品《天地翻覆》,亦係我到目前為止,我所睇過分析最詳盡最好嘅文革書籍,如果大家真係有興趣認識文化大革命,有興趣深入理解共產黨統治下嘅中國國情,你一定要睇楊繼繩,我話嘅,『生平不讀楊繼繩,雖稱反共也枉然』。

但楊繼繩並非一個反共人士,反而佢係一個資深嘅共產黨黨員,佢所寫嘅書只係要將歷史如實記錄落嚟,佢嘅動機高尚,佢只係想執政黨勇敢面對真實歷史,然後重新出發。楊繼繩現在都係居住響北京,共產黨並冇迫害佢,我真係唔知點解……

睇楊繼繩,往往會睇到欲罷不能,本書唔可以放落嚟。佢嘅思路係一級,批判力亦係一級,文字力量都係一級。我個人好希望佢嘅所有作品都會被翻譯成唔同嘅語言,令世界上每一個人都可以欣賞到一個咁出色歷史作家嘅著作,我非常期待有咁嘅一日。


【#大清亡國關慈禧蛋牛治】語音導航!請大家幫手「#訂閱」我條YoutubeChannel!同埋介紹多啲人睇睇!衝上1000訂戶!

http://yt1.piee.pw/DHH2V

https://youtu.be/ZGL_9uZ0XlE

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁:https://www.facebook.com/historysandwich/


[img]https://upload.cc/i1/2018/05/09/42ORjG.png[/img]

【常威中史】為慈禧平反系列(六十六)

未講臺灣人民英勇抗日嘅事蹟前,我想補充一則史料。

1894年2月,當丁汝昌率領剩低幾艘殘艦退到劉公島走投無路之際,佢收到一封由日本海軍總司令伊東祐亨(1843-1914)送嚟嘅「勸降書」,原文係英文,信裡面嘅內容大致係咁,我常公子試吓用母語(廣東話Cantonese)翻譯一下:

『大日本海軍總司令中將伊東祐亨,致書與大清國北洋水師提督丁軍門汝昌麾下:

時局大變,我同你現在於戰場上相見,實屬非常不幸。但係今日嘅事,係國家同國家嘅事,並唔係我同你之間嘅私人恩怨,我同你嘅友誼,同昨日一樣冇變過。我寫依封信亦都唔係單單為咗勸降一個清國水師提督咁簡單。

大凡天下大事,旁觀者清,當局者迷。清國海軍同陸軍接連慘敗,相信以閣下嘅聰明智慧,如果能夠心平氣和觀察,一定知道點解。

戰敗同你個人能力無關,係在於大清國墨守成規不懂變通、落後於大時代之故。今時今日,清國聘請政府官員,仍必須經過科舉考試。而科舉考試所考嘅係儒家經典文藝作品,官員晉升,亦係通過讀四書五經作八股文而擢昇。熟讀儒家經典就係昇官發財嘅保證,但係我想問,對於治國,儒家哲學同經典實際效果又有幾多呢?

當今世代,清國仍然沿用古老制度治國,大家都睇到,已經行唔X通。何況成個世界並唔係得清國一個國家,清國要獨行獨往,亦係冇可能。

過去30年,日本所經歷嘅改革亦都非常辛酸,閣下應該一清二楚。今天日本能夠將過去嘅舊患完全清除,係因為我哋能夠配合時代,響政治上作出大轉變,呢個亦係日本能夠自立嘅一個最大原因。

所以清國嘅政治改革係當務之急,如果肯改,配合世界大潮流,清國尚有一線生機,有如果仍然固步自封,唔肯改革,亡國係必然嘅事……』


伊東祐亨對丁汝昌所講嘅政治改革,就係君主立憲同埋西方代議政制民主議會制度。甲午戰爭爆發前幾年,日本已經開始實行民主議會制度,想辦法同歐洲諸國完全接軌,脫亞入歐。想提出一點,大清落後嘅地方係「政治」,而唔係「科技」!

呢封信出自敵人主將之手,具有劃時代意義。對於要大清實行政治改革,奮發圖強,其實民間已經有唔少聲音出現,1888年康有為已經上書清廷呼籲改革,1894年奪命書生亦寫過信比李鴻章,雖然事實擺在眼前,但係真係做嘅人就冇。一群既得利益者繼續維護住原有嘅死板古老制度,自己繼續肚滿腸肥,亡黨亡國關我叉事。

又要講番香港,香港再唔變,未來一定冇份響大桌上繼續玩,但係社會上一群既得利益者,繼續炒樓炒股炒炒炒。「科技」唔去發展,「政治」更調頭向下,我哋一直食糊嘅「法律制度」、「言論自由」完全冇人珍惜。談過戀愛未?佢一直喺你身邊,你梗係覺得冇咩嘢嘅,但一旦佢離開,你就會知道佢有幾好,到時候你就後悔莫及,到時候你又會講:如果要為呢份愛情劃上一個限期,你希望唔係五十年不變,而係一萬年。

到咗甲午戰爭俾日本仔打到一棟都冇,大家先至識驚,從1895年起,政治嘅改革聲音好似狂風暴雨震動大清朝野,風雲際會,下一Round就到百日維新,戊戌變法!

丁汝昌有冇睇過伊東封勸降書我唔知,但係10日後,佢就吞鴉片自殺,害死佢嘅,究竟係日本人?抑或係佢嘅祖國大清?

買定廉航飛機票,下次我哋飛臺灣。

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集,請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁:https://www.facebook.com/historysandwich/


[img]https://upload.cc/i1/2018/12/30/cLXBOo.png[/img]

【星期日特別放送】人夠蠢,政治佛系化


咁講新聞咁講政治,就仲向左走向右走大鑊,2014年佔中之後,只要日常話題間一談及政治,就會俾人標籤你係「#黃屍」或者「#藍屍」。其實大家都係屍體,有乜好分?

「藍屍」仲好好哋仲有位走,近年一做「黃屍」就萬劫不復!政治立場亦唔係非黑即白,非黃即藍,但偏偏社會碌葛就係咁膚淺咁低,有政治立場嘅人唔會受歡迎,會講政治嘅簡直係怪物。

#佔中 後幾年過去,好多人都明白要明哲保身,就要收埋自己,就要冇政治立場,即社會碌葛好鍾意講嘅和理非非「#中立」狀態,又或者乾脆扮蠢乜都唔知,唔睇報紙,刻意過濾資訊自我隔絕政治,同頭來就可以光明正大同人講:「政治我冇興趣架,亦唔知個社會發生乜嘢事,我乜都冇意見架……」

久而久之,人人咁做,變咗大趨勢,乜立場都冇曬,乜都唔識,乜都唔講,個世界就乾淨晒!再冇人會講啲唔啱聽嘅說話。全部變成河蟹依種居於淡水界嘅平和生物。

的確,禪宗冇錯,本來無一物,何處惹塵埃?

#社會碌葛 對政治完全冷感,完全進入 #佛系境界,無慾無求,既來之,則安之,呻兩句就有心理問題。結果,日日殺到埋身嘅白色恐怖冇人理,冇人覺得有問題,民選議員被DQ?合情合理喎,立法會內議員要遠離政治,又啱啫!凡事自我審查,更加係理所當然,或者叫盡忠職守。

到最後,社會碌葛一切都不在乎,好似鍾震濤,就讓一切隨風,結果起個音樂噴泉可以一億,元朗起條天橋又可以十七億,人工島一萬億,條條鐵路單單工程超支100億200億最正常,所有事情再冇人在乎再冇人去理去問,個夾萬嘅密碼亦冇人在乎,你要錢嗎?請隨便入去攞。

頭上嗰把刀落下,社會碌葛亦唔會避,任由把刀批落條頸大動脈度,反正生同死冇咩分別,大家佛系,大家冇所謂,最後社會精英揸保時捷社會碌葛仍坐巴士,其實都是沒有分別的。

或者,以上所描述嘅政治態度,亦係社會碌葛應有嘅政治態度。

節錄【#碌葛男人嫁得過】

【碌葛男人嫁得過】
https://play.google.com/store/books/details?id=e1N7DwAAQBAJ

#碌葛男人嫁得過 #嫁得過系列 #賭Sir #常威 #數學 #哲學 #mathematics #philosophy #生命 #風險管理 #新香港人 #意識形態


[img]https://upload.cc/i1/2018/05/11/zT5WPd.png[/img]

【常威中史】為慈禧平反系列(六十七)

台灣係十七世紀中期1661年由大明遺臣國姓爺鄭成功響東印度公司手上收復番嚟, 1681年佢個孫鄭克塽繼承皇位。1683年舉國投清,降清後受封海澄公,佢仲有個靚女女朋友叫阿珂(似李嘉欣唔似商天蛾),阿珂係陳圓圓個女,詳情可睇《鹿鼎記》。

李鴻章保得住大清龍脈同祖墓所在嘅遼東半島,但保唔住台灣及澎湖列島。《馬關條約》一簽,將台灣割讓畀日本,作為台灣嘅宗主國大清,完全係冇理會台灣原居民嘅感受。

大清遺棄台灣,日本隨即以割讓領土嘅名義出兵台灣,台灣民眾為咗保護家園,自己攞起武器自衛,同日軍打咗一場英勇不撓嘅本土守護大戰。呢場戰爭持續時間之長,日軍傷亡之大,甚至超越咗日本對清國嘅任何一場戰爭,直整可歌可泣,今日冇乜人記得,點都要寫番出嚟,紀念當時台灣人令人景仰嘅民族氣節。

早響馬關條約簽訂前嘅1895年3月中,日本已經派兵侵略台灣,但係侵略行動連個天都睇唔過眼,霍亂(Cholera)幫幫手,日軍病死嘅人多過戰死嘅人。

馬關條約簽訂後,台灣人丘逢甲(1864-1912)提出「台灣民主國」構想,起草咗一篇台灣民立國獨立宣言,公告世界。但係呢個國家只係曇花一現,冇成為現實。丘逢甲作為守護台灣嘅義軍統領,對抗日軍,之後亦逃返大清。丘生有詩傳世講咗當時心境,詩曰:

「宰相有權能割地,孤臣無力可回天。扁舟去作鴟夷子,回首河山意黯然。」


大清官吏相繼離開,日軍大舉登陸,大混亂中,籠裡雞作反,廣東籍清兵開始大肆掠奪,台灣人同清兵之間展開血腥械鬥,雙方為爭奪市政府金庫內嘅金銀,就死咗400人。5月29號,日本進一步增兵台灣,6月2日,日本派駐台灣總督樺山資紀(1837-1922)同大清代表李經方,響基隆港上嘅「橫濱丸」號簽署割讓交收文件,台灣正式響國際法上成為日本嘅殖民地。

6月14號,樺山資紀正式進入台北,佔領台灣總督府。但係台灣人並冇即時投降冇人帶路。由主張抗日嘅清朝將領劉永福(1837-1917)率領一支叫「黑旗軍」嘅義軍繼續對抗日本人,劉永福組織民眾,展開咗一場頑強台灣保衛戰,台灣人當時冇錢冇武器冇退路,得條命同不屈不撓嘅鬥志,同日本人打遊擊戰打巷戰,依場戰爭由1895年6月打到1896年3月,歷時九個月,日本人先至以強大嘅軍事力量完全平定。

保衛台灣之戰,軍民死傷者達到14000人,但係日本人亦要投入兩個半師嘅兵力,付上10841條人命嘅代價。台灣人有幾堅?數字話曬畀你知喇。

可能知道台灣人咁揪得,樺山資紀統治台灣嘅日治時代,並冇作出大規模嘅報復同逼壓台灣人民(如果有嘅請各位話我知),反而認真建設台灣,令台灣邁向現代化。呢啲事我唔敢寫咁多,費事俾五毛話我同日本人塗脂抹粉。

順帶一提劉永福呢個人,佢係太平軍出身,半生戎馬,一生經歷過太平天國、中法戰爭同台灣保衛戰。佢手「黑旗兵」戰鬥力驚人,台灣淪陷後返回廣東,大清仲驚佢作反,強行要佢解散「黑旗兵」。

清史劉永福傳形容佢:「永福骨瘦柴立,而膽氣過人,重信愛士,故所部皆盡死力云。」。

想知更多台灣保衛戰內容,可睇2011年由魏德聖導演的電影《賽德克 巴萊》。

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集,請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁:https://www.facebook.com/historysandwich/


【大清亡國關 #日本帝國 蛋牛治】

2019年1月1日,happy new year!

1895年發生嘅甲午戰爭,其實徹底將東亞整個格局改變。日本人嘅計畫,原本係佔領遼東半島後,就發動「直隸戰爭」,完全照住1860年英法聯軍嘅行軍路線直接打入北京,佔領大清國。當時嘅局面日本人完全有能力咁樣做,因為清國陸軍根本完全唔夠打,冇辦法履行到保護國家嘅任務。日本人最後冇咁樣做,只係因為西方列強嘅壓力,或者講係嚟自俄國嘅巨大壓力。

地緣政治相當重要,中國(清國)同俄國日本朝鮮接壤。中日嘅恩怨,已經延續到今時今日。大家要記得,共產主義係來自俄國,甚至蘇聯1991年嘅解體,某程度上亦都係1989年六四事件所引發嘅連鎖反應,呢件事已經好少人記得。1991年蘇聯嘅解體亦都告誡咗中共領導層,原來一個超級大國真係解體上嚟,可以好簡單,改革開放某程度上非常危險(就好似1902年嘅滿清一樣),所以六四事件之後,中共明白經濟可以開放,意識形態絕對要勒緊不放手,直至今日,我哋見到嘅國情就係由此而來。

放權其實係一件好難嘅事,被迫放權成日都會發生,主動放權歷史上好少見,係奇蹟。上世紀80年代,就連續兩次出現上述所說嘅政治奇蹟,第一次當然就係蘇聯嘅戈爾巴喬夫放權,但某程度上戈爾巴喬夫都係被迫,因為佢唔咁樣做,就冇可能挽留國民對社會主義嘅信心。真正擁有權力而又肯主動放手比人民嘅人,係臺灣嘅蔣經國先生,希望遲啲有機會講講。


【#大清亡國關慈禧蛋牛治】語音導航!請大家幫手「#訂閱」我條YoutubeChannel!同埋介紹多啲人睇睇!衝上1000訂戶!

http://yt1.piee.pw/DM2RE

https://youtu.be/cl32zftlT6c


【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁:https://www.facebook.com/historysandwich/


[img]https://upload.cc/i1/2018/05/14/HlMubY.png[/img]

【常威中史】為慈禧平反系列(六十八)

甲午戰爭嘅慘敗,令到大清再一次陷入前所未有嘅包皮環境。割走台灣澎湖列島(包括約魚台)、賠錢事小,最慘嘅係用咗二十幾年時間建立嘅現化化海軍北洋艦隊被一鋪清袋,大清再一次被清空武力,從此面對外勢力入侵,亦冇力再自衛。

李鴻章利用外交手段抑壓日本野心,同時打開大門引狼入室,入嚟睇,入嚟揀!大清好快步入被列強瓜分嘅命運。最明顯嘅例子係德國嘅威廉二世,甲午之後,德國亦遠渡重洋叉隻腳埋嚟搶嘢食,俄國嘅新沙皇尼古拉二世更加積極預備擴張南下,進一步侵蝕大清領土,日本更加唔使講,背後加強小動作,聯系奪命書生,誓要推翻你滿清王朝不可。

甲午慘敗嘅另一個意義,係宣佈李鴻章時代正式結束。由太平天國平定到1895年嘅30年間,李鴻章權傾朝野,其實佢被稱為做「影子總理」一啲都唔過分。佢手上嘅淮軍系統一直操縱大清嘅軍事力量方向,佢同慈禧太后一手促成嘅洋務運動,更加係大清嘅基本國策,可惜比日本人一棍打巢。30年經營嘅大清現代化任務宣佈全盤失敗,李鴻章響大清政治上、軍事上嘅影響力亦到此為止。

簽完《馬關條約》後,李鴻章更加受到全國上下一致譴責(真係慘,傾又小,唔傾又小,又冇人可以傾……),之後李鴻章辭去直隸總督兼北洋大臣,正式下野,事實上係被慈禧光緒解除咗一齊實際職務,淨係保留返文華殿大學士銜頭,閒居響北京出入紫禁城辦事,直至1900先再復出做兩廣總督。


期間李鴻章做咗中國特使,負責外交禮儀事務,1896年佢就代表中國去咗聖彼德堡出席沙皇尼古拉二世加冕典禮,之後仲公費暢遊歐洲列國考察,優哉悠哉。最出名嘅一件事就係1896年6月去德國照X光,睇吓塊面被日本仔小山豐太郎射入去嗰粒子彈。李鴻章喺政治上影響力暫時消失。不過佢始終大把錢,死唔去嘅。順帶一提,同期男朋友翁同龢先生被調離軍機處,任命為總理各國事務衙門大臣,即外交大臣,不過以佢嘅能力、高傲嘅思想同人脈,能夠做到幾多嘢?大家心知肚明囉。同李鴻章比?男朋友冇得比!

慈禧1889年正式退休,劉晶自己搞咗6、7年就搞到一鑊泡,亡黨亡國咁滯,佢嘅能力有幾高,真係可以睇得出。甲午之後,60歲嘅慈禧重新參與政務決策,但係冇正式復出,只係來回西苑同頤和園,睇頭睇尾。呢個時候,隨著李鴻章嘅勢力消失,慈禧亦都佈署將一直俾南方漢人操縱嘅政局,逐步回歸滿清皇族手上。接替李鴻章做直隸總督兼北洋大臣嘅人係榮祿(1836-1903),榮祿係慈禧堅定不移嘅支持者,早響1861年辛酉政變已經企喺慈禧側邊,1895年,榮祿正式接手大清軍務改革。

太陽能電筒袁世凱再次出場,1894年佢離開韓國,隱伏咗一排,之後就上門投靠榮祿,我諗袁世凱把口應該好得,榮祿一見佢就非常咁賞識佢,仲上奏畀劉晶知話大清冇左依個人唔得,韓國嘅事從此冇人追究袁世凱,所以話袁世凱叻仔就係咁解。當時大清陸軍有幾頹廢、戰鬥力有幾高強,經過甲午戰爭大家應該一清二楚,於是榮祿指派袁世凱改建陸軍系統,組建新軍,要求紫禁城大撥資源,比袁世凱響天津小站練兵,建設中國第一支真正嘅現代化普魯士式陸軍軍隊。

有榮祿枝大水喉射住,亦都係袁世凱一生嘅發跡點,北洋陸軍嘅人同事,從此影響中國政局三十幾四十年,袁世凱亦同時成為晚清近代史上面一個最重要嘅人物(沒有之一)。

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87


follow my instagram @historysandwich

Facebook 專頁:https://www.facebook.com/historysandwich/


[img]https://upload.cc/i1/2018/05/16/rJpMKq.png[/img]

【常威中史】為慈禧平反系列(六十九)

為獨裁者平反,時候大家見啲獨裁者一做就係三四十年,或者佢哋都係唔X想嘅,因為要搵到一個人交權,做到同自己一模一樣嘅嘢,真係好X難,你睇毛澤東,劉少奇唔啱,林彪又唔啱,江青又唔啱,鄧小平又唔啱,最後要將權力交咗畀一個能力好有限嘅大好人華國鋒先生。當其時,慈禧真係好想將權力交畀劉晶,自己安安靜靜退休,唸佛睇戲,但係劉晶光緒真係冇咁嘅能力,雖然佢咁靚仔又有型。

1895年慈禧一步一步揸返權,因為《馬關條約》內差唔多二億兩白銀(600億)賠款,數目實在太龐大,慈禧一定要揸返住條數,否則拖爆大清一啲都唔奇。講番日本,甲午戰爭開打前日本嘅國庫只有3000萬兩白銀(90億,咁小)儲備,為咗打仗發行公債8000萬兩(240億)。成功收返2億(600億),賺凸8000萬兩(240億)。呢場戰爭令日本庫房水浸,之後日本喺倫敦大手購入黃金(sorry!唔係倫敦金),完成國內日圓金本位建設工作,從此以後,日圓成為一種極度有信用嘅國際貨幣流通全世界,日本國力進一步提昇,脫亞入歐,指日可待,當時,一日圓兌換一兩白銀左右,第二次世界大戰之後,日圓先比美國佬大手質低瘋狂大眨值,變為以「千」「萬」做單位,十年河東,十年河西。

慈禧半復出,整治劉晶,之前已經提過1895年有Tom boy珍妃賣官事件,慈禧重責真妃之餘,亦將劉晶身邊嘅豬朋狗友同事革走,唔俾劉晶有私人時間同陌生人接觸。1896年年頭,慈禧甚至將軍機處調去頤和園,響東門外設立軍機公所,方便自己出入辦公,劉晶衰到冇人有,個個當佢透明,正式靠邊站。


上次講過,1896年5月,李鴻章代表大清出使俄國參與尼古拉斯二世加冕儀式,同時暢遊歐洲,其實當時李鴻章有特別任務響身。為咗仰壓日本野心,慈禧決心拉攏俄國對付日本。慈禧心知肚明俄國人想要啲乜,當時俄國正興建緊西伯利亞鐵路,橫跨整個俄羅斯,直達海參威,鐵路可以一直喺俄國領土之內,但係要兜一個大彎,一係就穿過大清滿州領土直達終點,後者比前者短500公里。慈禧用呢個條件拉攏俄國,大清更加投資500萬兩白銀(15億港紙,濕濕碎)成為大清國內「東北俄路」1/3嘅鐵路股東。俄國亦都答應,如果日本再出手侵略大清,一定會出兵幫手,之後嘅日俄戰爭,正正就係由此而嚟,當然俄國亦冇諗過自己會輸畀日本仔,波羅的海艦隊全軍覆沒後,俄國嘅國運亦正式步入墳墓,列寧、托洛斯基講句多謝唔該。

李鴻章去聖彼德堡其實就係簽呢份密約,為咗掩飾唔畀其他列強起疑心(Especially Japan),李生仲專登訪問多四個歐洲國家,照X光製造國際新聞,撈咗個「東方卑斯麥」靚朵返嚟。李鴻章返番中國,佢以為立咗大功,慈禧會原諒佢,但係慈禧用完即棄,正式結束咗同佢30幾年嘅親密戰友關係。

中俄密約簽訂、籌備好向日本賠款後,慈禧又一次穩固咗大清帝國嘅根基,1897年初,慈禧基本上冇過問政事,交返權俾劉晶,但係劉晶一啲都唔爭氣,一事無成之餘,仲響男朋友翁引領之下,識咗個新豬朋,佢叫康有為。

即係呢個時候,世界上最惡嘅人殺到!邊位?希特拉呀!

#常威 #慈禧太后 #晚清歷史 #李鴻章 #俄國 #西伯利亞鐵路

【大清亡國關慈禧蛋牛治】https://play.google.com/store/books/details?id=C3hjDwAAQBAJ

follow my instagram @historysandwich

Facebook 專頁:https://www.facebook.com/historysandwich/

:o) 【碌葛男人嫁得過】線上購閱
https://play.google.com/store/books/details?id=e1N7DwAAQBAJ


【大清亡國關 #劉公島 蛋牛治】

其實甲午戰爭係1894年9月17號黃海戰役打完已經結束咗,之後一段長時間,殘餘嘅北洋艦隊只係不斷逃避全軍覆沒嘅結局,到咗劉公島之役,大清重量級投資北洋艦隊宣佈全軍覆沒,日本人係趕盡殺絕,對大清帝國嚟講,甲午戰爭係一場致命性嘅災難。但我想再三強調,北洋艦隊嘅一眾將士,從來冇退縮過,直至戰鬥到最後一刻,光榮殉國,冇人可以抹殺佢哋嘅英勇同鐵血。

軍事對一個國家來講非常重要,依一點到今日都未改變過。特朗普借住貿易戰大力打擊華為同中興,其實某程度上都係軍事戰略,因為中國嘅高科技公司掌握咗未來重要科技,華為過去幾年喺全世界佈置嘅5G網絡硬件,並唔係單單為咗智能電話市場同互聯網咁簡單,有理由相信當中涉及大量軍事用途,美國人睇見呢個局面,知道再唔喐手,自己就會後悔莫及。

美國人過去半個世紀嘅世界霸權,絕對係嚟自佢哋手上面嘅強大武力。有人認為民主自由公平公正足以令一個國家強大,我話畀你聽絕對唔會,從來只有「槍桿子出政權」,明白呢一點,睇通睇透依一點,歷史有好多疑難你就會一清二楚。

【#大清亡國關慈禧蛋牛治】語音導航!請大家幫手「#訂閱」我條YoutubeChannel!同埋介紹多啲人睇睇!衝上1000訂戶!

http://yt1.piee.pw/DC9X8

https://youtu.be/CdVhqDQHCZQ

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁:https://www.facebook.com/historysandwich/


跳至第



  快速回覆 - 輸入以下項目

本討論區現只接受會員張貼文章,本站會員請先登入。非會員人仕,您可以按此加入為新會員,費用全免,並可享用其他會員服務。


上次光臨時間: 21/5/2019 11:33
今天貼文總數: 649 | 累積文章數目: 6,502,623

聯絡我們 | 服務條款 | 私隱政策 | 廣告查詢 | 職位空缺
Copyright © 2019 HKGolden.com. All Rights Reserved.