主頁 高登熱話 吃喝玩樂 科技消費 名人專訪 短片
現有會員可[按此]登入。未成為會員可[按此]註冊。
[公司模式 - 關]  [懷舊模式 - 開
[Youtube 預覽 - 關]  [大字型]  [小字型]

您現在聚腳在 學術台內。

有關帖文題目顯示香港字問題

一直以來,不少會員反映討論區帖文題目未能正常顯示香港字,由於此項更新牽涉整個系統,故一直未能完善。然而我們明白各會員對此有一定需求,決定於星期三早上7時短暫「熄登」更新系統,解決題目顯示問題,預計需時兩小時。不便之處,敬請原諒。

更新完成後題目將支援香港字、大部分日文及韓文字體,字數限制將由現時25個全形字符增加至30個。與此同時,討論區桌面版將增設M版現有的回帶及追蹤功能,發表頁面的題目輸入位置亦會加入字數提示功能,希望能改善大家的使用體驗。

香港高登討論區管理員團隊
精選文章
DeerGamer

跳至第

發起人
(日本史)大日本帝國海軍政治
44 個回應
-伊之助-

Member
[img]https://upload.cc/i1/2019/04/27/1pFMJ3.png[/img]
大家好#bye#

依個POST我會講下大日本帝國海軍(IJN)中比較少人了解嘅海軍政治 大家通常識嘅都係船艦同戰爭史 其實海軍政治係IJN入面先係由明治建國起到二戰嘅主角 IJN將軍中大眾最認識肯定係山本五十六 其實相比起佢兩位前輩加藤友三郎同加藤寬治對IJN嘅影響 山本只係戰術方面有巨大影響 而加藤友三郎同加藤寬治先真係從根本改變IJN嘅歷史同走向 今次我會由海軍建立講起但係重點會係1921-1936年中所謂海軍假日時期中 係大正到昭和日本歌舞昇平之下海軍政治嘅暗湧

[img]https://na.cx/i/4Z6TWkA.jpg[/img]
山本五十六
[img]https://na.cx/i/MHC70Nj.jpg[/img]
加藤友三郎
[img]https://na.cx/i/UPv5Nst.jpg[/img]
加藤寬治

P.S.有人睇有反應先繼續寫 因為會好長

CH.1
一開始簡單講下大日本帝國海軍早期 其實IJN建立主要係由勝海舟領導嘅幕府海軍同薩摩藩海軍所組成 但本身明治初期薩摩海軍同長州陸軍係爭取「海主陸從」同「陸主海從」中輸左 而好大程度上係因為西南戰爭中薩摩閥大佬西鄉隆盛造反失敗 而薩摩閥從此失去國防政策影響力而令大日本帝國海軍早期只係陸軍手下而非獨立成軍 而且係戰略、國防、預算都受陸軍控制 大日本帝國海軍真正崛起係係山本權兵衛手上先真正成為一支現代海軍而已經係對馬海峽海戰大勝幾年後嘅事 所以山本權兵衛被稱為日本海軍之父 本身山本權兵衛先係決定出擊發動日俄海戰個個人 但係日俄海戰光芒已經比東鄉平八郎搶唒:~(

下回待續
[img]https://na.cx/i/885ad8D.jpg[/img]
山本權兵衛


#good2#45    #bad#3  
CH.2

有幾個詞語係日本海軍歷史中一定要知:

帝國國防史論(1910)/帝國國防論(1902)/帝國防禦大綱(1907):依三本書係由山本權兵衛主導下由秋山真之丶佐藤鐵太郎(被喻為日本海軍史上最重要思想家 被稱氣日本嘅馬漢)所撰 其中最重要係建立一套由海軍主導嘅國防思想 而日本海軍本身好受馬漢海權論所影響 亦係依幾本書中第一次提出南進論 以此對抗陸軍嘅北進論大陸政策 所以南北路缐之爭早係1910s開始
[img]https://na.cx/i/LVy3COa.jpg[/img]
佐藤鐵太郎

馬漢(1840-1914):海權論作者 對日本最大影響係提出艦隊決戰概念 馬漢認為制海權勝負將會係由一場主力艦隊決戰控制 亦係大艦巨砲主義起源 因為戰列艦火力上係艦隊決戰中決定性因素 而日後全世界海軍其實都跟隨馬漢大力建造戰列艦而造成軍備競賽 務求係艦隊決戰中以數量壓倒對手 而對馬海峽海戰就係完美重現馬漢所提出艦隊決戰概念 所以日本從此執信戰列艦直到投降前亦從未改變 所以亦有人認為馬漢海權論係一二次大戰中嘅幕後推手
[img]https://na.cx/i/uHiZVzX.jpg[/img]
馬漢

統帥權:首先天皇地位係從《明治憲法》中所保護嘅神聖及不可侵犯的”天皇元首",即係由皇祖承傳下萬世一系中的超然統治者 而軍隊本身係直屬天皇而非內閣 所以理論上軍隊只需對天皇負責而非政府 但天皇本身唔會行駛權力所以軍隊係無枉管 而且本身海軍亦係二元架構 即係分設海軍軍令部同海軍省 所以日本軍隊係雙重二元架構 第一層係陸海軍互不從屬而且無人管制 第二層係海軍軍令部同海軍省 又因為軍令部部長直接將軍務上奏天皇的「帷幄上奏」權力而海軍省屬於內閣 所以日本海軍中本身都冇任何一個職位如海軍大臣、軍令部部長、聯合艦隊司令長官可以話唒事
[img]https://na.cx/i/zpQ9yng.jpg[/img] 日本軍制簡圖

陸海軍大臣現役武官制:即係軍部大臣(指陸軍省陸軍大臣、海軍省海軍大臣)任用必須係現役軍官的制度 而陸軍大臣同海軍大臣係內閣必然組成部份 所以軍部係可以拒絕提供人選或選擇辭職令內閣倒台同向政府施壓 需然係1913年山本權兵衛出任首相下取消以防濫用 但係1936年二二六事件後又得以恢復 所以依個規舉被稱為明治憲法中嘅毒瘤 因為軍部從此對一屆政府有生殺大權


下回待續


CH.2

有幾個詞語係日本海軍歷史中一定要知:

帝國國防史論(1910)/帝國國防論(1902)/帝國防禦大綱(1907):依三本書係由山本權兵衛主導下由秋山真之丶佐藤鐵太郎(被喻為日本海軍史上最重要思想家 被稱氣日本嘅馬漢)所撰 其中最重要係建立一套由海軍主導嘅國防思想 而日本海軍本身好受馬漢海權論所影響 亦係依幾本書中第一次提出南進論 以此對抗陸軍嘅北進論大陸政策 所以南北路缐之爭早係1910s開始
[img]https://na.cx/i/LVy3COa.jpg[/img]
佐藤鐵太郎

馬漢(1840-1914):海權論作者 對日本最大影響係提出艦隊決戰概念 馬漢認為制海權勝負將會係由一場主力艦隊決戰控制 亦係大艦巨砲主義起源 因為戰列艦火力上係艦隊決戰中決定性因素 而日後全世界海軍其實都跟隨馬漢大力建造戰列艦而造成軍備競賽 務求係艦隊決戰中以數量壓倒對手 而對馬海峽海戰就係完美重現馬漢所提出艦隊決戰概念 所以日本從此執信戰列艦直到投降前亦從未改變 所以亦有人認為馬漢海權論係一二次大戰中嘅幕後推手
[img]https://na.cx/i/uHiZVzX.jpg[/img]
馬漢

統帥權:首先天皇地位係從《明治憲法》中所保護嘅神聖及不可侵犯的”天皇元首",即係由皇祖承傳下萬世一系中的超然統治者 而軍隊本身係直屬天皇而非內閣 所以理論上軍隊只需對天皇負責而非政府 但天皇本身唔會行駛權力所以軍隊係無枉管 而且本身海軍亦係二元架構 即係分設海軍軍令部同海軍省 所以日本軍隊係雙重二元架構 第一層係陸海軍互不從屬而且無人管制 第二層係海軍軍令部同海軍省 又因為軍令部部長直接將軍務上奏天皇的「帷幄上奏」權力而海軍省屬於內閣 所以日本海軍中本身都冇任何一個職位如海軍大臣、軍令部部長、聯合艦隊司令長官可以話唒事
[img]https://na.cx/i/zpQ9yng.jpg[/img] 日本軍制簡圖

陸海軍大臣現役武官制:即係軍部大臣(指陸軍省陸軍大臣、海軍省海軍大臣)任用必須係現役軍官的制度 而陸軍大臣同海軍大臣係內閣必然組成部份 所以軍部係可以拒絕提供人選或選擇辭職令內閣倒台同向政府施壓 需然係1913年山本權兵衛出任首相下取消以防濫用 但係1936年二二六事件後又得以恢復 所以依個規舉被稱為明治憲法中嘅毒瘤 因為軍部從此對一屆政府有生殺大權


下回待續


CH.3

其實提及海軍政治必然會涉及陸海軍鬥爭,而陸海軍鬥爭中爭取預算一向係主戰場,因為陸海軍預算係由內閣草議經議會通過落實,而控制預算係內閣同議會唯一可以制衡軍隊嘅手段,既然陸海軍互不從屬妥協 而佢地又有不同戰略考量,咁陸海軍邊個獲得更多預算自然可以係國防政策上取得主導權 所以內閣、海軍、陸軍嘅預算角力係貫穿整個大日本帝國史重要嘅一環。
[img]https://na.cx/i/5VVEV4V.jpg[/img]

其實貫穿整個大日本帝國史,其實29個首相中有15個有軍方背景,所以陸海軍同大日本帝國政治根本密不可分。
[img]https://na.cx/i/McxzKY7.png[/img] 自制圖 #yup#

而陸海軍政治上正面交鋒係係1912年桂園時期第2次西園寺公望内閣開始,當時政治上最大問題係二個師團増設問題,簡單黎講即係陸軍要求増設二個師團,否則陸軍大臣就威脅辭職令内閣倒台(陸海軍大臣現役武官制) 而西園寺公望堅拒令内閣:-[ 而陸軍背景桂太郎再度上任,是為第3次桂内閣,桂太郎當然支持陸軍増設二個師團啦,但係今次到海軍增加預算上威脅辭職#hehe# ,咁桂太郎自然又拒絕,桂太郎甚至向天皇要求下達命令從以制止海軍,依個舉動令全國震驚[sosad] ,而引起全國性的倒閣抗爭,桂太郎亦係第一個首相經議會不信任動議下台,而海軍山本權兵衛就乘機上位繼任組閣[369] ,而依一連串事史稱大正政變,依一個時刻係桂園時代結束亦係大正民主運動開端。

[img]https://na.cx/i/AvXcwGT.jpg[/img]

西園寺公望
[img]https://na.cx/i/N3EeKZD.jpg[/img]
桂太郎

而山本權兵衛上任馬上取消陸海軍大臣現役武官制,以防止(陸軍)濫用#hehe#,山本權兵衛亦馬上展大型建艦計畫,但計畫中涉及左賄賂醜聞,日本海軍軍官及商界收受西門子賄款[banghead] 再一次令全國嘩然及引發全國大規模示威直接令山本權兵衛下台(有人話係「陸軍之父」山縣有朋所策劃#yup#) ,而陸海軍政治接連惡鬥係令民眾覺醒同開啟左日本民主及平民議會黃金時期。

[img]https://na.cx/i/ON8ZV6M.jpg[/img]
山縣有朋

[img]https://na.cx/i/kWcDsfg.png[/img]
原敬
日本第一位平民出身的首相,立憲政友會骨幹成員,係大正政變幕後煸風點火,最終確立立憲政友會係日本議會中領導地位

下回待續


CH.4(正文開始)

時間一跳就到1920年 係一次大戰後日本係平民引導下積極參與國際政治同西方列強交流 從而令日本真正係政治、軍事上成為世界列強之一 但日本嘅發展亦引起美國疑慮 而日本係太平洋、夏威夷、美國東岸大量移民亦直接令美國係1907、1913年出現排日潮,而係依段時期日美更發生軍事競賽,日本嘅八六艦隊同八八艦隊方案就係依段時間由加藤友三郎(大家要記住依個人好重要,加藤認為係日本史上最偉大同有實力嘅海軍政治家,而係日俄海戰中任聯合艦隊參謀長,佢戰功係同東鄉同LEVEL,政治方面更遠比東鄉重要) 。

日美係1920年可謂戰雲密佈,兩面都瘋狂建艦以爭取主動權,但係大家最終決定以政治解決,而1921年華盛頓海軍會議就係一切嘅起點,亦係令日本海軍走上不歸路嘅遠因。

[img]https://na.cx/i/WjNLR6q.jpg[/img]
華盛頓海軍會議



而加藤友三郎同加藤寬治就係因華盛頓海軍會議及其後左右海軍大局重要人物,加藤友三郎當時任職海軍大臣兼會議全權代理,而加藤寬治係海軍首席技術隨員代表(加藤寬治係海軍被受觸目嘅新星,日俄海戰中擔任東鄉旗艦炮術長,會議當時為海軍大學校校長) 。

[img]https://na.cx/i/45ofuS8.jpg[/img]
中央為東鄉左手面就係加藤友三郎

華盛頓海軍會議對海軍最重要問題就艦隊比例,本身日本要求艦隊主力艦比例係10:7,即係美國有10隻日本要有7隻,日本10:7比例因由其實係從帝國防禦大綱中秋山真之丶佐藤鐵太郎所決定,佢地假定美國艦隊每巡航一千里戰力會下降10% 因為日美之間超過三千里,所以10:7就可以令日本安全(其實好向左走向右走求其,佐藤完全忽略科技發展所帶來革命性影響,但日本海軍就從此當聖旨) 。

但係美國都好似醒目,要求美日10:6比例 (其實美日都一樣咁傻 都係痴迷相信馬漢主力艦隊決戰理論 ,美國甚至係中途島之後先醒覺),華盛頓海軍會議就演變成美日係艦隊比例上一輪大戰 ,而加藤友三郎傾向接受10:6比例, 因為加藤友三郎認為國防應該係外交為首軍事為副,只要大家FD底就冇事,但係加藤寬治就相反,認為10:7係必須,一個國家國防擁有最基本防守力量係必要,依兩個加藤嘅爭吵演變成整個日本海軍之間嘅分裂,其艦隊派以加藤寬治為首而條約派則以加藤友三郎為領導,開展出十幾年海軍內部政治鬥爭 。

[img]https://na.cx/i/Cr4N5WD.jpg[/img]
中央為加藤友三郎

加藤友三郎作為海軍大臣兼會議全權代理,力排眾議力拒加藤寬治同傳統派挑戰,並聯同民主政府成功以10:6比例簽華盛頓海軍會條約,以四國、五國、九國公約確保日本係國際政治同太平洋嘅平等地位,但係依個結果直接種下禍根,明明一個民主明智嘅選擇反而令日本反而慢慢走上孤立之路。

下回待續


CH.5

1922年由依一刻開始,我地要了解下整個日本嘅情況。 首先日本係一戰後,基乎所有國際活動都好積極參加,民主又開始發展,社會又自由,重工業經濟又發達,又冇乜仇家,議會又成熟,又同英美FD底,好似一切都恩恩向榮,但點解又會係1931年發動918事變呢?

[img]https://na.cx/i/7pNsmke.png[/img]
當時啲廣告#yup#

首先,加藤友三郎係華盛頓海軍會議後受英雄式觀迎,成功帶領日本走進新紀元,並係1922年成為首相推動親美政策,整個國家都穩步發展,佢亦大力改革海軍制度,甚至想將陸海軍大臣武官制變為現代文官制。但現實係殘酷,加藤友三郎健康一直好差而係1923年死去,咁岩就係關東大地震8日前,日本係加藤友三郎同關東大地震雙重打擊下開始出現問題,整個政府同海軍條約派陷入混亂(大正真係好不幸),而一切改革成果付諸流水,而天秤開始向加藤寬治艦隊派倒下。

[img]https://na.cx/i/zjXWY68.jpg[/img]
關東大地震

加藤寬治係加藤友三郎死後就再冇人政治、能力同威望上有人能夠匹敵,加藤寬治由海軍大學校校長升到第二艦隊司令再到聯合艦隊司令長官(曾經帶長門號出訪香港、亦係長門身為聯合艦隊旗艦唯一一次和平外訪),之後再升到軍令部部長,近乎君臨整個日本海軍權力核心。

[img]https://na.cx/i/jSybN0A.jpg[/img]
長門號出訪香港,以前香港#love#

[img]https://na.cx/i/e3QEWV1.jpg[/img]
當日新聞

而條約派加藤友三郎已死,山梨勝之進(佢好慘身為大將但冇出任過海軍大臣、軍令部部長、聯合艦隊司令長官,情況極少見[sosad])、堀悌吉(被山本五十六評為奇材,同山本同期但能力比山本強,如果佢冇出事應該堀悌吉先係聯合艦隊司令而非山本),同古賀峯一(山本死後接替聯合艦隊司令)成為條約派核心。但係同加藤寬治比較起威望同影響力都差一級,令到條約派係部內改革開始舉步為艱,亦令條約派變得被動,為黎緊1930年嘅倫敦海軍軍備會議帶來暗湧。

[img]https://na.cx/i/d7Ua3zf.jpg[/img]
堀悌吉

下回待續


[img]https://upload.cc/i1/2019/04/27/eyVhsv.jpg[/img]

嘩正野 巴打買左?


未睇
會唔會講同陸軍嘅鬥爭?

本編只到1936 陸軍嘅鬥爭可能做番外編


CH.6

雙方對於1930年嘅倫敦海軍軍備會議都做足準備,首先加藤寬治早係加藤友三郎死後1924年改組軍令部,再籍此加強軍令部係部內人事、編制、戰略上控制力,而且再確保左軍令部部長「帷幄上奏」權力,即係有咩事就用驚動天皇嚇你,再加上加藤寬治早年控制海軍大學校,令佢對中低層同軍令部部內好有影響力,亦令艦隊派實力大增。
[img]https://na.cx/i/7xeZdo6.png[/img]
加藤寬治

而條約派都冇放軟手腳,利用自加藤友三郎改革下海軍省為據點,聯同齋藤實、岡田啟介同鈴木貫太郎一班海軍元老連同首相濱口雄幸同外相幣原喜重郎一切希望保護加藤友三郎嘅遺產。但係經歷關東大地震同1929年華爾街股災,日本百業蕭條,民選政府冇力推動經濟發展,日本人從而對西方民主肦望熱情已大為減退,而對條約派等親西方派支持力度有好大影響。

[img]https://na.cx/i/ftVhKvR.jpg[/img]
華爾街股災

而民選政府再一次做錯決定,由若槻禮次郞依一個文官去做代表談判,民選政府基本上漠視艦隊派訴求,將比例進一步包括巡洋艦、驅逐艦、潛艇,雖然日本得到10:6.975 比例,但換黎係未來5年不得為艦隊更新換代,係艦隊派眼中更係得不償失,而簽署倫敦海軍軍備條約更缺乏一個加藤友三郎咁嘅人去全力支持,變相令問題更加復雜化。

[img]https://na.cx/i/Dr8bOXD.jpg[/img]
若槻禮次郞

而倫敦海軍軍備會議第二個帶起左干犯統帥權依個問題,而依個問題直接令到軍部開始失控。首先根據《明治憲法》中天皇係軍隊唯一領導者,軍隊一切決只能由天皇栽決,但民選政府係倫敦海軍軍備會議中獨自決定海軍軍備規模而某程度上侵犯左天皇權力,但係民選政府權力又係天皇給予,干犯統帥權慢慢變成一場憲法危機而陸軍就連同艦隊派開始挑戰民選政府決定,加藤寬治更決定使用其「帷幄上奏」權力直接向天皇請辭,再令問題加劇。

雖然倫敦海軍條約仍然順利通過,條約派雖然勝利但干犯統帥權問題變成禁忌,條約派同民選政府再難以控制軍部行動因為軍部一旦有咩事就用統帥權做借口而無視民選政府控制,而首相濱口雄幸亦係30年被暗殺,原因正係因為有人認為濱口侵犯天皇權力。而依一場暗殺就展開左長達5年的暗殺時代直到226事變為止,其間大量親美同中間派份子被暗殺及逼害,從根本上改變日本政活生態同國家未來。

[img]https://na.cx/i/eSM48XG.jpg[/img]
[img]https://na.cx/i/1xWkHhJ.jpg[/img]
首相濱口雄幸暗殺

下回待續


CH.7

倫敦海軍條約其實同九一八事變發生不無關係,首先九一八事變係由関東軍作戦主任参謀
石原莞爾策動,由石原莞爾所寫満蒙問題私見中,表達出在満蒙問題之上,滿洲和蒙古的價值是日本未來發展的關鍵和自然資源的來源,佔領満蒙可以幫助日本克服經濟衰退,而加強日本在亞洲的地緣政治影響力及將來總體戰中日本嘅緃深。

[img]https://na.cx/i/bTobPEC.jpg[/img]

石原莞爾

而石原莞爾正正利用左倫敦海軍條約後及濱口雄幸被暗殺中民選政府嘅弱勢,同埋日本社會對干犯統帥權問題嘅忌諱,係蒋介石北伐後同內戰中企穏陣腳前先發制人,係未事先通知陸軍、海軍、政府下短時間利用緊有兵力橫掃東北,制造既成事實逼政府同條約派無奈接受。

[img]https://na.cx/i/EBr8RSR.jpg[/img]
本庄繁 關東軍司令 緃容石原莞爾暴走

而一直同陸軍眉來眼去嘅艦隊派當然不甘於後人,係1932年發動一二八事變突襲上海(艦隊派點會咁執輸等陸軍玩唒),令民選政府同條約派只係可以傻左咁目睹軍部失控而無所作為,最終令日本退出國際聯盟同埋正式被國際社會孤立。

[img]https://na.cx/i/PMw49EE.jpg[/img]
松岡洋右宣布日本退出國際聯盟 番到日本變英雄

但係建立滿洲國後日本經濟的確有好大改善,九一八事變嘅更加鼓起日本國內戰爭熱,國內一片支持日本侵略行為以及興起敵視英美列強風氣,令民選政府同條約派陷入絕境,而艦隊派亦密謀一宗徹底改變日本海軍歷史的行動。

[img]https://na.cx/i/xyt3FMo.jpg[/img]

下回待續


果然冇乜人睇[sosad] 係題材太冷門定太無聊


果然冇乜人睇[sosad] 係題材太冷門定太無聊

好多人喇喎:O #adore#

攞下意見:)


以前中国有本叫 戰爭史硏究
有一個專案講 日本海軍,叫 逆天而行

仲有一個叫 冰眼看世界,寫了 浩瀚的大海是賭場

希望你成功

我係睇ACADEMIC向嘅書 依種興趣不大 寫完我會推介啲書比大家#yup#


CH.8

係1932年一二八事變後發生左兩件事,第一件係盟団事件而第二件係五一五事件。首先大家要知道當時日本中下層海軍新一代同帶領日清、日俄戰爭一代不同,從少到大皇國史觀同忠君愛國觀念教育,變得異常”愛國”#touch#dog,班後生仔當然好有理想#haha#dog,好想幫國家向外發展,將日本啲好野分俾鄰國。佢地之間有一個共通語叫「國體」,依個係一種好奇妙嘅詞語,人人都講但人人理解都唔同,但可以理解成以天皇為首嘅國家,由此日本軍部中下層開始有大大少少結社行為,大家都開始揾fd一齊去理解同實行自己所知嘅「國體」而努力改變日本未來#hehe#

[img]https://na.cx/i/R3K6D0b.jpg[/img]
橋本欣五郎 桜会領導人

桜会同血盟団係海軍結社中出名最激進個班人,桜会係橋本欣五郎帶領下在1931年試圖兩次推翻政府,佢地叫自己做昭和志士,目的係好似明治維新再一次拯求國家同天皇。(佢地班人起名好中二病)

另一方面,血盟団佢地開始組織一連串暗殺行動,佢地嘅口號係「一人一殺」,佢地狙擊大量政治家包括西園寺公望、幣原喜重郎、牧野伸顕、財閥領袖如池田成彬同団琢磨(都係三井話事人)、同舊貴族徳川家達(貴族院議長)等,因為依班人被佢地認為係貪婪同保守嘅象徵。最出名行動就係五一五事件中刺殺時任首相犬養毅,而個班刺殺者反而受日本大眾同情因而被輕判,整個社會、政界同軍部陷入失控同權力真空。

[img]https://na.cx/i/7v5xzyD.jpg[/img]


而另一方面艦隊派梗係食住上,係1933年策劃大角人事,近乎清除唒所有海軍條約派高層,加藤寬治首先支持皇室成員伏見宮博恭王繼任軍令部部長,再連同大角岑生海軍大臣利用皇室權威逼害條約派,係一連串人事任命下強逼山梨勝之進大将、谷口尚真大将、堀悌吉中将遷入予備役,成功架空條約派令佢地無法取得部內實權,係大角人事後艦隊派乎已經摧毀所有部內阻力,而整個海軍部內權力平衡亦被從止打破。

[img]https://na.cx/i/MEqd3r6.jpg[/img]

伏見宮博恭王

下回待續


有甚麼推介呢?

看到你在那邊也有post ,不過我沒有acc 。

我尋日一日寫完今日會出埋#yup#


CH.9

1935-6年係戰前最重要兩年,因為可以話係日本軍國主義正式形成時期。首先係1935年十二月到36年三月舉行的第二次倫敦海軍裁軍會議。其實係1934年事前會議中,日本決定派出山本五十六但並無成果(緊餘少數一個親美派兼有經驗同能力嘅人),亦係山本登上國際舞台後開始廣為人認識嘅契機。而係1935年舉行正式會議中山本亦被選中但佢拒絕接受任命(山本應該估到去左都冇用),而今次係永野修身帶領下,不論政府同條約派都無力反抗,而會議結果係災難性,任由加藤寬治一派係幕後將佢怨恨十幾年嘅裁軍協議打破,而太平洋馬上重新進入軍備競賽,日本正式脫離由美英主導嘅國際體系(華盛頓體系),美日關係真正開始出現裂痕。

[img]https://na.cx/i/sb6EjO6.jpg[/img]
永野修身


到依一刻大家都對條約派問艦隊派有啲認識,但係有啲重點要講番。首先條約派不等於親美而艦隊派不等於反美,條約派不等於愛好和平而艦隊派不等於好戰。

其實加藤寬治本身都唔太反美,但加藤寬治反對嘅係日美之間不平等,點解日本一定要犧牲自己國家安全? 雖然10:7比例都係求求其其計出黎但係點解日本必定要屈服係美國之下?相反加藤友三郎好似好開明,但佢一開始自己一言堂接受裁軍同10:6比例其實並冇通知同諮詢海軍內部意見,用一個獨斷方式去決定整個日本海軍走向係咪真係咁明智?

哟人雖然係佢生前包括加藤寬治都怕左佢冇人敢出聲,所以係佢死後艦隊派先反撲,加藤友三郎自己其實都明白問題,但早在會議中加藤友三郎身體已經唔好,會唔會病情影響左加藤判斷? 如果加藤友三郎處理好哟甚至係將加藤寬治早早排除出海軍核心的話,問題就唔會咁大? 所以本身不論艦隊派同條約派都係有理由同問題,而加藤友三郎嘅死已經令條約派無以為繼。(所以大正真係太不幸,天皇本身精神問題難以監督國家,天皇又不能親手教育昭和天皇,民選重臣被殺、加藤友三郎又早死而一死就有一個大規模天災係首都出現,咁黑真係:~()

而另一方面,整個日本係有根本制度問題,海陸軍各自為政、議會政府無力控制、皇族從軍而權力過大、海陸軍對自己中下層又屢屢緃容等等都係令整個日本軍部係短短十多年間完全失控,而人民由嚮往西方自由民主而變成一個反其道而行嘅國家。

而係二次倫敦海軍裁軍會議中發生嘅二二六事件正正將日本民主議會時代終結。

[img]https://na.cx/i/sZGACA2.jpg[/img]
二二六事件

下回待續


CH.10
要講二二六事件同海單嘅關係並不簡單,首先要理解整個日本軍結構同生態。首先係日本陸軍中有兩大派系「皇道派」同 「統制派」。「皇道派」係建基於思想家北一輝嘅理論,主張天皇親政同昭和維新,同海軍中血盟團和櫻會十分相似,並由陸軍中主要人物荒木貞夫、真崎甚三郎等,支持北進論與蘇聯決戰。

[img]https://upload.cc/i1/2019/04/28/dDqTOZ.jpg[/img]
北一輝 日本軍國主義先驅

[img]https://upload.cc/i1/2019/04/28/r1Hd6h.jpg[/img]
荒木貞夫

而「統制派」係由永田鐵山同東條英機作為代表,「統制派」和「皇道派」相反,主張利用現有制度中加入軍部獨裁成份,維持天皇立憲地位。而永田鐵山係1934年被皇道派的相澤三郎斬殺後更令兩派矛盾加劇,勢成水火。

[img]https://upload.cc/i1/2019/04/28/ahAy8x.jpg[/img]
永田鐵山 譽為日本軍中第一大腦

而本身加藤寬治領導嘅艦隊派一直同堅決反對裁軍嘅「皇道派」關係幾好,加藤寬治本身都成日同北一輝、荒木貞夫、真崎甚三郎依哟人交往。而「皇道派」一直將齋藤實、岡田啟介同鈴木貫太郎一班條約派海軍元老視為最大敵人,因為「皇道派」認為依班人連同政府一直妨礙天皇施政而岡田啟介更係時任首相支持裁軍。


[img]https://upload.cc/i1/2019/04/28/l1m06J.jpg[/img]
岡田啟介 和平派重臣 加藤寬治同鄉兼前輩 少數能克制艦隊派嘅人

二二六詳細唔多講,但係「皇道派」主要目標包括齋藤實(内大臣 被殺)、岡田啟介(首相 冇事但從此退隠)、鈴木貫太郎(侍従長 重傷但從此退隠 直到45年被任首相負責投降)、高橋是清(大蔵大臣 平民政治家 被殺)、牧野伸顕(元老 冇事但從此退隠)、西園寺公望(元老 冇事但從此退隠)、渡辺錠太郎(陸軍教育総監 裁軍支持者 被殺)。

[img]https://upload.cc/i1/2019/04/28/v6RuSf.jpg[/img]

而當「皇道派」進攻條約派海軍元老個陣,係政變一刻加藤寬治本身都呆左,一冷静並馬上同伏見宮博恭王進見天皇去嘗試振壓事件,而且不論艦隊派同條約派都馬上一齊去救人(果然陸海軍矛貭更深[sosad]),海軍馬上動員第一第同第二艦隊去東京同大阪連同海軍陸戰隊去保護海軍高層,當時接近40艘戰艦係東京灣,內戰直程一觸即發。

但幸好事件冇惡化,但係岡田啟介已經決定請辭,而條約派所有反抗力量近乎玩完。但艦隊派都唔好得多,因為加藤寬治同「皇道派」關係令艦隊派陷入危機,艦隊派現役重臣山本英輔、中村良三被強制調入預備伇,伏見宮博恭王同加藤寬治亦因二二六而關係決裂,伏見宮博恭王轉投親美米內光正上本五十六一派,加藤寬治亦因226未能進昇元帥海軍大将。

由華盛頓海軍會議到226事件係一個時代終結,日本十幾年努力加入國際社會努力付諸流水、海軍大量人材被逼害、部內因條約派同艦隊派瓦解而陷入混亂、中下層獨行獨斷而高層無力控制、整個社會瀰漫白色恐怖、軍部獨裁成為事實,由依一刻日本可以話正式踏上軍國主義國家之路。

本編完


之後講下啲海軍無聊野#yup#

主要參考書

麻田貞雄 From Mahan to Pearl Harbor: the Imperial Japanese Navy and the United States.(神作 深入淺出 有中文版)

麻田貞雄 両大戦間の日米関係―海軍と政策決定過程 (日文) HKU有

麻田貞雄今年死左:~(

Evans, D and Peattie, M. Kaigun: Strategy, Tactics, and Technology in the Imperial Japanese Navy, 1887-1941 (海軍入門必睇) HKU, UST好似有

野村實 日本海軍の歴史 (日本海軍史專家) HKU好似有

太田久元 戦間期の日本海軍と統帥権 新新地香港冇


番外 1

[img]https://upload.cc/i1/2019/04/28/hwcneW.jpg[/img]
大家都應該知佢係邊個 西鄉隆盛
但其實銅像個樣係由佢細路西鄉從道個樣作出黎
因為西鄉隆盛並冇相片同畫象流傳後世 真係好怪咁重要人物都冇留低[sosad]
而西鄉從道就係日本海軍奠基者 日本第一個海軍元帥 #yup#

日本海軍元帥其實好少 唔計追封只有西鄉從道、伊東祐亨、井上良馨、東鄉平八郎、伊集院五郎、伏見宮博恭王同永野修身




番外 2

大家睇完本編覺唔覺得有樣野好奇怪? 就係海軍行政決策,明明係重大決策中如對中開戰、美開戰或者三國同盟依啲部內根本冇人可以話到事情況下,咁海軍部內最高決策點黎? 依樣野真係好瘋狂,就係拖,一傾唔掂數就拖,拖冇可拖就可以"被逼"接受,依招萬試萬靈,日本海軍就係咁拖到同美國開戰。

而主流教科書都會將希特拉、墨索里尼同東條英機並列,話佢地係戰爭罪魁禍首,但係東條英機其實係唔想開戰,本身天皇任命佢個陣就係希望佢能夠撥亂反正,而佢都多次同天皇溝通了解到天皇對美開戰有相當疑懼,亦嘗試力挽狂瀾,但偏偏係係佢任內開戰,真係天意弄人。

依招唔單止海軍用,係日本基本上好多重大決策決定唔到個陣都係咁,而東條就係拖咁拖拖下決定開戰。而拖依招其實係關乎日本嘅集團心理,日本高層係冇結論情況下又唔敢否決下而引起中下層再暴走,就只能拖,最後就變成由一個人自己私自做左啲決定後再一個拖一個,在拖冇可拖就可以全部"被逼"接受,由退出國聯、德意日三國同盟到蘇日中立條約就係松岡洋右自己一個暴走最後令全日本"被逼"跟從嘅好例子。

[img]https://na.cx/i/a5p6MZV.jpg[/img]
松岡洋右




高汁#hoho# 樓主點睇918同李頓份調查報告

李頓份調查報告其實對日本算好 日本其實冇退國聯必要 係松岡暴走搞成咁 滿洲國其實唔可以話錯唒 至少日本由滿洲國系統上到經濟都整得似模似樣 日本係自己最大可接受程度下係滿洲國奉行緊日本式威爾遜主義[sosad]


番外 3

今次講深少少,講下超國家主義理論。

日本超國家主義理論係由丸山真男(被喻為日本戰後最重要政治學家)所提出,係丸山真男所寫現代政治の思想と行動中試圖解釋日本中下層同國家暴走失控原因。

[img]https://na.cx/i/1UhcPY1.jpg[/img]
丸山真男

佢嘗試比較日本人稱天皇制下同基督教影響下西方道德同價值觀形成嘅分別,相對於西方個人主義,日本係以集團主義為中心,西方將道德同價值模範交比宗教而日本人就將所有野集中係天皇身上,將天皇當成好似上帝咁,係一切道德同價值觀嘅泉源,一切道德同價值觀必須由天皇身上出發方為真理。

而且西方所有道德判断係由宗教出發、而令社會倫理同政治現實上可以係分開,所以西方人係個人主義下,面對政治問題時可以保持自我同獨立思想,即係宗教作為人類基本道德制約。

而日本則相反,思想皆以天皇作為「國體」嘅中心,而因為天皇係真實存在係日本,當宗教同政治上皆以天皇為尊時,令人難以建立出一套獨立於天皇同國家嘅思想,依套教育往往令人無法區分個人同社會、善惡與對錯分別,在缺乏制約下,令人可以係冇限制下係社會做一切認為係"幫助"天皇嘅野而站在道德高地。

因為正確係由天皇定義,但問題點先知天皇定義正確係乜? 因為天皇又唔會親口講,咁就要身邊啲人去估,問題係人人估嘅唔同,點先係真正正確? 啲人開始覺得與天皇的關係越親近就係代表在道德同價值觀嘅高地,即係同天皇的關係越親近就越正確,而軍人正正因為統帥權而直屬天皇,咁自然高人一等。

另一方面,日本本身文化推祟過程而非結果,日本人重視內心同決意,即係凡事講求一個純粹真心,而當你擁有一個純粹真心做事不論好壞,個件事係會更容易被人認同同接受。

而我地睇翻515事件中,個班中下層軍官唔單止年輕,而且佢地比起當權者梗係做得"作惡"更少 ,亦有軍人身份依種榮耀,佢地自然比當權者更純粹更真心為天皇辦事,所以當大量暗殺發生時,社會係更傾向支持喑殺者行為,認為佢地忠心可嘉,協助天皇清除毒瘤。

大家想像下以前日本同依家鄰近地區@_@




番外 4

大家好似都覺得陸軍罪大惡極,海軍比佢拖累先會搞成咁,其實依樣野係日本都有一套理論叫陸軍悪玉論同海軍善玉論。大家覺得海軍比較好其實好多時係因為米内光政,井上成美同山本五十六俗稱親美鐵三角所影響,而且係終戰個陣海軍元老鈴木貫太郎、岡田啟介主持大局先能夠順利投降。的確依班人係相比下比較好同理性,尤其係山本五十六個人魅力幫海軍加左好多分。而且海軍係行精英主義,唔單止係教育上,而且擁有大量留學同出國工作經驗,就好似周不時都出國開下海軍會議又上下國際新聞,相比起班陸軍當然好似表現得有智慧啲又開眀。

[img]https://na.cx/i/LbAaK25.jpg[/img]
東條英機

但係海軍依班人好多只係因為打唔驘美國而行親美路線被免衝突而非真心信奉西方價值,基本上班人多數對侵略其他地方係冇乜反對只要唔影響日美關係,咁其實同陸軍班人本質上又有乜分別,虧佢地又留學又讀書但係有幾多個真係有加藤友三郎咁嘅見識,而連有膽色反抗陸軍嘅人都唔多個。

如果海軍有好似加藤友三郎咁大膽係華盛頓會議後提出軍部大臣文官制同馬上炒左9成海軍將级軍官(好多有日俄海戰戰功)嘅氣魄,而又能夠係現代角度理解國防,就唔會搞成咁,而加藤友三係連英文都唔太識更唔好枉論外交經歷,加藤真係一個天材而海軍真係一代不如一代。

[img]https://na.cx/i/2xZKGWc.jpg[/img]
加藤友三郎



就咁睇其實天皇個定位係好多問題嘅觸發點


可以咁講 而且日本好多係根本制度問題


大正民主興起其實係時間問題,當老個批元老軍閥死得七七八八,係冇人能夠呼風喚雨下必然要揾過一個新方法去選拔首相,而民主政治就係潮流所在,日本想加入國際社會自然要扮文明進步,十年憲政常道自然水道渠成。

裕仁天皇其實唔易做,首先冇一班元老控制場面,而且本身因為大正精神有問題,根本冇幫能力物識一班人做顧命大臣傳話,係二二六中裕仁天皇就表現異常孤立,裕仁天皇一得識此事件就表現震怒,當天皇想振壓時但竟然冇人能夠係天皇身邊幫手振臂一呼,天皇差d想帶領近衛師團親手振壓又被阻止,陸海軍又唔想行動,內閤又收左皮,天皇係政變中其實好無助。:-(


其實日本最傷係比美帝斷左航空燃油,對石油供給有興趣可以睇下編文(日文)


https://oilgas-info.jogmec.go.jp/_res/projects/default_project/_project_/pdf/0/662/200603_071a.pdf


跳至第



  快速回覆 - 輸入以下項目

本討論區現只接受會員張貼文章,本站會員請先登入。非會員人仕,您可以按此加入為新會員,費用全免,並可享用其他會員服務。


上次光臨時間: 20/9/2019 3:15
今天貼文總數: 435 | 累積文章數目: 6,563,184

聯絡我們 | 服務條款 | 私隱政策 | 廣告查詢 | 職位空缺
Copyright © 2019 HKGolden.com. All Rights Reserved.