主頁 高登熱話 吃喝玩樂 科技消費 名人專訪 短片
現有會員可[按此]登入。未成為會員可[按此]註冊。
[公司模式 - 關]  [懷舊模式 - 開
[Youtube 預覽 - 關]  [大字型]  [小字型]

您現在聚腳在 講故台內。

即日起停收SMS會員

香港高登討論區曾接納用戶以SMS註冊成為會員,惟發現不少人濫用SMS會員登記,註冊帳號只作洗版宣傳之用#kill2# 。為防止問題惡化,本站決定即日起停收SMS會員,並改行ISP電郵加上SMS認證。

新註冊規則如下:
1. 部份獲認可的ISP或學校電郵仍可直接申請帳號#good#
2. 由於部份ISP容許用家任意更改電郵名稱,所以我們會同時要求這些電郵用戶提供手提電話號碼,作SMS認證#adore# ; ......
精選文章
跳至第

發起人
【連載】電流俠:潛伏特異人
13 個回應
你打我唔到

Member
〈序章〉

二零零三,人心惶惶嘅一年。

放學後嘅中學校舍比以往更加平靜,只係得微風輕輕力吹過樹葉嘅沙沙聲。就喺兩個禮拜前,地下嘅籃球場先至舉辦完班際比賽,但而家望落都已經開始封麈,而且睇怕仲會持續一段時間𠻹。喺各層嘅走廊間唔中可以聽到一對兩對嘅腳步聲匆忙走過,好似留喺室外多一分鐘都會迎嚟啲咩不祥之事咁。春天,本來充滿住萬象更新、孕育成長嘅氣息;初春嘅景象並唔應該如此死寂一片。而喺學校嘅某一個班房角落,似乎隱約聽到陣陣吵鬧同掙扎聲。聲音背後,正正有某種未知嘅潛能孕育緊,就如同迎接新生嘅來臨一樣。

一班老師啱啱開完會,一個二個急急腳離開會議室,得返蔡副校同幾個助理喺度整理文件。年近六十嘅蔡副校從來都唔係一個特別受學生同事歡迎嘅人,一嚟以前喺學校做咗八年訓導主任,學生少不免都唔會想同佢有太多接觸;二嚟佢平時皺起眉頭嗰一副嚴肅樣,令到唔少同佢共事多年嘅老師都對佢退避三舍。雖則係咁,不過佢對學校一直以嚟嘅貢獻,以及對學生嘅默默關心,大家都係有目共睹嘅。

就喺佢哋熄哂燈、行出會議室嘅一剎,二樓走廊盡頭嘅班房傳嚟霹靂一聲嘅巨響,狠狠劃破校園嘅一片寧靜。會議室位處一樓,理所當然聽得好清楚,於是乎蔡副校同一班助理即刻跑上二樓,睇吓究竟發生乜事。仲未去到樓梯頂,已經聞到由 2E 班房傳出嚟嘅一陣燒焦嘅氣味。裏面只係得兩個學生攤咗喺地下,身邊冒出一堆白煙。一個助理首先走入班房,立即揞住個鼻嗌咗聲,緊隨嘅其他助理同蔡副校亦都抵受唔住越嚟越濃嘅燒焦味,馬上揞住鼻。蔡副校唔敢相信眼前所見到嘅一切:其中一個學生挨住後面埲牆坐咗喺地上面,條頸明顯有俾人勒過嘅痕跡;另一個學生面上都有傷痕,但更加明顯嘅係右手手掌燒燶咗,成隻手黑哂咁滯,而且就係白煙嘅源頭。另外側邊仲有唔少撞跌哂、亂七八糟嘅檯檯櫈櫈,佢幾乎肯定呢度啱啱發生過打鬥。

喺情急之下,蔡副校一步衝上前,嘗試扶起靠牆嗰個同學嘅手臂,向後面同事大叫:「報警呀!應該係漏電——」仲未講完,另一聲刺耳嘅巨響喺原地發出,蔡副校應聲倒地。


#good2#0    #bad#1  
標籤:
〈第一章〉

十五年後,一個孤冷寂靜嘅夜晚。

觀塘海濱公園裏面,一個着住深藍色西裝嘅後生仔一直沿住欄杆向藍田方向行。所謂嘅「後生仔」睇真啲其實已經接近中年,不過都尚算姿整,一隻手攞住一個名牌黑色公事包,另一隻手戴住新型號 Apple Watch,爭在無攞埋杯 Starbucks 咖啡慢慢行慢慢飲,如果唔係就成個典型中產人士咁。呢一晚跌到去十五度,海旁嘅地方就更加大風,所以人並唔多,得幾 pair 情侶坐喺唔同角落嘅木櫈咿挹,同埋一年四季都如常喺度練跑嘅人。

正當呢個接近中年嘅後生仔行到去大約公園中心嘅位置,佢褲袋傳出斷斷續續嘅震機聲。拎出手提電話,螢幕上嘅來電顯示寫住「琪」。佢望住呢個單字幾秒,猶豫緊到底接唔接好。但佢仲喺度諗緊嘅時候,震機聲已經停止咗,取而代之,係螢幕彈出一個未接來電通知。後生仔嘆咗口氣,但呢一口氣包含嘅,係放鬆,定係惋惜,定係無奈,只有佢至清楚。

電話又隱約震咗聲,好似回應佢嘆氣咁。係「琪」send 咗個訊息嚟:「阿希 又話黎既?係邊呀?」

佢雖然好想收埋電話繼續唔理,但阿琪始終都係佢其中一個僅餘嘅好朋友,喺呢個時候唔理佢似乎有啲過份。

「Sorry 我改變咗主意。妳幫我同 Miss 潘講聲唔好意思吖。食得開心啲。」

「都話隔左咁多年 佢地冇野架啦」

「都係唔係咁好。唔好逼我啦。」

「咁你係邊度?」

「觀塘海濱。」然後順便補多句:「我就走㗎啦,妳唔使嚟揾我。」

後生仔收起電話,挨住欄杆望向前面三個相連嘅觀景亭,睇佢哋一直喺度變色,紅變黃、綠變藍咁,色調時冷時暖;觀景亭樓高一層,燈光啱啱好反映喺佢塊面度。望咗一陣,佢感覺到佢內心亦同一時間經歷緊類似嘅反覆變化,憤怒同時又混雜後悔,懷念又連帶住傷感。佢就係企喺一切嘅中間,俾各式各樣嘅情感包圍住,活喺「後生仔」同「中年人」之間;身處喺日同夜之間嘅傍晚時份,企喺陸地同海港嘅界線之上,唔上唔落咁。


:)


〈第一章〉(2)

今晚係九龍某間中學某一屆 2E 班嘅班聚,亦都係自從大家畢業之後第一次約齊哂咁多位。其實成班學生總共得三十五個人,加埋班主任潘老師都係三十六人,睽違足足十五年終於能夠再一次共聚一堂,都唔知應該話係可惜定係奇跡。或者最令人可惜嘅,係呢個奇跡到最後並無發生到,因為當年喺臨暑假前就退咗學嘅郭誠希,今晚始終都無喺班聚上出現過。

其實大家對佢嘅缺席一啲都唔意外,原因係佢咁多年嚟無論大小聚會、同學生日飯、校慶等等,都一直無蒲頭。而最主要嘅原因,當然係嗰陣時發生嗰件怪事啦。係就係已經相隔咗十五年,但都曾經喺學校轟動一時,甚至連新聞都有報導過,又點會有人唔記得?有,嗰個咪正正係郭誠希本人囉。

根據當時在場嘅教學助理所講,佢哋喺班房發現佢嘅時候,佢已經暈咗喺地下度。醒返之後,佢堅稱自己無對蔡副校做過任何事,唯一記得發生過嘅就係俾隔離班嘅蒙元傑打,之後就不醒人事。而蔡副校醒返嘅時候,講嘅嘢亦都同其他人俾嘅證供完全吻合。件事的確係好有疑點,但係無人知到底成件事嘅來龍去脈係點。時至今日,仍然有一啲同學對事件真相有各種揣測,覺得佢係為咗同件事劃清界線,專登扮傻話自己失憶,咩都唔記得。

「佢係咪唔嚟啦?」潘老師問啱啱放低手提電話嘅黃凱琪。凱琪點一點頭。「唔緊要啦,我明嘅。大家都應該明嘅。」潘老師面帶安慰咁微笑,向大家揮揮手示意起筷。

同一時間,喺海濱公園度嘅阿希沿住斜坡緩步行上觀景亭,然後放低公事包。一陣陣嘅冷風撲面。佢望住仍然發出亮麗光芒嘅對岸,望吓望吓,眼前嘅一切景色開始變得好朦,好似海面嘅倒影一樣。


〈第一章〉(3)

突然間,佢覺得身後面有啲唔妥,好似聽到有種奇怪嘅回音喺好遠傳過嚟,雖則聽落去係人聲,但佢又唔清楚係講緊咩。一擰轉頭,居然成個環境比頭先光咗一啲。莫非係月光?阿希抬頭望上天,不過連個月亮都見唔到(反而今晚啲星星特別光,而且仲幾多𠻹,以今時今日嘅光污染咁嚴重,已經算係好難得㗎啦)。回音越嚟越多,唔同嘅男聲同女聲互相夾雜重疊埋一齊。仔細聽吓,佢哋似乎都喺度迎接緊啲嘢,話咩:「係時候 ⋯ ⋯(唔知乜乜乜)⋯ ⋯ 終於可以 ⋯ ⋯」之類,感覺有啲詭異。

阿希留意到周圍真係越變越光,明明已經係接近夜晚八點,點解會光到好似傍晚六點幾咁樣?正當佢終於忍唔住想轉身離開觀景亭嗰時,佢見到六七個人影一個一個咁由地下行緊條斜坡上嚟,再擰轉頭望一下樓梯底,同樣見到有幾個頭頂,一步一步行上嚟。阿希喺觀景亭上面,眼見兩邊嘅出口都俾咁多人攔住,自己完全被困。

呢個時候,佢終於聽得明嗰一拃聲音喺度講緊乜:「係時候一次過還返俾蔡韻儀 ⋯ ⋯ 今晚終於可以還返哂俾佢 ⋯ ⋯」

阿希個心沉一沉,打咗個冷震,個腦開始亂諗一通:「蔡韻儀蔡韻儀蔡韻儀亦即係十四年前應該係十五年前佢哋話係因為我而入院嘅蔡副校長之但係我真係咩都唔記得點解我真係完全唔記得唔記得點解會咁唔係我真係唔關我事唔係我唔係我唔係 ——」佢對腳已經開始企唔穩,腦裏面不斷回憶返以前俾同學話係殺人兇手嘅畫面,俾同學、甚至教佢嘅老師排擠,就連負責情緒輔導佢嘅駐校社工都似乎認定佢係有嘢隱瞞住大家。

觀景亭下面嘅兩堆人群轉眼已經行咗上嚟,企哂喺度。阿希突然覺得佢哋好面善,好快就認得佢哋某啲人嘅面孔;佢哋都係當年同佢同班或者係隔離班嘅同學。佢甚至無懷疑過點解佢嘅同班同學會喺呢度,佢哋唔係喺班聚食緊飯㗎咩?呢一刻嘅佢個心已經好亂,差唔多負荷唔到一切眼前嘅景象。佢只係心知一樣嘢:佢哋一定唔會放過佢。

果然,佢哋大叫咗一聲:「殺人兇手!」之後就一齊擁過去阿希度,合力將佢成個人舉起。阿希合埋雙眼,麻木地面對自己即將死亡嘅事實。


〈第一章〉(4)

「喂!醒未呀?」一把熟識嘅聲音響起,令阿希從沈睡之中扎醒:「呀 ——!」。發惡夢俾一班人拋落街,然後再突然俾人嗌醒嗰吓,真係幾難頂,搞到阿希成個人好似跌一跌咁,而且個頭仲好痛𠻹。

叫醒佢嘅係佢嘅中學同學兼老友黃凱琪,亦即係啱啱 send 訊息揾佢嗰個。中學生涯嗰時,凱琪喺學校裏面都算係有啲唔受歡迎,皆因佢一向都比較大情大性,唔會好似平時啲人咁扮哂嘢,背後就數人哋呢樣嗰樣;佢見到有人做錯事就會直斥其非,不過正正因為佢咁嘅性格,多數嘅人都會覺得佢難相處、唔合群、唔識人情世故。另外,佢一向都比較男仔頭,平時啲動作唔算粗魯但亦都絕對唔會係温柔。可能因為咁,已經嚇走咗唔少人,平時會接觸到嘅同學就只係有幾個同級嘅女同學,而所謂嘅接觸,通常都係不外乎一齊食晏同問吓功課之類。

至於佢同阿希係點樣熟,大家都唔係好清楚。以阿希平時比較內斂嘅性格,應該唔會同一個咁豪爽嘅女仔做 friend,但中二同班嘅短短幾個月,佢哋的確係變得幾熟,直到而家都仲會聯絡。特別係發生咗蔡副校嗰單嘢之後,當某啲同學疏遠阿希之際,阿琪仍然無離棄佢,繼續同佢食飯傾計。可能阿琪就係為咗抱不平,覺得阿希俾成班人杯葛好可憐,於是更加唔想孤立佢。但無論係咩原因都好,總之阿琪都係阿希中學時期裏面其中一個好重要嘅同伴。

喺海濱公園裏面嘅幾個人聽到阿希嘅大叫聲,就算係喺遠啲嘅都望哂過去觀景亭嗰邊,有啲甚至行咗過去睇吓發生咩事。阿希扶住欄杆起身,喺腦袋一片空白,同埋一片黑暗嘅環境之下,望咗一陣先知道企喺眼前嘅係阿琪,而且仲攞咗兩罐啤酒嚟。阿希心諗:「妳又會喺度嘅,叫咗妳唔好嚟㗎嘛。」但佢其實喺叫阿琪唔好嚟嗰陣,或多或少都估到佢好大機會會照過嚟揾佢。「咁樣先係阿琪吖嘛。」

腦入面嗰句已經唔需要講:「嚟咗啦?」

阿琪笑咗一吓:「驚你一時諗唔開吖嘛,死仔包。不過我都唔識游水,你真係跳咗嘅,我都只可以喺遠處食住花生睇吓你點死法。」

阿希又望住觀景亭外面嘅景色,無應到阿琪嗰幾句亂噏廿四。「喂,點呀?真係想跳落去呀?」阿琪開咗罐啤酒,遞俾阿希:「唉,飲埋先死啦吓。」阿希懶理寒冷嘅天氣,大啖大啖咁飲咗半罐,再問阿琪:「而家幾點呀?」

阿琪望吓部電話:「九點半啦。你瞓得咁舒服,早知由你繼續瞓天光啦。」阿希覺得唔係好妥,見到下面有幾個途人停低落嚟望住觀景亭。「莫非我嗌得好大聲,嚇親人?」阿希心諗。

「點解會咁暗嘅,啱啱我八點嗰陣光好多㗎喎 ⋯ ⋯」阿希一路講,一路又諗返起頭先發嘅惡夢,稍為打咗個冷震。佢伸咗個頭出觀景亭,發覺腳下面應該喺度變緊色嘅彩燈全部都熄咗,心裏面覺得奇怪:「咁早就熄燈㗎咩?」

阿琪見佢怪怪哋,就問佢:「你無嘢吖嘛?你仲諗緊 2E 班啲嘢?」

阿希攞起罐啤酒同公事包:「無事。行啦我哋。」然後兩個人就行樓梯落返地下,阿希再望咗一吓熄哂嘅彩色燈,就同阿琪一齊離開咗海濱公園。


〈第一章〉(5)

因為阿希住觀塘,所以佢哋每次喺海濱公園走嗰陣,阿琪都會陪佢行去觀塘站先搭地鐵,而唔係行去比較近嘅牛頭角站。

過咗巧明街條馬路,阿希終於開口:「阿琪,妳之前嚟海濱呢,有無留意過啲彩色燈係幾點熄㗎?」

「我點記得呀?」阿琪一面無奈咁答:「你都幾無聊㗎喎。」

阿希追問:「唔係呢,我認真㗎。頭先觀景亭下面咪有成排變色嘅燈嘅?」

阿琪皺一皺眉頭:「唔係喺頭頂㗎咩?地面好似無成排燈㗎喎 ⋯ ⋯」

「妖,上面又好,下面又好啦。我記得頭先上去嗰陣明明係着哂 ——」

「咁關我叉事啫?你理得啲燈着定熄咩,我嚟又唔係同你研究呢啲嘢。」阿琪嘅霸氣咁多年完全無變過。阿希知佢本身已經燥緊佢甩底,而家佢仲要喺度講埋哂啲唔𠸎耕嘅嘢。雖然佢始終都係覺得奇怪,尤其係頭先有其他途人都停低落嚟望住佢,一定係有嘢唔妥先至會咁;不過,佢費事再辣㷫阿琪,所以都係收吓把口,唔好再問好啲,於是又飲咗兩啖,然後就繼續行。

兩個人一路上都無再講啲咩。今晚嘅風似乎比平時更加大,喺佢哋耳邊「馮馮」聲吹過。眼見前面就係 APM 港貿中心入口,阿希知道就快要同阿琪道別,於是停低咗喺度,有啲尷尬咁問:「係呢,乜個班聚咁快就完啦咩?」

阿琪戚起眼眉,露出一副「你話呢?」嘅樣。「大家都剩係識喺度講最近返工、結婚生仔啲嘢,留喺度托咩?我去都係俾面 Miss 潘咋,你估我想㗎?不過我都唔夠你勁。」又繼續向前行。

「咪行住先啦。」阿琪停低落嚟,望返轉頭。「妳知我點解唔去㗎。」佢望一望向阿琪,然後睇住附近嘅路人經過。佢間唔中都有呢個小動作,一尷尬就鐘意留意吓其他嘢。

「唔。」阿琪用鋒利嘅眼神望住佢;呢種方法好容易令一個人望返住自己。阿希唯有望住阿琪嘅一副令人難堪嘅表情。「你係咪真係要一直逃避落去呢?」阿希靜咗,無答到佢。「知唔知點解我想你去呀?你永遠都只係諗返起嗰陣時嘅事,但係大家都無再介懷啦。」

一提返起,阿希更加覺得難過:「佢哋鬧我係殺人兇手呀!」阿琪一手捉住阿希手臂:「十五年前吖嘛。嗰陣大家仲細,實會亂講㗎啦?唔好再係咁啦,阿希。你咁嘅話,成世都會俾呢樣嘢纏住,咁點得㗎?」阿希鬆開阿琪隻手。

「更何況,」阿琪慢慢褪後一步:「你根本就對呢件事無印象。」

阿希反駁:「咁唔代表件事無發生過㗎喎。我上網睇過,有啲受創傷嘅人都會失去咗某部分嘅記憶。咁即係嗰時我同蔡副校的確係發生咗啲意外,於是乎我先會失憶㗎啫。」

「或者係你俾懵向左走向右走打到暈咗,仲失憶埋,然之後蔡副校再俾佢整傷咗呢?」阿琪口中嗰個「懵向左走向右走」係嗰陣時周圍欺凌人嘅同級同學蒙元傑,亦都係喺事發現場 2E 班房裏面嘅另一位學生。

「班助理嗰陣唔係咁講,佢哋話係蔡副校一掂到我,之後我唔知做咗啲乜,就令到佢成個人跌咗落地。咁唔通佢哋專登夾埋砌我啦喎?」

阿琪又開始無耐性:「係,你講咗好多次啦。咁再斟酌喺一件唔會有結論嘅事上面,有鬼用呀?」


阿希頂唔順阿琪咁樣講,越嚟越大聲:「蔡副校係因為我而死㗎!」

阿琪亦都爆 seed 還拖:「佢係因為沙士而死呀!你要我講幾多次呀?」

「唔係因為呢件事,佢會入醫院咩?」阿希激動到眼淚都出埋。呢個就係佢一直都咁內疚嘅心結,而呢樣嘢正正就係班同學當時話佢殺人嘅原因。當然呢樣並唔係事實嚟啦,呢件事只不過係令到蔡副校入院,然後再感染到當年致命嘅沙士病毒。

「夠啦。再聯絡啦。」阿琪留低咁樣一句,就靜靜哋轉身離開。阿希成個定咗喺度,望住阿琪嘅背影急急腳咁轉咗入去港貿中心。

〈第一章〉完


〈第二章〉

十一點半,門後面傳出電視聲。

企喺屋企門口,郭誠希花咗啲時間去整理重組一下今晚嘅「來龍去脈」。「七點半放工、八點班聚、十點九散 band。如果問到班聚嘅話,再加插幾樣無關痛癢嘅吹水內容 ⋯ ⋯」

一打開門,見到老婆坐咗喺沙發睇電視,心裏面諗:「又係呢套無聊旅遊節目,已經就快播咗兩個禮拜啦。」老婆阿 Wing 擰轉頭望咗阿希一下,笑住同佢講:「返嚟啦?頭先試整咗隻新糖水呀,你沖完涼出嚟試吓吖。」

「好呀。」阿希一路放低公事包、除鞋,一路擠返個笑容俾佢:「陣間試。」之後就行入咗廁所,於是阿 Wing 又試眼定定睇住電視。

阿 Wing 今年廿五歲,比佢老公阿希大約細三年。佢哋喺七年前偶然喺搭車途中認識到對方,當時阿希大學 Year 3 臨近畢業,而阿 Wing 就中七畢業,喺暑假開始咗無耐就正式一齊咗。嗰陣阿 Wing 考唔到入大學,阿希勸佢重考,但佢都係決心出嚟做嘢,第一份工就係時裝店職員,自此就對時裝結下不解之緣。兩年後,阿 Wing 開始嘗試設計唔同嘅服飾,然之後仲同佢哋一個讀時裝設計嘅朋友夾錢開咗間小型時裝店。或者,阿希就係俾佢呢一種隨性得嚟又會努力實現自己理想嘅性格吸引,於是就喺兩年前同佢拉埋天窗。

身為一個時裝設計師,阿 Wing 對自己衣着都幾有要求,同時阿希有時候去買衫或者着咗啲奇怪嘅配搭,佢都會提吓阿希。雖然好多人都會覺得煩,不過阿希又似乎幾受落嘅,可能呢啲就係夫妻之間一啲其他人唔會明嘅情趣啦。

喺屋企嘅佢裝扮雖然同平時好唔同,不過就有另一種清新脱俗嘅感覺。今晚嘅佢同平時一樣戴住粗框眼鏡,吊帶連身睡衣加件外套,再將頭髮紮成一個圓髻。佢覺得呢種裝扮特別適合佢呢種身型比較細小嘅女仔。

廁所裏面嘅阿希着好睡衣,行咗出廳。阿琪見佢望落有啲倦意,於是就同佢講:「你攰嘅話就聽日先食啦,我陣間去雪咗佢。」

阿希點一點頭,然後行入廚房:「我而家去雪啦。」

阿 Wing 邊睇住電視邊問:「係呢,個 gathering 點呀?」

「OK 啦,都係講返以前啲嘢,又傾吓而家近況囉。David 話佢諗住今年結婚喎 ⋯ ⋯」阿希打開雪櫃,一陣冷氣令佢打咗個冷震。佢本身並唔係一個鍾意講大話嘅人,但有時候,講真話真係可能更加有害。


〈第二章〉(2)

雪好咗糖水之後,阿希聽到電視機熄咗。

阿 Wing 離開咗佢張沙發,企喺廚房外面伸個頭入嚟望阿希。阿希見到,擰轉面做咗個鬼馬樣引佢笑:「Wing Wing 妳唔睇啦?」

「睇你好睇啲吖嘛。」阿 Wing 由後面環抱住阿希條腰,緊貼住佢。阿希感覺到阿 Wing 細小而温暖嘅身軀,同埋佢一呼一吸造成嘅起伏。阿希伸手捉住佢一對幼嫩嘅手背。每一次阿 Wing 咁樣緊抱住佢,佢都覺得自己真係好幸福好幸福。阿希成日覺得,如果佢好朋友阿琪係負責引導佢理性思想嘅人,咁阿 Wing 就正正係佢嘅相反,係一個極其感性而夢幻嘅人,而且好容易可以感染埋身邊啲人嘅情緒。有阿琪同阿 Wing 呢兩個人喺佢身邊,就可以令佢睇清楚呢個世界嘅一事一物、一思一念。

「係呢,聚會啲人個樣有無同以前好唔同呀?話哂佢哋有好多人你都咁多年無見啦嘛。」阿 Wing 仍然挨住喺阿希後面。

「有啲啦。不過都唔算好多年,都仲認得大家嘅。」

「噢,又係喎。」阿 Wing 笑一笑。「得閒約吓都好,橫掂你都唔多朋友嘅。」

「係㗎。」阿希轉身,正面咁望住佢:「而家有妳就夠啦,Wing Wing。」然後輕輕錫咗佢個嘴一啖。

阿 Wing 雙眼好似望實阿希咁,但係又似乎無聚焦喺任何一處咁。佢鬆開阿希條腰,但依然企得好近:「仲有呀,你阿媽頭先打嚟過呀,話你連續有兩三個禮拜無揾謝 Sir 上堂啦喎。」

「係咩,咁我打俾佢。」阿希正想出去攞電話,阿 Wing 又開口:「咁夜,你都係聽朝先覆佢啦。」

「都好。」阿希一手攬住佢,一齊走咗入睡房。


〈第二章〉(3)

佢哋嘅睡房唔算大,有一張標準雙人床,隔離角落頭放咗個床頭櫃,加一棧壞壞哋嘅床頭燈。床嘅另一邊,係一個古典風格嘅木造衣櫃,類似《獅子 • 女巫 • 魔衣櫥》入面嗰個魔衣櫥咁,除咗無咁高大之外,同埋呢個衣櫃裏面無存在到一個充滿魔法嘅世界。無論呢隻故事嘅發展會幾咁天方夜譚、不可思議都好,我保證,所有發生嘅事都唔涉及任何魔法。(題外話:有唔少人都會撈亂「魔法」同「魔術」,其實係兩樣嘢嚟。魔法師係哈利波特嗰一類,而魔術師係大衛高帕菲嗰啲。祟尚現實主義嘅你可以當魔法係假嘅,並且係以假幻真,而魔術就係用真嘅道具同掩眼法去以真幻假。所以如果陣間有魔術師出現嘅話,你唔好話我講過唔算數啦吓。)

阿希坐咗上床,望住喺窗口旁邊一埲牆上面嘅畫。呢幅壁畫係佢哋搬入嚟呢間屋嘅時候,阿 Wing 同阿希花咗兩個月時間一齊合作完成嘅一幅作品。除咗時裝外,阿 Wing 都好鍾意一有空檔嗰陣就畫吓畫,有大自然風景、街景、夢幻嘅仙境等等,仲有畫盆栽、卡通人物嗰啲。而呢一幅畫裏面嘅,畫嘅係韓國首爾嘅鬧市景色。原因係因為阿 Wing 同阿希兩個拍拖嗰時,第一次去旅行就係去首爾,為咗記念呢次旅行,所以就決定畫出嚟。而佢哋喺畫作上面亦都特登記錄咗當時旅行發生過嘅各種事。例如係畫咗一班着住紅色衫嘅年輕人,因為有次喺啲陌生街道蕩失路,係呢班年輕人幫手帶路,而且途中仲同佢哋做埋朋友。喺畫裏面另一個角落嘅一間咖啡店枱頭,畫咗一個細嘅紫色手袋。呢個手袋係某一年聖誕節阿希買俾阿 Wing 嘅禮物;喺首爾有一日佢哋幫襯完咖啡店之後唔覺意漏低咗。當時阿 Wing 揾唔返手袋心急到喊咗出嚟,事隔幾年,估唔到居然會重現喺呢一幅壁畫度。

阿希當時拿住畫筆,咁樣同佢講:「Wing Wing,我想加多樣嘢喺度呀。」

「畫咩呀?」見到阿希突然好認真咁嘅樣,阿 Wing 一面茫然。

「好快妳咪知囉!」阿希隨手攞起畫筆,整咗啲紫色顏料就開始畫畫。畫完之後,阿 Wing 當然記得呢個手袋,以為阿希喺度笑佢整唔見嘢,正想發佢脾氣嗰陣,阿希轉身用手指掂一掂佢鼻尖,講咗句:「嗱,送多一次俾妳啦。記住以後要好好保護佢啦噃。」

兩年之後,兩夫妻瞓喺床上面望住當時畫嘅畫。遠處嘅南山首爾塔喺一片昏黃嘅天色之中閃爍,前面令人眼花繚亂嘅異國繁華鬧市,同佢哋身處呢間狹窄而平實嘅睡房形成強烈嘅對比。阿 Wing 挨住身邊嘅阿希,無發出任何聲,只係望住幅畫。阿希側身望吓阿 Wing,再望吓幅畫,然後用手指輕輕梳住阿 Wing 嗰把長頭髮。

阿 Wing 𩓥起頭望住阿希。阿希情不自禁慢慢挨塊面埋去,錫咗佢一啖。阿 Wing 緊握住阿希手臂,嘴唇仍然貼實對方。慢慢,佢哋開始用雙手喺對方身體上面遊走,然後再遊走到下面。持續咗三五分鐘之後,阿 Wing 停低咗落嚟。

阿希忍唔住,嘗試跨上阿 Wing 度:「Wing Wing ——」突然之間,佢留意到阿 Wing 好似面有難色咁望住佢。「Wing?做咩事呀?」

阿 Wing 垂低頭,但依然挨住阿希,細細聲話:「我有啲嘢,想同你講。」


〈第二章〉(4)

阿希無開到口,只係繼續望住阿 Wing 頭頂,直到阿 Wing 坐直個身,無再挨住佢:「老婆?發生咩事呀?」然後伸手捉住阿 Wing 隻手腕:「係咪同我有關㗎?」

阿 Wing 搖一搖頭,眼角微微向阿希佢望吓一眼:「我唔知呀 ⋯ ⋯ 我打算間時裝店嚟緊唔再做落去啦。」

阿希個樣好驚訝咁望住阿 Wing:「點解呀?」開時裝店係阿 Wing 幾年嚟嘅心願,由七年前因為打工而無意中醖釀嘅一個主意,然之後再花咗幾年時間日日夜夜咁不斷去畫唔同嘅服飾設計,亦都為咗要儲錢而捱咗唔少餐麥記,去到最後終於變成一間實體店鋪。幾年嚟嘅心血,唔通就要白白浪費哂?

「記唔記得早排我咪同個業主傾續約嗰嘅事嘅?」

「係呀。」其實當時阿希忙緊,聽完就無咗件事,但阿 Wing 而家提返起,佢又有啲印象。「當時妳唔係話佢幾好人,無乜點加租咩?」

「係,當時佢係咁樣同我講呀,仲喺度話咩幾欣賞啲後生仔創業𠻹。」阿 Wing 企咗起身:「但係隔咗無幾耐,佢突然之間反口話,諗諗吓都係要加足兩成,仲話同區有大把人加得仲高過佢喎。」

「加兩成咁鬼多?佢又會咁無恥無啦啦反口嘅?」阿希都知道近排經濟市道差,但無諗過啲人會咁狼:「而家啲人為咗錢,咩都唔理㗎啦,話知要搶啦。」

「唔。」阿 Wing 點吓頭同意,低頭望住阿希。

阿希問:「咁 Benson 佢知唔知道?妳有無同佢講?」Benson 係阿希讀大學識嘅朋友,佢之前喺大學讀時裝設計。嗰陣時,阿希知道阿 Wing 對呢方面有興趣,就介紹咗俾佢識。之後佢哋有一段時間一齊合作,設計咗幾套服飾,再創立咗一個小型嘅時裝品牌。喺四年前,阿 Wing 同阿希終於儲夠錢,夾埋 Benson 喺旺角一條內街度租咗間鋪頭開時裝店。直到而家,佢哋雖然少咗見面,但係都有繼續合作去設計啲新嘅款式。

「我未講呀,但係佢不嬲都唔係負責呢方面嘅事㗎啦,佢剩係管服飾設計嗰啲咋嘛。」阿 Wing 繼續講:「不過 ⋯ ⋯ 我覺得個業主加租似乎唔係純粹為咗錢。」

阿希唔係好明佢意思:「吓?唔係為錢,係為咩?」

「因為我收到佢通知之後,專登打過電話俾佢。我一開始問佢可唔可以加少啲,佢直接同我講話唔得。」阿 Wing 行到去窗口隔離,用背脊貼住牆上面嘅壁畫講:「之後我唔忿氣繼續同佢 bargain。佢最後講咗一句:『你要怪嘅就怪你個郭生啦。』然後就收咗線。」


〈第三章〉

第二日朝頭早,阿希搭地鐵返工嘅途中。

「下一站,藍田 ⋯ ⋯」阿希企喺密麻麻嘅車廂中間,俾一堆上班族同玩緊電話嘅學生圍住。佢雙目無神咁望住出面沿途嘅風景,見到一座灰藍色嘅大樓,同埋一個無人用緊嘅游泳池,腦裏面一片空白。

阿希尋晚聽完老婆阿 Wing 講時裝店單嘢之後,成晚都瞓得唔係咁好。個業主口中嘅「郭生」一定係講緊佢㗎啦,但喺阿希印象中,佢哋一直都無咩過節,咁加租呢件事又點會同佢有任何關係呢?而且業主一向都幾平易近人,就算真係唔覺意得罪咗佢嘅,咪大家出嚟三口六面傾掂佢囉,點解要趕盡殺絕?「我一定要打去問清楚,睇吓究竟有啲咩誤會。」阿希打算一返到公司就打俾個業主。

佢攞起電話,撳咗去通訊錄裏面業主嗰一欄:「萬一佢唔肯妥協嘅話,我唯有攞自己啲錢去填返個數囉 ⋯⋯ 應該 OK 嘅。」阿希心裏面已經開始盤算緊點樣可以避免間鋪「被執笠」。

電話突然震機,阿希一路避開喺藍田站落車嘅人潮,一路睇係邊個打嚟:「母親大人」。阿希醒起自己仲未打返俾佢。

「阿媽?」阿希早就知佢打嚟係為咗啲咩,不過都照樣問:「做咩事呀?」

「希仔。阿 Wing 同我講呀,你尋晚去咗中學班聚呀?」

阿希答:「係呀,媽。」

「無乜嘢吖嘛?」

阿希心諗:「一個我根本無出席到嘅聚會,可以發生啲咩事呢?」然後答:「幾好呀,唔錯呀。」心裏面又再諗起阿琪尋晚同佢講嘅嘢,暗中怪責自己一直都唔敢面對中學嘅同學。

「啲同學無講啲咩說話你聽呀呵?」電話裏頭嘅「母親大人」繼續追問。

「點會呢?」事實上,阿希都唔肯定假如佢真係出席咗班聚嘅話,啲人會唔會有意無意咁提起當年嘅事。

「謝 Sir 話你成兩個禮拜無去上堂啦喎。你唔係就嚟要考段啦咩,仔?唔使練吓㗎?」

「係呀,媽。下個月就考啦。我會練㗎啦,妳唔使擔心我喎。」阿希唯有答。自從發生咗中二嗰件事之後,佢阿媽就安排咗佢跟一個好朋友謝 Sir 上跆拳道班,一學就學咗十幾年。其實阿希一早已經唔想再學落去,不過佢阿媽咁多年嚟都對呢樣嘢好執着,於是佢唯有死死氣繼續學落去。


〈第三章〉(2)

阿希諗返起當時中二下學期就嚟完結嘅時候,佢阿媽決心幫佢轉校。一開始阿希知道咗嗰陣,好唔情願。一方面,佢心知阿媽都係為咗佢唔再俾人唱同俾人杯葛,先至會想佢轉去一個新環境;另一方面,佢除咗覺得俾人誤會俾人屈之外,亦都唔捨得中學某啲好朋友同埋老師。雖然佢可以約朋友出嚟或者上 ICQ 吹吓水,但係無得一齊返學放學,佢知道始終都會同大家越嚟越疏遠。

最後令到佢願意轉校嘅,係由於有一次,佢阿媽嚟學校同社工 Miss Lai 傾計。當時 Miss Lai 同佢哋兩個傾咗一陣,然後叫咗阿希出去,同佢阿媽單獨傾。阿希企喺出面無所事事,望住教員室外面啲老師行出行入,又再望吓阿媽同 Miss Lai 傾計。雖然身隔一塊玻璃窗,令到佢聽唔到裏面嘅對話,但係從揖揖揚揚嘅淡白色百葉簾縫之間,佢突然望到阿媽佢講到好激動,眼淚係咁流落嚟。見到呢個景象,阿希個鼻忍唔住酸一酸;佢無諗過件事會令到身邊嘅親人咁難過,而且佢阿媽一直以嚟都係一個好堅強嘅人,阿希絕少會見到佢喊。呢幾個月嚟,佢喺學校裏面受到嘅種種待遇,已經開始令佢變到麻木哂,甚至乎對一切覺得厭倦。呢種無助同失望嘅感覺蓋過哂之前佢對學校嘅任何留戀之情。

於是,喺返屋企嘅途中,佢終於開聲同阿媽講:「我都係轉啦,好唔好?妳唔好唔開心啦。」後來,佢阿媽話幫佢報名參加謝 Sir 嘅跆拳道班嗰陣,阿希雖然對跆拳道無特別興趣,但係都一口答應咗。「你放暑假流流長,好悶㗎嘛。學吓啲新嘢幾好吖。」佢阿媽同佢咁講。

時至今日,阿希依然無後悔當年做咗呢啲決定。其中一個原因係一直以嚟,佢都同阿媽相依為命。阿希最唔希望見到嘅,就係佢阿媽為咗佢而唔開心。所以咁多年嚟,佢都繼續上跆拳道班,同埋喺其他事上面都盡可能聽聽話話,唔去引起咁多紛爭。


跳至第



  快速回覆 - 輸入以下項目

本討論區現只接受會員張貼文章,本站會員請先登入。非會員人仕,您可以按此加入為新會員,費用全免,並可享用其他會員服務。


上次光臨時間: 26/4/2019 4:17
今天貼文總數: 390 | 累積文章數目: 6,492,132

聯絡我們 | 服務條款 | 私隱政策 | 廣告查詢 | 職位空缺
Copyright © 2019 HKGolden.com. All Rights Reserved.