主頁 高登熱話 吃喝玩樂 科技消費 名人專訪 短片
現有會員可[按此]登入。未成為會員可[按此]註冊。
[公司模式 - 關]  [懷舊模式 - 開
[Youtube 預覽 - 關]  [大字型]  [小字型]

您現在聚腳在 學術台內。

請大家務必定期更改密碼

有見近日有會員懷疑自己帳號被盜用,我們在此向大家呼籲,為保安理由請定期更改密碼,並要為電腦安裝最新的網絡保安軟件,如無必要亦請不要在不屬於自己的電腦登入任何需要密碼的網站,謝謝各位。

香港高登管理員團隊
精選文章
跳至第

發起人
【常公子近代史】大清亡國關慈禧蛋牛治
260 個回應
真係!唔通我同成龍影過相又話你知咩?情況都係一樣,見過皇帝嘅有為自抬身價自我感覺非常良好,皇帝亦比咗個「總理衙門章京上行走」職位佢,其實就係「跑腿」,根本冇官位,佢連官都唔係,又點有可能參與戊戌變法嘅高層決策呢?

但係6月之前,佢同隊冰超已經響北京組織「保國會」搞政治文宣,人氣好盛,係一個有朵嘅政治KOL,劉晶好欣賞佢依方面嘅才華,於是下詔叫佢去上海辦報,配合朝廷宣傳戊戌變法。但有另一個講法,劉晶專登調走佢同隊冰超,係唔想佢哋繼續留響北京吹水刺激京城裏邊嘅權貴保守派。有為同隊冰超魯莽多咀,其實已經引起好多人不滿,劉晶身邊幕僚六君子之一嘅楊銳(1857-1898)就建議皇帝儘快同康有為脫離關係,楊銳講過「康不得去,禍不得息」,亦係呢個緣故,劉晶為咗息事寧人,於是即刻調走有為去上海辦報。

有為嘅吹水嘢,下次先繼續。但藉住一場政治運動自抬身價,並唔係乜嘢新鮮事,古代有今時今日都大把。有時候真相係乜嘢其實唔重要,最重要係,你講出嚟嘅嘢有冇人相信你。你想用講大話去攻擊一個專係講大話嘅政權,其實大家都喺度講緊大話。康有為同梁啟超之後係食緊戊戌六君子嘅人血饅頭壯茁成長,呢一點絕對不可以原諒。


#常威 #慈禧太后 #晚清歷史 #戊戌政變 #百日維新 #康有為 #六四

[img]https://upload.cc/i1/2019/01/11/KkF8u4.png[/img]


【大清亡國關 #馬關條約 蛋牛治】

馬關條約天文數字嘅賠款事實上冇拖垮到大清帝國,甲午戰爭戰敗,最重要係表現咗清帝國幾十年來所做嘅洋務運動徹底失敗,有人話日本有明治維新,清帝國冇。但其實兩個國家嘅現代化步伐差唔多響1865左右同一時間開始,清帝國叫「洋務運動」,30年後,兩個國家嘅現代化最後變成一場「黃海海戰」去分高下,四個小時嘅驚天大海戰中,最後決定咗彼此嘅命運同去向。

最近有朋友同我傾,割讓香港嘅《南京條約》同埋《北京條約》係由清帝國統治者愛新覺羅家族所簽下,而兩份條約嘅正本,現存於臺灣故宮博物院(不知資料是否有誤請指正),所以朋友唔明點解英國係同中華人民共和國去談判香港前途問題,而最後香港嘅主權係歸於中華人民共和國?要答呢個問題,其實好複雜,會牽涉一大堆國際法,我其實都唔識,但我知道世界上只有一個中國政權係被聯合國正式承認,1972年前係中華民國,1972年後就係中華人民共和國。而所謂中國政權就係清帝國嘅延續體,馬關條約賠款亦喺1911年中華民國成立後繼續繳付畀日本,亦都係相同道理。

1972年,尼克遜訪問中國,同周恩來握手一刻,世界嘅格局從此大變,同一年尼克遜取消金本位,從此以後世界貨幣利用國家信用去backup,其實兩者息息相關。

【#大清亡國關慈禧蛋牛治】語音導航!請大家幫手「#訂閱」我條YoutubeChannel!同埋介紹多啲人睇睇!衝上1000訂戶!

http://yt1.piee.pw/EVKDE

https://youtu.be/CCuLusKmPb0

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁:https://www.facebook.com/historysandwich/


[img]https://upload.cc/i1/2018/06/06/qvVIN2.png[/img]

【常威中史】為慈禧平反系列(七十八)

世界踏入二十世紀初期,其實係一個作故仔嘅年代。

因為普羅民眾識字率上昇,油墨印刷技術成熟,閱讀階層人數激增。無論響西方世界定東方世界,民眾開始靠著閱讀報紙刋物書籍小說,增加對時局同世界嘅認識,世界進入真正嘅「媒體主導意識形態時代」。當然,文人多大話,寫出嚟嘅嘢有真亦有假(我常瘋子就係好例子),有政治宣傳成份,同時亦有老作吹水,加鹽加醋。

有歷史學家分析,發生響1914年第一次世界大戰嘅部份成因,亦係媒體同埋小說不斷炒作英法德三國之間嘅仇恨而引發,英國嘅大量廉價小說作家paperback writer為咗爭取讀者同銷量,不斷推出德國要征服大英帝國為主軸嘅戰爭間諜小說作品,民衆睇到上晒腦,自然對德國心生怨恨,結果戰爭一爆發,大量英國民眾主動參軍對付德國人保家衛國,最終被送入戰壕直達西方極樂。

寫得出嚟嘅嘢、講得出嚟嘅嘢就係真?咪玩啦Baby。

響大清國亦有兩個作故大師名滿天下,佢哋就係有為同隊冰超兩師徒,有為畀劉晶調咗去上海辦報,繼續吹水。之後戊戌政變爆發,豆斗反撲劉晶(詳情遲啲再講),維新派人士遭到朝廷搜捕,有為去咗英國大使館要求政治庇護,隊冰超則入咗日本領事館。

有為嘅造假去到乜層次?大家可以睇睇,1898年9月15號,當時慈禧見百日維新變法運動岌岌可危,外國勢力嚴重介入,諗住煞停改革。依個時候,劉晶比咗封密詔楊銳,內容大致係「要想辦法既唔得罪慈禧,又能夠讓變法繼續行落去」之類,9月18號,有為響上海得知密詔內容,其後偽造出另一份密詔,內容係劉晶叫佢設法相救,並要求大英帝國介入,仲加入「圍園殺后」光緒企圖行刺豆斗嘅攞命情節!


過咗幾日,戊戌政變發生。

10月6號,經英國幕後軍情六署間諜李提摩太牧師(Timothy Richard,1845-1919)協助,有為逃亡去咗顛覆基地香港,接受當時英文報紙《德臣報》訪問,就將呢份偽做嘅密詔公佈全世界,攻擊抹黑慈禧太后粉碎百日維新,同一時間抬高自己喺戊戌變法中嘅影響力(Auntie你只係一個跑腿呀冚家鏟),有為真係咁都做得出?響北京嘅豆斗睇到份報紙,仲以為江緒真係想謀害自己,激到差啲想殺咗劉晶。直到1909年,楊鋭個仔將密詔原件上交都察院,有為嘅驚天造假行為先至被揭穿。

我好明白有為諗乜,一個考科舉考到30幾歲嘅男人,懷才不遇,做唔成公務員,半生鬱鬱不得志,一有機會,自然不擇手段向上爬,自己高估咗自己嘅角色同埋能力,亦都係一般讀書人嘅通病,洪秀全已經係一個好例子,當然有為冇洪秀全嘅膽色同能力,但有為嘅造假行為,亦足以令佢載入史冊。流芳百世?遺臭萬年?咁就要睇吓大家點睇?但係無論係點,佢都係成功嘅,依一點可以肯定!

#常威 #慈禧太后 #晚清歷史 #戊戌政變 #百日維新 #康有為

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集,請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁:https://www.facebook.com/historysandwich/


[img]https://upload.cc/i1/2018/06/07/5U21o7.png[/img]

【常威中史】為慈禧平反系列(七十九)

戊戌政變真相仲神秘過美國50年代羅玆威爾(Roswell)事件,究竟有冇外星人嚟過地球?喂!亞視當年播放解剖外星人嘅片段又係唔X係真?真係冇人知?

政治真係有好多秘密,行刺甘乃迺嘅真相又係乜?戴安娜同佢個埃及裔未婚夫真係死於車禍?如果真係純粹交通意外?點解跟住白金漢宮內有人要自殺嘅?赫魯曉夫當年又點樣比布里茲尼夫逼宮成功?甚至1971年林彪點樣發動政變推翻毛澤東?到依家都係冇人知,嫌遠?近小小,王立軍點解要走入美國大使館?劉慧卿同何俊仁當年入中聯辨同李剛傾過啲乜,亦從來冇人知道。

眾說紛紜下,好多政治神秘事件最後都會有一個官方版本叫你去信,當然官方版本大部分都係假嘅。好似林彪事件,最後就定性為反革命反黨叛變,咁到底點樣反呢?具體嘅政變內容係乜嘢呢?都係冇解嘅,只係知道佢最後要坐架飛機飛去蘇聯,飛機中途響蒙古人民共和國肯特省溫都爾汗撞山解體,最搞笑嘅係,一架飛機喺幾千公尺上空爆炸,中共官方發佈嘅照片裡面,竟然可以見到個樣可以變依稀辨認到、冇粉身碎骨嘅林彪、葉群同林立果遺體?

仲有仲有,更加唔可以唔提嘅係馬航MH370,飛機呢?去咗邊呀?大佬我哋係生活響一個三萬呎高空上人造衛星可以辨認人類身份嘅世界裡面,你同我講搵唔到一架失事飛機嘅殘骸?我真係點相信你好呢?飛機上大部份都係中國公民喎。

但係戊戌政變就連一個官方版本都冇,呢個係大清帝國嘅特色,佢哋係唔鍾意發表官方檔案嘅,一方面係愚民政策,另一方面響一個文盲率達到99%嘅國家,呢啲嘢唔係太重要囉。如果唔係日本人同外國媒體將甲午戰爭發生嘅經過詳盡記錄落嚟,我哋今日根本唔知道當日發生過乜嘢事?戊戌政變,究竟有冇「圍園殺后」件事呢?抑或係有為齋吹水?但係20世紀80年代,又有日本人搵到當年行刺慈禧個殺手畢永年嘅証據喎。又係嗰句,寫出嚟就係真架?冇嘢吖嘛BB?


其實成個戊戌政變嘅過程,有好多事仲係一個謎。

其中康有為嘅參予度同埋佢同皇帝嘅關係,就有幾個唔同嘅版本。有版本認為一切都係有為之後嘅吹水技倆、自抬身價、純粹造假。亦有版本認為康有為一直lead光緒鼻子走,百日維新,根本係康有為作為幕後玩家,主導光緒嘅一場現代化奪權政變。康有為可以重要到有機會成為大清嘅首相,但係亦有人覺得佢只係一條説謊的文棍。因為官方從來冇正式嘅版本公佈,後世人認識百日維新或戊戌政變嘅史料,其實好多都係由康有為,梁啟超及其門人子弟寫出嚟嘅資料。甚至專門研究中國歷史嘅外國專著,好多嘅原始材料都係嚟自有為一方。

但進入互聯網世代後,潮流興拆大台。越嚟越多人鍾意挖出一啲我哋以為係英雄人物嘅臭事。奪命書生孫中山就係其中嘅好例子,康有為嘅驚世騙局,亦一步一步被揭穿。同樣道理,魔鬼慈禧,亦根本唔係嗰回事,整個近代史,要平反嘅嘢,實在太多。

太多太多……愈接近20世紀就更多更多更多,或者呢個亦係歷史本身最有趣嘅地方。

#常威 #慈禧太后 #晚清歷史 #戊戌政變 #百日維新 #康有為

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集,請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁:https://www.facebook.com/historysandwich/


[img]https://upload.cc/i1/2019/01/14/v2ICV0.png[/img]


【大清亡國關 #遼東半島 蛋牛治】

今日同大家講吓日本,現代日本。日本係香港人最鍾意去嘅地方,有唔少香港人視日本為家鄉,當然要成為一個日本人好難,大和民族有高度嘅排外性,佢哋亦都充分瞭解,如果大規模接納外來移民(尤其是中國人),日本呢個國家好快唔存在。日本當前遇到嘅問題,係人口急劇減少,新一代普遍唔願意生育,甚至去到唔願意結婚唔願意拍拖,其實都好大件事。因為唔繁殖,係違反人類嘅生物天性。未來二三十年嘅日本,將會係一個超級老人國家,我相信國策上,佢哋一定要吸納外國移民以增加本地人口,我知道佢哋好唔想咁做,但一定要咁做。

中國人口龐大,係中國發展最大嘅劣勢,同時亦都係最大嘅優勢,生物學上,物競天擇,數量多永遠有優勢存在。如果用呢個講法去分析,共產主義反而更符合生物學定義上嘅人性,因為喺共產(社會)主義世界,因為資源分佈比較平均同計劃經濟,人口數目好容易會上昇。相反喺高度資本主義世界,先進工業社會,人口下跌亦係一種常態。

當然現今地球,人類數目已經太多,多到地球不能夠承受,人口減少應該係正面嘅事,如果咁樣講,日本又有優勢喎。

咁究竟係有優勢?抑或劣勢?好亂呀…………

【#大清亡國關慈禧蛋牛治】語音導航!請大家幫手「#訂閱」我條YoutubeChannel!同埋介紹多啲人睇睇!衝上1000訂戶!

https://user35103.pics.ee/EES3E

https://youtu.be/o56_g2T3zvo

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁:https://www.facebook.com/historysandwich/


[img]https://upload.cc/i1/2018/06/11/pFSH93.png[/img]

【常威中史】為慈禧平反系列(八十)

80回了…………滾動!多謝大家支持厲鬼寫歷史!

故事係咁樣開始嘅,1898年6月11日劉晶頒發《明定國是詔》開始戊戌變法,到9月14號深夜發生政變結束,史稱「百日維新」!

戊戌變法,後世人認為係新思想(新黨)同舊思想(舊黨)嘅鬥爭,又係嗰種呃細路嘅正邪二分法。其實內裡係劉晶同豆斗嘅權力鬥爭,亦係滿人同漢人之間嘅鬥爭,係南方同北方嘅終極對決,錯綜複雜縱橫交錯,絕對唔係非黑即白,更加唔係丹布朗嘅天使與魔鬼,加上之後仲有康有為集團響大英帝國同日本人控制下嘅一連串造假論述,更加令單嘢複雜化。

當時嘅清朝打輸甲午戰爭,李鴻章落馬,恭親王同軍機重臣李鴻藻瓜埋,加埋男朋友翁被炒魷,權力中心呈現真空狀態,大家都知道爭產就係好時機。中國人就係鍾意鬥鍾意爭權,外國勢力乘機插手,民生嘅嘢,一向唔係政治嘅考慮範圍。

至於戊戌變法嘅具體內容,如下:

政治方面一句講曬就係裁員,精簡架構提高效率,大量辭去多餘職位,以及提拔新人上位。至於具體嘅政治體制改革,例如佈署君主立憲,其實係冇講過嘅。有為之後加上去嘅嘢,全部係吹水。

最受人爭議嘅係教育方面,戊戌變法廢除八股取士,考試唔再考八股文,一律改考策論。籌辦京師大學堂同醫學院,彷效西方學制,於全國設立中小學校,教學內容大量加入西學,傳統卜卜齋專教儒家哲學嘅私墊從業員被一舗打殘,而且鼓勵官紳辦報,開放言論自由之路。

經濟方面包括興辦鐵路,翻譯西方技術書籍,認真講求工藝製作,鼓勵發明創造,而且第一次提出「專利權」概念,鼓勵私人資金創辦企業,亦開始模仿西方編制政府財政預算案。其實以上嘅嘢響戊戌變法之前,慈禧一手推動嘅洋務運動一路做緊,成個清國亦一步一步邁向緊現代化,只不過一場甲午戰爭將所有嘢推倒重來。

上述三項就係戊戌變法嘅主要內容,其他措施包括整頓北京市容,派出大臣去外國考察,改良傳統司法制度貼近西方,以及命令各省保護外國教士及清國教民,防止宗教衝突(教案)再次發生,提高國家文明形象(又有邊個估到年零後整單義和拳排外暴動事件?)。


有一派人覺得上述嘅維新政策都係康有為一個人提出,一定係錯啦。因為除咗大刀闊斧廢除八股文改革教育制度之外,其餘嘅事都係炒舊餸,豆斗當政嘅時候其實一路講緊do緊。所謂維新,只不過係將啲嘢再勁講多次。但係百幾年前嘅中國同今日一樣,中央有中央講,地方有地方做,中央講嘅嘢,地方政府不一定要執行,而且執行上亦可以五折執行,甚至一折執行都得,甚至唔執行李亦都吹我唔漲。戊戌變法期間,除咗北京天津、同一路對中央政府忠心耿耿曾國藩李鴻章代表嘅軍事大省湖南認真對待之外(毛澤東同劉少奇就係湖南人,當時就以學生嘅身份接受新思維)。其他省份都係採取「聽咗就算」嘅積極態度。所謂維新其實從來冇維新過。

山高皇帝遠,地方政府嘅陽奉陰違,亦係中國官員嘅傳統政治智慧。今時今日中央政府盤滿缽滿,地方政府債台高築亦可以反映出當中嘅關鍵。要知道,地方政府唔可以比中央管得太緊,否則邊有位上下其手?借返嚟嘅錢自己偷咗移民美加,債項留番畀地方政府,最後想中央政府同你埋單?大家係咪發緊夢呀?

下次carry on……

#常威 #慈禧太后 #晚清歷史 #戊戌政變 #百日維新

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集,請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁:https://www.facebook.com/historysandwich/


[img]https://upload.cc/i1/2018/06/13/IrlnC7.png[/img]

【常威中史】為慈禧平反系列(八十一)

好多人有一個錯誤嘅感覺,覺得劉晶一生一世都係豆斗嘅扯線公仔。上述嘅講法基本上冇錯,豆斗係劉晶嘅大姨媽,大家都知道大姨媽有好大威力,大姨媽到,就算你幾強壯都要請假。但自從豆斗1889年退休之後,佢真係將權力交畀劉晶,自己搬去頤和園遠離紫禁城權力核心唸佛睇戲。之前我講過,豆斗有時候仲會睇奏摺,但只睇heading,略知大概就算,佢只係保留一項權力,就係決定重要官員(例如李鴻章級數)嘅昇降同去留。

打甲午戰爭時,豆斗基本上唔知道戰況嘅具體發展,劉晶同李鴻章多次向佢隱瞞軍情,之後大清徹底地Hi Hi,佢先逼不得已出返嚟震住個局面,講真真係唔似想同劉晶爭權,而且1898年時,豆斗已經63歲,聞到棺材香,爭嚟托?相反,豆斗復出,最唔開心嘅係27歲嘅劉晶,好多屎尿(史料)都講畀我哋知,劉晶嗰幾年好唔開心。呢種廢青,能力有限,讀書唔成,但偏偏又想改變世界大展拳腳。唔畀你玩你就搞事掟磚,畀你玩又玩到一Pad屎,老人家出嚟幫佢收拾殘局,佢就話人老屎忽霸住個位。呢啲事大家都見唔少囉(忽然變咗愛港力上身)。

戊戌變法初期,豆斗劉晶合作順利,頭果60日,可以話係佢哋嘅蜜月期,朝廷嘅變法意志全國上下都感受得到,當然做唔做係另一回事。


其實喺呢段時間,反對嘅聲音已經開始出現。裁減官員,精簡架構,改革教育。表面好好聽,但另一面就係大量人失業。呢個世界上有兩樣嘢千祈唔好做,第一樣係著紅鞋勾二嫂;第二樣係打爛人哋飯碗,青幫規條三刀六洞嘢!變法繼續行落去,好多老屎忽官員同八股文舊式教育工作者都預計到自己即將乞食。北京城內,既得利益者食長糧者收租佬加滿蒙貴族聯埋一線,反對一系列冒進嘅改革措施,呢啲就係守舊派,就係所謂「舊黨」,後世人成日將呢種人講成反面教材,其實佢哋都係為咗想保住個飯兜啫?港豬話齋搵食大曬,邊有話啱定錯?相反所謂一班「新黨」,急於改革,藥石亂投,完全冇理過人哋感受嘅,呢班人又可以被稱呼為正義嗎?

舊未必係錯嘅,新亦未必啱曬,世界冇所謂非黑即白。大部份人為咗搵食供樓都係遊走於灰色地帶之間,要明白呢個道理相信要40歲後……孔子話「四十而不惑,五十知天命」,我就話「四十而知灰,五十要認命」。

或者開頭變法進行順利,劉晶條廢青開始鬆毛鬆翼,組織自己班底,任用大批新派官員佔據朝廷有利位置,呢班人即係後來講嘅所謂「新黨」,問心嗰句,劉晶咁樣做真係為咗改革?真係想為廣大人民謀幸福?咁樣諗,就將佢諗得太高鳥。佢組織自己嘅班底,無非都係想同大姨媽奪權。如果劉晶冇搞搞震,變法真係可以行落去,或者過多幾年,搞埋君主立憲都仲得。但係劉晶同林彪一樣,冇辦法等多幾年,等最高領導人過身,個世界咪係你咯囉。林彪仲情有可原,因為佢自己年紀大身體又好差(傳說有鋪煙癮),分分鐘仲早死過仲響花叢中游走嘅毛澤東。但係劉晶當年只係27歲,要同一個63歲嘅女人鬥長命,我諗佢嘅勝算都幾高。佢連依點都諗唔明白,我差不多可以肯定講一句,佢係:

低B嘅!

劉晶點樣玩嘢?佢側邊D屎忽鬼點送佢上路?下次繼續。


#常威 #慈禧太后 #晚清歷史 #戊戌政變 #百日維新 #光緒

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集,請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁:https://www.facebook.com/historysandwich/


【大清亡國關 #勸降書 蛋牛治】

今集我講由日本海軍大將伊東佑亨寫畀丁汝昌嘅一封勸降書,由日本人嘅眼光去睇下當時大清嘅弊病。一句到尾,伊東就係覺得清帝國已經落後於世界大潮流,再唔作出改革,一定亡國。人類係非常之有智慧嘅生物,我哋好多時候都知道結局係點,但係我哋好多時候又做唔到啲乜嘢去改寫個結局,百幾年前如是,今日都如是。

今日人類面對最大嘅問題,一定係環境污染。發達工業同科技將我哋帶到一個舒適無比嘅新世代,但係凡事冇免費午餐,人類必須付出極大代價去得到今天嘅享受。未來世界,資源會極度缺乏,生態環境會日漸惡化,呢啲事大家都一清二楚。但係要去改變,就似乎冇一個人有能力可以做到。

對於保護環境問題,目前人類仍然停留喺玩game嘅階段,統治階層教我哋,用少個膠袋用少支飲管就可以挽救地球,但係單就塑膠污染海洋而言,我哋面對最大嘅敵人唔係膠袋亦唔係膠飲管,而係會浮、會佔用更大空間嘅膠樽,但係販賣式飲料,係一個龐大嘅工業貿易。你叫我用少個膠袋唔好同人攞飲管,不如你先禁止咗用膠樽先啦。

早兩日去麥當勞,佢冇畀支飲管我,嗰一刻我好嬲。我問自己,我哋全人類究竟做緊啲乜嘢?如果你以為用少一支膠飲管,個地球就有得救,我就更嬲,人類嘅智慧幾時低到咁樣?個世界的確好有問題。

【#大清亡國關慈禧蛋牛治】語音導航!請大家幫手「#訂閱」我條YoutubeChannel!同埋介紹多啲人睇睇!衝上1000訂戶!

https://user35103.pics.ee/DY8YK

https://youtu.be/1kK9_S5ORbo

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁:https://www.facebook.com/historysandwich/


[img]https://upload.cc/i1/2018/06/16/GrYMN1.png[/img]

【常威中史】為慈禧平反系列(八十二)

劉晶一直唔鍾意大姨媽豆斗阻頭阻勢,依一點我非常肯定。戊戌變法行咗一排,劉晶已經有奪權野心。或者由一開始,整場變法根本就係一場搶奪權大計。

簽訂《馬關條約》後,豆斗復出鎮住大局。當中豆斗同李鴻章一齊拉隴俄國制衡日本之事,例如利用西伯利亞鐵路利益輸送,取得俄國保護遼東半島軍事承諾等等,通通都無知會過劉晶,劉晶嘅角色只係一個「被通知」,對於呢件事,劉晶非常之嬲。其實我都唔知佢嬲乜?豆斗嗰一著棋都不知幾高,一個唔該,擺咗俄國上枱,令俄國同日本衝突尖銳化,有啲嘢,一時三刻係睇唔到成效嘅(好似創科局咁)。

1904年,就發生日俄戰爭,大清仲借埋地方俾佢哋打,其中一個俄國就係咁樣玩X完。試諗吓,如果你有兩個敵人,你有辦法令佢哋自相殘殺,殺死其中一個,咁你就得返一個敵人,條數點計,你都一定有Jetso。豆斗借力打力,運用嘅根本係政治博奕上嘅最高技巧。我諗佢唔講俾劉晶知,都係怕劉晶嘅智力冇辦法理解啫。

當初豆斗拉攏俄國嘅時候,好多人覺得豆斗好蠢,引「熊」入室。其實依一招叫做「扮豬食老虎」。現代世界,呢一招用得最高明嘅人叫特朗普同金正恩。

兩條友仔古靈精怪,特朗普扮癲,金正恩扮喪,其實心裡面都不知幾古惑。糾纏東亞政局六十幾年嘅朝鮮問題,竟然喺兩個傻佬手上面出現曙光,試問之前邊個諗得到先?如果到頭來,北韓真係要借美國嘅錢搞開放改革,我諗受傷最深嘅,應該會喺中國,美國同北韓達成和解,亦都係向中國一招隔山打牛。嚟緊中國會用乜嘢方法面對呢件事,就可以直接睇得出當今領導人嘅智慧去到咩Level?但大家千祈唔好睇小中國,你以為中國人玩外交係弱項?錯囉!分分鐘佢哋一路都係用緊一招:

「扮豬食老虎」!

呢個世界玩外交,冇符碌。未到最後,唔會知邊個係老處?亦都唔知邊個食咗邊個隻豬?

之前講過,劉晶份人好容易受身邊嘅豬朋影響,冇辦法,一個智慧唔高嘅人就係特別容易受人影響,佢老豆男朋友翁離開佢身邊後,另一個廣東佬張蔭桓(1837-1900)就成為咗劉晶身邊最信任嘅人,南海佛山人張蔭桓之前出過場,佢做過總理衙門大臣(外交部長),代表過大清響甲午戰爭之後同日本和談(但乜嘢都傾唔成),佢基本上係一個專同外國人打交道嘅大清高級官員。

張蔭桓響劉晶身邊做過啲乜?下次再講!

#常威 #慈禧太后 #晚清歷史 #戊戌政變 #百日維新 #光緒 #張蔭桓

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集,請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁:https://www.facebook.com/historysandwich/


[img]https://upload.cc/i1/2018/06/17/pQ39MX.png[/img]

【常威中史】為慈禧平反系列(八十三)

張蔭桓先生最出名嘅係,1898年3月,作為外交大臣嘅佢同埋李鴻章先生收咗俄國沙皇每人50萬兩銀(折算每人1億5000萬港幣),瞞住朝廷,拿拿臨簽紙將旅順港租借比俄國25年,出賣大清利益。之後大英帝國租借山東半島威海衛軍港25年,隔岸同俄國對峙,張生亦係經紀中間人,至於佢有冇收過大英帝國黑錢?檔案就冇記載喇,但你諗吓有冇囉?

一句到尾,如果當時有ICAC,佢已經要入冊通櫃同肥媽唱黑獄斷腸歌。但呢兩單賣國通敵又俾佢過到骨,之後仲向北京成為劉晶身邊嘅重臣。中國人嘅荒謬,真係度度都可以見到。

響康有為嘅故仔裡面,張蔭桓係佢同劉晶之間嘅橋樑同傳聲筒,作為整個戊戌變法嘅「總設計師」,聖人教主有為嘅「口喻」,就由張蔭桓先生一字不漏傳達比皇帝知,然後由皇帝運用權力執行,頒布天下。正史記載,有為只係響1898年6月16號見過皇帝一次,但係之後劉晶竟然完全聽曬有為枝笛?依住張蔭桓傳達有為嘅「指令」執行戊戌變法?大佬,講你都唔好信啦。


第一,我講過變法嘅內容其實好多已經係舊嘢,並唔係有為發明嘅,當時大清行咗放改革已經30年鳥。

第二,有為係邊個先?只係「一介寒儒」,又係一個南方廣東佬(北京中央一定排斥),考科舉考到30幾歲先考到,家族背景充其量只係地方中產,即係住喺太古城杏花村之流,有十幾個物業收租,一個咁樣背景嘅香港人,有咩可能要北京中央政府習大大聽佢指揮?呢個比喻係非常之正確,有為同光緒之間嘅距離就係咁遠,幾千光年咁遠……

第三,你可能會話有為背後有外國勢力支持所以咁惡咁有影響力!有大英帝國有日本帝國撐腰喎,但事後睇返就完全唔似。況且外國勢力如果要收賣,都收賣一啲有影響力嘅政府官員喇,點解要收賣個啲佔中佔旺訓街嘅知識份子大學生呢?嘥錢個喎。

第四,張蔭桓響大清官場打滾三十年,位高權重,而且身為億萬富豪,佢會為你康有為做傳聲筒?傻的嗎?

所以,外國勢力要買通嘅人,一定唔會係康有為梁啟超,反而張先生就乎合曬以上一切條件,而且佢收外國勢力黑錢做嘢,可能已經天下皆知。我個人相信,張蔭桓先至係成個大局裡面嘅終極屎忽鬼,劉晶向豆斗奪權,並唔係康有為搞起嘅,而係佢!

最心痛嘅係,真相已經被淹沒,康有為版本嘅戊戌政變,差不多成為正史教科書裡面唯一嘅講法。而且講到似層層,好似真係發生過咁,大家有冇諗過,所謂百日維新嘅「正史」內容細節,好有可能其實係一條文棍老作出嚟,當然以上我講嘢都未必係真,可能有為先係背後嘅幕後大玩家,但如果我哋由細背到大嘅歷史全部都係假,作為中國人,就真係好悲哀囉。

不過「悲哀」同「貪污」一樣,一向都係中國人嘅本質嚟嘅。

張蔭桓D衰嘢,下次再講!

#常威 #慈禧太后 #晚清歷史 #戊戌政變 #百日維新 #光緒 #張蔭桓


【大清亡國關 #割讓臺灣 蛋牛治】

甲午戰爭令到臺灣及澎湖列島成為日本殖民地,從此以後臺灣經歷咗半個世紀嘅日本人統治,呢段時間,日本將臺灣由一個未開發嘅原始島嶼,變成一個現代化嘅世界。整個臺灣,其實係用日本嘅形象同模式打造出嚟,今時今日,仲有好多臺灣人懷念日本人嘅統治,李登輝相信就係其中一個,情況同今日香港好相似,依種情意結叫戀殖。

日本統治臺灣50年期間,史料記載並唔係用高壓手段統治臺灣人民,二次世界大戰時,唔少臺灣人代表日本皇軍出戰太平洋戰爭。有人話呢啲人叫漢奸叫賣國賊,對唔住,我絕對唔認同。

龍應台本書《大江大海》,內裡有一篇文章寫二次世界大戰結束之後,蔣介石國民黨政府收返臺灣主權,當時臺灣人民喺碼頭熱烈地慶祝回歸,諗住堂堂正正做返個中國人,佢哋等待國軍嘅船隻泊岸,當時佢哋心裡面滿懷希望,但係當見到國軍船隻行落嚟嗰班國軍嘅時候(造型問題),佢哋個心突然涼咗一截……真正嘅恐怖統治,原來係嗰一刻先開始。

國民黨政府接收臺灣後,好快就發生咗二二八事件,臺灣人民真真正正見識到乜嘢叫軍統式高壓統治,無情白事屠殺平民,日本人半個世紀都冇做過。來生不做中國人,其實有根有據。

【#大清亡國關慈禧蛋牛治】語音導航!請大家幫手「#訂閱」我條YoutubeChannel!同埋介紹多啲人睇睇!衝上1000訂戶!

http://yt1.piee.pw/EXRW8

https://youtu.be/du-2BEndEpg

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁:https://www.facebook.com/historysandwich/


[img]https://upload.cc/i1/2018/06/22/zCehat.png[/img]

【常威中史】為慈禧平反系列(八十五)

戊戌變法最失敗嘅地方就係廢除科舉制度,千百年嚟,中國知識份子就係行緊科舉條路,考科舉中狀元然後做貪官掠大水,成為中國讀書人唯一出路。

1898年劉晶嘟一聲廢咗佢,又冇嘢頂替,全國讀書人即係騰哂雞……你睇香港當年廢除會考高考,立刻頂上個DSE,行三三四同內地學制接軌,方便內地尖子投考香港各大專院校,咁先係德政吖嘛,咁先係一個真心為香港學生好嘅學制吖嘛。劉晶廢科舉早就不得民心,當年能夠有書讀嘅,唔會係窮人貧中下農,起碼係有田有地中產階級(你睇康有為梁啟超孫中山毛澤東就知),你一下子封咗佢哋向上流動嘅出路,佢唔Hi你Aunt就有鬼。

精簡官僚架構梗係變法攞命籐,打爛一衆貪官隻飯兜?殺Auntie有殺冇賠喇。變法行到三份二,其實已經民怨沸騰。北京城內,滿清權貴嗰班大食懶即得利益者人人自危。響依個時候,劉晶仲唔知死,起用大批新人加入中央政府。依批「新思維人仕」(有網友講得好正,叫佢哋做"搲撈男朋友")仲要大部份係南方漢人。自太平天國後,南方士大夫代表李鴻章操縱大清實權30年,滿清權貴等佢Hi Hi等咗成代人,難得終於等到甲午戰爭將李生一舗清袋,以為風水輪流轉,卒之到滿人上番位威威。點知劉晶哥又搞場戊戌變法,變本加厲又再重用南方漢人,你話會唔會嬲死?所以話戊戌變法百日維新係漢人同滿人之爭;係南人同北人之爭;係皇帝同太后之爭;就係咁解。


有智慧嘅人通常會揸緊自己中指做人。慈禧自上任以來,一直以維護滿蒙貴族利益為第一優先,佢從來冇改變過上述立場,千方百計捍衞滿清政權延續生命,以當家女主人身份担起頭家。百日維新後期新舊黨對峙,面臨決裂,慈禧仍然選擇站於貴族保守勢力上,一來係避免帝國大亂嘅理智抉擇,但另一方面,亦係中國儒家文化婦女從一而忠堅守婦道嘅貞節體現。

1898年8月13號劉晶27歲生日,生日之前佢已經向豆斗提出「制度局」構思(又係康有為背後策劃?嘿嘿!),想另立內閣處理維新事務,分割軍機處權力,豆斗當然即刻拒絕咗。依件事對劉晶打擊好大,結果佢從8月19號病咗,日日睇醫生(又用依招?漏埋精吖苯?),但病還病,奪權嘅野心就從來冇停止過。響身邊嘅二五仔繼續慫恿之下,劉晶繼續積極替自己擺棋,重用自己友建立班底,一於要同慈禧鍊過。

9月頭,劉晶行動昇級,硃筆一揮,第二日就撤銷咗一大批政府部門,燉咗大批人冬菇(有為話係佢命令劉晶咁做喎),單單北京,一日之內就有成萬個公務員被炒魷!完全冇理過人哋感受嘅,當時「朝野震駭」,人人自危,發生嘅事已經唔係變法,而係赤裸裸嘅奪權手段。

亦響依個時候,日本政壇嘅重量級人物伊藤博文訪問大清,外國勢力正式插手戊戌變法,大龍鳳上演!

#常威 #慈禧太后 #晚清歷史 #戊戌政變 #百日維新 #光緒 #伊藤博文

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集,請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁:https://www.facebook.com/historysandwich/


[img]https://upload.cc/i1/2019/01/20/MjTAiH.png[/img]

星期日特別放送<要做社會碌葛,唔係碌葛>

哲學佬話第一步要釐清概念,社會碌葛究竟係乜先?

依本純粹負能量充、滿厭世情懷嘅書藉,係要教人成為「社會碌葛」,認為碌葛男人先嫁得過。首先,「社會碌葛」唔係「碌葛」;同樣道理,「中國香港人」唔係「香港人」;依本書係教人做「社會碌葛」,唔係純粹做「碌葛」!

未講「社會碌葛」係乜前,首先講講「碌葛」係乜?所謂「碌葛」,亦即係社會上一群冇用嘅人,蠢嘅人。或者係啲上曬岸移民加拿大回流、大陸有小三嘅老屎忽口講嘅「廢青」或「宅男\女」。

依種人對社會完全冇貢獻、完全冇作用,社會上有冇佢哋存在都冇所謂,或者,冇咗依堆人,個社會仲會好小小、富裕小小。佢哋嘅存在,某程度上係社會嘅沉重負擔,拖累咗成個社會發展,拖累咗社會上其他人嘅幸福同快樂。佢哋唔會製造財富或快樂,只會製造貧窮與痛苦。

如果我哋係由納粹黨(民族社會主義德國工人黨Nazi Party)統治,依種人要直接進入集中營(Concentration Camp)處理。

不過,何謂對社會有貢獻先?有作用先?永劫回歸,又返番去哲學嘅定義問題。簡單小小,會交稅就係對社會有貢獻。相信大家都會同意,係嗎?但係,如果人工太小,收入唔超過個人入息免稅額唔駛交稅,咁又有冇貢獻先?

所以再簡單小小,凡係有工作嘅人就對社會有所貢獻,因為佢打工,就會帶來經濟活動,佢人工小,可能係老細剝削緊佢,相對地老細係賺多咗,老細賺多鳥,亦會用稅務形式直接或間接貢獻社會,包括交入息稅、交利得稅、買樓交印花稅、或者吃喝玩樂養情婦包二奶消費繼續推動中港臺兩岸三地經濟高速發展……

哇!原來一個人只要肯返工,就可以貢獻社會?是的!沒有錯!(普通話發音)。有貢獻,就唔係「宅男/女」,唔係「碌葛」!所以,定義係「碌葛」唔可以返工,無論佢有冇工返或可唔可以返工,總之佢唔可以有份工!因為只要一投入任何社會經濟活動,就係對個社會有小小貢獻。貢獻當然有分大細,但我哋唔可以抹殺任何微小如塵嘅貢獻,本土最偉大嘅哲學家周星馳講過,畢竟一條底褲都有一條底褲嘅用處,一張廁紙都有一張廁紙嘅作用,至少可以用嚟吻屎,除非你連一條底褲同一張廁紙都唔係。

#碌葛男人嫁得過 #嫁得過系列 #賭Sir #常威 #數學 #哲學 #mathematics #philosophy #生命 #風險管理 #新香港人 #意識形態


[img]https://upload.cc/i1/2018/06/24/aHoZO5.png[/img]

【常威中史】為慈禧平反系列(八十六)

劉晶係一個冇主見,非常之容易受人影響嘅低B仔。自1865年豆斗搞開放改革洋腸運動搞左廿九幾年,一直好地地。係響1889年劉晶接班後,因為佢受到守舊派元老儒家哲學發燒友翁同龢唆擺,開放改革嘅速度先放緩落嚟,停建鐵路、唔肯撥款俾北洋艦隊添置新船直接導至甲午慘敗已經唔同佢計。馬關條約簽訂後,豆斗復出同佢擺平局面,佢就覺得大姨媽同佢奪權?不X知所謂。之後聽聽埋埋啲二五仔唆擺,搖身一變又變成改革先鋒亂搞一通,好心你喇儍逼劉晶(唔知係唔係細個打得飛機多?)。

大龍鳳上演鳥,戊戌政變豆斗完全係被動者。先撩者賤,打死無怨,劉晶要冚頭埋墻燈蛾撲火與人無尤。1898年9月頭發生嘅事件相當神秘,坊間有好多個講法,或者我先將整個「戊戌政變」過程列出,當中時間性相當重要。


9月頭,劉晶連環下旨,開始大規模裁員,瘦身公務員系統,全國震驚。

9月4號,豆斗一返回頤和園。劉晶就下旨革去禮部六名最高級官員、包括最高負責人懷塔布、許應騤、堃岫、徐會灃、溥頲、曾廣漢職務。仲保舉自己友新黨嘅李端棻做禮部尚書。仲未夠,佢仲任命咗四個低級官員為軍機處章京,當中包括譚嗣同、林旭。

9月6號,劉晶去頤和園見豆斗,豆斗妥協,答應李端棻做禮部尚書,對軍機四搲撈(章京)任命亦冇反對。

9月13號,劉晶策劃重開「制度局」(懋勤殿),內裡全部自已友,更希望集合各國政治專家商議改革大清政制(我要真普選?外國勢力插手干預?)。

9月14號,劉晶見豆斗再提出懋勤殿動議,正式向豆斗奪權,終於觸碰豆斗底線,二人反面,衝突表面化。同日,袁世凱接到聖旨由天津嚟到北京。

9月15號袁世凱到頤和園見豆斗。同日大清陸軍調動,封阻袁世凱天津7000新軍入京之路,北京城外亦有軍事部隊進駐防範。大沽口外,英國軍艦亦有不正常動向出現。

9月18號夜晚,譚嗣同法華寺見袁世凱。

9月20號,日本伊藤博文訪問大清。

9月21號,劉晶到頤和園見豆斗,豆斗發動政變,軟禁劉晶。並開始搜捕囚禁新黨成員。

9月28號,六名新黨成員譚嗣同、林旭、楊銳、楊深秀、劉光第同埋康廣仁被斬首,史稱「戊戌六君子」,百日維新結束,新政大部份即時煞停。

大龍鳳timeline寫好,下次再詳細分析,有請福爾摩斯Benedict Cumberbatch!

#常威 #慈禧太后 #晚清歷史 #戊戌政變 #百日維新 #光緒 #伊藤博文

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集,請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁:https://www.facebook.com/historysandwich/


【大清亡國關 #保衛臺灣 蛋牛治】

今日講吓英國脫歐,傳媒報導文翠珊嘅脫歐方案得唔到國民同國會嘅支持,正陷於兩難局面。但係我同朋友討論過,文翠珊做嘅嘢,可能亦都係權謀策略,明知拋出一個又一個爛方案,一定通唔過,第二次公投亦冇可能發生(英國並無公投法,公投並無正式法律約束力),英國搞唔掂,個波自然俾反歐盟。3月29號硬脫歐?一定唔會發生,歐盟一定又會讓步,又會延期,然後繼續同英國談判,件事會繼續死拖難拖拖落去。

歐盟概念源於上世紀50年代末期,歐洲呢個火藥庫經過二次世界大戰蹂躪,其實已經五癆七傷,用一個國際組織將整個歐洲結合起來,避免戰亂再發生,其實係一件大好事。可惜同檯食飯各有異心,相見好同住難,歐洲諸國經濟同埋實力亦都完全唔均等。目前英國要脫歐,法國黃背心運動亦都演變成一場革命,德國默克爾退休在即,新政府上臺極有可能係極右取向,唔玩大愛即係玩脫歐;相同情況響意大利亦都出現。加埋英國,其實全部有實力嘅歐陸大國都會在未來步上脫歐之路,歐盟其實好危危乎。甚至會一個好奇怪嘅情況出現,就係英國未傾掂如何脫歐之前,歐盟已經自己爆煲玩完。

地球皇者,美國當然想歐盟爆煲,因為歐盟成立某程度上就係抗衡美國嘅單邊主義,歐盟如果潰散,美國又可以少一個貨幣(歐羅)對手。我常公子永遠認同一件事,玩手段,玩權謀,整個世界冇人夠美國人玩……

【#大清亡國關慈禧蛋牛治】語音導航!請大家幫手「#訂閱」我條YoutubeChannel!同埋介紹多啲人睇睇!衝上1000訂戶!

https://user35103.pics.ee/E6ZXJ

https://youtu.be/fy5qfS6lukE

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁:https://www.facebook.com/historysandwich/


[img]https://na.cx/i/s9j46Gh.jpg[/img]


【常威中史】為慈禧平反系列(八十七)

福爾摩斯式嘅歷史解讀,非常唔乎合正史胃口,但成個戊戌年9月發生嘅事,真係好似偵探故事咁離奇。正史一直冇將兩個因素擺落去戊戌政變,一個係「日本」;另一個係奪命書生孫文。

我常公子分析過成個廠戊戌政變過程,可以同大家講一句,成場大龍鳳係日本人響背後操縱同策劃嘅,至於「康有為」之流,只不過係日本人嘅白手套,扮上市公司主席,用嚟擋住證監會同歷史嘅視線,你睇我唔到…你睇我唔到…咁我咪唔存在囉,明未?

根本由一開始,日本人就響度攪鬼。講番豆斗同劉晶衝突表面化單「禮部人事大地震」就係同日本有直接關係,九月頭,禮部主使新黨嘅人王照上疏(即提出議程)要求劉晶出外遊歷考察增廣見聞,其中一個外遊項目就係同豆斗一齊訪問日本!哇!啱啱打完甲午戰爭幾年前嘅事?好似有人殺咗你老豆,你仲一家大細去人屋企拜年派利是?傻的嗎?聽到都知有問題啦。禮部尚書(老細)懷塔布唔肯上奏俾豆斗知,理由都好充份,兩大國家領導人一齊出訪敵國,一陣有咩冬瓜豆付,大清咪亡党亡国?但劉晶咁就嬲咗,以舊臣守舊唔配合改革風氣為理由,一口氣炒曬禮部舊黨嘅人!如果你唔係儍,你都知有問題喇……


百日維新以來,社會上都吹起一陣崇日風(多得一班文棍煽風點火),甲午死戰日清本來係世仇,但之後列強伸手瓜分大清,大清班低B國民又覺得低處未算低、夾硬比較下,都係洋人衰啲啲,而且清國嘅知識份子(康有為梁啟超奪命書生等人)不約而同非常羡慕日本人嘅成就,覺得如果大清學足日本就冇死。加上大家外貌相同(AV同北姑有時幾難分),文字亦相同(當時日本主要用緊漢字),話曬文化同宗同源。於是社會出現咗要求大清同日本「聯邦」、甚至「合邦」嘅聲音。你今日試吓鼓吹香港要同英國或日本合邦,我諗你會判得重過梁天琦。

輿論環境同今日唔同,今時今日有影象聲音文字有片有圖先有真相到眼看都未必係真,十九世紀末,文字就係一切,寫得出嚟就係真相。所以當時最新興嘅媒體就係小說同報紙newspaper,而報紙亦係產生輿論嘅源頭,玩媒體玩意識形態操控大清識條鐵麽?當時天津就有一份重要嘅中文報紙叫《國聞報》,大力鼓吹合邦理論,仲話大清嘅改革必須由伊藤博文領導,聘唔聘請伊藤博文直整係大清存亡嘅關鍵……呢份報紙,老細係日本人西村博,資金係來自日內外務省,大家一清二楚未呀?

合邦同聘請伊藤博文做顧問嘅輿論,影響咗當時大清好多知青(識字青年),其中一個就係人蠢到都冇藥醫嘅劉晶,聽聽埋埋,加埋啲二五仔響耳邊係咁吹係咁吹,劉晶響百日維新後期真係想拍埋日本人度搞合邦,之後想出訪日本、同伊藤博文嚟中國見佢就係証明咗佢想點喇。所以話,輿論幾咁重要呢?今日,23條立法你見中共想千方百計封咗黎智英蘋果日報你就知啦。

響黨國合一嘅社會裡面,文人寫字一定要服務政權,毛澤東喺1942年5月《延安文藝座談會》上已經講得好清楚。槍桿子可以出政權,但係筆桿子都有佢嘅一定威力,唔明呢個道理,唔了解呢件事,基本上係冇辦法了解歷史,因為歷史本身就係由筆寫出嚟嘅。

下次講吓雄才大略嘅伊藤侯爵點樣退休後玩大清?

#常威 #慈禧太后 #晚清歷史 #戊戌政變 #百日維新 #光緒 #伊藤博文

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集,請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁:https://www.facebook.com/historysandwich/


跳至第



  快速回覆 - 輸入以下項目

本討論區現只接受會員張貼文章,本站會員請先登入。非會員人仕,您可以按此加入為新會員,費用全免,並可享用其他會員服務。


上次光臨時間: 18/2/2019 4:02
今天貼文總數: 336 | 累積文章數目: 6,465,996

聯絡我們 | 服務條款 | 私隱政策 | 廣告查詢 | 職位空缺
Copyright © 2019 HKGolden.com. All Rights Reserved.