主頁 高登熱話 吃喝玩樂 科技消費 名人專訪 短片
現有會員可[按此]登入。未成為會員可[按此]註冊。
[公司模式 - 關]  [懷舊模式 - 開
[Youtube 預覽 - 關]  [大字型]  [小字型]

您現在聚腳在 學術台內。

有關整合forum 1~15事宜

高登討論區定於下星期三(14/6)將forum1~15整合為http://forum.hkgolden.com,屆時有部分未獲授權的第三方app與瀏覽器plugin或會受到影響。不便之處,敬請原諒。
精選文章
跳至第

發起人
【常公子近代史】大清亡國關慈禧蛋牛治
260 個回應
[img]https://upload.cc/i1/2018/06/30/zoG2JZ.png[/img]


【常威中史】為慈禧平反系列(八十八)

我講過大清有李鴻章,日本有伊藤博文,人比人,比死人。

伊藤博文被喻為創造現代日本之父,一啲都冇吹大(劉晶係改革維新先鋒就係吹大個波嘞)。自從1878年大久保利通(1830-1878)被暗殺之後,到1896年第二次伊藤內閣倒臺為上,足足有20年,成個日本係響長州藩出身嘅伊藤博文手中領導。其間日本建立起亞洲最強大嘅海軍同陸軍,經濟起飛,打贏甲午戰爭,吞拚朝鮮,簽訂《馬關條約》,國內貨幣完成金本位建設,認真地把炮認真地豐功偉績!求吓你唔好再同你比喇……好卵羞家!

但係,當佢同李鴻章簽埋《馬關條約》之後,陸軍派系坐大,日本國內軍國主義昇溫,伊藤命運同邱吉爾非常相似,二次世界大戰打完之後就被國民遺棄,其實完成咗歷史任務走都係應該。加上伊藤感覺自己身體狀態滑落(當時佢都係五十幾,可能前半生太搏殺),佢響1896年倒閣後宣佈退休,但佢依種人,點會咁易收山?佢仍然係日本最大嘅幕後玩家,有理由相信佢響依段時間,就策劃咗一場驚天大龍鳳玩大清同劉晶。我常公子亦相信,伊藤枝茅最後想插死嘅,係慈禧太后!以伊藤嘅水平,佢一定知道只有架空(or kill)智慧最高嘅慈禧,日本先有可能吞拚大清!


1897年至1898年前,伊藤就想用一招「空手入白仞」,之前甲午戰爭用「武鬥」吞拚大清唔成功,就改用「文攻」,真係高手中嘅高手!如果中國冇咗豆斗,日本或者會成功都未定……

日本人首先收賣一班二五仔讀書人,製造改革維新輿論,利用媒體大肆宣傳,捧紅康有為梁啟超等人,再催眠大清子民日本點威點勁點樣同大清企響同一陣線點樣想幫大清對付西方列強帝國主義侵略,同時間再有高級官員張蔭桓不斷左右劉晶條傻仔嘅想法,終於令白痴仔劉晶覺得大清同日本 #合邦 依條form一定work,仲想請埋伊藤博文做大清深度改革嘅總顧問(同放隻老鼠入米缸有乜分別呢?)。而家諗諗,如果真係成事,以劉晶同埋伊藤博文之間嘅水準分野,大清雙手奉上比日本,其實一啲都唔覺得需要奇怪。所謂合邦,其實即係吞埋你,如果你咁都唔明?咁你咪傻仔囉。

又叉開一筆,如果當時大清真係同日本合邦成功,或者中國往後會國泰民安都未定,伊藤博文同劉晶想做嘅嘢未必一定係錯。照日本右翼嘅講法,推翻大清滿蒙貴族嘅高壓統治,其實係為咗解放整個中國,係為咗四億中國人謀幸福。大東亞共榮圈,共榮共富,共同抵抗西方帝國主義勢力,建立起一個巨大嘅東方勢力抗衡西方,東西平分天下。以東風壓倒西風,唔係我哋一直落嚟嘅夢想咩?

下次返番正題……

#常威 #慈禧太后 #晚清歷史 #戊戌政變 #百日維新 #光緒 #伊藤博文

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

【大清亡國關慈禧蛋牛治】全集,請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁:https://www.facebook.com/historysandwich/


【大清亡國關 #血統 蛋牛治】

今集我講過血統嘅問題,我發現19世紀成個愛新覺羅家族根本冇人可用,皇族大部份成員出現低B現象,好有可能係同大量近親通婚有關。其實上述嘅事件並不只係發生喺清帝國,古往今來好多巨大帝國之內都有呢個問題,當然貴族低B化,未必一定關基因事,出身太好,好食好住,一生無風無浪,低B都係好正常。今日嘅香港,唔少富二代富三代富四代都有呢種情況。

論血統純正,世界上有兩個民族一直堅持,就係猶太人同日本人。過去幾百年,猶太人都唔鼓勵自己嘅族人同外族通,你試吓今日識個以色列女朋友,如果你想同佢結婚,你自己又唔係太有錢或者太有才華,我相信你一定遇上極大壓力。相反,中國人嘅世界,湊條鬼佬,食條洋腸就已經威過威士忌,娶到個鬼婆老婆,其他人就另眼相看,呢啲事唔使我多講。

血統問題其實非常重要。中國人都講竹門對竹門,木門對木門,其實都係講緊血統純正嘅問題,血統問題超越階級問題,我之前講過,日本人口劇減,佢哋其實需要大量外國移民加入,振興經濟,但係日本國一直冇咁樣做,畀你長期居留就可以,你想要個大和護照正正式式堂堂正正做個日本人就難過登天。其實日本都係捍衛緊大和民族血統的純正性同優越性。

【#大清亡國關慈禧蛋牛治】語音導航!請大家幫手「#訂閱」我條YoutubeChannel!同埋介紹多啲人睇睇!衝上1000訂戶!

https://user35103.pics.ee/EG3RH

https://youtu.be/Gh1xA79iHsQ


【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁:https://www.facebook.com/historysandwich/


[img]https://upload.cc/i1/2018/07/02/Xcu037.png[/img]

【常威中史】為慈禧平反系列(八十九)

除咗日本帝國,另一個響戊戌政變被隱藏起嚟嘅角色就係外號奪命書生嘅孫文(1866-1925)。

孫文係大清國民,又係廣東佬,由於靠近大英帝國建立顛覆總基地香港。佢同當時擁有新思維嘅廣東書生一樣,睇見甲午慘敗國破家亡咁滯,立心要拯救萬民於水深火熱,一腔熱血上腦要搞革命推翻現存政權,至於推翻之後要點搞,可能大部份人都冇諗過,呢個世界嘅嘢,想像係一回事,現實又係一回事,相信唔使我再多講。孫文係一個強烈嘅愛國主義者,依一點完全可以肯定。唔愛國嘅人,揾夠錢會移民美加,點會同你搞革命揾自己個人頭嚟玩吖?每個人愛國表現嘅形式唔同,你可以擁護政權去愛國,亦可以一面革命一面愛,冇衝突嘅。

(孫文生平唔講喇,大把書睇,或者自己上維基scan啦!)

孫文係叻人,佢最強嘅能力係演講(吹水)同籌旗,千祈唔好睇小依個異能,搞生意同搞革命一樣,最需要籌旗揾金主(或水魚),有錢先有得玩落去,如果唔係咪就係同泛民一樣得個講字。孫文基本上係英文好過中文嘅半個西人,響當時華橋社群有最強號召力同籌款力,要知道離開咗中國嘅中國人(攞住其他國家護照)都會特別愛國,因為針唔拮到肉火唔燒到自己,呢個情況到今日都冇變過。記得97年前香港人幾愛國,97後就大逆轉都係「針唔拮到肉」嘅大道理展現。

1895年甲午戰爭後,孫文睇到大清已經完全冇得救,打正旗號革命推翻滿清,期間佢游走西方各國,接觸廣大華橋有錢佬,宣揚佢嘅革命理念同籌款,早已經比滿清視為眼中釘。1896年嘅倫敦綁架案更係滿清特務向孫文直接開火,不過依壇嘢大清就捉蟲入屎忽嘞,綁架案令孫文一夜之間上晒國際頭條,加上劍橋大學漢學家H.A.Giles同佢出書宣傳,孫文由一個「亡命之徒」搖身一變做「民族英雄」,為日後國父形象打好輿論基礎,1896年香港政府向孫文下驅逐令,於是奪命書生流亡去咗日本。


日本係孫文如魚得水嘅地方,之後佢響日本住咗三年,索性改埋名叫「中山樵」(孫中山個朵就係咁樣嚟),依三年,中山樵基本上係一個日本人(娶埋日本妾侍做蘿莉控),佢使出渾身解數打入日本各種政治圈子,同部分政界高層人物、黑白兩道建立深厚友誼,孫文非常欣賞明治時代嘅現代化成就,日本人嘅睇法更為孫文提供咗日後「三民主義」理論基礎,期間日本甚至給予孫文顛覆大清行動嘅具體支援同資金。

孫文做嘅嘢放喺今日嘅香港,就一定係收外國人錢嘅漢奸賣國賊,入冊係最低要求。但係孫文成為一代偉人,企響扯旗山頂,就係時代嘅問題,有時候,黑同白、忠定奸、根本係睇吓你用咩角度去睇?企響咩立場去睇?

戊戌年間日本伊藤博文響中國玩嗰場合邦大龍鳳究竟同奪命書生有冇關係呢?華文正史就一定唔會講,但各種線索顯示,孫文一定有份,下次繼續。

#常威 #慈禧太后 #晚清歷史 #戊戌政變 #百日維新 #孫文

#:o)#b 【大清亡國關慈禧蛋牛治】https://play.google.com/store/books/details?id=C3hjDwAAQBAJ

#:o)#b 【大清亡國關慈禧蛋牛治】實體購買
https://www.382now.com/product?id=87

#:o)#b 【大清亡國關慈禧蛋牛治】全集,請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

#:o)#b follow my instagram @historysandwich

#:o)#b Facebook 專頁:https://www.facebook.com/historysandwich/


[img]https://upload.cc/i1/2018/07/04/inRrAX.png[/img]

【常威中史】為慈禧平反系列(九十)

由以下開始一連串關於戊戌政變發生嘅描述,純屬我常公子個人福爾摩斯式嘅想像同憶測,屬於青山院友境界,大家唔好當真,一切事實應以正史為真,因為官方正史一定永遠唔會呃人,而我常公子就會嘞。

奪命書生孫文帶住倫敦綁架案嘅政治大光環於1896年登陸日本,期間結交浪人宮崎滔天(1871-1922)同平山周(1870-1940)等人,以兩人中文老師身份定居日本,宮崎滔天同平山周係當時政治家犬養毅(1855-1932)嘅手下,而犬養亦響1989年正式入閣成為日本政治核心成員之一,孫文加入犬養陣型成為佢嘅人,如果宮崎平山係四二六紅棍,咁犬養就係白紙扇,龍頭大佬就係大隈重信(1838-1922)!

大隈重信於1898年6月到11月間接替伊藤博文成為日本首相,而依段時間正正就係戊戌政變最關鍵嘅時刻。我常公子有理由相信自1897年中日本對大清發動嘅「意識形態」侵略戰,孫文一定係幕後嘅策劃人之一。因為敵方日本陣型中,當時只有孫文能夠有線路有資格夠光環接通日本政壇中嘅最高人脈。(比較同時期身處日本嘅魯迅、周作人、秋瑾等人,佢哋只係一班普通留學生)

我講過,甲午戰爭係日本軍人武裝侵略大清。而合邦理論則係文攻戰略,一脈相承,伊藤博文係文官出身,大隈重信都係(就係佢建立早稻田大學),記者出身嘅犬養毅都係,奪命書生更加唔駛講,一班文人走埋一齊,諗出一條「空手入白仞」絕世好橋,要響白痴仔劉晶身上將整個大清「呃」過嚟,亦係合情合理。可能嘅情況係身處日本嘅孫文提案兼背後策動,伊藤博文大隈重信等猛人利用國家資源響大清國內發動媒體輿論攻勢,收賣文人例如康有為梁啟超等人配合,加埋朝中大官張蔭桓同楊深秀(1849-1898)等人不斷影響劉晶,要劉晶最後同意同日本合邦,兼請埋退休嘅伊藤博文嚟做改革總指揮,咁搞多幾年,唔覺唔覺,大清步上朝鮮後塵,成為日本大亞細亞主義(大東亞共榮圈)內嘅成員之一,其實一啲都唔覺得需要奇怪。

豆斗就係猛料,一早睇通曬日本人壠嘢,及時發動戊戌政變救大清!事後大規模清洗,斬殺六君子,罪名除咗話佢哋作反之外,亦係話佢哋同反革命份子孫文勾結,只不過「孫文」兩個字實在太光太神聖太敏感,所以之後嘅歷史描述,好多都將孫文兩個字從戊戌政變中抽起咗,好似佢從來冇參予過呢場大龍鳳咁。當然,我都係靠估咋。

依班人放返入今日香港嘅角度,直整係「認賊作父」「通敵賣國」「吃裡扒外」……(下刪一萬字罪行),但係我好相信,當時佢哋嘅出發點一定係純潔同善良,佢哋放眼嘅係清國四億同胞嘅福祉同未來,純粹一片愛國情懷。至於後人點評價佢哋嘅功過?多舊魚,都只不過係響處打飛機,打得叻,咪成地都係囉。

下次繼續。


#常威 #慈禧太后 #晚清歷史 #戊戌政變 #百日維新 #孫文


【大清亡國關 #榮祿 蛋牛治】

甲午戰爭之後,李鴻章時代結束,歷史邁向新嘅一頁,新嘅一頁主角其實係袁世凱,作為一個練兵高手,袁世凱所嘅資本都係嚟自軍事方面,佢之後建立嗰支北洋新軍,其實就係之後中國最重要一個政治集團,槍桿子出政權,軍事同埋武力先係所有政權嘅基石。美國可以欠成個世界債,不斷借錢,令國民過住世界第一幸福愉快嘅優越生活,其實都係同佢哋嘅軍事實力成正比。

19世紀係大英帝國嘅時代,20世紀就係美國嘅時代,至於21世紀,好有可能係中國嘅時代。目前好多香港人,對中國有好多唔滿意同睇唔過眼嘅地方,但係無可否認,中國係一天一天咁強大起嚟,從40年前一無所有,一窮二白,到今日可以同世界第一強權美國平起平坐,最起碼美國將佢當成敵人,需知道要成為美國嘅敵人,其實要有一定資格。

中美嘅角力,會唔會成為下一輪世界大戰嘅基礎格局?我唔知道。當然我絕對唔想戰爭再次發生,第一次世界大戰同第二次世界大戰,教訓實在太深刻,不過戰爭作為政治延續嘅最後手段,事實上無法避免,關係只係遲同早,同大與細。

【#大清亡國關慈禧蛋牛治】語音導航!請大家幫手「#訂閱」我條YoutubeChannel!同埋介紹多啲人睇睇!衝上1000訂戶!

http://yt1.piee.pw/DNL3E

https://youtu.be/PifRBIEVQFA

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁:https://www.facebook.com/historysandwich/


[img]https://upload.cc/i1/2018/07/06/gzW6Hc.png[/img]

【常威中史】為慈禧平反系列(九十一)

太多人要保護劉晶光緒帝嘅聲名,其實成單嘢做得最錯就依條Hi Hi仔。豆斗發動戊戌變法堅決向西方學習,一方面當時嘅時勢的確有咁嘅需要。另外作為一個叻人馬基維利主義者, 變法另一個作用就係渲洩民怨。你要普選吖嘛?我就同你搞場普選行政長官喇,你唔鍾意都冇計,情況一如你想食牛扒,哦?l see,就比碟屎你,都係有得食吖?但依招就封咗大部份蠢人把口,搞咗喇,仲想點吖?

但搞還搞,勾結外國勢力就唔得,咁叫做觸及底線,嗌民主自由得,講港獨就唔得。1898年8月中開始,合邦輿論唱到慶烚烚,而劉晶就唔想環保吹想真做,9月頭開學,伊藤博文亦預備訪問大清行程,接受總顧問一職。

局內人非常明白,要水到渠成必需移走眼前最後一座大山,就係豆斗。於是劉晶發動總攻擊,籌備奪權。9月4號「禮部人事大地震」後,豆斗同光緒僵持咗10日,劉晶勾結日本人,你估豆斗唔知咩?唔知就坐唔到個位四十年喇儍仔,佢一直唔發難,冇非都係想比個機會劉晶回頭是岸,但白痴仔不但冇回頭,仲變本加厲,打算動用武力奪權。俗語有講「先撩者賤,打死無怨」,睇番成件事,豆斗完全被動,一切都係劉晶不斷搞屎棍。

9月14號,劉晶豆斗衝突表面化,相信成個統治階層都知,袁世凱接到聖旨由天津坐火車嚟到北京。當時袁電筒響天津小站練咗兩年兵,手中一枝7000人全普魯士式兵制同裝備嘅「新軍」係當時大清最強嘅武裝力量,佢響敏感時刻被召入京,明顯係太后同皇帝嘅攤牌。

只要邊個得到袁電筒新軍嘅支持,邊個就係贏家。袁電筒係新派官員,言論亦曾經支持過新黨康有為等人,但講還講,朝鮮返來之後,佢係榮祿一手提攜上位,榮祿係豆斗四十年自己人兼頭馬(當時佢係直隸總督),條線好清楚,未踼已經知道賽果。況且袁電筒出嚟行走江湖見識廣博,絶對唔係嗰啲埋頭苦讀以為講幾句漂亮説話就可以救國嘅白痴Seven Head。仲有,袁世凱其係一個好守信用嘅人,由始至終都未變過,後世人話佢出賣光緒害死人。其實,如果佢當時投靠光緒,先至係出賣慈禧,先至係變節,不仁不義,遺臭萬年,調轉嚟講抹黑佢,情何以堪?


9月15號到9月18號,袁電筒分別響紫禁城同頤和園見過豆斗同劉晶,至於講過乜就冇人知咯。中間榮祿調動聶士成等陸軍,一面進駐北京外圍防範,一面封阻天津新軍入京之路,一場軍事政變如箭在弦。亦有資料顯示大沽口外,英國軍艦亦有不正常動向出現。大英帝國軍情六署高級特務李提摩太先生相信亦有份參予合邦奪權嘅大龍鳳。一切動向,亦有理由相信袁電筒響當中擔當住決定性嘅角色。

9月18號夜晚,新上任嘅軍機處京章行走、戊戌事件最響噹噹嘅人物譚嗣同(1865-1898)去到法華寺見袁世凱。(我諗L爆頭都唔明,而當時袁世凱一個咁重要嘅關鍵人物,典解會住響一間寺度?而且保安一啲都唔森嚴,譚先生可帶住武器自出自入?中國人做嘢,真係冇卵得解嘅…)


#常威 #慈禧太后 #晚清歷史 #戊戌政變 #袁世凱

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

【大清亡國關慈禧蛋牛治】全集,請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁:https://www.facebook.com/historysandwich/


[img]https://upload.cc/i1/2019/01/27/6Zak2C.png[/img]

星期日特別放送<碌葛係宇宙中最冇用的東西,社會碌葛唔係>

碌葛冇工返就要柄響屋企宅,主力從事打機或上網等私人活動,碌葛嘅生態就等於早年TVB新聞透視訪問過嘅「阿源」,單純獻世,仲要覺得自己一無是處、自己是「零」,同個社會完全割裂,同社會唔產生任何實質關係(上網打機同向老竇老母伸手攞錢例外),唔參予任何社會性活動,或者乾脆唔參予任何牽涉其他人嘅活動,完全自我封閉狀態。

吃父母、坑爹娘,唔做嘢、唔怕拖、唔結婚、唔會有下一代、唔會主動創造任何價值同希望,自己所做嘅一切都唔會影響到個社會同其他人,而且,做齊上述所有嘢嘅同時,千萬唔可以後悔,唔可以有反思回頭重新做人、更而且,要愈宅愈快樂、愈宅愈自然,宅到去一個點,要非宅不可,要宅先可以生存落去,更加要有心理準備同覺悟,最後自己就算要死,都要死響一個冇人理又冇人知道嘅獨居房間裡面,死咗都冇人會發現你,因為你冇親戚冇家人冇朋友,根本唔認識任何人,屍體會直至化成白骨為止,冇葬禮、冇人理會你生死,因為社會同成個世界同你毫無關係,咁就係一碌完美嘅「葛」!

換言之,一碌葛其實係「出世」嘅,就好似古人隱世一樣,遠離社會,離開群眾,離開名疆利鎖。

但本書所講嘅係「社會碌葛」,即係唔會脫離社會脫離群眾。係「入世」嘅一碌社會葛。

依碌社會葛雖然蠢(一定要蠢),人講乜佢就信乜,多人做乜佢就跟住做乜,但佢從來未諗過脫離社會一個人宅埋一邊打飛「之」,反而佢會感覺自己仍有響社會生存同創造價值嘅能力,雖然佢除咗俾人統治、剝削同欺淩之外,其實並冇其他價值存在。

相對地,做社會碌葛比純做一碌葛容易,要同個社會割斷其實好有難度,因為人類與生俱來就係社會性動物、係群體性動物,正如我哋既牙齒結構係「雜食性動物」,而唔係草食性肉食性,與生俱來係大曬嘅,天性要後天改變其實好X難,而社會碌葛只係順住條Trend繼續響社會生存,不過唔係做一個社會精英,而係做一碌葛。

上面已經定義做一碌葛唔應該參予任何經濟活動,唔應該對社會或其他人有任何貢獻,葛最好成為社會包袱,成為社會背脊上一粒唧極都唧唔走嘅大毒瘡。

但完全相反,社會碌葛並唔係咁,社會碌葛係入世嘅,佢會有工返,會媾女/仔、拍拖、結婚、生仔、供樓、供保險、供強積金、會進行經濟活動,會參予一切社會事務,甚至會投票比建制派覺得為香港大眾好。

總之,社會碌葛係會對社會作出一定貢獻,而且仲係整個社會結構嘅樁腳所在。一旦冇咗依亭社會葛、或社會葛有一日覺悟醒覺過嚟,個社會會亂、甚至會發生革命、崩潰!

依一part講哲學定義問題,最後為社會碌葛再作定義。


社會碌葛要蠢、要人講乜佢信乜、先決條件要入世、要參予社會經濟活動、要義無反顧相信權威或威權。仲有仲有,最後一個定義,社會碌葛一定唔可以發達!佢哋嘅存在要極度知足,極度滿足於社會和政權所給予佢嘅生存配套同權限,就算發覺有問題都要自我安慰然後忘記,永遠要跟隨大時代步伐,跟隨領導人足印,唔可以行差踏錯。

舉個例,社會碌葛要用成世人遁規蹈矩打份朝八晚七(加班冇補水)既西工,辛辛苦苦去供一層三、四百呎嘅私樓,最後老中青三代加埋印傭逼響間豆腐潤裡面,雖然係咁,但仲要覺得好X正,覺得自己係中產,覺得自己比上不足比下有餘,覺得自己嘅人生好好,起碼對得住國家同民族。

講返轉頭,社會碌葛只要一發達,就係社會精英,約定俗成下,以我哋嘅社會定義「成功」為:

『發達等於成功』

於是,發咗達嘅社會碌葛,就已經唔再係社會碌葛,係晉身咗社會精英階層,凡事用錢用財富嚟衡量,亦係我哋社會嘅特徵,錢,亦係社會碌葛最認同嘅衡量生命價值單位。

--節錄【碌葛男人嫁得過】

【碌葛男人嫁得過】線上購閱
https://play.google.com/store/books/details?id=e1N7DwAAQBAJ

[img]https://upload.cc/i1/2019/01/27/DzbKCF.png[/img]


[img]https://upload.cc/i1/2018/07/09/HDIQir.png[/img]

【常威中史】為慈禧平反系列(九十二)

首先我哋要相信譚嗣同18號晚袁世凱嘅事實係真,並唔係虛構。因為袁世凱日記都有提及,雖然袁世凱日記又唔係袁世凱寫(吊詭嗎?),不過至於譚生袁生講過乜?真係問米叫當事人上返嚟講先知。正史話譚先生向袁先生提出軍事政變 及「圍園殺后」方案,袁假裝答應,之後嗱嗱臨通報榮祿,出賣新黨,榮祿話比豆斗聽,結果豆斗大怒,發動戊戌政變,囚禁劉晶,六君子人頭落地。

個故事好似TVB膠劇那年花開月正圓咁Seven。絶對符合一般平民百姓想像空間,忠奸分明有劇味亦有膠味。首先,我當件事真係發生之過。當中亦有幾個塑膠位:

第一,早前已講過,袁世凱入京之前,豆斗同劉晶已經反晒面,滿朝皆知,期間北京城外亦有不正常軍事調動,袁世凱冇可能18號晚先從譚嗣同口中知道有軍事政變依件事存在,除非袁生同劉晶一樣都係低能者,但有可能咩?

第二,既然係咁,譚生18晚講嘅就一定唔會係大仁大義叫袁世凱支持劉晶嘅説話,就算講,應該都係拋出條件,要說服袁生參予政變後有咩好處或利益,而涉牽到依part,談話內容亦冇可能唔涉及日本同合邦,所以官方正史上記録兩人嘅談話內容一定係假,假到冇人有。

第三,事後証明,圍園殺后單嘢係康有為吹水,劉晶根本從來冇咁諗過亦唔知情,譚嗣同如果18號晚貿貿然講出嚟,就真係害死劉晶同其他不知情嘅新黨朋友。一場涉及外國勢力、四億人超級大帝國嘅上層奪權政變,你估細路仔玩泥沙咩?冇可能膠成咁掛?


第四,就係譚嗣同嘅身份問題。其實18號之前,佢只係見過劉晶一次半次,絕對唔係劉晶心腹。劉晶就算蠢到貼地,亦萬萬唔會授權一個陌生人represent自已、充當說客去見袁世凱,如果要傾咁大壇嘢,外交大臣張蔭桓、禮部新任尚書李端棻、或者六君子之一嘅都察院山東道監察御史楊深秀會係更適當人選。你揾上任軍機處京章行走(跑腿)只有十日唔夠譚嗣同去傾,袁世凱第一個反應一定係「皇上你係味痴線架」。跟住啲咁嘅人作反,成功機會又會有幾多呢?袁世凱冇奶油唔知。

第五,如果從正史脈絡去推敲,仲有一個解讀,就係譚嗣同去見袁世凱,劉晶根本唔知情,只係康有為新黨等人自把自為嘅小動作。如果係咁就仲痴線!大佬,傾政變呀?傾殺慈禧呀?你估去傾保險嗎?但我覺得亦唔合邏輯,我講過成場政變係日本人背後文官策動,清国人蠢但日本人一啲都唔蠢,18號晚,伊藤博文已經身處大清國土上,密謀配合劉晶對付豆斗,依個關鍵時刻,日本人(加埋李提摩太牧師)冇可能比依件事發生?只要伊藤博文順利受聘成為大清改革總顧問,合邦大計上馬,豆斗同滿清政權遲早一樣玩完,駛鬼咁急發動軍事政變同圍園殺后?

第六,所以我唔排除譚嗣同18號晚見袁世凱,只係一件小撮人豬隊友嘅瘋狂行為,事前冇深思熟慮,亦冇通報上線,做咗先算,結果引發一場大災難兼大笑話。

第七,膠劇為咗營造黑面白面,依場戲,製造咗一個烈士、一個革命符號,亦製咗一個小人、一個民族罪人。以戲劇角度,堪稱空前成功,寫劇本嘅人成功消費袁世凱同譚嗣同……既然係場戲,咁從來冇發生過,亦係有可能。


#常威 #慈禧太后 #晚清歷史 #戊戌政變 #袁世凱 #譚嗣同

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

【大清亡國關慈禧蛋牛治】全集,請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁:https://www.facebook.com/historysandwich/


【大清亡國關 #倫敦金 蛋牛治】

華為5G網絡事件,終於擺上軍事層面,美國宣佈,一定要千方百計打贏這場戰爭,絕對唔可以俾中國取得未來5G網絡嘅領導權。我之前講過,美國嘅軍備領先中國超過30年,以軍事硬件嚟講,中國冇可能追到美國,但係科技上,中國近年突飛猛進,現在更加為美國帶來嚴重軍事威脅。

好簡單,現代世界一切軍備以電腦網絡控制,如果駭客可以hack入軍事系統網絡,隨時可以癱瘓你一個航空母艦戰鬥群,至於通訊情報系統,更加係科技主宰一切。華為其實係中國國家戰略機器之一,美國到今時今日先發現5G網絡主導權有可能落入中國手上,其實係佢哋後知後覺,責任唔喺特朗普度,應該係前任總統奧巴馬身上。

戰爭係政治嘅延續,戰爭亦係政治嘅最後手段。中美之間嘅摩擦,已經開始接近戰爭嘅層面。美國固然係一個好戰嘅國家,佢哋需要用絕對武力,穩固佢哋世界霸主嘅地位。但係中國依個極權政府亦都唔抵可憐,兩邊其實都唔係好人。當然喺政治嘅世界裡面,並沒有好人存在。

【#大清亡國關慈禧蛋牛治】語音導航!請大家幫手「#訂閱」我條YoutubeChannel!同埋介紹多啲人睇睇!衝上1000訂戶!

https://user35103.pics.ee/DYKTL

https://youtu.be/G_sGwb1e7_s

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁:https://www.facebook.com/historysandwich/


[img]https://upload.cc/i1/2018/07/11/TLbkdC.png[/img]


【常威中史】為慈禧平反系列(九十三)

正史嘅講法係18號晚袁世凱見過譚嗣同後,20號早上佢就搭車返天津基地,遠離是非圈。至於19號成日佢做過乜就留白,後世史學創作人針對依一日大造文章,話佢走去向榮祿豆斗告密,史上最強二五仔就係咁樣煉成。

信不信由你,我常公子唔信。我唔係唔信袁世凱會告密,我只係唔信之後寫歷史嘅人枝筆啫*。

戊戌政變發生響1898年9月21日星期一,而被大多數中學歷史教科書抹去嘅事件係9月20號星期日劉晶接見以平民身份到大清訪問嘅日本前首相伊藤博文。依場歷史性會面,正史並冇記載具體談話內容,只可以話比大家聽,會面響紫禁城中舉行,慈禧亦在場,雙方禮節性交談對話,Just say hello,並冇實質內容提及。原因好簡單,因為20號前,一切已經塵埃落定,日本背後操縱嘅合邦大計早已胎死腹中,伊藤知道劉晶唔會聘請佢做顧問,佢唔可以進入大清權力核心,(另外有史料記載,25仔朋友們除咗推薦伊藤博文做顧問外,另一個顧問就係英格蘭代表李提摩太先生),之前一日19號,有為已經想好似王立軍咁走入北京日本大使館要求政治庇護,但大使館因伊藤仲未見劉晶而唔俾佢入去(用完即棄),結果佢漏夜離開北京著草去天津。

成個局應該同袁世凱嘅立場有關,先唔講18號晚譚嗣同事件,袁世凱14號入京,20號朝早離開,前後六日見過劉晶同豆斗幾次,佢好清楚表達咗自己意愿,佢會繼續支持豆斗舊黨而唔幫劉晶新黨,我諗原因好簡單,劉晶想做嘅事係出賣緊大清國利益俾外國勢力,而且一佔中,個社會就會亂,支持豆斗就係推持現狀不變,穩定壓倒一切,個社會唔可以亂,相信85%香港人都會認同,咁袁生點會係奸先?況且作為1898年全清國一支最強武裝力量嘅總指揮官,佢嘅選擇亦係劉晶奪權失敗嘅主因。好話唔好聽,當時北洋海軍徹底玩完,渤海大估口已經係冇掩雞籠,日本人英國人軍隊隨時可以大規模登陸入侵大清,如果配合袁生7000人普魯士裝備嘅新軍,北京城守到24小時已經係奇蹟(兩年後八國聯軍入京就係最好証明)。袁世凱當時冇出賣到豆斗,同時亦冇出賣過大清,話佢係忠臣係英雄,其實係啱。

成場大龍鳳已經做完,20號劉晶見伊藤博文只係想事件好好睇睇,大家有個下臺階。20號下午伊藤離開北京,聰明嘅佢同聰明嘅豆斗大家都當件事冇發生過,於是歷史亦當件事冇發生過,徹徹底底將日本因素抽出戊戌政變教科書版本。

伊藤博文送客,剩低嘅就係善後問題……


#常威 #慈禧太后 #晚清歷史 #戊戌政變 #袁世凱 #伊藤博文


[img]https://upload.cc/i1/2018/07/13/fsNuvo.png[/img]

【常威中史】為慈禧平反系列(九十四)


落雨收柴,實在無可口非,智商80樓下嘅劉晶差啲畀日本人呃咗大清條蝦條,整劈屎出嚟,都要有人幫佢執屎,邊個?又係大姨媽豆斗囉!

其實響18號譚嗣同見袁世凱當日,御史楊崇伊已經上奏請「太后訓政」(出山做最高領導人),舊黨早已經積極佈置發動政變推翻劉晶新黨勢力,袁世凱嘅選擇或效忠,或者講佢堅決選擇不變節,早就將新黨判咗死刑(其實唔死又有咩用呀?)。20號見埋伊藤博文好好睇睇,豆斗等伊藤離京就郁手,有資料話佢星期日黃昏就開始軟禁劉晶,亦有史料話豆斗第二日星期一21號早上先郁手。

正史話21號早上劉晶響寢宮一起身,豆斗就成班人衝入嚟,擸走國璽及章疏,劉晶好X驚,豆斗就好嬲咁同佢鹵味講:
「我養咗你二十幾年,你今日竟然聽啲小人疏擺想隊冧我?」
劉晶嚇到唔敢出聲,過咗一陣先講:
「我冇咁諗過……」
豆斗就答佢:
「白痴仔,今日冇我,聽日都冇你呀……」
上述史料對白,基於有「圍園殺后」前設存在,但我已經講過,呢單嘢係康有為事後老作居多,所以正史對白一定係假。

隨後就好似當年六四後,鄧小平軟禁趙紫陽咁,豆斗將劉晶軟禁響南海瀛臺之內,瀛臺四面環水,中間設置橋板以供出入,由豆斗親信嘅太監看守。咁樣嘅軟禁方法,無非都係想劉晶遠離小人,再唔好俾人喺耳邊干預佢。線索前後成立,豆斗都係認為係有一班小人(間諜、收咗錢、賣國賊)喺劉晶身邊煽動佢賣國。最大嘅責任並唔係劉晶上邊,劉晶由頭到尾都只係一個俾人擺佈嘅木偶,呢個亦都係佢可以保住條小命嘅理由,但我常威再講多次我唔X信,牛唔飲水邊撳得牛頭低?劉晶好命,祇不過佢係皇帝。佢由頭到尾,根本係千方百計想從豆斗手上奪權,想一人獨大,甚至勾結日本仔出賣帝國都在所不惜,最可憐嘅反而係一班比佢捆綁上賊船嘅朋友下屬。計畫失敗佢哋就人頭落地,而劉晶仲可以苟延殘喘,響瀛臺活多八九年。

第二日9月22號劉晶(自愿地)親筆寫下聖旨,聲稱自己「再三籲懇慈恩訓政」,隨後簡單而低調進行咗訓政正式儀式,豆斗復出,第三次「垂簾聽政」大局既定,豆斗以64歲關愛座年紀再一次成為清國最高領導人(沒有之一)。

呢個世界嘅嘢勝者為王敗者為寇,而且政治本來就係你殺我,如果唔係就我殺你。以豆斗為首嘅舊黨立刻發動政變,百日維新大部份新政煞停,大規模捉拿及清洗新黨成員!史稱戊戌政變!

下次,我哋講吓新黨班人嘅悲慘下場……

#常威 #慈禧太后 #晚清歷史 #戊戌政變


[img]https://upload.cc/i1/2019/01/31/IUDvbP.png[/img]


【大清亡國關 #清俄密約 蛋牛治】

大清帝國係甲午戰爭戰敗之後,曾經秘密同俄國簽訂一份密約,用帝國國內鐵路權益換取俄國保護,對付日本人。呢一著好聰明,1905年發生嘅日俄戰爭,就係由此而起。對於清帝國嚟講,日俄戰爭無論邊一面打贏,都係有著數嘅,之後嘅歷史亦都講畀我哋知,一切真係咁樣發生。

所謂秘密簽下密約,其實喺國際社會上相當常見。到咗今時今日,有人會認為個世界已經變得完全透明,新聞報導睇到嘅就係真相。呢一個理解當然係錯,我好相信,國家同國家之間其實存在住好多不為人知嘅秘密同協議。好似美國同北韓,甚至最近嘅中美貿易戰,其實當中發生緊乜嘢事,局外人根本冇人知。

香港就更加奇怪,中美貿易戰越係打,經濟數據越係不利,股票反而嘭嘭聲昇上去,今日甚至收復失地。我常公子唔係經濟專家,我唔明個玩法係點?金錢嘅世界的確不可思議。2019年嘅世界經濟前景,連李嘉誠都唱淡,形勢真係唔係好樂觀。但係又如果俾你估X到,你咪係食神?

【#大清亡國關慈禧蛋牛治】語音導航!請大家幫手「#訂閱」我條YoutubeChannel!同埋介紹多啲人睇睇!衝上1000訂戶!

http://user35103.psee.io/ES8MC

https://youtu.be/xEgs-7buWwA

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁:https://www.facebook.com/historysandwich/


[img]https://upload.cc/i1/2018/07/16/HxuZkm.png[/img]

【常威中史】為慈禧平反系列(九十五)

相對中國(廣義上)大部份執政者,豆斗其實係一個非常善良嘅領導人,佢整個半世紀嘅執政時間,只係發動過兩次政治殺人事件,第一次係登位之初向肅順等人嘅爭鬥(辛酉政變),第二次就係戊戌政變。你話佢殘忍?相對後來嘅毛主席同委員長,豆斗連尾燈都睇唔到。落雨濕身冇得同大洪水到比較。

兩次前後相隔成四十年嘅政治殺人,豆斗都係逼不得已,牽涉到唔係你死就係我亡嘅關係,相信比任何人做佢個位,一定比佢殺得更多。我唔係同佢辯護,而係講實際情況。

豆斗斬殺六君子,千夫所指,遺臭萬年就一定,好似當年64鄧小平鎮壓天安門學生咁,自己孭起開槍嘅責任,要做大佬就要咁POP。個個想做CEO,你估咁易咩?

六君子中,康廣仁(1867-1898)係康有為細佬,當年響北京冇官職在身,亦冇証據話佢有份參予顛覆活動,佢似乎係成為大佬嘅替死鬼。不過奇就奇在,親生細佬被殺,有為亦冇太憎恨大清依個封建政權,之後嘅日子,有為仲變身保皇黨同奪命書生孫文革命黨打對臺,最後民國六年以大清遺老身份參加張勳(1854-1923)復辟,就更加吹銀脹。


至於楊銳、譚嗣同、林旭同劉光第四位維新人仕,就係由唔同人介紹比劉晶用,佢哋只係見過劉晶一兩次,就比白痴皇帝賜咗做四品官撈軍機章京行走,代劉晶發言,以為從此飛黃騰達,典知成為政變嘅犧牲品,做埋刀下鬼。常公子再重申一次,我唔會抹黑佢哋嘅天真嬌美麗動機。戴耀庭搞佔中,梁天琦搞港獨,無非都係想為香港人好,我覺得佢哋冇錯,用嘅方法好唔好見仁見智嚕,人間視野有高有低,每人品味唔同,有人要做奴隸先舒服,有人屎都覺得好食都冇辦法。你話佢哋收外國勢力錢?呢個世界邊個冇收人錢做嘢呢?冇錢邊有得搞呢?冇錢只可以做鍵盤戰士打飛機,打飛機自己開心做唔到大事,美國總統背後有金主,當年中共得江山亦有蘇聯大力資助。總好過一啲自認愛國人士,搵到盆滿缽滿掠盡民脂民膏之後移民美國加拿大,叫仔女做黃皮白心ABC,嗰班Seven Head又點計呢?

楊銳臨殺頭前大聲疾呼自己所犯何罪?只可以講一句你站錯隊跟車太貼信錯白痴皇帝。林旭同劉光第都係清國有功名嘅知識份子,其中林旭妻子是晚清名臣沈葆楨子沈瑜慶之長女沈鵲應,亦係有頭有面人物。人頭落地係劉晶責任,佢哋有冇參予賣國?佢哋有冇串聯日本人或孫文我唔知,但可以肯定一句,真正實牙實齒收過日本人錢嘅康有為梁啟超張蔭桓最後冇死,反而死嘅只係佢哋。

有一日同朋友茶聚,朋友講咗個「藍絲帶論點」我駁唔到,佢話佔中嗰陣,泛民人仕號召大學生上前線抗爭,但佢哋啲仔女又一個都冇出現到?咁又係嘅,點解嘅?似乎有人都知道走得太前做爛頭卒掘地雷始終係一件好危險嘅事,人哋仔女可以衝,自己仔女最好唔好衝,而且自己啲仔女多數係美英讀名牌大學有外國護照,香港人嘅事又同佢哋無關喎…又啱,我又駁唔到。

下次繼續……

#常威 #大清亡國關慈禧蛋牛治 #慈禧太后 #晚清歷史 #戊戌政變

【大清亡國關慈禧蛋牛治】

https://play.google.com/store/books/details?id=C3hjDwAAQBAJ


[img]https://upload.cc/i1/2018/07/18/WosYjZ.png[/img]

【常威中史】為慈禧平反系列(九十六)

消費死人,絶對唔係道德行為,六君子之中,以譚嗣同之死被後世文化編劇渲染得最緊要,有得走唔走,慷慨激昂,從容就義,為咗喚醒國民嘅革命精神,我諗譚生當時並唔係咁諗,推翻慈禧同推翻大清畢竟係兩個唔同嘅概念。譚嗣同死後成為革命符號同象徵,相信亦唔係佢本人意愿。

我常公子年輕讀過一篇臺灣作家李敖所寫嘅中篇小説《北京法華寺》,寫嘅就係譚嗣同嘅故事,借古諷今,直擊蔣家軍統統治。年少嘅我睇得熱血沸騰,根正苗紅嘅李敖後來坐政治監亦唔知關唔關依單嘢事?

除咗譚嗣同,反而要講一講楊深秀(1849-1898),楊深秀係六君子中唯一真正嘅清朝大官,兩榜正途出身,前途無可限量,思想西化,係百日維新新黨嘅中堅份子,佢係最早鼓吹合邦理論嘅新派官員。我唔懷疑佢嘅美麗動機,佢可能以為合邦及聘請伊藤博文做總顧問,大清先可以進入國泰民安先進國家之列。百日維新期間楊先生同各國領事來往甚密。當然佢冇睇到合邦本身可能係一個呃勁儍仔嘅外交騙局,有人以合邦為名,誘使清國同儍仔劉晶交出軍事、財政、外交等權力,令政權逐步掌握響外國人手上。日本人同李提摩太等間諜,利用楊深秀等人對國際知識所知有限嘅弱點進行大計。佢哋啲死橋呃到楊深秀康有為劉晶等人,但絶對呃唔到唐紹儀伍延芳嗰種級數嘅高等華人,更加呃唔到智慧城府同佢哋有一大段距離嘅豆斗。

講開又講,百日維新以全面學習西方國家為旗號,但劉晶所用嘅一班新派人仕,都只不過係西學半桶水嘅「進步知識份子」,全部接受儒家思想卜卜齋教育長大,國學根底好深厚,但中途出家學西學,英文應該全部唔識,所有對西方世界嘅認知全部嚟自睇文人裁剪過嘅二手翻譯文本。反而,真正留學外國攞到外國大學學位嘅,如唐紹儀伍延芳英文嘞嘞聲嘅「真西人」就無影無蹤。

依個情況,反映咗兩件事,一,劉晶真係流嘅;二,有啲腦嘅人都知件事冇得搞,費時乸屎上身。講完。

仲有,大家唔好唔記得,當時大清國內成街都係西人(自由城邦上海大把),北洋艦隊亦有聘用西人習慣,千祈又唔好唔記得海關關長赫德先生仍然在任,食洋腸落老蘭,搞西化用西人,常識吧?但你就偏唔用,重用一班滿口西化嘅作家文人搞政治,總結落嚟七個字:「笑你傻的嗎怕你嬲」。

除咗西學半桶水,楊深秀亦對清國國策一頭霧水,佢主張英美日同大清合邦,共抗俄國侵略,但豆斗李鴻章一早同俄國有秘密協議,合作對付日本人。基本立場都唔知,都幾陰公。

下次繼續……

#常威 #大清亡國關慈禧蛋牛治 #慈禧太后 #晚清歷史 #戊戌政變


【大清亡國關 #青島啤酒 蛋牛治】

19世紀末期列強瓜分中國,弱國無外交,大家可以睇到。一個國家要自立,要喺國際社會上有發言權同影響力,一定要有強大嘅軍事實力喺背後做backup。世界上有一班左膠和平主義者,認為軍事同暴力並唔係主宰國際秩序嘅第一主因,呢個見解一定係錯,從來祇有槍桿子出政權,人類嘅世就係咁簡單同膚淺。窮兵贖武固然唔啱,但係唔識保護自己或者冇能力保護自己,更加係大錯特錯。

今次殺到嚟嘅係德國人,一伸手就要咗山東同膠州灣,從此以後中國有青島啤酒。其實成個十九世紀下半葉,基本上係「鐵血宰相」卑斯麥嘅時代(1815-1898),自從1871年德意志統一後,卑斯麥主宰咗成個歐洲嘅秩序,大德意志日爾曼民族嘅崛起,意味著大英帝國同民主共和法國最重要嘅競爭對手終於出現,卑斯麥在世嘅時候,全力收斂德意志帝國嘅巨大鋒芒,強權間嘅平衡尚且可以維持,但當佢死咗之後,整個歐洲正式步入戰爭嘅漩渦,第一次世界大戰嘅慘烈,同第二次世界大戰嘅空前破壞性,都係同德國人嘅崛起有關。

人亡政息,可以喺卑斯麥同慈禧太后身上睇到,卑斯麥一死,歐洲就大亂;慈禧太后死後,大清帝國亦都得返三年壽命。除咗軍事實力之外,強勢領導人喺一個國家裡面亦都相當重要。今時今日嘅中國,強勢領導人係中國國家主席習近平,過去幾年,佢將權力集中自己身上,其實我知道點解。佢一定讀過歷史,佢一定會明白玩法係點。有人話,近年美國將中國作為假想敵係因為習近平出現,但我話你知,就算有冇習近平存在,美國都一定會咁做。一山不能藏二虎,世界嘅霸主只可以有一個。

【#大清亡國關慈禧蛋牛治】語音導航!請大家幫手「#訂閱」我條YoutubeChannel!同埋介紹多啲人睇睇!衝上1000訂戶!

http://yt1.piee.pw/E8TDJ

https://youtu.be/bs3a5QEAADk

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁:https://www.facebook.com/historysandwich/


[img]https://upload.cc/i1/2019/02/03/0zfHXt.png[/img]

【星期日特別放送】係宇宙俾我哋獨立思考能力

所謂哲學(philisophy),就係一啲吹到好大及好虛無嘅嘢嚟混淆視聽。聽住,137億年前(唔係150億),發生大爆炸(Big Band),在一無所有嘅虛無中,出現咗空間同時間。

如果宇宙創生嘅時間係1月1日0時0分,我哋可以得出一個「宇宙曆」,依照宇宙曆嘅時間線,重力凝聚星塵,第一顆星星出現響 1月10日。我們身處嘅銀河系於3月15號左右出現,地球生命之源嘅「太陽」誕生響8月30日。至於地球上嘅生命,則是出現響9月13日,大概響太陽誕生嘅二十億年後。然後,生命開始演化,克服咗重重難關,由單細胞變成衆數,我哋嘅遠祖響海洋裡找尋著下一步出路。

11月9日,生命開始呼吸、對周遭環境作出反應,甚至開始進食、生長、交配、繁衍……生命形式開始由簡單變成複雜,由單一化變成多樣化,由無意識變成有意識。

12月17日係精采嘅一天,因為生命開始由海洋伸延至陸地上,當其時海洋裡已經充斥著唔同嘅大型動植物,生命剛剛開始在陸上演化,森林、恐龍、鳥類、昆蟲…………全部都在12月嘅最後一週出現響宇宙曆日程之上,第一朵花,在12月28日綻開。

宇宙曆12月30日淩晨6點24分,小行星撞擊地球,導至恐龍滅絕。細小嘅哺乳類生物得以響大災難中倖存過來。

但響整個宇宙曆嘅漫長歷史中,仍然冇我哋人類身影出現,直至宇宙曆最後一日,即12月31日嘅最後一個小時裡,人類嘅進化先開始啟步,11時59分46秒,即宇宙曆的最後14秒裡,一切才被正式紀録下來,因為人類祖先發明咗文字,所有我哋認知嘅一切,所有我哋所知道嘅嘢,全響這個宇宙曆最後嘅一個小小角落裡誕生。

直至今日,我們身處嘅依個世界由我們人類作主宰,我們嘅未來,也由我哋嘅自由意志去選擇。我哋可以選擇生存,亦可以選擇滅絕,但生命總會找到出路,生命會以不同形式存在落去,當然生命形式也不一定係人類。

人類作為地球眾多物種嘅其中一個過客,其特別嘅係,我哋有其他物種都冇擁有過嘅發達大腦,大腦令我哋產生智慧,我哋嘅智慧,令我哋有獨立思考能力,從而認知自己係乜?令我哋能夠認知自己響整個宇宙洪荒歷史中嘅位置為何?亦能夠令我哋思考生命嘅意義究竟係乜嘢,對依個講法,我堅定不移。


咁點解要寫上面一番説話?我無非都係想指出兩點:

第一,我想指出人類嘅獨特性,人類意識在地球上出現,當然係一個非常偶然嘅產物,機率大概比連中100次六合彩頭獎更低,既然如此幸運嘅事情發生響我哋身上,我哋更加應該珍惜一次性嘅生命機會。態度唔可以太認真之餘,卻要活得似一個人,唔好似碌葛(或者社會碌葛)。當然你可以反駁,「妖!似碌葛就似碌葛喇,又有乜嘢關係先?反正宇宙到最後都會毀滅……」依個問題好吊詭,生命只有一次,你應該問一問你自己答案係乜?唔好問我,我無權同你答。依個問題亦係哲學大門條鎖匙(key),打開門可以行入去,但將會引發無限煩惱。反而永遠將門關上,冇眼屎乾淨盲,亦係一個唔錯既選擇,唔該你自己揀!

第二,既然偶然嘅演化令我哋有獨立思考能力,我哋更唔應該浪費佢,人要似一個人,唔似碌葛(或社會碌葛),就因為我們可以獨立思考,依種能力令我們產生自由意志,亦因為有自由意志,人先可以有自由嘅選擇權,人之所以為人先可以被定義。否則一個人同石貝梨水塘一隻恒河猴冇分別,亦同一隻嬲屎嘅烏蠅冇分別,甚至同馬桶裡一舊沖極都沖唔去嘅屎都冇差別。30年前《李天命的思考藝術》依本本土哲學巨著,就係講依個問題。

*結論係:「人嘅獨特性,在於人可以獨立思考;亦因有依個獨立思考能力,人先可以被定義為一個人。」

(其實依個定義只係我自己為「人」所作嘅定義,你可以唔buy都得。但如果你唔buy,以下嘅論述一啲意義都冇)

節錄【碌葛男人嫁得過】

【碌葛男人嫁得過】
https://play.google.com/store/books/details?id=e1N7DwAAQBAJ


[img]https://upload.cc/i1/2018/07/20/p9I6J5.png[/img]

【常威中史】為慈禧平反系列(九十七)

應死唔死,唔應死就死,世界冇公平,政治好污糟。六君子人頭落地,喊都無謂。其他受牽連嘅人,當中包括禮部右侍郎、翰林侍讀學士徐致靖(1844-1918)判終身監禁,但兩年後八國聯軍入京,監犯趁亂走X曬,但徐生仍然堅守法律留響監獄服刑,老實(Seven)到爆,豆斗見到咁就特赦咗佢。同樣發放新疆充軍嘅李端棻(1833-1907)亦響兩年後獲釋,百日維新最積極支持者湖南巡撫陳寶箴(1831-1900)被炒魷永不錄用。陳寶箴有個孫叫陳寅恪(1890-1969),係名垂千古學術太斗大人物!

而我一直覺得賣國嘅主凶係佛山人張蔭桓,豆斗發動政變後,佢亦唔駛死,原因係當時大英帝國領事竇納樂Claude Maxwell MacDonald(1852-1915)出手營救,咁你就知道張生幾咁把炮,又唔見麥當奴出手去救六君子?真灰…張蔭桓最後被判充軍新疆,又係兩年後八國聯軍殺到,豆斗怕外國勢力要救釋放張先生,於是先發制人,命令將佢就地正法。前後線索,都直指張先生響整件賣國通敵、合邦外交陰謀事件嘅身份同重要性。

花邊新聞一則,張蔭桓被捕後,曾經爆大鑊,話外國勢力俾過錢康有為楊深秀等人搞事,依亭人渣,自己賣國之餘,東窗事發後又篤兄弟出嚟,人品真係冇得頂!我講過,賣國賊分兩種,前者一心仰慕西方社會制度同日本維新成就,想自己同胞有機會享有同等待遇,出於美麗動機,應該有所保留。而後者純粹為錢同利益,出賣自己國家人民,張蔭桓日記內多次仇視日本人,但佢又同日本人做間諜,立場前後矛盾,明顯係後者,唔可以原諒,佢多活六君子兩年,係天冇眼。劉晶多活九年,更加係天冇冇冇眼!


跳至第



  快速回覆 - 輸入以下項目

本討論區現只接受會員張貼文章,本站會員請先登入。非會員人仕,您可以按此加入為新會員,費用全免,並可享用其他會員服務。


上次光臨時間: 18/2/2019 3:45
今天貼文總數: 336 | 累積文章數目: 6,465,996

聯絡我們 | 服務條款 | 私隱政策 | 廣告查詢 | 職位空缺
Copyright © 2019 HKGolden.com. All Rights Reserved.